Liib 9

Tuk Ä-ron kɛ lätkɛ

1Ɛ Jɛn kɛ cäŋ kä bädäk kɛ kɔr kä mëë ci ni̱n lëyä thuɔ̱k, cu Muthɛ Ä-ron kɛnɛ gaatkɛ kɛ di̱t I-thɛ-rɛl cɔl. 2Kä cuɛ Ä-ron jiök i̱, “Käni ruath tha̱a̱k ala luur dui̱rä kɛnɛ ruath rɔɔmä ala luur in waŋ, kä akɛ thil diw kä thöp nikɛ Kuoth Nhial. 3Kä jio̱kni ji̱ I-thɛ-rɛl i̱, ‘Ka̱nɛ thäk dɛ̈ɛ̈l böwä ala luur dui̱rä, kɛ ruath tha̱a̱k kɛnɛ ruath rɔɔmä ti gur kɛli ti thil diw ala luuri ti bawaŋ. 4Kɛ thäk kɛnɛ rɔaam ti la muc nyuaakä ti bathöp Kuoth Nhial, kɛ kɛ muc bɛɛl mi ca lia̱a̱p kɛ liɛɛth, kɛ ɣöö ɛn wa̱lɛ bi Kuoth Nhial ben kä yɛ.’ ” 5Cukɛ ti diaal tëë ci Muthɛ kɛ la̱t kɛ nööŋ thok kɛmɛkä ro̱mä kɛ Kuoth Nhial, kä cu nɛy diaal rɔ duɔl ɛn wi̱ni palkɛ Kuoth Nhial. 6Kä cu Muthɛ wee, “Nɛmɛ ɛ jɛn min ci Kuoth ɛ la̱r yɛ i̱ bia la̱t, kɛ ɣöö dëë gɔɔydɛ cu ben kä yɛ.” 7Cu Muthɛ Ä-ron jiök i̱, “Bër yi̱kä bi luur dui̱rädu ben thöp kɛnɛ luuru min waŋ ben luɛl rɔ yɛnɛ naath, thöp ni luur nath in bi ben luɛl nikɛ, ce̱tkɛ min ci Kuoth Nhial ɛ lar.”

8Ɛn guäth ɔ cu Ä-ron ben yi̱kä kä cuɛ ruath tha̱a̱k näk ala muc dui̱rädɛ. 9Cu gaatkɛ jɛ nöŋ riɛm, kä cuɛ yiatdɛ cua̱th thi̱n, kä cuɛ jɛ ben bat tuɔ̱ŋni yi̱kä. Cuɛ duɔth riɛm cu wuɔ̱c thaar yi̱kä. 10Niɛn yi̱kä cuɛ thiɔl kɛnɛ rok kɛ go̱o̱k cua̱ny luurä dui̱rä cu waŋ ce̱tnikɛ mëë ci Kuoth Nhial ɛ la̱t Muthɛ. 11Cuɛ kölɛ kɛnɛ ri̱ŋdɛ waŋ jɔk wec.

12Kɛ kɔr kä mɔmɔ cuɛ luurɛ min waŋ näk, cu gaatkɛ jɛ nöŋ riɛmdɛ, kä cuɛ kiɛth yi̱kä kui̱ nikɛ da̱ŋ ŋuaan. 13Kä cu kɛ jɛ ka̱m ri̱ŋkɛ amäni wi̱cdɛ, kä cuɛ kɛ waŋ wi̱i̱ yi̱kä. 14Cuɛ jia̱cdɛ kɛnɛ kockɛ lak, kä cuɛ kɛ waŋ wi̱i̱ yi̱kä kɛ kɛ muc in waŋ.

15Ɛ jɛn cu Ä-ron luur tha̱k dɛ̈ɛ̈l böwä min mɔ luur dui̱rä kɛ kui̱ naath ku nööŋ, kä cuɛ jɛ näk, kä cuɛ jɛ la̱t nikɛ la̱t luurä dui̱rädɛ. 16Kä cuɛ luur in waŋkɛ nööŋ, kä cuɛ jɛ la̱t nikɛ duɔ̱pdɛ min la la̱tkɛ ni jɛ. 17Kä cuɛ muc bɛɛl lɛni nööŋ bä, kä cuɛ rɔ jiöm nup mi thiäŋ tëtdɛ kä cuɛ jɛ waŋ wi̱i̱ yi̱kä kɛ kɛ luuri tin la waŋkɛ ciɛŋä.

18Cuɛ ruath tha̱a̱k kɛnɛ ruath rɔmä näk ala luur nyuaakä nath. Kä cu gaatkɛ jɛ ka̱m riɛmdɛ, kä cuɛ jɛ kiɛth yi̱kä kui̱nikɛ diaal. 19Kä cuɛ thiɔl ruath tha̱a̱k kɛnɛ ruath rɔmä diaal koc, thiɔl jua̱a̱l kɛ paari jiɛcdiɛn kɛ rok amäni göökni cua̱ny. 20Cukɛ tɔ̱tɔ̱ diaal bat rɛy nyiëtni kath. Kä cu Ä-ron thiɔl waŋ wi̱i̱ yi̱kä. 21Kä cuɛ nyi̱et kath kɛnɛ ɣa̱a̱m cuëcnikiɛn ŋuëŋ Kuoth Nhial ala muc ŋueŋä ce̱tnikɛ mëë ci Muthɛ ɛ lar. 22Täämɛ mi ci Ä-ron ku thuɔ̱k kɛ thöp luuri, tin tɔ̱ luuri dui̱rä, luur mi waŋkɛ, kɛnɛ luur nyuaakä, cuɛ tetkɛ kap nhial kä cuɛ kɛ cu poth, kä cuɛ cu ben piny. 23Kä cu Muthɛ kɛnɛ Ä-ron coth rɛy kɛmɛkä ro̱mä kɛ Kuoth Nhial, kä mi lonykɛ raar cukɛ naath poth, kä cu ji̱ I-thɛ-rɛl diaal wuɔ̱t Kuɔth Nhial nɛn. 24Cu mac pɛ̈ɛ̈n kä Kuoth Nhial, kä cuɛ luur in waŋ pɛ̈t kɛnɛ thiööl tin te wi̱i̱ yi̱kä. Kä min wä naath nɔmɔ, guic, cukɛ köök kɛ tɛth lɔaac. Kä cukɛ rɔ yuɔr piny palkɛ.

Currently Selected:

Liib 9: nusNHB

Highlight

Copy

Compare