Horiso 69
69
Nơ̆r ôr krao kơ tơgŭm
Tơdrong hơri Đawit pơm. Ăn kơ lu 'bok Thây tơm kiơ̆ tơ'nguơ̆ “pơkao tŏng-mŏng Sêsamin”
1Ơ Kră Yang 'Bok Kei-Dei! Apinh Ih dŏng pơklaih inh.
Yua kơ đak lơ̆p truh tơ hơko inh boih.
2Inh puh lăm hlŭt jrŭ,
anih chro jơ̆ng ưh pă tôch.
Inh glơ̆k lăm đak jrŭ, đak lơ̆p lê̆ inh.
3Inh ôr đĭ lap, hơlŏng inh đĭ kro;
Măt inh đĭ rơgah yua kơ chang gô Kră Yang 'Bok Kei-Dei.
4Lu bơngai areh kơ inh tơdrong kơđei, lơ hloh kơ sŏk kơpal kơ̆l inh;
Lu pơm ayăt kơ inh tơdrong kơ đei, lu bơngai wă pơrăm inh kơtang tơpă.
Inh athei 'mong dôm tơmam mă inh ưh kơ tơtông iŏk ră.
5Ơ Kră Yang 'Bok Kei-Dei! Ih băt kơ tơdrong kơtul kơwao inh.
Dôm tơdrong yoch inh ưh kơ gơh ôn kơ Ih.
6Ơ Kră Yang Tih Hloh 'nĕ ăn kơ lu bơngai chang gô Ih đei mơlâu yua kơ inh.
Ơ Kră Yang 'Bok Kei-Dei lu bơngai Isơrael!
'Nĕ ăn kơ lu bơngai mă chă Ih đe pơ'brơh yua kơ inh.
7Noh yua kơ Ih na inh pŭ iŏk tơdrong đe pơjăm,
tơdrong mơlâu 'bĕnh kơ muh măt inh.
8Inh jing thoi bơngai tơmoi kơ 'nhŏng oh inh.
Thoi gơ̆p nai kơ lu 'nhŏng oh drŏ-nglo kon mĕ inh
9Yua kơ tơdrong hưch hanh kơ Hnam Ih dang luăn sa inh.
Tơdrong đe hiĕk pơjăm Ih 'bơm boih tơ inh.
10Mă inh nhơ̆m ơh,
păng ơ̆t kơ sŏng sa.
Noh kư̆m pơm kơ inh mơlâu.
11Mă inh iŏk 'bi hrŭk pơm ao tai, Inh jing pơm kơ lu sư hiĕk ăr.
12Lu bơngai ngôi 'bơ̆t măng jang che bơle kơ inh;
Inh jing nơ̆r lu et tơdrô hơri jô̆.
13Mă-lei ơ Kră Yang!
Inh krao apinh kơ Ih!
Ơ Kră Yang 'Bok Kei-Dei lăm tơdrong Ih 'mêm mơnat apinh Ih tơl tơwih nơ̆r inh,
Hăm tơdrong dŏng pơklaih sĭt Ih.
14Apinh Ih dŏng pơklaih inh đơ̆ng lăm hlŭt,
'nĕ ăn kơ inh đom.
Tơgŭm kơ inh hlôi đơ̆ng lu bơngai areh kơ inh,
păng hlôi kơ đak jrŭ.
15'Nĕ ăn kơ đak lơ̆p inh,
păng sơlŭng jrŭ hiup inh.
'Bơ̆r hơlŭng hơlih klơ̆p inh.
16Ơ Kră Yang! Apinh Ih tơl tơwih kơ inh, yua kơ tơdrong 'mêm 'lơ̆ng Ih;
Kiơ̆ kơ tơdrong 'mêm mơnat Ih, apinh wih tơ inh.
17Apinh Ih 'nĕ kơ ôn muh măt Ih kơ inh,
Đĭch đam Ih, yua kơ inh oei pơmat-tat;
Jah drơ̆ng nơ̆r inh bĕ.
18Apinh Ih năm jê̆ inh păng huai iŏk bơhngol inh.
Apinh dŏng pơklaih inh đơ̆ng lu bơngai ayăt.
19Ih băt tơdrong mơlâu, tơdrong đe pơjăm pơjuă păng tơdrong đe pơ'brơh kơ inh.
Lu bơngai ayăt kơ inh oei 'bơ̆t anăp Ih.
20Inh pơmat-tat dêh,
jơhngơ̆m inh pơchah yua kơ tơdrong mơlâu.
Inh oei chang bơngai mơnat kơ inh, mă-lei ưh kơ đei bu;
Inh chang đei bơngai pơlung, mă-lei ưh đei 'bôh bu.
21Lu sư ăn hla tăng pơm tơmam sa inh.
Păng ăn kơ inh nhă đak iŭ kơplah rơhing.
22Ăn kơ gơ'bang sŏng sa lu sư jing hơđong hơ'năk kơ lu sư.
Sŏng sa hiôk-hian nhen hơnhuăl hrơ̆p lu sư kơdih.
23Ăn kơiĕng lu sư pơpơ̆ hơnơ̆ng ăn kơ măt lu sư tol, ưh pă 'bôh dơ̆ng.
24Tuh bĕ tơdrong hil Ih tơ lu sư.
Ăn tơdrong hil mĭl Ih truh tơ lu sư.
25Ăn kơ anih oei lu sư jing juơ.
Ưh pă đei bu oei tơ lăm anih noh dơ̆ng.
26Yua kơ lu sư pơmat lu bơngai mă Kră Yang teh boih,
Păng lu sư chă roi tơdrong pơmat-tat lu bơngai mă Ih ăn đei rơka.
27Apinh Ih pơthim tơdrong kơnê̆ kơ tơdrong kơnê̆ lu sư;
'Nĕ jô̆ kơ lu sư đei lăm tơdrong tơpăt Ih.
28Sŭt lê̆ anăn lu sư đơ̆ng lăm sơ̆p hla bơar tơdrong arih.
Ưh kơ gơh chih tơmơ̆t hơdai hăm lu bơngai tơpăt
29Gah inh pơmat-tat răm-'băm:
Na ơ Kră Yang 'Bok Kei-Dei apinh Ih dŏng pơklaih păng hơtŏk inh tơ anih kơjung.
30Inh gô bơnê kơ anăn Kră Yang 'Bok Kei-Dei hăm nơ̆r hơri.
Yua nơ̆r bơnê na pơư pơang kơ Sư.
31Tơdrong âu lăp đon Kră Yang hloh kơ tơmam pơyơ̆r hăm rơmo,
Mă rơmo tơno đei hơke păng kơchôp blah.
32Lu bơngai pơmat-tat 'bôh tơdrong noh gô chơt hiôk,
Ơ lu bơngai mă krao chă Kră Yang 'Bok Kei-Dei.
Jơhngơ̆m lu iĕm gô arih.
33Yua kơ Kră Yang mơ̆ng lu bơngai dơnuh hin.
Ưh kơ đei areh ôh kơ lu bơngai mă đe pơm bơnă.
34Ơ plĕnh, teh, đak dơsĭ păng kon sem brem lăm noh,
đĭ-đăng bơnê bĕ kơ Sư.
35Yua kơ Kră Yang 'Bok Kei-Dei gô pơklaih Siôn păng wă pơjing dơ̆ng lu pơlei tih lăm Juđa;
Kon pơlei Sư gô oei tơ noh,
iŏk teh jang sa.
36Adrĕch adrung đĭch đam sư gô yua iŏk teh noh jang sa.
Dôm lu đe bu mă 'mêm kơ anăn Sư gô oei tơ noh.
Currently Selected:
Horiso 69: bdq
Highlight
Share
Copy
Want to have your highlights saved across all your devices? Sign up or sign in
©Bahnar Bible Association. All rights reserved.
Horiso 69
69
Nơ̆r ôr krao kơ tơgŭm
Tơdrong hơri Đawit pơm. Ăn kơ lu 'bok Thây tơm kiơ̆ tơ'nguơ̆ “pơkao tŏng-mŏng Sêsamin”
1Ơ Kră Yang 'Bok Kei-Dei! Apinh Ih dŏng pơklaih inh.
Yua kơ đak lơ̆p truh tơ hơko inh boih.
2Inh puh lăm hlŭt jrŭ,
anih chro jơ̆ng ưh pă tôch.
Inh glơ̆k lăm đak jrŭ, đak lơ̆p lê̆ inh.
3Inh ôr đĭ lap, hơlŏng inh đĭ kro;
Măt inh đĭ rơgah yua kơ chang gô Kră Yang 'Bok Kei-Dei.
4Lu bơngai areh kơ inh tơdrong kơđei, lơ hloh kơ sŏk kơpal kơ̆l inh;
Lu pơm ayăt kơ inh tơdrong kơ đei, lu bơngai wă pơrăm inh kơtang tơpă.
Inh athei 'mong dôm tơmam mă inh ưh kơ tơtông iŏk ră.
5Ơ Kră Yang 'Bok Kei-Dei! Ih băt kơ tơdrong kơtul kơwao inh.
Dôm tơdrong yoch inh ưh kơ gơh ôn kơ Ih.
6Ơ Kră Yang Tih Hloh 'nĕ ăn kơ lu bơngai chang gô Ih đei mơlâu yua kơ inh.
Ơ Kră Yang 'Bok Kei-Dei lu bơngai Isơrael!
'Nĕ ăn kơ lu bơngai mă chă Ih đe pơ'brơh yua kơ inh.
7Noh yua kơ Ih na inh pŭ iŏk tơdrong đe pơjăm,
tơdrong mơlâu 'bĕnh kơ muh măt inh.
8Inh jing thoi bơngai tơmoi kơ 'nhŏng oh inh.
Thoi gơ̆p nai kơ lu 'nhŏng oh drŏ-nglo kon mĕ inh
9Yua kơ tơdrong hưch hanh kơ Hnam Ih dang luăn sa inh.
Tơdrong đe hiĕk pơjăm Ih 'bơm boih tơ inh.
10Mă inh nhơ̆m ơh,
păng ơ̆t kơ sŏng sa.
Noh kư̆m pơm kơ inh mơlâu.
11Mă inh iŏk 'bi hrŭk pơm ao tai, Inh jing pơm kơ lu sư hiĕk ăr.
12Lu bơngai ngôi 'bơ̆t măng jang che bơle kơ inh;
Inh jing nơ̆r lu et tơdrô hơri jô̆.
13Mă-lei ơ Kră Yang!
Inh krao apinh kơ Ih!
Ơ Kră Yang 'Bok Kei-Dei lăm tơdrong Ih 'mêm mơnat apinh Ih tơl tơwih nơ̆r inh,
Hăm tơdrong dŏng pơklaih sĭt Ih.
14Apinh Ih dŏng pơklaih inh đơ̆ng lăm hlŭt,
'nĕ ăn kơ inh đom.
Tơgŭm kơ inh hlôi đơ̆ng lu bơngai areh kơ inh,
păng hlôi kơ đak jrŭ.
15'Nĕ ăn kơ đak lơ̆p inh,
păng sơlŭng jrŭ hiup inh.
'Bơ̆r hơlŭng hơlih klơ̆p inh.
16Ơ Kră Yang! Apinh Ih tơl tơwih kơ inh, yua kơ tơdrong 'mêm 'lơ̆ng Ih;
Kiơ̆ kơ tơdrong 'mêm mơnat Ih, apinh wih tơ inh.
17Apinh Ih 'nĕ kơ ôn muh măt Ih kơ inh,
Đĭch đam Ih, yua kơ inh oei pơmat-tat;
Jah drơ̆ng nơ̆r inh bĕ.
18Apinh Ih năm jê̆ inh păng huai iŏk bơhngol inh.
Apinh dŏng pơklaih inh đơ̆ng lu bơngai ayăt.
19Ih băt tơdrong mơlâu, tơdrong đe pơjăm pơjuă păng tơdrong đe pơ'brơh kơ inh.
Lu bơngai ayăt kơ inh oei 'bơ̆t anăp Ih.
20Inh pơmat-tat dêh,
jơhngơ̆m inh pơchah yua kơ tơdrong mơlâu.
Inh oei chang bơngai mơnat kơ inh, mă-lei ưh kơ đei bu;
Inh chang đei bơngai pơlung, mă-lei ưh đei 'bôh bu.
21Lu sư ăn hla tăng pơm tơmam sa inh.
Păng ăn kơ inh nhă đak iŭ kơplah rơhing.
22Ăn kơ gơ'bang sŏng sa lu sư jing hơđong hơ'năk kơ lu sư.
Sŏng sa hiôk-hian nhen hơnhuăl hrơ̆p lu sư kơdih.
23Ăn kơiĕng lu sư pơpơ̆ hơnơ̆ng ăn kơ măt lu sư tol, ưh pă 'bôh dơ̆ng.
24Tuh bĕ tơdrong hil Ih tơ lu sư.
Ăn tơdrong hil mĭl Ih truh tơ lu sư.
25Ăn kơ anih oei lu sư jing juơ.
Ưh pă đei bu oei tơ lăm anih noh dơ̆ng.
26Yua kơ lu sư pơmat lu bơngai mă Kră Yang teh boih,
Păng lu sư chă roi tơdrong pơmat-tat lu bơngai mă Ih ăn đei rơka.
27Apinh Ih pơthim tơdrong kơnê̆ kơ tơdrong kơnê̆ lu sư;
'Nĕ jô̆ kơ lu sư đei lăm tơdrong tơpăt Ih.
28Sŭt lê̆ anăn lu sư đơ̆ng lăm sơ̆p hla bơar tơdrong arih.
Ưh kơ gơh chih tơmơ̆t hơdai hăm lu bơngai tơpăt
29Gah inh pơmat-tat răm-'băm:
Na ơ Kră Yang 'Bok Kei-Dei apinh Ih dŏng pơklaih păng hơtŏk inh tơ anih kơjung.
30Inh gô bơnê kơ anăn Kră Yang 'Bok Kei-Dei hăm nơ̆r hơri.
Yua nơ̆r bơnê na pơư pơang kơ Sư.
31Tơdrong âu lăp đon Kră Yang hloh kơ tơmam pơyơ̆r hăm rơmo,
Mă rơmo tơno đei hơke păng kơchôp blah.
32Lu bơngai pơmat-tat 'bôh tơdrong noh gô chơt hiôk,
Ơ lu bơngai mă krao chă Kră Yang 'Bok Kei-Dei.
Jơhngơ̆m lu iĕm gô arih.
33Yua kơ Kră Yang mơ̆ng lu bơngai dơnuh hin.
Ưh kơ đei areh ôh kơ lu bơngai mă đe pơm bơnă.
34Ơ plĕnh, teh, đak dơsĭ păng kon sem brem lăm noh,
đĭ-đăng bơnê bĕ kơ Sư.
35Yua kơ Kră Yang 'Bok Kei-Dei gô pơklaih Siôn păng wă pơjing dơ̆ng lu pơlei tih lăm Juđa;
Kon pơlei Sư gô oei tơ noh,
iŏk teh jang sa.
36Adrĕch adrung đĭch đam sư gô yua iŏk teh noh jang sa.
Dôm lu đe bu mă 'mêm kơ anăn Sư gô oei tơ noh.
Currently Selected:
:
Highlight
Share
Copy
Want to have your highlights saved across all your devices? Sign up or sign in
©Bahnar Bible Association. All rights reserved.