Luk 2
2
Da̱p Yecu
(Mɛ̈t 1:18-25)
1Kɛn ni̱ni tɔ̱tɔ̱ cu ruac wä raar kä Thii-thɛr Ɔ-gäth-täth, i̱ ba ciööt nath diaal gɔ̱r wi̱i̱ muɔ̱ɔ̱n kɛɛliw. 2Ɛ jɛn jio̱l gɔ̱rä ciöötni, mëë Ku-ri-niäth a rueec kä Thi-ri-ya. 3Kä cu nɛy diaal wä dho̱rikiɛn, kɛ ɣöö ba ciöötkiɛn wä gɔ̱r. 4Kä cu Jo-thɛp jiɛɛn kä Na-dha-rɛth, ro̱o̱l Gɛ̈-lɛ-li. Cuɛ wä rɛy ciëŋ Dee-bid mi cɔal i̱ Beth-lɛ-ɣɛm mi te kä Ju-dia, kɛ ɣöö ɛ raan thuɔk duëël Dee-bid. 5Cuɛ wä kɛ ɣöö ba ciötdɛ wä gɔ̱r kɛɛl kɛnɛ Mɛri, mi cɛ la̱r kuën, kä ruetdɛ. 6Mëë tekɛ ɛn wi̱ni, cu gua̱a̱th dapädɛ cop. 7Cuɛ dap kɛ kɛ̱̈ɛ̱̈dɛ mi dho̱o̱l. Kä cuɛ jɛ kuäth kɛ bi̱i̱ gatdä mi pay dap, kä cuɛ jɛ tɔa̱a̱c rɛy diëny mi jek ɣɔ̱k wal thi̱n, kɛ ɣöö thilɛ kɛ gua̱a̱th mi ca jek dueel ja̱a̱li.
Yiëën deet kɛnɛ ja̱a̱k
8Rɛy rööl ɛmɔ tëëkɛ tha̱a̱ŋ yiëën deet ti yiënkɛ detkiɛn rɛy dɔaar kɛ wäär. 9Kä cu jääk Kua̱r ni Kuɔth jɔɔc nhiamdiɛn, kä cu buay Kua̱r ni Kuoth kɛ mɛr, kä cukɛ dual ɛlɔ̱ŋ. 10Kä duundɛ ɣöö cu jääk nhial kɛ jiök i̱, “/Cuarɛ dual. Kä nɛ̈nɛ jɛ, ɣän nöŋä ni yɛ thuk ti gɔw ti la nyin tɛthkä lɔaac kɛ kui̱ nɛɛni diaal. 11Kɛ ɣöö ɛn walɛ rɛy ciëŋ Dee-bid ca yɛ da̱p Kään in la Mɛ-thia, Kuäär ni Kuoth. 12Kä bi mɛmɛ nyuuth kä yɛ. Bia gat jek ca kuäth kɛ bi̱i̱ gatdä mi pay dap, kä ca jɛ tɔa̱a̱c rɛy diëny mi jek ɣɔ̱k wal thi̱n.” 13Kä ni ɛn guäth ɛmɔ cu buɔ̱n ji̱ nhial mi di̱i̱t kɛ pärikä kɛ jääk nhial kɛɛl, liakɛ Kuoth wäkɛ i̱,
14“A liak wä kä Kuoth ni nhial,
kä a mal tekɛ ji̱ piɛny
tin tɛ̈thkɛ lɔc Kuɔth!”
15Mëë ci ja̱a̱k nhial jiɛɛn kä kɛ, lockɛ nhial, cu yiëën deet ruac kärɔ̱ i̱, “Kuanɛ wä ɛn täämɛ kä Beth-lɛ-ɣɛm, banɛ min ci tuɔɔk wä nɛn, min ci Kuäär ni Kuoth ɛ la̱r kɔn ɛ.” 16Cukɛ wä kɛ pɛ̈th, kä cukɛ Mɛri kɛnɛ Jo-thɛp jek, kä te gat tɔ̱ɔ̱cä rɛy diëny mi jek ɣɔ̱k wal thi̱n. 17Mëë cikɛ jɛ nɛn, cukɛ ruac ëë ca la̱rkɛ kɛ kui̱ gatdä nɔmɔ la̱t naath. 18Kä cu nɛy diaal tëë ca jɛ liŋ ga̱a̱c kɛ tin ca la̱tkɛ ɛ yiëën deet. 19Kä cu Mɛri rieet ti̱ti̱ diaal käp, kä cuɛ kɛ la̱th lɔɔcdɛ. 20Kä cu yiëën deet loc jɔk puanykɛ Kuoth, kä liakɛ jɛ kɛ kui̱ ŋɔaani diaal tëë ci kɛn kɛ liŋ kä ca nɛn, ce̱tkɛ min ca la̱r kɛ.
Ca̱k cio̱tdä Yecu
21Mëë ci ni̱n da̱ŋ bädäk thuuk, cua gua̱a̱th cuelä gatdä. Kä cua ciötdɛ cɔl i̱ Yecu. Ɛ jɛn ciöt ëë ca ka̱m jɛ ɛ jääk nhial ni mëë /ka̱n jɛ ni ruet ɛ man.
Naŋ Yecu luaak Kuɔth
22Kä mëë ci gua̱a̱th leyädiɛn cop ce̱tnikɛ ciaŋ ŋuɔ̱tni Muthɛ. Cukɛ gat naŋ kä Jɛ-ru-tha-lɛm, naŋkɛ jɛ nhiam Kua̱r ni Kuoth. 23(Kä ce̱tkɛ mi ca gɔ̱r rɛy ŋuɔ̱tni Kua̱r ni Kuɔth i̱#2:23 Ɣöth 13:2., “Key diaal ti tut bakɛ lëy Kuäär ni Kuoth ala ti lɛ̈y lɛ̈ɛ̈y”). 24Kä cukɛ muc thöp kuäär ni Kuoth ce̱tkɛ min ca lar rɛy ŋuɔ̱tni Kua̱r ni Kuoth i̱#2:24 Liib 12:8., “Thöpɛ guɔ̱kni da̱ŋ rɛw kiɛ dɛy kunööri rɛw.”
25Täämɛ, tëëkɛ wut kɛl kä Jɛ-ru-tha-lɛm mi cɔal ciötdɛ i̱ Cim-on. Ɛ wut mi gua̱n cuŋni mi ŋääth Kuoth, kä liipɛ ni ka̱n ji̱ I-thɛ-rɛl. Kä te Yiëë in Gɔaa in Rɛl Rɔ kɛ jɛ kɛɛl. 26Kä ca nyuɔ̱th jɛ ɛ Yiëë in Gɔaa in Rɛl Rɔ, ɛn ɣöö /cɛ bi li̱w mi /kenɛ Kuäär ni Kuoth ni Mɛ-thia nɛn. 27Cu Yiëë Kuɔth Thi-mɛ-ɔn naŋ luaak Kuɔth. Mëë ci diëëth gat ni Yecu nööŋ rɛy luaak Kuɔth, kɛ ɣöö ba jɛ ben lät kä ŋɔaani ce̱tkɛ ciaŋ ŋuɔ̱tni, 28cu Thi-mɛ-ɔn gat käp kɛ tetkɛ, kä cuɛ Kuoth liak, wëë i̱,
29“Täämɛ, Kuäär ni Kuoth,
ku ɣän ja̱ŋdu jakä wä,
a ɣä li̱ewä kɛ mal,
ce̱tkɛ ruacdu.
30Kɛ ɣöö ci wäŋkä ka̱ndu nɛn,
31min ci rialikä
nhiam dööri diaal.
32Ɛ buay kɛ kui̱ nyuuthä kä Jur,
kä ɛ gɔɔy puɔnyä kä nɛɛku,
ni ji̱ I-thɛ-rɛl.”
33Kä cu gua̱n kɛnɛ man ga̱a̱c kɛ tëë ca lat kɛ kui̱dɛ. 34Kä cu Cim-on kɛ poth, kä cuɛ man gatdä ni Mɛri jiök i̱, “Ca gat ɛmɛ di̱eth, kɛ ɣöö bɛ nɛy ti ŋuan däk kä bɛ nɛy ti ŋuan kän kä ji̱ I-thɛ-rɛl, kä bɛ la nyuuth mi bi nɛy ti ŋuan ɛ lo̱k. 35Kɛ ɣöö bi ca̱r lo̱cni nɛɛni ti ŋuan jɔɔc, kä bi jiath lɔaac lɔcdu rɛt ce̱tnikɛ thɛp.”
36Täämɛ tëëkɛ ciek mi gök mi cɔal i̱ Anna, mi la nya Pan-wel thok duëël Ɛ̈-cɛr. Kä jɛn cɛ dɔŋ ɛlɔ̱ŋ. Kä ca jɛ kɔŋ kuɛn ala ciek kɛ run da̱ŋ bärɔw. 37Kä cuɛ a ciek jɔkä kɛ run ti jiɛn da̱ŋ bädäk wi̱cdɛ ŋuan. /Kenɛ lɛ wä raar luaak Kuɔth, kä duundɛ ɣöö palɛ ni Kuoth kä thɛɛk mi̱th, kä palɛ kɛ wäär kɛnɛ cäŋ. 38Kä cuɛ ben ɛn guäth ɛmɔ pa̱ny, cuɛ Kuoth la̱r tɛth lɔaac, kä cuɛ ruac kɛ kui̱ gatdä lätdɛ jɛ nɛy diaal tëë liɛpkɛ Kuoth kɛ ɣöö bɛ Jɛ-ru-tha-lɛm kän.
Loc Yecu kä Na-dha-rɛth
39Mëë cikɛ ti diaal thuk kɛ lätni ce̱tkɛ ŋuɔ̱t Kua̱r ni Kuoth, cukɛ loc kä Gɛ̈-lɛ-li dhɔriɛn kä Na-dha-rɛth. 40Cu gat piith, kä cuɛ buɔ̱m, cuɛ thia̱a̱ŋ kɛ pɛl, kä te puɔ̱th Kuɔth kɛ jɛ.
Wä Yecu luaak Kuɔth
41La diëëthkɛ a wä kä Jɛ-ru-tha-lɛm runi diaal kɛ ti̱em Ca̱ŋ Bälä. 42Kä mëë ci runkɛ a wäl wi̱cdɛ rɛw, cukɛ wä kä Jɛ-ru-tha-lɛm ce̱tkɛ min la wäkɛ ti̱mä ni wen. 43Mëë ci pek ni̱ni ti̱mä thuuk cukɛ loc jɔk, kä cu dho̱o̱l ni Yecu duɔth kä Jɛ-ru-tha-lɛm, kä duundɛ ɣöö kui̱c diëëthkɛ jɛ. 44Kä ɛ kɛn i̱ dɔ̱ŋ tëë kɛɛl kɛ ja̱a̱l tin kɔ̱kiɛn, cukɛ wä kɛ ja̱l ca̱ŋ kɛl. Kä cukɛ jɛ tok kɛ mi görkɛ jɛ rɛy watnikiɛn kɛnɛ mäthnikiɛn. 45Kä mëë /ken kɛn ɛ jek, cukɛ loc Jɛ-ru-tha-lɛm, cukɛ jɛ wä go̱r. 46Kɛ kɔr ni̱ni da̱ŋ diɔ̱k cukɛ jɛ jek rɛy luaak Kuɔth, tëë nyuurä rɛy ŋi̱eecni liŋɛ ruacdiɛn, kä thiecɛ kɛ. 47Cu nɛy diaal tëë liɛŋkɛ ruacdɛ ga̱a̱c kɛ ŋäcdɛ kɛ ŋɔaani kɛnɛ luɔcdɛ kɛ kɛ. 48Mëë ci diëëthkɛ jɛ nɛn, cukɛ ga̱a̱c ɛlɔ̱ŋ. Kä cu man ɛ jiök i̱, “Gatdä, ɛŋu ci kɔ ciɛŋ inɛ mɔ? Guic ɛ, ɣän kɔnɛ guur cakɔ ji̱ go̱r kɛ diɛɛr lɔaac mi di̱i̱t.” 49Kä cuɛ kɛ jiök i̱, “Kä ɛŋu go̱o̱r yɛn ɣä mɔ? /Ka̱nɛ jɛ ŋa̱c ɛn ɣöö bi ɣän dhil tey rɛy luaak Gua̱a̱r?” 50Kä duundɛ ɣöö /ken ruacdɛ cop lɔɔcdiɛn. 51Cuɛ loc kä Na-dha-rɛth kɛ kɛ kɛɛl, kä cuɛ kɛ luɔ̱th. Kä cu man ŋɔak diaal ti̱ti̱ käp kɛ lɔcdɛ.
52 # 2:52 1 Tham 2:26. Cu Yecu piith kɛ pɛl, kɛn pi̱eth pua̱ny, kä cu tɛ̈th lɔaac Kuɔth kɛnɛ naath kɛ jɛ rɔ rep.
Currently Selected:
Luk 2: nusNHB
Highlight
Copy
Compare
Share
Want to have your highlights saved across all your devices? Sign up or sign in
Nuer Bible © Bible Society in South Sudan 1998,2012.
