Liib 13
13
Ŋuɔ̱t kɛ kui̱ jɔak gupä
1Cu Kuoth Nhial muthɛ kɛnɛ Ä-ron jiök i̱, 2“Mi wee tekɛ ram mi te puɔ̱nydɛ kɛ kuat kiɛ kuuk kiɛ nyuɔɔny kiɛ dhɔp, bajɛ nöŋ Ä-ron bööth palä kiɛ ram kɛl kä gaatkɛ min mɔ bööth palä. 3Mi wä bööth palä jɛ wä guic ɛn jɔk ɛmɔ cɛ mi̱em jak kä buɔy kä cɛ coth gupädɛ a cɛ ŋa̱c i̱ ɛ dhɔp#13:3 Dhɔp kɛ thok Ɣi-bɛ-ru lotdɛ ni ɣöö jɔak gupä. /Cɛ lot ni dhɔp kä rɔa., niɛn nɔ cɛ ŋa̱c ɔ bɛ jiääk raam ɔ cu lat. 4Kä mi /kän biɛl mi bör jɔɔc gupä ala min /kän coth thi̱n kä /kenɛ mi̱em in te thi̱n jak kä buɔy, bi bööth palä gua̱n jua̱th bat gua̱a̱thdɛ kä rɔa kɛ ni̱n bärɔw. 5Kä kɛ kɔr ni̱ni da̱ŋ bärɔw bi bööth palä jɛ nyɔk kɛ guec mi ŋotdɛ cɛ jɔɔc waaŋdɛ kä /kenɛ däk puɔ̱nydɛ bɛ jɛ nyɔk kɛ mi mocɛ jɛ kɛ ni̱n bärɔw kɔ̱kiɛn gua̱a̱thdɛ kä rɔa. 6Kɛ thuɔ̱k ni̱ni da̱ŋ bärɔw bɛ jɛ nyɔk kɛ mi guicɛ jɛ mi wee jɛ wä nɛn i̱ ci biɛlɛ a ca̱r, kä /kenɛ jɛ da̱k puɔ̱nydɛ, bɛ jɛ cu lat i̱ ɛ ram mi gɔaa, bɛ bieyni kɛ cu lak ɛn ram ɛmɔ kä bɛ cu gɔaa. 7Kä ɛn kuuk ɛmɔ mi wee jɛ wä da̱k puɔ̱nydɛ kɛ kɔr kä min cɛ rɔ nyuɔ̱th bööth palä. A jɛ nyɔk rɔ kɛ nyoth jɛ. 8Mi wä bööth palä jɛ wä nɛn i̱ cɛ da̱k puɔ̱nydɛ bɛ jɛ cu lat raar i̱ tëë kɛ dhɔp ɛn ram mɔmɔ kä cɛ jiääk.
9“Mi wee wä tekɛ ram mi tëë juey, bajɛ nöŋ bööth palä. 10Min bi jɛ wä guic, mi cɛ jɛ je̱k i̱ cɛ guɔ̱pdɛ yɔm kä cɛ mi̱em jak kä ti böör kä te rɛydɛ kɛ ri̱ŋ mi tëk. 11Ɛ juey mi ci jääny gupädɛ bi bööth palä jɛ cu lat i̱ cɛ jiääk kä /ca bilɛ la̱th gua̱a̱thdɛ kä rɔa kɛ ɣöö cɛ jiääk ni wen. 12Kä mi cɛ ben raar ɛn juey a cɛ puɔ̱nydɛ kum kɛɛliw, a kenɛ jɛ ni wi̱i̱dɛ cu mäni ciökɛ, nikɛ gui̱c bööth palä kɛ jɛ, 13bajɛ guic ɛ bööth palä, mi wee jɛ wä je̱k a cɛ puɔ̱nydɛ thiäŋ kɛɛliw, bɛ jɛ lat i̱ gɔaa puɔ̱nydɛ ɛn raam ɔ, min ci puɔ̱nydɛ buay kɛɛliw cɛ ku gɔaa. 14Kä duundɛ ɣöö cäŋ ɛ wä guɔ̱p mi ca̱r jɔɔc puɔ̱nydɛ mɔ bɛ jiääk. 15Mi wä bööth palä jɛ wä nɛn ɛn guɔ̱p ɛ ca̱r ɛ mɔ, bɛ jɛ lat i̱ cɛ jiääk ɛn raam ɔ, ɛn guɔ̱p ɛ ca̱r ɛmɔ jiäkɛ, tëë kɛ juey. 16Mi wä guɔ̱p ɛ ca̱r ɛmɔ rɔ wä nyɔk kɛ buay, bɛ loc kä bööth palä. 17Bi bööth palä jɛ guic, mi wee jɛ je̱k i̱ cɛ buay bɛ jɛ lat i̱ cɛ gɔaa, kä bɛ cu gɔaa.
18“Ɛ jɛn mi wä guɔ̱p pua̱ny ran wä te pia̱a̱r mi ci gɔaa, 19kä ci mi bör ben raar thi̱n kiɛ mi dɛ̈ɛ̈r a jɛ nyothɛ bööth palä. 20Bi bööth palä jɛ gui̱c, mi wee jɔɔc i̱ cɛ coth rɛy ri̱ŋ kä ci mi̱emkɛ jɔɔc ala ti böör, bɛ jɛ lat i̱ cɛ jiääk kɛ ɣöö ɛ juey ɛn ɔ ci päl rɛy pi̱rä mɔ. 21Kä mi wee jɛ wä guic a thilɛ mi̱em mi bör thi̱n kä /kenɛ guɔ̱p le̱ny, baɛn raam ɔ bat gua̱a̱thdɛ kä rɔa kɛ ni̱n bärɔw. 22Mi wee jɛ da̱k puɔ̱nydɛ, bɛ jɛ lat i̱ cɛ jiääk tëë kɛ juey. 23Kä /mi kenɛ jɛ däk a tëë rol roolä ɛ pia̱a̱r ni jɛn, bi bööth palä jɛ lat i̱ gɔaa ɛ.
24“Kä kɛ kui̱ raam mi ci waŋ, mi tithɛ kä cɛ yɔm ɛn pia̱a̱r waŋä, 25bi bööth palä jɛ ben guic, mi ci mi̱em in ci do̱ny thi̱n buay kä cɛ coth ri̱ŋ, ɛ jɛn juey ci päl ɔ rɛy piäärä waŋä, bɛ jɛ cu lar i̱ tëë kɛ juey gupä. 26Kä mi wee jɛ wä guic a thilɛ jɛ mi̱em mi bör kä pia̱a̱r a tëë gupä kä rɔa, bɛ jɛ bat gua̱a̱thdɛ kä rɔa kɛ ni̱n bärɔw. 27Kɛ kɔr ni̱ni da̱ŋ bärɔw bɛ jɛ nyɔk kɛ guec mi däk kɛ jɛ rɛy gupädɛ, bɛ cu lat i̱ tëë kɛ juey gupä. 28Duundɛ ɣöö mi cɛ lɛn ŋot kɛ läŋ lääŋ, a wä ni jɛn kɛ cuɔl. Kä /cɛ jɛ lɛ däk wäni jɛn kɛ gɔɔy, bi bööth palä jɛ lat i̱ thilɛ jɛ juey gupä, ɛ pia̱a̱r ni jɛn.
29“Kä mi wee tekɛ wut kiɛ ciek mi tekɛ buɔ̱t wi̱i̱dɛ kiɛ ti̱kdɛ, 30bi bööth palä jɛ guic ɛn buɔ̱t ɛ mɔ. Mi cɛ coth rɛy ri̱ŋ kä ci mi̱emdɛ a yian kä ciwɛ, bɛ jɛ lat i̱ cɛ tekɛ juey ɛn ram ɛmɔ, cɛ tekɛ wuɔ̱ɔ̱k wec kiɛ ti̱äk. 31Kä mi wee jɛ wä guic a thilɛ jɛ mi̱em mi ca̱r kä /kenɛ coth rɛy ri̱ŋ bɛ ram ɛmɔ la̱th gua̱a̱thdɛ kä rɔa kɛ ni̱n bärɔw. 32Kɛ cäŋ in bärɔwdiɛn bɛ jɛ nyɔk kɛ gui̱c, mi thilɛ jɛ mi̱em mi yian kä /kenɛ coth rɛy ri̱ŋ kä /kenɛ jɛ däk, 33lotdɛ ni ɣöö bamud ɛn wi̱cdɛ kiɛ ti̱kdɛ, ba päl ni gua̱a̱th butdä, kä bɛ jɛ nyɔk kɛ läth gua̱a̱thdɛ kä rɔa kɛ ni̱n bärɔw kɔ̱kiɛn. 34Kɛ thuɔ̱k ni̱ni da̱ŋ bärɔw bɛ jɛ nyɔk kɛ gui̱c ɛn buɔ̱t, mi /kenɛ jɛ däk kä tëë jɔk gupä, bɛ jɛ lat i̱ thil ɛ jɛ juey, ɛn raam ɔ bɛ bieynikɛ lak kä bɛ cu gɔaa. 35Kä mi wee jɔɔc i̱ ci buɔ̱t rɔ rëp a ca lat i̱ cɛ thil juey, 36ba jɛ nyɔk kɛ gui̱c ɛ bööth palä, mi wee jɛ nɛn i̱ cɛ da̱k puɔ̱nydɛ kä te mi̱em mi yian ɛn raam ɔ cɛ tekɛ juey. 37Kä kɛ ca̱r bööthä palä mi guicɛ jɛ i̱ /kenɛ buɔ̱t däk a do̱ny mi̱em ti ca̱a̱r thi̱n kä wä ni jɛn kɛ gɔɔy, bɛ jɛ lat i̱ thil ɛ jɛ juey ɛn raam ɔ.
38“Mi wee tekɛ wut Kiɛ ciek mi te pia̱a̱r butdä mi cɛ guɔ̱pdɛ yɔm, 39bi bööth palä jɛ guic ɛn raam ɔ, mi tɔyɛ ni pia̱a̱r kä cɛ yɔm, bä ni gɔakdɛ raar thilɛ jɛ juey ɛn ram mɔmɔ.
40“Kä mi ci mi̱em wec ran rɔ̱ guth a cɛ tekɛ wuɔɔk, mi puɔthɛ ɛn wuɔɔk thilɛ jɛ juey. 41Kä mi ci mi̱emkɛ rɔ̱ guth nhiamdɛ a cɛ tekɛ wuɔɔk, jɛn gɔaaɛ thilɛ jɛ juey. 42Mi wee wä tekɛ mi dɛ̈ɛ̈r wokädɛ, luɔtdɛ ɣöö tëë kɛ juey gupä. 43Jɛn baben guic ɛ bööth palä, mi wee jɛ wä nɛn i̱ wuɔ̱ɔ̱kdɛ yɔmɛ jɛ kä ti̱thɛ, 44bɛ jɛ cu lat i̱ tëë kɛ juey gupä wi̱i̱dɛ.
45“Kɛ kui̱ ɛmɔ bi ram min tekɛ juey gupä ala dhɔp ciɛŋ ni bieyni ti ci rɛ̈t, kä bɛ wi̱cdɛ päl ɛ /ka̱n la̱t, kä bɛ thokdɛ kum kä wiee ɛ i̱, ‘Mi jiääk, mi jiääk.’ 46Bɛ cieŋ ala mi jiääk kɛ pëk ɔ tëë kɛ juey thi̱n ɔ, kä bi cieŋ ni jɛn kä rɔa jɔk wec.”
Dhɔp biey
47“Mi wee tekɛ biɛl dhɔpä rɛy biey ɛ thup kiɛ terli̱i̱n, 48kiɛ rɛt biey mi la̱tkɛ kɛ thup kiɛ terli̱i̱n kiɛ la̱t kɛ jɛ kɛ köl, 49mi wec tekɛ biɛl mi dɛ̈ɛ̈r kiɛ mi tɔ̱c, ɛ dhɔp ba jɛ ben nyuɔ̱th bööth palä. 50Bi bööth palä jɛ guic kä bɛ jɛ la̱th kä rɔa kɛ ni̱n bärɔw. 51Kɛ kɔr ni̱ni da̱ŋ bärɔw bɛ jɛ nyɔk kɛ gui̱c, mi rëp biɛɛlkɛ ni rɔ, cɛ jiäk ɛn bi̱i̱ ɛ mɔ. 52Kä bɛ jɛ waŋ kɛ ɣöö cɛ tekɛ dhɔp röŋɛ kɛ wa̱ŋ.
53“Kuɛ la ɣöö mi ci bööth palä jɛ guic, kä cɛ jɛ je̱k i̱ /kän biɛl rɔ rëp puɔ̱ny biey, 54bɛ jɛ jak kä lak kɛ jɛ, kä ba bat gua̱a̱thdɛ kä rɔa kɛ ni̱n bärɔw kɔ̱kiɛn. 55Kä bɛ jɛ nyɔk kɛ guec, mi /kän biɛl thuuk, a cäŋ /kän biɛɛl rɔ rëp ŋotdɛ kɛ jiääk, bi jɛ waŋ kɛ mac, a cäŋ te biɛl dhɔpä jɔkdɛ kiɛ nhiamdɛ.
56“Kä kɛ min guic ɛ jɛ, mi ci biɛl biey jɔɔc ɛ mi̱r mi̱r, bɛ jɛ rɛ̈t jɔ̱ɔ̱r ɛn gua̱a̱th ɛmɔ puɔ̱ny biey kiɛ köl. 57Mi wä biɛl rɔ wä nyɔk kɛ mi jɔckɛ ala ti ŋuan, bi gua̱ndɛ jɛ waŋ ɛn bi̱i̱ ɛ mɔ. 58Kä mi wee jɛ wä lak kä bi cuäänydɛ bath, a jɛ nyɔkɛ kɛ la̱k kä bɛ cu gɔaa.”
59Ti̱ti̱ kɛ kɛn ŋuɔ̱t kɛ kui̱ dhɔpä mi te rɛy biey, ɛ bi̱i̱ mi thup kiɛ ɛ terli̱i̱n kiɛ mi la̱t kɛ kɛ köl ba jɛ lar mi gɔaaɛ kiɛ /cɛ gɔaa.
Currently Selected:
Liib 13: nusNHB
Highlight
Copy
Compare
Share
Want to have your highlights saved across all your devices? Sign up or sign in
Nuer Bible © Bible Society in South Sudan 1998,2012.
