Liib 15

Löny pua̱ny ti nööŋkɛ jiäk

1Cu Kuoth Nhial Muthɛ kɛnɛ Ä-ron jiök i̱, 2“Jiökɛ ji̱ I-thɛ-rɛl i̱, mi wä raan puɔ̱nydɛ wä löny kɛn lony ɛmɔ, jiäkɛ. 3Mi lönyɛ kiɛ cɛ cuɔ̱ŋ cɛ puɔ̱nydɛ jak kä jiäk. 4Kä dhaŋ ɔ bɛ tɔ̱ɔ̱c thi̱n ɔ cɛ jiäk kä mi cɛ nyuur thinɔ bɛ jiääk. 5Kä ɛn ram ɔ bi dhaŋdɛ nyɔt ɔ a jɛ lak bieyni kɛ, kä bɛ puaak, kɛ ɣöö bɛ jiääk mäni thiaŋ. 6Kä ɛn ram ɔ bi nyuur guäth in cɛ nyuur thi̱n ɔ, a jɛ lak bieynikɛ kä a jɛ puaak, bɛ jiääk mäni thiaŋ. 7Kä ram ɔ bi puɔ̱nydɛ thiap ɔ, a jɛ lak bieynikɛ kä bɛ puaak, bɛ jiääk mäni thiaŋ. 8Kä mi wee raan wä ŋuɔ̱l ruɛy, a jɛ lak bieynikɛ ɛn raam ɔ kä bɛ puaak, bɛ jiääk mäni thiaŋ. 9Kä mɔ cɛ cɛ jiääk. 10Kä ɛn ram ɔ bi duɔ̱ɔ̱r thiap ɔ kä tin ci gua̱n lonyä nyuur thi̱n tɔ, bɛ jiääk mäni thiaŋ. Kä ram ɔ bi tɔ̱tɔ̱ kap nhial ɔ, a jɛ lak bieynikɛ, kä a jɛ puaak bɛ jiääk mäni thiaŋ. 11Kä ram ɔ bi gua̱n lonyä jɛ nyɔt ɔ kä cɛ tetkɛ bi lak, a jɛ lak bieynikɛ kä bɛ puaak, bɛ jiääk mäni thiaŋ. 12Kä dhaar ɛ bɛ nyɔt ɔ, a jɛ tiath kɛ, kä tin la̱tkɛ kɛ jiɛɛn ba kɛ lak kɛ pi̱.

13“Kä kɛ kɔr kä min ci lönydɛ gɔaa ɛn gua̱n lönyä, a jɛ li̱p kɛ ni̱n bärɔw kɛ kui̱ la̱kdɛ, kä bɛ bieynikɛ cu lak, kä bɛ puaak pi̱i̱ni ti te lony, bɛ cu gɔaa. 14Kɛ bädäk ni̱ni bɛ rɔ moc kɛ guɔ̱kni rɛw kiɛ kunnööri rɛw, kä bɛ ben nhiam Kuɔth Nhial thok kɛmɛkä ro̱mä kɛ Kuoth Nhial, kä bɛ kɛ ka̱m bööth palä, 15bi bööth palä kɛ thöp ala muc, kɛl ba luur dui̱rä bi min dɔ̱ŋ a luur mi waŋkɛ, bɛ raam ɔ cu luɛl nhiam Kuɔth Nhial kɛ kui̱ lönyädɛ.

16“Mi wä wut la̱k wä läkikä, a jɛ lak puɔ̱nydɛ ni kɛɛliw, kä bɛ jiääk mäni thiaŋ. 17Kä ɛn bi̱i̱ ɛ ci ti̱i̱y pɛn thi̱n ɔ kiɛ köl, a jɛ lakkɛ, bɛ jiääk mäni thiaŋ. 18Kä mi ci wut tɔ̱ɔ̱c kɛ ciek, akɛ puakɛ rɔ, kä bikɛ jiääk mäni thiaŋ.

19“Kä mi thek ciek ce̱tkɛ ta̱a̱dɛ min wen, bɛ tekɛ jɛ kɛ ni̱n bärɔw. Kä ram mi wä jɛ nyɔt bɛ jiääk mäni thiaŋ. 20Kä tin diaal tin cɛ tɔ̱ɔ̱c thi̱n guäth in thekɛ cɛ jiääk. Kä tin cɛ nyuur thi̱n bä cikɛ jiääk. 21Kä ɛn ram ɔ bi kölɛ nyɔt ɔ a jɛ lak bieynikɛ kä bɛ puaak bɛ jiääk amäni thiaŋ. 22Ɛn ram ɔ bi duɔ̱ɔ̱r mi cɛ nyuur thi̱n thiap ɔ, a jɛ lak bieynikɛ kä a jɛ puaak, bɛ jiääk amäni thiaŋ. 23Mi ɛ köl kiɛ ŋu cɛ nyuur thi̱n ɔ, mi wi̱i̱ jɛ wä nyɔt bi jiääk amäni thiaŋ. 24Kä mi te wut mi ci tɔ̱ɔ̱c kɛ jɛ guäth in thekɛ, bɛ jiääk kɛ ni̱n bärɔw, kä kölɔ cɛ tɔ̱ɔ̱c thi̱n ɔ cɛ jiääk.

25“Kä mi wä ciek wä thɛɛk kɛ pëk mi bäär a /cɛ ni̱nkɛ bäl tin la thek kɛ jɛ, kɛn ni̱n thek tɔ̱ diaal ɛ tɔ̱ bɛ kɛ thuk bäkɛ jiääk ce̱tnikɛ mëë thekɛ, bɛ jiääk. 26Kä ɛn köl ɛ cɛ tɔ̱ɔ̱c thi̱n ɔ kɛ ni̱n thekädɛ, ba köl kɛ kui̱ thëkdɛ, kä mɔ cɛ nyuur thi̱n ɔ, bɛ jiääk ce̱tnikɛ thëkdɛ. 27Kä ram ɔ bi ti̱ti̱ nyɔt ɔ bɛ jiääk, a jɛ lak bieynikɛ kä a jɛ puaak bɛ jiääk amäni thiaŋ. 28Kä mi ci thek thuɔ̱k, a jɛ kuɛn ni̱n bärɔw kɛ kɔriɛn bɛ cu gɔaa. 29Kɛ bädäk ni̱ni bɛ rɔ moc guɔ̱kni rɛw kiɛ kunnööri rɛw kä bɛ kɛ ben ka̱m bööth palä thok kɛmɛkä ro̱mä kɛ Kuoth Nhial. 30Bi bööth palä kɛl thöp ala luur dui̱rä kä bi min dɔ̱ŋ a luur mi waŋkɛ, bɛ ciek ɛmɔ cu luɛl nhiam Kuɔth Nhial kɛ kui̱ thëkdɛ.

31“Bia gaat I-thɛ-rɛl nɔ̱an kɛ tin la kɛ a jak kä jiääk, kɛ ɣöö /cikɛ bi li̱w kɛ jiääkdiɛn, kɛ yäridiɛn kɛ kɛmɛkä ro̱mädä min te rɛydiɛn.” 32Ti̱ti̱ kɛ ŋuɔ̱t kɛ kui̱ wutdä mi löny kiɛ ram ɔ bi jiääk kɛ tieey ɔ läkä, 33kɛ kui̱ ciek ni̱ni thekädɛ, kɛ kui̱ wutdä kɛnɛ ti löny, amäni wut mi tɔ̱ɔ̱c kɛ ciek mi thek.

Currently Selected:

Liib 15: nusNHB

Highlight

Copy

Compare