Liib 20
20
Duäc raam mi thil luth
1Cu Kuoth Nhial Muthɛ jiök i̱, 2“Jiök ni ji̱ I-thɛ-rɛl i̱, pëkdɛ raan I-thɛ-rɛl kiɛ nɛy tɔ̱ cieŋ rɛydiɛn tɔ, mi wee gaatkɛ wä ka̱m kuoth Mo-lɛk ba jɛ näk. Bi ji̱ dolä jɛ bo̱k. 3Kä bä wi̱cdä ciaŋ jɔ̱ɔ̱r kä jɛn ram ɛ mɔ, kä bä jɛ tuɔ̱k raar kä nɛɛkɛ. Kɛ ɣöö cɛ gatdɛ kɛl kä gaatkɛ ka̱m kuoth Mo-lɛk, cɛ luaakdä jak kä jiäk kä cɛ ciötdä ya̱r. 4Kä mi ci ji̱ dolä jɛ dhɔt ɛn ram ɛ mɔ min thöpɛ gatdɛ kɛl kä gaatkɛ kuoth Mo-lɛk kä /ken kɛn ɛ näk. 5Inɔ ɣän bä wi̱cdä luɔ̱c jɛ kɛnɛ ji̱ dhɔaarɛ, kä bäkɛ cu dääk raar rɛy nɛɛnikiɛn, amäni nɛy diaal tin guɔ̱r kɛ ji̱ kä wa guɔ̱r ni kuoth Mo-lɛk.
6“Kä ram mi wä gɛɛr kä ji̱ kolaaŋni, ɣän bä wi̱cdä luɔ̱c jɛn ram ɛmɔ, kä bä jɛ tuɔ̱k raar rɛy nɛɛnikɛ. 7Kɛ kui̱ ɛmɔ jakɛ rɔ kä gɔw, kɛ ɣöö ɛ ɣän Kuoth Nhial Kuothdu. 8Tit ruaacnikä kä yopkɛ. Ɛ ɣän Kuoth in jak ji̱ kä gɔaa. 9Kä ram mi jäny gua̱n kiɛ man ba jɛ näk. Bi riɛmdɛ te wi̱i̱dɛ.
10“Kä mi wä raan ciek gua̱n thiekädɛ wä dhɔm, kɛn dhööm da̱ŋ rɛw ba kɛ näk. 11Wut mi wä tɔ̱c kɛ ciek gua̱n, cɛ lɔc gua̱n jak kä jiäk. Ba kɛn da̱ŋ rɛw näk, kä bi riɛmdiɛn te wi̱i̱diɛn. 12Kä mi wee tɔ̱c kɛ ciek gatdɛ, ba kɛ näk kɛn da̱ŋ rɛw, cikɛ ruaal la̱t, bi riɛmdiɛn te wi̱i̱diɛn. 13Mi ɛ wut wä tɔ̱ɔ̱c kɛ wut mi dɔ̱diɛn ɔ, kɛn da̱ŋ rɛw ca kɔɔr la̱t, ba kɛ näk, bi riɛmdiɛn te wi̱i̱diɛn. 14Mi ci ran nyal mat kɛ kɛnɛ man, ɛ buar, ba kɛ waŋ kɛ mac, kɛn da̱ŋ diɔ̱k, kɛ ɣöö /cɛ bi lɛ te buar rɛydun. 15Kä mi wä wut tɔ̱c kɛ le̱y ba jɛ näk. Kä ba le̱y näk bä. 16Kä mi wä ciek rɔ ka̱m le̱y a bɛ jɛ ka̱n, bia ɛn ciek näk kɛnɛ le̱y. Bi riɛmdiɛn te wi̱i̱diɛn.
17“Mi ci wut nyiman ka̱n, ɛ nya gua̱n kiɛ nya man, ɛ duŋ pöcä, ba kɛ tuɔ̱k raar rɛy nɛɛnikiɛn. Kɛ ɣöö cɛ nyiman ka̱n, bɛ riɛkdɛ jek ɛ jɛn. 18Mi wä wut tɔ̱c kɛ ciek mi te buɔth cɛ buɔthdɛ ya̱r, kä /kenɛ jɛ tit, kɛn da̱ŋ rɛw ba kɛ tuɔ̱k raar rɛy nɛɛnikiɛn. 19Cu muɔlen lony juutdä kiɛ waydu, kɛ ɣöö kɛ ji̱ maarädu, bi riɛkdɛ jek yɛn. 20Mi wä wut tɔ̱c kɛ ciek närɛ, bɛ lɔc närɛ jak kä jiäk, ɛ dueriɛn, bikɛ li̱w a thil gaat. 21Mi ci wut ciek däman ka̱n, ɛ duer cɛ lɔc däman jak kä jiäk, cikɛ bi tekɛ gat.
22“Kɛ kui̱ ɛmɔ tiɛtdɛ ruaacnikä kɛnɛ ŋuɔ̱tkä, kä la̱tdɛ kɛ, kɛ ɣöö /ci mun in bä yɛ naŋ thi̱n yɛ bi lo̱k. 23Kä /cia bi guɔ̱r ni ciɛŋ nɛɛni tin cä tuɔ̱k raar nhiamdun, kɛ kui̱ kä ti jiäk tin ci kɛn kɛ lät kä ɣä, cä kɛ cu lo̱k. 24Ce̱tkɛ mëë cä la̱r yɛ i̱, ‘Bia mundiɛn ka̱n, bä ka̱m yɛ ɛn mun ɛmɔ mun tuar kɛnɛ cak.’ Ɛ ɣän Kuoth Nhial Kuothdu mëë käm ji̱ raar rɛy nath. 25Kɛ kui̱ ɛmɔ bi tekɛ däk kam le̱e̱ni tin gɔw kɛnɛ tin jiäk, kam diitni tin gɔw kɛnɛ tin jiäk. Cu puɔ̱nydu bi ya̱r kɛ le̱y kɛnɛ diit kɛ tin diaal tin do̱ny piny, tin cä lar i̱ dëë ji̱ jak kä jiäk. 26Bi yiɛn gɔaa kɛ ɣä, kɛ ɣöö ɛ ɣän Kuoth mi rɛl gɔɔydɛ rɔ, kä ci yɛ dääk raar rɛy nath, kɛ ɣöö bi yiɛn a nɛɛkä.
27“Kä wut ɔ kiɛ ciek ɔ bia̱ gua̱n kolaaŋni mɔ ba. Kɛ bök kɛ dööl amäni lia̱a̱, kä bi riɛmdiɛn te wi̱i̱diɛn.”
Currently Selected:
Liib 20: nusNHB
Highlight
Copy
Compare
Share
Want to have your highlights saved across all your devices? Sign up or sign in
Nuer Bible © Bible Society in South Sudan 1998,2012.
