Liib 17
17
Ya̱c mi̱eth riɛm
1Cu Kuoth Nhial Muthɛ jiök i̱, 2“Ruacni kɛ Ä-ron kɛnɛ gaatkɛ, kɛ ji̱ I-thɛ-rɛl diaal jiök nikɛ i̱, ‘Nɛmɛ ɛ jɛn min ci Kuoth ɛ lar i̱, 3raan I-thɛ-rɛl ɔ bi mucdɛ thöp rɛy wec kiɛ jɔk wec ɔ, yaŋ rɔaam kiɛ böw, 4a /kenɛ jɛ nööŋ thok kɛmɛkä ro̱mä kɛ Kuoth Nhial ala muc mi thöpɛ Kuoth Nhial nhiam luaak Kuɔth, ɛn raam ɔ cɛ duer kɛ wuth riɛm piny. Kä ba tuɔ̱k raar rɛy nɛɛnikɛ. 5Nikɛ ɣöö bi ji̱ I-thɛ-rɛl muckiɛn tin na̱kɛ rɛy ka̱a̱ni dɔɔr nöŋ Kuoth Nhial, bikɛ jɛ nöŋ bööth palä thok kɛmɛkä ro̱mä kɛ Kuoth Nhial, kä bɛ kɛ thöp ala muc malä. 6Kä bi bööth palä riɛm kiɛth yi̱kä Kuɔth Nhial min te thok kɛmɛkä ro̱mä kɛ Kuoth Nhial, kä bɛ thiɔl waŋ ala ŋuäny mi gɔaa kä Kuoth Nhial. 7Kɛ ɣöö ci ji̱ I-thɛ-rɛl bi lɛ ŋot kɛ mi thöpkɛ muc deetkiɛn kuth, tin palkɛn kɛ. Ɛn mɛmɛ ba jɛn ŋut mi do̱raar kä kɛ amäni ri̱c ɛ bi ben ɔ.’
8“Kä jiök nikɛ, pëkdɛ raan I-thɛ-rɛl kiɛ juɔ̱r ɛ cieŋ rɛydiɛn ɔ mɔ bi luurɛ min waŋkɛ kiɛ muc thöp ɔ, 9kä /kenɛ jɛ nööŋ thok kɛmɛkä ro̱mä kɛ Kuoth Nhial a bɛ jɛ ben thöp Kuoth Nhial, ɛn raam ɔ ba jɛ tuɔ̱k raar rɛy nɛɛnikɛ.
10“Kä mi wee tekɛ raan I-thɛ-rɛl kiɛ juɔ̱r mi wä riɛm cam, bä wi̱cdä luɔ̱c ɛn raam ɔ ci riɛm camɔ, kä bä jɛ tuɔ̱k raar kä nɛɛkɛ. 11Kɛ ɣöö te tëk ri̱ŋ rɛy riɛm. Cä ka̱m yɛ i̱ bia rɔ luɛl kɛ jɛ wi̱i̱ yi̱kä, ɛ jɛn riɛm luɛl yi̱ey tɔ. 12Kɛ Kui̱ ɛmɔ cä la̱r ji̱ I-thɛ-rɛl ɛn ɣöö thilɛ ram mi bi riɛm cam, amäni jur tin cieŋ rɛydiɛn thilɛ ram mi bi riɛm cam. 13Kä mi wä raan I-thɛ-rɛl, kiɛ ram mi juɔ̱r kä jur tɔ̱ cieŋ rɛydiɛn tɔ̱ le̱y kiɛ dit wä kak, kä tin dɔ̱ŋ dëë cam, a jɛ wuth riɛmdɛ piny kä bɛ jɛ mol kɛ tup.
14“Kɛ ɣöö tëk kä ti diaal te rɛy riɛmdɛ, kɛ ɣöö nɔ cä ji̱ I-thɛ-rɛl jiök i̱ /ca riɛm bi cam rɛy ri̱ŋ, kɛ ɣöö tëk ri̱ŋ ɛ riɛm, kä ram ɔ biɛ cam ɔ ba tuɔ̱k raar. 15Kä ɛn ram ɔ bi ri̱ŋ lɛ̱̈ɛ̱̈ mi ci li̱w kä rɔa kiɛ ca näk ɛ le̱y mi dɔ̱ŋ cam ɔ kä ji̱ I-thɛ-rɛl kiɛ kä jur, a jɛ lak bieynikɛ kä a jɛ puaak, bɛ jiääk mäni thiaŋ, kɛ kɔrɛ bɛ cu gɔaa. 16Mi wec tey a /cɛ bieynikɛ lak kä /cɛ puaak bɛ riɛkdɛ jëk ɛ jɛn.”
Currently Selected:
Liib 17: nusNHB
Highlight
Copy
Compare
Share
Want to have your highlights saved across all your devices? Sign up or sign in
Nuer Bible © Bible Society in South Sudan 1998,2012.
