Liib 11

Ley ti dëë cam

(Ŋuɔ̱t 14:3-21)

1Ɛ jɛn Cu Kuoth Nhial Muthɛ kɛnɛ Ä-ron jiök i̱, 2“Jiökɛ ji̱ I-thɛ-rɛl i̱, ti̱ti̱ kɛ kɛn tin tëk tin bia mi̱th thi̱n kä le̱y diaal tin cieŋ wi̱i̱ muɔ̱ɔ̱n. 3Bia le̱y diaal tin tekɛ barkakni da̱ŋ rɛw kä nyɔakɛ wal bia kɛ cam. 4Kä le̱y tin nyɔakɛ wal kä thil kɛ barkakni da̱ŋ rɛw, /cia kɛ bi cam. Ce̱tkɛ thɔ̱rɔ̱l, nyɔkɛ wal kä thil ɛ jɛ barkak. Jiäkɛ kɛ yɛ. 5Amäni kuŋɛ̈k bä nyɔkɛ wal kä thil ɛ jɛ barkakni da̱ŋ rɛw, jiäkɛ kɛ yɛ. 6Lëërcandak nyɔkɛ wal kä thil ɛ jɛ barkakni da̱ŋ rɛw jiäkɛ bäkɛ yɛ. 7Kä kundhur tëë kɛ barkakni da̱ŋ rɛw, kɛ ɣöö /cɛ wal nyɔk, jiäkɛ kɛ yɛ. 8Kɛn le̱y ɛ tɔ̱ cuarɛ kɛ cam, kä cuarɛ ri̱ŋdiɛn thiap mi ci duɔ̱ɔ̱r li̱w kɛ ɣöö jiäkɛ.

9“Kä yɛn camɛ rɛc diaal tin te rɛy bäpdiit kɛnɛ rɛy kiɛri kä tekɛ kuac kɛnɛ nyim, 10kä kɛn tin diaal tin tëk rɛy pi̱i̱ni, kä thil kɛ ji̱th kɛnɛ nyim, cuarɛ kɛ cam, jiäkɛ kɛ yɛ. 11Kä kɛ ɣöö jiäkɛ kɛ yɛ, /cuarɛ ri̱ŋkiɛn cam, kä /cuarɛ kɛ thiap. 12Kä /cuarɛ tin diaal tin tëk rɛy pi̱i̱ni kä thil kɛ ji̱th kɛnɛ nyim cam.

13“Kä ti̱ti̱ kɛ diit tin cia bi cam kɛ ɣöö kɛ diit ti jiäk. Cuɔr, kui̱k cuɔr, nyoŋgol, kue̱y, 14manliɛɛth kɛ cätdiɛn, 15wuɔ̱t, käät, 16jakɔa̱a̱k kɛ cätdiɛn, wawaw, 17mulguc, bo̱o̱ŋ, 18ŋök rialbɛɛk, rumputh, 19ŋabrɔkɛdhɔ̱t, bolwijua̱t, jiec, wɛrwɛri.

20“Kä kɔ̱a̱m diaal tin tekɛ gɔ̱k kä jäl kɛ ciök ŋuaan kɛ tin pär /ci kɛ ro̱ŋ kɛ mi̱eth. 21Kä tin dëë cam kä kɛn kɔ̱a̱m ti tekɛ gɔ̱k ti kä jäl kɛ ciök ŋuaan, kɛ tin tekɛ ciök rɛw ti kac kɛ kɛ. 22Rɛydiɛn camɛ ra̱a̱kni kɛ cätkiɛn, kɛ diɛɛri kɛ cätkiɛn, kɛ yɔŋyɔŋni kɛ cätkiɛn. 23Kä ɛ ni ɣöö kɛn kɔ̱a̱m diaal tin tekɛ gɔ̱k kä tekɛ ciök ŋuaan /cikɛ ro̱ŋ kɛ mi̱eth.

24“Kä kɛ kɛn ti̱ti̱ bapua̱nykun ya̱r, kɛ ɣöö mi wä raan pua̱nykiɛn wä thiap bɛ jiäk amäni thiaŋ. 25Kä ram mi wä kɛl wä käp kä ri̱ŋkiɛn, a jɛ lak bieynikɛ, kä bɛ jiäk mäni thiaŋ. 26Kä le̱y diaal tin tekɛ barkak mi /kenɛ bakdäär kä /ci wal nyɔk /cɛ rɔ lot kɛ mi̱eth, kä ram ɔ wä ri̱ŋkiɛn wä thiapɔ, bɛ jiäk. 27Kä le̱y diaal tin jäl kɛ ciök ŋuaan kä jäl kɛ ŋuul cio̱kdɛ jiäkɛ, kä ram ɔ bi ri̱ŋdiɛn guëërɔ bɛ jiääk mäni thiaŋ. 28Ɛn ram ɔ wä kɛ nyɔt ɔ, a jɛ lak bieynikɛ, kä bɛ jiääk mäni thiaŋ kɛ ɣöö kɛ le̱y ti jiäk /ca rɔ lot kɛ mi̱eth.

29“Kä ti̱ti̱ kɛ tin /ca rɔ lot kɛ yɛ i̱ dëë cam kä tin diaal tin la muɔl piny, lo̱o̱kuɛ̈ɛ̈t kɛnɛ kun kɛ ke̱r ke̱r kɛ cätkiɛn, 30lo̱o̱kuɛ̈ɛ̈t kɛnɛ gaany ke̱r ke̱r thɔa̱a̱l kɛ nyuɛ̈ɛ̈nyga̱w. 31Kɛn ti̱ti̱ diaal kä muɔl piɛny jiäkɛ kɛ mi̱eth kä ram mi wa ri̱ŋ duɔ̱ɔ̱rä wä thiap a cäŋ cɛ li̱w bɛ jiääk ɛn ram ɛmɔ mäni thiaŋ. 32Kä mi wä kɛl li̱w kä kɛ, kä bɛ pɛn kä duɔ̱ɔ̱r cɛ jiääk ɛn nɔmɔ, kä nyin cieŋ, ɛ jiath kiɛ ɛ bi̱i̱ kiɛ köl kiɛ dua̱l, bat ɛ jɛ pi̱i̱ni, cɛ bi gɔaa mäni thiaŋ, kä kɛ kɔrɛ bɛ cu gɔaa. 33Kä mi wee pɛn rɛy dhar, kɛn tin diaal tin te thi̱n cikɛ jiääk kä bia tiath ɛn dhaarɛ mɔ. 34Kä mi̱eth in camkɛ, mi /ka̱n kɛ pikɛ ɛn rɛy dhar ɛ mɔ, cɛ jiääk amäni pi̱ tin mathkɛ bä mi jälɛ ɛn rɛy dhar ɛmɔ, cikɛ jiääk. 35Pekdɛ duɔ̱ɔ̱r mi Ci ri̱ŋdiɛn pɛn thi̱n cɛ jiääk, ɛ dhaar tha̱t cɛ pɛn thi̱n ɔ kiɛ ɛ yi̱k, ba tiëëth ni ŋëëtni. Kɛ ɣöö cikɛ lɛn ŋot kɛ gɔɔy kä cikɛ dëë lɛ gɔw kɛ yɛ. 36Kä mi wee pɛn kä jiw kiɛ wa̱t pi̱, bikɛ ŋot kɛ gɔɔy, duundɛ ni ɣöö ram ɔ bi puɔ̱ny kä duɔ̱ɔ̱r thiap ɔ bɛ jiääk. 37Kä mi wee pɛn rɛy bɛɛl tin bapi̱th, bikɛ ŋot kɛ gɔɔy. 38Kä mi wee wa̱a̱ pi̱ tin wackɛ bɛɛl cɛ pɛn thi̱n ɔ, cɛ jiääk kɛ kui̱dun.

39“Ɛ jɛn täämɛ mi ci le̱y li̱w kä le̱y tin camkɛ, kä wä raan ri̱ŋdɛ wä nyɔt bɛ jiääk amäni thiaŋ. 40Kä ram mi wä mi̱th kä ri̱ŋdɛ, a jɛ lak bieynikɛ, kä bɛ ŋot kɛ jiääk mäni thiaŋ. Kä ram mi wä ri̱ŋdɛ wä käp, a jɛ lak bieynikɛ kä /cɛ bi gɔaa amäni thiaŋ.

41“Kɛn muɔl diaal tin mol wi̱i̱ muɔ̱ɔ̱n jiäkɛ kɛ mi̱eth. 42Tin diaal tin ɣo̱y kɛ bapdiɛn, kiɛ tin jäl kɛ ciök ŋuaan, kiɛ tekɛ ciök ti ŋuan, /cuarɛ jɛ cam, kɛ ɣöö /cɛ rɔ lot kɛ mi̱eth. 43Cuarɛ pua̱nykun yär kɛ mi̱eth ri̱ŋ kä tin mol piny, cuarɛ rɔ bi jak kä jiäk kɛ kɛ. 44Ɛ ɣän Kuoth Nhial Kuothdu, tiɛtdɛ pua̱nykun kɛ bia gɔw kɛ ɣöö rɛl gɔɔydä rɔ. Cuarɛ rɔ jak kä jiäk kɛ muɔɔl piny. 45Ɛ jɛn ɣän Kuoth Nhial mëë käm yɛ raar kä I-jëp kɛ ɣöö ba̱a̱ Kuothdun, kɛ kui̱ ɛmɔ jakɛ rɔ kä ti gɔw kɛ ɣöö rɛl gɔɔydä rɔ.

46“Täämɛ ti̱ti̱ kɛ kɛn ŋuɔ̱t kɛ kui̱ le̱yni, kɛn diit, kɛ tin diaal tin tëk a jäl rɛy pi̱i̱ni kɛnɛ tin jäl wi̱i̱ muɔ̱ɔ̱n. 47Bia jɛ dhil ti̱t agɔaa kam kä mi gɔaa kɛnɛ mi jiääk, kam le̱yni tin dëë cam kɛn le̱y tin /ca cam.”

Currently Selected:

Liib 11: nusNHB

Highlight

Copy

Compare