Amo 3
3
1Piɛŋkï kë cïï Bɛ̈nydït lueel në biäkdun wek kɔc ke Yithriɛl, kɔc wään bïï keek bei paan ë Rip kedhie. Acï lueel an, 2“Ee wek cä lɔc wapäc në juöör ke pinynɔm yiic kedhie, ku tiɛɛt week. Yen kë tɔ we loi kërac ka arëët. Ka wek bä luöi këtuc në biäk de karɛc juëc cäk looi.
Luɔi de Tiët ë Nhialic
3Duëër kɔc kaarou cath kueer ëtök, të kën kek mat nɔn bï kek cath ëtök?
4Duëër köör ŋäär baaŋ në butic, ke cïn lɛ̈n cï dɔm?
Ku dhuŋ ë köör duëër kïïu baaŋ ɣönde, të cïn kë cuet?
5Ku duëër dit lööny piny ë wïn ë dɛ̈pic baaŋ, të kënë ye deep?
Ku wïn ë dɛ̈p duëër yeyic ruɔɔt baaŋ, ke cïn kë cï ye jak?
6Të cïï kaaŋ de tɔŋ kooth, cïï kɔc ke pänydït ee päu?
Duëër pänydït riääk, ke cie Bɛ̈nydït Yen ee yen bɛ̈ɛ̈i?
7Bɛ̈nydït Nhialic acïï këdäŋ ee guɔ looi, ke kën tït ke Nhialic awuutke kɔn nyuöth kë cï kiëët.
8Të cïï köör ŋäär eeŋa cïï duëër riɔ̈ɔ̈c?
Të cïï Bɛ̈nydït Nhialic jam, eeŋa duëër mim ke cïï jamde lueel?
Riääk de Thamaria
9Lɛ̈kë kënë kɔc rëër në ɣööt ke bäny ke Acedɔd yiic, kekë bäny ke Rip, an, “Bäkï në kur ke Thamaria nïïm, bäk tiëŋkï awënwën loi rɔt, ku yaaŋ yɔŋë ë kɔc röt.
10Aye Bɛ̈nydït lueel an, “Kek ee kɔckë akuckï luɔi de këpiɛth. Acïk ɣöötdïtken thiɔ̈ɔ̈ŋ në kak ë peckï në riɛl tëde kɔc. 11Ku be ë Bɛ̈nydït Nhialic lueel an, “Pinydun abïï ë raan ater peec, ku abï ɣöötdïtkun riäär piny, ku yiɛk keyiic në kapiɛth tɔ̈u thïn kedhie.
12Aye Bɛ̈nydït lueel an, “Kɔc ke Yithriɛl tɔ̈u në Thamaria, abïk cït man ye raan tit thök thïïm cï döŋ ë köör thok lɔ̈ɔ̈k yök piny, nɔn ë yök yom kaarou ke cök, ku nɔn ee yen thïm de biäk de yïny de thɔ̈k. Kɔc bï poth në keyiic abïk lïk, kek ee kɔc rɛ̈ɛ̈r në ageenken nïïm ënɔɔnë në Thamaria. Ayï adhuëëŋkɛn rɛ̈ɛ̈r në thöckɛn piɛth nïïm në Thamaria.#3:12: thööc läk; Acie yökic në Ɣeberuu. 13Go Bɛ̈nydït Nhialic Awärjäŋ lueel an, “Piɛŋkï, ku bäk aa cäätɔɔ në kë luɛɛl në biäk de dhiën ë Jakop. 14#2 Mel 23:15. Kööl bän kɔc ke Yithriɛl luöi këtuc, në biäk de awänydɛn cïk looi. Yɛn bï yïk ke Bethel riɔ̈ɔ̈k, ku dhuɔŋ tuŋ ke yïk kaŋuan bei në yenɔm kedhie. 15Yɛn bï ɣöötkɛn ë aruöt, ku ɣöötkɛn amäi dhuɔŋ piny. Ɣööt cïk jäm në tuŋ ke akɔ̈ɔ̈n, abä keek jäp piny. Ku ɣöötdïtken abïï keek riɔ̈ɔ̈k. Yen kë cïï Bɛ̈nydït lueel ka.
Currently Selected:
Amo 3: dip-JPB
Highlight
Copy
Compare
Share
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
