Horiso 66
66
Bơnê kơkuh kơ Kră Yang 'Bok Kei-Dei
Tơdrong hơri. Pơm ăn kơ lu thây tơm.
1Ơ đĭ-đăng lăm teh đak chhôk ngă 'nă hal bĕ kơ Kră Yang 'Bok Kei-Dei.
2Hơri ư-ang kơ anăn Sư păng pôk bơnê kơ Sư bĕ.
3Pơma bĕ hăm Kră Yang 'Bok Kei-Dei khan: “Dôm tơdrong jang Ih trŏ kơ hli yom tơpă!
Đơ̆ng tơdrong mơsêh tih Ih; na dôm lu ayăt gô wih hli yom kơ Ih.
4Jơ̆p-jang kơpal teh đak kơkuh kơ Ih.
Hơri bơnê kơ ih.
Lu sư hơri bơnê anăn Ih.” Sêla
5Năm lăng, bĕ dôm tơdrong jang
Kră Yang 'Bok Kei-Dei: Tơdrong jang Sư pơm kơ kon bơngai trŏ hli yom tơpă.
6Sư tơplih đak dơsĭ jing teh hrĕng kro.
Kon bơngai yak jơ̆ng tŏk kơ đak krong. Bĕ bơ̆n chơt hiôk lăm Sư.
7Sư yua tơdrong mơsêh mơyang Sư pơgơ̆r ling-lang hloi;
Măt Sư sek lăng lu dêh char:
Ơ lu bơngai ayăt 'nĕ kơ pơang. Sêla
8Ơ kon pơlei pơla, kơkuh bơnê bĕ kơ Kră Yang 'Bok Kei-Dei lu bơ̆n. Ăn kơ đe kơtơ̆ng nơ̆r iĕm ư-ang Kơ Sư.
9Sư boih bơwei tơdrong arih lu bơ̆n.
Ưh kơ ăn jơ̆ng lu bơ̆n tơpling.
10Yua kơ, ơ Kră Yang 'Bok Kei-Dei ih pơlong lăng lu nhôn thoi rơ̆ Hu.
11Ih ba lu nhôn puh lăm hơnhuăl.
Ih tơpŭ ăn tơ kơdŭ lu nhôn trăp dêh.
12Ih ăn kơ đe hao tơ kơpal kơ̆l lu nhôn;
Lu nhôn năm hlôi kơ đak, yak mơ̆t hlôi kơ ŭnh
Mă-lei Ih ăn kơ lu nhôn lĕch năm tơ anih đei tơmam sa rơkah rơkai.
13Inh gô iŏk tơmam soi 'buh na mơ̆t lăm hnam Ih.
Pơkeh kơ nơ̆r đêl inh pơkă hăm Kră Yang.
14Đêl hơkŭng inh đei pơkă;
Mă 'bơ̆r inh pơma, 'bơ̆t năr pơmat-tat.
15Inh pơyơ̆r kơ Kră Yang sem dơrong bek 'lơ̆ng wă pơm tơmam soi 'buh.
Hơdai hăm triu tơno pơm tơmam soi 'buh.
Inh kư̆m gô pơyơ̆r lu rơmo tơno păng bơbe bram. Sêla
16Ơ lu bơngai mă băt hli yom kơ Kră Yang 'Bok Kei-Dei, mơ̆ng bĕ.
Inh gô roi dôm tơdrong mă Kră Yang đei pơm kơ bơhngol inh;
17'Bơ̆r inh krao apinh Sư,
păng hơpiĕt inh ư-ang kơ Sư.
18Tơdah jơhngơ̆m inh mong răk tơdrong kơnê̆;
Lei Kră Yang 'Bok Kei-Dei kuă kơ mơ̆ng nơ̆r inh.
19Tơpă Kră Yang 'Bok Kei-Dei mơ̆ng boih;
Sư pơgling boih đon mơ̆ng nơ̆r inh krao khan.
20Kơkuh bơnê kơ Kră Yang 'Bok Kei-Dei, yua kơ sư ưh kơ đei sơngah kơ nơ̆r inh krao khan.
Kŭm ưh kơ đei lê̆ iŏk tơdrong Sư 'mêm kơ inh.
Currently Selected:
Horiso 66: bdq
Highlight
Share
Copy
Want to have your highlights saved across all your devices? Sign up or sign in
©Bahnar Bible Association. All rights reserved.
