Ɣöth 18

Muthɛ kɛnɛ gua̱nthudɛ

1Täämɛ gua̱nthu Muthɛ ni Yith-ro mi la bo̱o̱th palä kä Mid-yan, cuɛ tëë diaal tëë ci Kuoth kɛ lät kä Muthɛ kɛnɛ ji̱ I-thɛ-rɛl diaal liŋ, jɛn no̱o̱ŋ ëë ci Kuoth Nhial jɛ no̱o̱ŋ ni ji̱ I-thɛ-rɛl raar kä I-jëp. 2Yith-ro min la gua̱nthu Muthɛ, cuɛ nyaadɛ ni Dhi-pö-ra, min la ciek Muthɛ, mëë ci kɔŋ duɔth mëë jiɛyɛ, 3kɛnɛ gaatkɛ da̱ŋ rɛw, tin cɔal kɛl i̱ Ger-com, kɛ ɣöö ci Muthɛ ɛ lar i̱, “Ɣän lapä ja̱l ro̱o̱l mi guä.” 4Kä cɔal min dɔ̱ŋ i̱ Ɛ-li-dhɛr, kɛ ɣöö cɛ jɛ lar i̱, “Kuoth gua̱a̱r ɛ luääkdä, kä cɛ ɣä gi̱ek raar tetdä Pɛro.” 5Kä jɛn gua̱nthudɛ ni Jɛ-thɛ-rö, cuɛ ben kä jɛ kɛ gaat Muthɛ kɛɛl amäni mandiɛn rɛy dɔaar guäth ëë cɛ pua̱t thi̱n gekä pa̱a̱m Kuɔth. 6Kä mëë wa jɛ la̱r Muthɛ i̱, “Nɛnɛ, guuthu kɛnɛ gaatku da̱ŋ rɛw kɛ ciekdu a bëë ni,” 7cu Muthɛ gua̱nthudɛ wä lor, cuɛ rɔɔdɛ goŋ nhiamdɛ kä cuɛ jɛ ro̱mä kɛ Kuoth ciɛm. Cukɛ maliɛn thi̱ec, kä cukɛ wä rɛy kɛmɛkä. 8Cu Muthɛ ŋɔak diaal tëë ci Kuoth Nhial kɛ lät kä Pɛro kɛnɛ ji̱ I-jëp kɛ daandiɛn la̱t gua̱nthudɛ, rik diaal tëë ci ben kä kɛ dup kɛnɛ dhi̱i̱l raar ëë dhi̱i̱l Kuoth Nhial ɛ ni kɛ raar. 9Cu Jɛ-thɛ-rö lɔcdɛ tɛɛth kɛ gɔɔy diaal tëë ci Kuoth Nhial kɛ lät kä I-thɛ-rɛl kɛ kämdiɛn raar te̱tni ji̱ I-jëp. 10Cu Jɛ-thɛ-rö wee i̱, “A liak wä kä Kuoth Nhial, jɛn ram in ci yɛ dhi̱eel raar te̱tni ji̱ I-jëp, kɛnɛ tet Pɛro. 11Täämɛ ɣän ŋa̱cä jɛ i̱ Kuoth Nhial di̱t ni jɛn kä kuth diaal, kä cɛ nɛɛkɛ dhieec raar te̱tni ji̱ I-jëp tëë ciaŋkɛ kɛ yaakä.” 12Ɛ jɛn, cu gua̱nthu Muthɛ ni Jɛ-thɛ-rö, luur in la wa̱ŋkɛ Kuoth kɛnɛ min la na̱kɛ jɛ, ka̱m Kuoth, kä cu Ä-ron kɛnɛ di̱t I-thɛ-rɛl diaal ben kɛ ɣöö bikɛ mi̱eth ben nyuak piny kɛ gua̱nthu Muthɛ kɛɛl nhiam Kuɔth.

Kuëny ruëëcni

13Mëë ruɔ̱ndɛ cu Muthɛ luk cɔl, cuɛ nyuur lukɛ naath, cu naath ben, cukɛ cuɔ̱ŋ, liɛpkɛ luk ni kɛ runwaŋ cu amäni thiaŋ. 14Mëë wä gua̱nthu Muthɛ ni Jɛ-thɛ-rö lät Muthɛ diaal tin lätdɛ kɛ kui̱ nath nɛn, cuɛ wee i̱, “Ɛŋu ɛnɛ lätdi mi? Ɛŋu mɔ nyuuri luɔ̱k kärɔaadu mɔ? Kä cuŋ naath ɛbi̱r li̱pkɛ ni min wäärun cu mäni thiaŋ?” 15Cu Muthɛ ɛ loc i̱, “Ɛ min la naath diaal cua bä kä ɣä, kä görkɛ ruac Kuɔth. 16Mi tëë kɛ ŋaknɔm kam nɛɛni rɛw, bikɛ la bä kä ɣä, bä kam ran kɛnɛ gua̱n thie̱e̱kädɛ cu lat, kä bä ŋut Kuɔth kɛnɛ ruaacnikɛ cu luɔ̱k lo̱cnikiɛn.” 17Cu gua̱nthu Muthɛ Muthɛ jiök i̱, “Mɔ lätdi mɔ, /cɛ gɔaa. 18Ji̱n yɛnɛ naath bɛ ŋɔa̱a̱ŋ bia cuc, kɛ ɣöö nɔmɔ ɛ la̱t mi tiaam ji̱ ɛlɔ̱ŋ, /ciɛ mi de̱ri luäŋ kɛ la̱t kärɔaadu. 19Liŋ ruacdä täämɛ, ɣän a ji̱ lueekä, a Kuoth tëë ji̱ kɛɛl. Bi rɔ cuŋ kɛ kui̱ nath nhiam Kuɔth, bi̱i̱ go̱o̱nynikiɛn ku la no̱ŋi Kuoth. 20Bi kɛ ŋi̱eec kɛ ŋuɔ̱t Kuɔth kɛnɛ ruaacnikɛ. Kä bi kɛ jak kä ŋa̱ckɛ duɔ̱ɔ̱p in bi cieŋ kɛ kɛ, kɛnɛ min görkɛ i̱ dëë la̱t. 21Kä ji̱n, bi nɛy ti ro̱ŋ kɛ ŋäc luɔ̱ɔ̱kni rɛy nɛɛni diaal kuany, kä bikɛ a nɛy ti luɔ̱thkɛ Kuoth ti cieŋ thuɔ̱ɔ̱kni, ti lökɛ kök kua̱r, bi kɛ kuany ala kua̱r wec nath, bi nɛy ti bath dɔɔr, kɛ nɛy ti kuɔ̱r, kɛ nɛy ti jiɛn dhieec amäni nɛɛ wäl a kue̱nyi kuääriɛn. 22Akɛ luɔ̱kkɛ naath gua̱thni diaal. Ba luɔ̱k tin di̱tkiɛn diaal ku la nöŋkɛ ji̱, kä bikɛ luɔ̱ɔ̱k tin tiɛtni diaal ŋok ɛ kɛn. Bɛ cua mi puɔl puɔl kä ji̱ kɛ ɣöö bikɛ la̱t ɛ di̱i̱t ɛmɛ nyuak piny kɛ ji̱ kɛɛl. 23Mi wi̱i̱ jɛ la̱t inɔ, bi Kuoth jɛ la nyuth ji̱, bi cu tëë lua̱ŋ kɛ mi dhiaaci ni rik nɛɛni diaal ti̱ti̱, kä bikɛ cua loc ciëëŋni a cikɛ ro̱ŋ.” 24Cu Muthɛ luek gua̱nthudɛ käp cuɛ tëë diaal tëë cɛ la̱r jɛ la̱t. 25Cuɛ nɛy ti ro̱ŋ kɛ ŋäc luɔ̱ɔ̱kni kuany rɛy ji̱ I-thɛ-rɛl diaal. Cuɛ kɛ ka̱m rui̱c nath, cukɛ a ruëëc nɛɛni ti bath dɔɔr, kɛ nɛy ti kuɔ̱r kɛ nɛy ti jiɛn dhieec amäni nɛɛ wäl rɛy ji̱ I-thɛ-rɛl diaal. 26Cukɛ naath la luɔ̱kkɛ gua̱thni diaal. Bikɛ luɔ̱ɔ̱k tin di̱t nöŋ Muthɛ, bikɛ luɔ̱ɔ̱k tin tiɛtni ŋok ɛ kɛn. 27Cu Muthɛ gua̱nthudɛ cu pa̱l wä, kä cu Yith-ro duɔ̱ɔ̱pdɛ riet ro̱o̱liɛn.

Currently Selected:

Ɣöth 18: nusNHB

Highlight

Copy

Compare