Luk 9

Jäkni Yecu kɛ jaak da̱ŋ wäl rɛw

(Mɛ̈t 10:5-15, Mak 6:7-13)

1Cu Yecu jaakɛ da̱ŋ wäl rɛw cɔl, kä cuɛ kɛ ka̱m buɔ̱m kɛnɛ lua̱ŋ kɛ kui̱ yieyni ti jiäk diaal, kɛnɛ ɣöö bikɛ jua̱th jakä gɔw. 2Cuɛ kɛ jäkä raar kɛ ɣöö bikɛ ruac kɛ kui̱ kuäärä Kuɔth wä la̱t naath, kä bikɛ naath jak kä gɔw. 3Cuɛ kɛ jiök i̱, “/Cuarɛ ŋɔak naŋ kɛ kui̱ ja̱lun, thilɛ kɛɛt, kiɛ gök, kiɛ mi̱th, kiɛ yio̱w, kä /cuarɛ gɛ̈rɛ biey naŋ. 4Kä duelɔ bia wä thi̱n ɔ, ta̱yɛ thi̱n amäni jiɛɛndun. 5Kä gua̱a̱thɔ /ca yɛ bi nyuɔ̱ɔ̱r thi̱n agɔaa ɔ, tɛ̈ŋɛ tur ciöknikun ala neendiɛn, mi jiayɛ ɛn wi̱c ɛmɔ.” 6Cukɛ jiɛɛn, kä cukɛ wä rɛy ciëëŋni, la̱tkɛ naath thuk Kuɔth ti gɔw, kä jakɛ jua̱th kä gɔw gua̱thni diaal.

Yiec wec Ɣɛ-rod

(Mɛ̈t 14:1-12, Mak 6:14-29)

7Mëë ci kuäär ni Ɣɛ-rod ŋɔaani diaal tëë ca la̱t liŋ, cuɛ wi̱cdɛ yi̱c, kɛ ɣöö ci laar tha̱a̱ŋ nath ɛ ci Jɔ̱ɔ̱n rɔ jiɛc li̱th. 8Kä ɛ tha̱a̱ŋkiɛn ɛ ci E-li-yaa jɔɔc, kä laar kɔ̱kiɛn ɛ ca ram kɛl kä göök tëë wal jiɛc li̱th. 9Cu Ɣɛ-rod wee i̱, “Cä wi̱c Jɔ̱ɔ̱n ŋok, kä ɛŋa ɛn nɛ liɛŋä ŋɔaani ti̱ti̱ kɛ kui̱dɛ mɔ?” Kä cuɛ go̱r ɛn ɣöö bɛ jɛ nɛn.

Mi̱i̱th bathdɔɔri da̱ŋ dhieec

(Mɛ̈t 14:13-21, Mak 6:30-44, Jɔ̱ɔ̱n 6:1-14)

10Mëë ci jaak luny jɔk, cukɛ Yecu la̱t ŋɔaani tëë ci kɛn kɛ la̱t. Cuɛ kɛ naŋ kɛɛl kɛ rɔ, cukɛ jiɛɛn kɛn kärɔ̱ wäkɛ wi̱c mi cɔal i̱ Beth-the-da. 11Mëë ci buɔ̱n nɛɛni ti ŋuan jɛ ŋa̱c, cukɛ jɛ guɔ̱ɔ̱r. Kä cuɛ kɛ nyuɔ̱ɔ̱r, kä cuɛ kɛ la̱t ruac kuäärä Kuɔth, kä cuɛ nɛy tin tekɛ jua̱th jakä gɔw.

12Mëë ci thia̱k ni kony ca̱ŋ cu jaakɛ da̱ŋ wäl rɛw ben kä jɛ. Cukɛ jɛ jiök i̱, “Jakni buɔ̱n kä jiɛy, kɛ ɣöö bikɛ wä rɛy ciëëŋni kɛnɛ wi̱i̱ tin thia̱k, bikɛ rɔ̱ wä gör gua̱a̱th tɔ̱ɔ̱cä kɛnɛ mi̱eth, kɛ ɣöö gua̱a̱th ɛ ta̱nɛ thi̱nɛ ɛ dɔr.” 13Kä cuɛ kɛ jiök i̱, “Yɛn muɔcɛ kɛ kɛ mi bi kɛn ɛ cam.” Cukɛ jɛ jiök i̱, “Tin tekɛ kɔ kɛ jurayni da̱ŋ dhieec kɛnɛ rɛc da̱ŋ rɛw kärɔ̱, ɛ ni mi wa̱kɔ mi̱th kɔk kɛ kui̱ nɛɛni diaal ti̱ti̱.” 14Kä te wutni ti ce̱tkɛ bathdɔɔri dhieec ɛn wi̱ni. Cuɛ ji̱ kɔaarɛ jiök i̱, “Jakɛ kɛ kä nyuur bua̱a̱ni, a te buɔ̱nɔ kɛ nɛy ti jiɛn dhieec.” 15Cukɛ jɛ la̱t inɔ. Cukɛ kɛn diaal jakä nyuur. 16Kä cu Yecu jurayni da̱ŋ dhieec kɛnɛ rɛc da̱ŋ rɛw ka̱n, cuɛ nhial liɛc, cuɛ kɛ poth, kä cuɛ kɛ puɔ̱ny. Cuɛ kɛ ka̱m ji̱ kɔaarɛ kɛ ɣöö bikɛ kɛ dääk kä bua̱n. 17Cu kɛn diaal mi̱th a bikɛ ria̱ŋ. Kä cua tin ci duɔth kuany rɛy diënyni da̱ŋ wäl wi̱cdɛ rɛw.

Lät Pi-tɔr ŋäcdɛ kɛ Yecu

(Mɛ̈t 16:13-19, Mak 8:27-30)

18Kɛ cäŋ kɛl mëë pal Yecu Kuoth kärɔa, cu ji̱ kɔaarɛ ben kä jɛ, kä cuɛ kɛ thiec i̱, “Laar naath ɛ i̱ ɛ ɣän ŋa?” 19Cukɛ jɛ loc i̱, “Laar kɛn ɛ i̱ ɛ ji̱n Jɔ̱ɔ̱n in la lääk, kä ɛ tha̱a̱ŋkiɛn i̱ ɛ ji̱n E-li-yaa, kä ɛ kɔ̱kiɛn i̱ ɛ ji̱n ram kɛl kä göök tëë wal mi ci rɔ jiɛc li̱th.” 20Kä cuɛ kɛ jiök i̱, “Kä laar yɛn ɛ i̱ ɛ ɣän ŋa?” Cu Pi-tɔr ɛ loc i̱, “Ɛ ji̱n Mɛ-thia Kuɔth.”

21Kä cuɛ kɛ la̱t ruac, cuɛ kɛ guɔk ɛn ɣöö /cikɛ mɛmɛ bi la̱t radɔ̱diɛn. 22Cuɛ wee i̱, “Bi Gat Ran ti bɛ̈c bɛ̈ɛ̈c rut, kä ba jɛ lo̱k ɛ di̱t kɛnɛ bööth palä, kɛ ji̱ gɔ̱rä, kä ba jɛ näk, kä ba jɛ jiɛc li̱th kɛ diɔ̱ɔ̱k ni̱ni.”

23Kä cu Yecu kɛn diaal jiök i̱, “Mi go̱o̱r raan ɣöö bɛ ɣä guɔ̱ɔ̱r, a jɛ jay rɔɔdɛ, kä a jɛ kap jiathdɛ ni ciaŋ, kä a jɛ guur ɣä. 24Kɛ ɣöö ramɔ wä tëkdɛ yop ɔ, bɛ jɛ bath. Kä ramɔ wä tëkdɛ thöp ɔ kɛ kui̱dä, bɛ jɛ kän. 25Ɛŋu mi dee raan ɛ jek mi cɛ ɣɔw kɛɛliw jek kä bath kɛn diaal tëkdiɛn? 26Kɛ kui̱ ɛmɔ, mi wä raan wä pöc kɛ ɣä kɛnɛ rieetkä, amäni Gat Ran bä bɛ pöc kɛ jɛ, mi wëë wä ben kɛ gɔɔy puɔnyädɛ kɛnɛ gɔɔy puɔnyä Gua̱n kɛ gɔɔy ja̱a̱kni nhial tin rɛ̈l kɛ rɔ̱. 27Kä ɣän la̱rä jɛ yɛ kɛ thuɔ̱k, tëëkɛ tha̱a̱ŋ nath tia̱ cuŋä wanɛ mɛ ti /ca lia̱a̱ bi nɛn a /ka̱n kuäär Kuɔth ni nɛn.”

Luɔ̱c pua̱ny Yecu kɛ rɔ

(Mɛ̈t 17:1-8, Mak 9:2-8)

28Mëë ci ni̱n da̱ŋ bädäk thuuk, kɛ kɔr kä mëë ci Yecu ruaacni ti̱ti̱ lat, cuɛ Pi-tɔr kɛnɛ Jɔ̱ɔ̱n kɛ Je-mɛth naŋ kɛ jɛ kɛɛl, cuɛ wä wi̱i̱ pa̱a̱m mi bäär, wëë pal. 29Kä min palɛ, cu ta̱a̱ nhiamdɛ rɔ ri̱t, kä cu bieynikɛ buay ɛ pak. 30Kä cukɛ wutni da̱ŋ rɛw Muthɛ kɛnɛ E-li-yaa nɛn, kä cukɛ ruac kɛ Yecu. 31Cukɛ jɔɔc rɛy puɔnyä, kä cukɛ ruac kɛ kui̱ jiɛɛnä Yecu min bi wä thuɔ̱k kä Jɛ-ru-tha-lɛm. 32Täämɛ, cu Pi-tɔr kɛnɛ nɛy tin tekɛ jɛ kɛɛl dɔ̱ɔ̱l. Kä min cikɛ keer, cukɛ gɔɔy puɔnyädɛ nɛn kɛnɛ wutni da̱ŋ rɛw tin cuŋ kɛ jɛ kɛɛl. 33Kä min jiɛy wutni tɔ̱tɔ̱ kä Yecu, cu Pi-tɔr Yecu jiök i̱, “Kuäärä, gɔaaɛ ɛn ɣöö ta̱kɔ ɛn wanɛ. A kɔ la̱tkɔ bi̱lɛni da̱ŋ diɔ̱k, kɛl kɛ kui̱du, kɛ kɛl kɛ kui̱ Muthɛ, kɛ kɛl kɛ kui̱ E-li-yaa,” a kui̱cɛ min latdɛ. 34Kä min latdɛ nɛmɛ cu pua̱r ben, cuɛ kɛ kuɔ̱m piny, kä cukɛ dual ɛlɔ̱ŋ mëë kum pua̱r kɛ piny. 35Kä cu jɔw ben raar rɛy puɔ̱rä wëë i̱,#9:35 Diit 2:7, Ica 42:1, Ŋuɔ̱t 18:15. “Mɛmɛ ɛ jɛn Gatdä, min cä mɛk, liɛŋɛ ruacdɛ!” 36Kä min ci jɔw thuɔ̱k kɛ ruac, cua Yecu jek kärɔa. Cukɛ biɛt, kä cuɛ thil ram mi cu kɛn ɛ la̱r min ci kɛn ɛ nɛn ɛn ni̱ni tɔ̱tɔ̱.

Jak Yecu kɛ dho̱o̱l mi tekɛ yiëë mi jiääk kä gɔaa

(Mɛ̈t 17:14-18, Mak 9:14-27)

37Mëë ruɔ̱ndɛ mëë cikɛ luny piny wi̱i̱ pa̱a̱m, cu buɔ̱n nath mi di̱i̱t röm kɛ jɛ. 38Kä ni ɛn wanɔ, cu ram kɛl yɔal rɛy bunä wëë i̱, “Ŋi̱i̱c, ɣän la̱ŋä ni ji̱, bër guic gatdä, ɛ jɛn gatdä ni kärɔa. 39Ci yiëë mi jiääk ɛ käp, kä cuɛ jɛ yuɔr rɛy kɔ̱kä. Kä la thokdɛ cua̱ tekɛ guɔ̱p, kä duäcɛ jɛ piny, kä bumɛ ɛn ɣöö bɛ jɛ mal päl. 40Kä cua̱ ji̱ kɔaaru läŋ ɛn ɣöö bikɛ jɛ woc, kä /ken kɛn ɛ luäŋ.” 41Cu Yecu wee i̱, “Yɛn ri̱c mi thil ŋa̱th, mi thil luth, bä te kɛɛl kɛ yɛ, kɛ gua̱a̱th mi ni̱n di, kä yɛ rut kɛ pek mi ni̱n di? No̱o̱ŋni gatdu wanɛ mɛ.” 42Min bëë, cu yiëë mi jiääk ɛ dua̱c piny, kä cuɛ rɔ daŋ. Kä cu Yecu yiëë in jiääk luek. Kä cuɛ dho̱o̱l jakä gɔaa, kä cuɛ jɛ luɔ̱c gua̱n. 43Kä cu nɛy diaal ga̱a̱c kɛ gɔɔy wutdä Kuɔth.

Nyɔk Yecu kɛ lat li̱ethdɛ

Kä min ga̱a̱c nɛy diaal kɛ ŋɔaani diaal tëë cɛ la̱t, cuɛ ji̱ kɔaarɛ jiök i̱, 44“A rieet ti̱ti̱ coth ji̱thnikun. Ba Gat Ran kɔak tetni nath.” 45Kä /ken ruac ɛmɔ cop lo̱cnikiɛn, ca luɔtdɛ tey kä kɛ, kɛ ɣöö /ca jɛ bi ŋa̱c ɛ kɛn. Kä cukɛ dual kɛ ɣöö ba jɛ thiec kɛ kui̱ ruac ɛmɛ.

Di̱t ni ŋa ɛlɔ̱ŋ?

(Mɛ̈t 18:1-5, Mak 9:33-37)

46Cu ŋaknɔm tuɔɔk kam jaakni i̱, ɛŋa kä kɛ ɛnɔ di̱tɔ. 47Mëë ci Yecu ca̱r lo̱cnikiɛn ŋa̱c, cuɛ gat mi tɔt nööŋ gekädɛ. 48Kä cuɛ kɛ jiök i̱, “Ram mi nyuur gatdä mi tɔt mi ce̱tkɛ nɛ kɛ ciötdä, nyuurɛ ni ɣä. Kä ram ɔ ci ɣä nyuɔ̱ɔ̱rɔ, nyuurɛ ni ram ëë jäk ɣä. Kɛ ɣöö ram mi kuiy ni jɛn rɛydun diaal ɛ jɛn ram in di̱i̱t.”

Ram mi /ci gua̱c kɛ yɛ ɛ raandun

(Mak 9:38-40)

49Cu Jɔ̱ɔ̱n ɛ loc i̱, “Ŋi̱i̱c, cakɔ raan nɛn mi wooc yiey ti jiäk kɛ ciötdu, kä cua kɔ jɛ pën, kɛ ɣöö /cɛ guur ni kɔn.” 50Kä cu Yecu jɛ jiök i̱, “/Cuarɛ jɛ pen, kɛ ɣöö ram mi /ci gua̱c kɛ yɛ, ɛ raandun.”

Lo̱k wec Tha-mɛ-ria kɛ Yecu

51Mëë ci ni̱n thia̱k kɛ ɣöö ba Yecu naŋ nhial, cuɛ wi̱cdɛ luɔc kä Jɛ-ru-tha-lɛm. 52Kä cuɛ ja̱a̱k jäkä nhiam. Kä cukɛ wä rɛy ciëŋ Tha-mɛ-ria, kɛ ɣöö ba gua̱a̱th wä rialikä kɛ kui̱dɛ. 53Kä duundɛ ɣöö /ken naath ɛ nyuɔ̱ɔ̱r, kɛ ɣöö cɛ wi̱cdɛ luɔc kä Jɛ-ru-tha-lɛm. 54Kä mëë ci Je-mɛth kɛnɛ Jɔ̱ɔ̱n tin la ji̱ kɔaarɛ jɛ nɛn, cukɛ wee i̱,#9:54 2 Kua̱r 1:10. “Kuäär ni Kuoth, go̱o̱ri ɣöö bakɔ mac ciöl piny nhial kɛ ɣöö bɛ kɛ waŋ?” 55Cuɛ rɔ ri̱t, kä cuɛ kɛ luek. 56Kä cukɛ räth rɛy ciëŋ dɔ̱diɛn.

Nɛy ti guɔ̱ɔ̱rkɛ Yecu

(Mɛ̈t 8:19-22)

57Min jälkɛ dup, cu wut kɛl Yecu jiök i̱, “Ɣän bä ji̱ guɔ̱ɔ̱r gua̱thni diaal tɔ̱ wi̱i̱ thi̱n tɔ̱.” 58Cu Yecu jɛ jiök i̱, “Wa̱a̱ni tekɛ kɛ ɣo̱t, kä te diit nhial kɛ duël, kä Gat Ran thilɛ gua̱a̱th mi läthɛ wi̱cdɛ thi̱n.” 59Kä cuɛ radɔ̱diɛn jiök i̱, “Guuri ɣä.” Kä cuɛ wee i̱, “Kuäär ni Kuoth, kɛ nhiam päl ɣä ɣöö bä gua̱a̱r wä kony.” 60Kä cu Yecu jɛ jiök i̱, “Päli nɛy ti ci li̱w kuɔ̱ny nɛɛnikiɛn ti ci li̱w. Kä kɛ kui̱du, wër lätni naath ciaŋ kuäärä Kuɔth.” 61Kä cu radɔ̱diɛn ɛ wee i̱, “Kuäär ni Kuoth, ɣän bä ji̱ guɔ̱ɔ̱r, kä kɛ nhiam päli ɣä ɣöö bä nɛy tin te dhɔrä wä ba̱ny mal.” 62Kä cu Yecu jɛ jiök i̱, “Thilɛ ram mi ci puur ka̱n kä liɛcɛ jɔkdɛ, mi bi ro̱ŋ kɛ kuäär Kuɔth.”

Currently Selected:

Luk 9: nusNHB

Highlight

Copy

Compare