Math 12

Thiëc në Biäk de Thabath

(Mak 2:23-28; Luk 6:1-5)

1 # Nyöŋ 23:25. Na wën, ke Yecu lɔ cath ë dum yiic ëkööl ë thabath, ku kɔckɛn ë piööcë acï cɔk ke nɔ̈k, agokï rap gɔl ë dhuŋ, ku camkï ke. 2Na wën, aacï Parithai ke tïŋ, ke ke yöök an, “Tïŋ, kɔckuön ë piööcë aloikï kë cï pɛ̈n kɔc ëkööl ë Thabath!”

3 # 1 Tham 21:1-6. Go ke yɔ̈ɔ̈k an, “Kɛ̈nkï kueen ë awerekic në kë cï Debid looi, ɣɔn nɛ̈kë cɔk en, ayï kɔc cath në yen, 4#Leb 24:9. luɔi le yen ɣön ë Nhialic, le ku ciɛm kuïn cï pam ɣeric cï gäm Nhialic, ku akënë päl en luɔi duëër en ke cam, ayï kɔc cath në yen, ee ka ke bäny ke ka ke Nhialic kapäc? 5#Kuɛ̈n 28:9,10. Ku kɛ̈nkï kueen ë löŋic ayadäŋ an, “Ëkööl ë Thabath bäny ke ka ke Nhialic bäny nu Luaŋdït ayek löŋ de Thabath dhɔ̈ŋic, ku acïn kë yek wööc? 6Ku wek yɔ̈ɔ̈k an, Raan kï eenë, raan wär Luaŋdït ë dït? 7#Math 9:13; Ɣodh 6:6. Ku tëë we cï jamë ŋic thar an, “Ee kokdepiɔ̈u yen kaar, ku acie kë bï nɔ̈k yen kaar, adï kɛ̈nkï kɔc jɔ̈ɔ̈ny kɔc cïn kë cïk wööc. 8Wën ë Raan ee Bɛ̈nydïït ë Thabath aya.”

Raan cï Ciin Riɔu

(Mak 3:1-6; Luk 6:6-11)

9Na wën, acï jäl ëtɛ̈ɛ̈n, ku le ɣön ë Nhialic, 10ku ade raan cï cin riɔu ëtɛ̈ɛ̈n. Gokï thiëëc an, “Cï päl kɔc an, bïk kɔc aa tɔ dem ë akööl ke Thabath?” Kɔɔr kek luɔi bï kek e gaany.

11 # Luk 14:5. Go ke yɔ̈ɔ̈k an, “Ee raanou nu ë weyiic, raan de amäl tök, ku të lööny en ë adhum thuthic ëkööl ë Thabath, ke cïï bï dɔm, ku jöt bei? 12Ku piath ë raan awär piath ë amääl aläl? Yen tëde ka, luɔi ee raan këpiɛth looi aye päl kɔc ë kööl ke Thabath. 13Na wën, ke yöök raan an, “Riɛnyë yïcin tueŋ.” Go riɛny tueŋ, ago bɛ piath acït ciindɛn däŋ. 14Go Parithai lɔ biic, lek löŋ guiir kapäc në këde, në luɔi bï kek e nɔ̈k.

Awun cï Lɔc në Nhialic

15Na wën, acï Yecu e ŋic, ke ric rɔt ëtɛ̈ɛ̈n, ago kuany cök ë kuut dïït ke kɔc, go ke tɔ dem kedhie, 16ku jɔ ke lom thook, ke cïkï bï tɔ ŋic kɔc, 17luɔi bïï jam aa yic jam ë lueel tiët Yithaya ɣɔn an,

18 # Yith 42:1-4 (LXX). “Tiëŋkï awundï, raan cä lɔc,

Mɛnhdiën nhiaar, yɛn mit piɔ̈u wokë yen,

Wëikï abä ke tääu ë yeguöp,

ku abï löŋ yic guiëër juöör.

19Acï bï aa teer, ku cie cööt,

ku acïn raan bï e piŋ röl ë kuɛɛr yiic.

20Aruöör cï nyiɛɛcic acïï bï dhoŋ kɔ̈u,

ku alanh tol acïï bï tɔ liu,

Aɣet të bï en guiëërëlöŋ tɔ bɔ̈, ago tiam.

21Ku rinke abï juöör ke aa ŋɔ̈ɔ̈th.”

Yecu ku Beeldhebub

(Mak 3:20-30; Luk 11:14-23)

22Na wën, ke raan de guöp jɔŋ rac bïï yë të nu yen, ku ye cɔɔr, ku cïn ethok të jam, ago tɔ dem, arëk abï raan wën cï cɔɔr ku cïn ethok të jam abï jam ku dɛɛi. 23Go kut ë kɔc gäi kedhie, luelkï an, “Cie Wën ë Debid ee kënë?”

24 # Math 9:34; 10:25. Na wën, aacï Parithai e piŋ, ke luelkï, an, “Raanë ee jɔɔk rac ciëëc bei në riɛl ë Beeldhebub tei, yen bɛ̈nydïït ë jɔɔk rac.”

25Go Yecu kë cïk tak ŋic, ku yöök keek an, “Ciɛɛŋ ee gɔ̈m etök ee riääk abï aa jɔ̈ɔ̈ric, ku pänydït ayï ɣöt, të gɔ̈m en etök, ka cïï bï kɔ̈ɔ̈c, 26ku Catan, të cï en Catan ciëëc bei, ka ye gɔ̈m etök, bï ciɛɛŋdɛn cieŋ jɔ kɔ̈ɔ̈c adï? 27Ku të ciëëc ɛn jɔɔk rac bei në riɛl ë Beeldhebub, ku na mïthkun, yek ke ciëëc bei në ŋa? Yen abï kek aa bänykuön ë week jɔ̈ɔ̈ny. 28Ku tën aa yɛn jɔɔk rac ciëëc bei në Wëi ke Nhialic, ke ciɛɛŋ de Nhialic acï bɛ̈n tëde week.

29Duëër raan lɔ ɣön ë raan ril adï, le ku yiɛk kake, të ŋoot en ke kën raan ril kɔn duut? Aduëër kɔn duut ku jɔ ɣönde yak.

30 # Mak 9:40. Raan reec mät ke yɛn, ka de ater ke yɛn, ku raan reec kuëny kekë yɛn ëtök, ka thiëi käŋ wei. 31Yen aa yɔ̈ɔ̈k ɛn week an, “Kërɛɛc ee kɔc wööc ëbɛ̈n ku lɛ̈t ee kɔc lueel ëbɛ̈n abï päl kɔc,#12:31: lɛ̈t yek lueel; nɔn ee lɛ̈t ye kek Nhialic lat. ee lɛ̈t ee kɔc Wëidït ɣer lat etök yen acïï bï päl kɔc. 32#Luk 12:10. Ku raan lëk Wën ë Raan jam rac, ka bï päl en, ku raan lëk Wëidït ɣer jam rac, ka cïï bï päl en, ayï ë pinyë nɔm, ayï piny bï lɔ̈ɔ̈k bɛ̈n.”

Tim ku Mïthke

(Luk 6:43-45)

33 # Math 7:20; Luk 6:44. Yak tim tɔ piɛth, ku takï mïthke piɛth ayadäŋ, ku be an, “Cäk e tïŋ, ke we tɔ tim nhiany, ku takï mïthke nhiany ayadäŋ, tim aye ŋic në mïthke. 34#Math 3:7; 23:33; Luk 3:7; Math 15:18; Luk 6:45. Wek mïth ke karɛc, duɛ̈ɛ̈rkï kapiɛth aa lueel adï, ku yak kɔc rac piɔ̈ɔ̈th? Kë ye piɔ̈u thiɔ̈ɔ̈ŋ nɔm yen aye thok lueel. 35Raan piɛth piɔ̈u ee kapiɛth bɛ̈ɛ̈i bei në kakɛn piɛth nu ë yepiɔ̈u, ku bïï raan rac piɔ̈u karɛc bei në kakɛn rac nu ë yepiɔ̈u.”

36Ku wek yɔ̈ɔ̈k an, “Jam ɣɔ̈ric ëbɛ̈n jam bï kɔc aa lueel, këden abïk lueel ëkööl ë guiëërëlöŋ. 37Wëlku kek abï yï tɔ cin yeth gääk, ku wëlku kek abï yï tɔ yïkë yeth gääk.”

Köör de Gök

(Mak 8:11-12; Luk 11:29-32)

38 # Math 16:1; Mak 8:11; Luk 11:16. Na wën, ke kɔc kɔ̈k në kɔc ë löŋ gɔ̈ɔ̈r ku Parithai ke bëërkï an, “Bɛ̈ny ee wëët, wok kɔɔr gök buk tïŋ tëde yïn.”

39 # Math 16:4; Mak 8:12. Go bɛ̈ɛ̈r ku yöök keek an, “Rem rac piɔ̈u ë diëër lei kɔɔr akɔɔr gök bï tïŋ, ku acïn gök bï gäm en, ee gök ë tiët Jona tei. 40#Jon 1:17. Acït man ë tɔ̈uwë Jona ë rɛ̈c dït yäc ë cool yiic kadiäk ku wɛ̈ɛ̈rwakɔ̈u yiic kadiäk an, “Acït täu bï Wën ë Raan tɔ̈u ë pinyic ë cool yiic kadiäk ku wɛ̈ɛ̈rwakɔ̈u yiic kadiäk. 41#Jon 3:5. Kɔc ke Ninebe abïk röt jɔt ëkööl ë guiëërëlöŋ kekë rem de ënɔɔnë, agokï yiëk yeth gääk, acïk kepiɔ̈ɔ̈th puk në guëër cï Jona ke guiëër wël, ku tiëŋkï, raan kï eenë, raan wär Jona. 42#1 Mel 10:1-10; 2 Lëk 9:1-12. Tiiŋ melik nu të lɔ wöuwic abï rɔt jɔt kekë rem de ënɔɔnë ëkööl ë guiëërëlöŋ, ago yiëk yeth gääk, acï bɛ̈n ë piny thar bï pɛl ë Tholomon nɔm bɛ̈n piŋ, ku tiëŋkï, raan kï eenë, raan wär Tholomon.

Bɛ̈n Ciëën de Jɔŋ rac

(Luk 11:24-26)

43Jɔŋ rɛɛc col, të cï en bɛ̈n bei ë raan guöp, ke cath të cïn pïïu, akɔɔr të bï en lɔ̈ŋ, ku cïï yöök. 44Na wën, ke lueel an, “Yɛn bï a nɔm dhuöny ɣöndiën wään bä yɛn bei thïn. Na wën, aacï bɛ̈n, ke yök akënë ɣap, ku cï napic ku cï yic dikëdik. 45Go lɔ, le jɔɔk kɔ̈k diëc kadhorou jɔɔk wär en ë rac, agokï bɛ̈n, ku lekkï ë raan guöp, ku jɔkï ɣap thïn, ago täu de raanë täudɛn ciëën ago rac awär täudɛn tueŋ wään. Yen abï ciët täu de rem de ënɔɔnë rem rac piɔ̈u.

Man Yecu ku Mïthëkɔcken

(Mak 3:31-35; Luk 8:19-21)

46Na wën, të ŋoot en ke jam kekë kut ë kɔc, ke man ku mïthëkɔcken ke ke kääc biic, akɔɔrkï jam bï kek jam ë yen. 47Go raan tök yɔ̈ɔ̈k an, “Tïŋ, moor kï kekë mïthëkɔckun akɛ̈ɛ̈ckï biic, akɔɔrkï jam bï kek jam ë yïn.”

48Go bɛ̈ɛ̈r ku yöök raan jam ke yen an, “Eeŋa ee maar? Ku ee yïŋa ee mïthëkɔckuɔ?” 49Go yecin riɛny tueŋ të nu kɔckɛn ë piööcë, ku lueel an, “Maar kï! Ku mïthëkɔckuɔ kï! 50Raan ëbɛ̈n raan bï këde Wäär piɔ̈u aa looi, Wäär nu paannhial, yen aye mɛnhkäi, ku ye nyankäi, ku ye maar.”

Currently Selected:

Math 12: dip-JPB

Highlight

Copy