Mat 23
23
1Kơplah noh Yêsu pơma kơ lu bơngai tơpôl păng lu bơngai pơhrăm păng Sư thoi âu: 2“Lu thây bơtho tơdrong juăt đe Juđê păng lu khŭl Pharisi lu sư bơtho bơ̆n tơdrong juăt Môis pơkă. 3Iĕm athei pơm kiơ̆ thoi sư bơtho păng rok dôm tơdrong sư pơkă. Mă-lei iĕm 'nĕ kiơ̆ thoi tơdrong arih lu sư. Tơdrong lu sư bơtho 'lơ̆ng ră, mă-lei lu sư ưh kơ kiơ̆ tơdrong 'lơ̆ng noh ôh. 4Lu sư pơkă kơ iĕm lơ tơdrong juăt kiơ̆ kơ lu sư tơchĕng kơdih, kư̆m dang lĕ lu sư tơpŭ kơ iĕm tơmam trăp hloh kơ ai tơ̆p pă kĕ gơrŭn, dah wă kiơ̆ pơđĭ tơdrong juăt noh, iĕm ưh kơ kĕ ôh păng lu sư ưh kơ tơgŭm iĕm hơya tŏ sĕt.
5“Dôm tơdrong sư pơm, sư wă kơ đe 'bôh na ư-ang kơ sư, khan sư bơngai 'lơ̆ng. Kơdŭng lu sư tah hla bơar 'Bok Kei-Dei mă lu sư chô̆ 'băk tơ ako dah chô̆ bĕng tơ kơkŏng, kơdŭng noh lu sư pơm mă tih wă kơ đe 'bôh nhên; ao lu sư sĭt mă tai wă kơ đe 'bôh na ư-ang kơ lu sư. 6Kơplah akŭm lăm hnam 'Bok Kei-Dei păng lăm năr et sa tih, lu sư wă oei tang-dŏ 'lơ̆ng hloh kơ đe. 7Lu sư wă kơ đe kơkuh kơ sư tơ anih đe akŭm tơpôl păng wă kơ đe krao lu sư 'bok thây.
8“Gah lu iĕm, iĕm 'nĕ ăn đe krao lu iĕm 'bok thây hŏ, yua kơ iĕm đei minh 'nu 'Bok Thây boih, đĭ-đăng kơ iĕm jing 'nhŏng oh ngăl đĕch. 9Păng iĕm 'nĕ krao lu bơngai ala teh âu 'bă, yua kơ iĕm đei minh 'nu 'Bă tơ plĕnh ti boih. 10Iĕm 'nĕ chă athei đe krao kơ iĕm yŏng, yua kơ iĕm đei minh 'nu Krist boih Yŏng iĕm. 11Lăm lu iĕm bu wă pơm tih, bơngai noh athei pơm thoi lĕ đĭch đam iĕm. 12Bơngai bu pơma pơang akâu sư wă kơ đe pôk sư pơm tih, bơngai noh ning-mônh sư gô mơlâu hloh kơ đe. Bơngai bu ưh kơ hơnhŏ chă pơang akâu sư kơ đe, bơngai noh 'Bok Kei-Dei mơnat, ăn kơ sư pơm tih.
Yêsu lach kơ lu 'bok thây păng lu bơngai kiơ̆ tơdrong Pharisi
13“Ơ lu thây bơtho đe Juđê păng bơngai kiơ̆ tơdrong Pharisi, ning-mônh iĕm pơmat-tat dêh, yua kơ iĕm bơngai 'bơ̆r đak klak ŭnh. Iĕm pơgăn đe kiơ̆ tơdrong 'Bok Kei-Dei pơgơ̆r, tơ'ngla iĕm kơdih kuă kơ kiơ̆, mưh đe wă kiơ̆ na iĕm nŏng kơ pơgăn đe. 14Ơ lu thây bơtho đe Juđê păng lu bơngai kiơ̆ tơdrong Pharisi, ning-mônh iĕm pơmat-tat dêh yua kơ iĕm bơngai 'bơ̆r đak klak ŭnh. Iĕm chă pơgŏ iŏk tơmam lu drŏ-kăn adro păng pơm pơrŏ akâu krao khan kơ 'Bok Kei-Dei đunh wă kơ đe jô̆ iĕm khan bơngai 'lơ̆ng. Iĕm pơm thoi noh, ning-mônh 'Bok Kei-Dei phak iĕm hloh kơ lu bơngai nai.
15“Ơ lu thây bơtho đe Juđê păng lu bơngai kiơ̆ tơdrong Pharisi, ning-mônh iĕm pơmat-tat dêh, yua kơ iĕm bơngai 'bơ̆r đak klak ŭnh. Iĕm kư̆ kơ năm bơtho jơ̆p-jang kơ teh đak, tơ minh 'nu bơngai kư̆m năm bơtho, mă tơdrong bơtho, iĕm ưh kơ bơtho sư pơm 'lơ̆ng ôh, rai pơm kơnê̆ hloh kơ iĕm dơ̆ng.
16“Ơ lu iĕm, khan bơngai 'bôh hơdah wă tơ'bôh kơ đe trong, mă-lei iĕm dang bơngai măt tol. Ning-mônh iĕm pơmat-tat dêh, yua kơ iĕm khan dah bu wă mơng tơmam kiơ kiơ wă kơ băt sư gô 'mong, athei bơngai noh tơhlâu hnam akŭm 'Bok Kei-Dei tơm. Mă-lei dah sư pơm thoi noh tơpă, iĕm khan tŭk tơdrong 'mong dơ̆ng kư̆m bưh. Dah sư tơhlâu maih hnam akŭm 'Bok Kei-Dei noh iĕm khan trŏ kơ 'mong. 17Ơ bơngai kơhlôh, thoi bơngai măt tol, lơliơ iĕm tơchĕng thoi noh? Hnam 'Bok Kei-Dei kăl hloh kơ maih. Maih yua kơ đe man tơ hnam 'Bok Kei-Dei đĕch na lăng nhen kăl. 18Păng iĕm khan dah bu wă mơng tơmam kiơ kiơ wă kơ băt sư gô 'mong tơpă, iĕm athei bơngai noh tơhlâu chơnang 'măn tơmam soi kơ 'Bok Kei-Dei. Mă-lei dah bơngai noh sư pơm thoi noh tơpă, iĕm khan bơngai noh tŭk tơdrong 'mong dơ̆ng kư̆m bưh. Dah sư tơhlâu tơmam soi 'măn kơpal chơnang soi noh iĕm khan trŏ kơ 'mong. 19Ơ bơngai dang kơ măt tol, iĕm hăm băt chơnang 'măn tơmam soi kăl hloh kơ tơmam soi? Tơmam soi yua kơ 'măn kơpal chơnang soi noh đĕch na lăng thoi lĕ kăl.
20“Yua kơ thoi noh na dah bu wă 'mong kơ đe tơmam tơpă na sư tơhlâu chơnang 'măn tơmam soi, dang sư tơhlâu đĭ-đăng chơnang soi păng tơmam soi noh mơ̆n. 21Na bơngai wă 'mong kơ đe tơmam, sư tơhlâu hnam akŭm 'Bok Kei-Dei tơm, noh kư̆m dang sư tơhlâu 'Bok Kei-Dei oei lăm hnam noh mơ̆n. 22Bơngai wă 'mong kơ đe tơmam, dah sư tơhlâu plĕnh, noh kư̆m dang tơhlâu anih 'Bok Kei-Dei, kư̆m dang tơhlâu akâu 'Bok Kei-Dei mơ̆n.
23“Ơ lu thây bơtho đe Juđê păng lu bơngai kiơ̆ tơdrong Pharisi, ning-mônh iĕm pơmat-tat dêh, yua kơ iĕm bơngai 'bơ̆r đak klak ŭnh. Iĕm pơm hăt hot tĕch lu tơmam hơi thoi lĕ kơ hla lŭng-hŭng, hla gơsơ̆m, hla ĕch, hla hla-kat, iŏk jên noh pơm pơyơ̆r kơ 'Bok Kei-Dei minh lăm mơjĭt. Mă-lei dôm tơdrong juăt 'Bok Kei-Dei mă kăl hloh thoi lĕ kơ pơm 'lơ̆ng kơ đe, athei 'mêm kơ 'Bok Kei-Dei hăm bôl buăl, tơdrong lui kơ 'Bok Kei-Dei, dôm tơdrong noh iĕm pơhơi ưh kơ wă pơm. Mă tơdrong iĕm pơyơ̆r tơmam hơi noh kư̆m trŏ mơ̆n, mă-lei ưh kơ dang bơ̆n kiơ̆ tơdrong juăt noh hei. 24Iĕm khan bơngai tơ'bôh kơ đe trong, mă-lei dang bơngai măt tol. Tơdrong kăl iĕm pơhơi, tơdrong hơi iĕm hăt hot. 'Noh dang iĕm chơkơih tŭk 'bruih iĕ lăm kơchŏk đak, mă tŏ aseh iĕm ưh kơ 'bôh, nhă luăn jrok hloi.
25“Ơ lu thây bơtho đe Juđê păng lu bơngai kiơ̆ tơdrong Pharisi, ning-mônh iĕm pơmat-tat dêh, yua kơ iĕm bơngai 'bơ̆r đak klak ŭnh. Iĕm hăt hot kơ ôp pơnhan hăm kơchŏk hơdrol kơ sŏng sa, khan trŏ tơdrong juăt 'Bok Kei-Dei, mă-lei tơmam sa iĕm lăm pơnhan hăm kơchŏk đak iĕm noh iĕm tơgar iŏk đơ̆ng đe. 26Ơ bơngai Pharisi, dang kơ măt tol, iĕm 'nĕ pă tơgar iŏk dôm tơmam sa đe 'mơ̆i, na 'Bok Kei-Dei 'bôh tơdrong iĕm ôp bơ̆n pơnhan bơ̆n kơchŏk noh 'lơ̆ng.
27“Ơ lu thây bơtho đe Juđê păng lu bơngai kiơ̆ tơdrong Pharisi, ning-mônh iĕm pơmat-tat dêh, yua kơ iĕm bơngai 'bơ̆r đak klak ŭnh. Lăng akâu iĕm rŏ thoi bơsat đe 'nao pơm, mă-lei lăm to đei atâu ôm. 28Đe lăng akâu akar iĕm gah 'ngoaih kư̆m thoi noh mơ̆n, rŏ kơ bơngai pơm 'lơ̆ng kơ đe, mă-lei lăm to iĕm ling-lang kơ hơlĕnh păng pơm kơnê̆ kơ đe.
29“Ơ lu thây bơtho đe Juđê păng lu bơngai kiơ̆ tơdrong Pharisi, ning-mônh iĕm pơmat-tat dêh, yua kơ iĕm bơngai 'bơ̆r đak klak ŭnh. Iĕm pơm chă pơrŏ hơmet ming lu bơsat bơngai pơtruh nơ̆r 'Bok Kei-Dei păng bơsat lu bơngai 'lơ̆ng tơpăt, wă kơ 'lơ̆ng rŏ. 30Na iĕm khan: ‘Dah bơ̆n arih hơdai lu yă 'bok bơ̆n sơ̆, bơ̆n ưh kơ pơlôch lu bơngai pơtruh nơ̆r 'Bok Kei-Dei thoi lu sư sơ̆ ôh.’ 31Iĕm krao lu sư yă 'bok noh trŏ tơpă yua kơ iĕm oei wă pơm thoi lu sư. 32Iĕm wă pơm thoi lu sư noh pơm bĕ. 33Iĕm pơm thoi lĕ kơ klăn tih 'bih tur makkang, ning-mônh 'Bok Kei-Dei phak iĕm lăm dơnâu ŭnh tơpă. 34Inh gô wơh lu bơngai pơtruh nơ̆r 'Bok Kei-Dei, lu bơngai hơgei, lu bơngai pơm 'bok bơtho năm bơtho iĕm, na 'blep kơ lu iĕm rôp pơlôch, mơ'nah iĕm pơ̆ng tơ 'long pơglang, mơ'nah iĕm teh tach lu sư păng sơnguĕt lăm hnam akŭm iĕm. Păng iĕm kư̆m pơpuh lu sư jăk đơ̆ng pơlei âu pơlei to. 35Lu bơngai 'lơ̆ng lôch yua kơ lu bơngai thoi iĕm âu lơ boih tơpă, đơ̆ng Kain pơlôch Abel blŭng-a sơ̆ truh tơ iĕm pơlôch Sachari kon 'bok Barachi tơ hnam 'Bok Kei-Dei tơm. 36Inh khan kơ iĕm tơpă, yua kơ dôm lu bơngai mă yă 'bok iĕm pơlôch noh 'Bok Kei-Dei kư̆m wă phak iĕm hơgop hăm lu sư mơ̆n.
Yêsu 'mêm mơnat kơ lu bơngai Pơlei Jêrusalem
37“Ơ lu bơngai Pơlei Jêrusalem, iĕm pơlôch kơ kiơ lu bơngai 'Bok Kei-Dei wơh pơtruh nơ̆r Sư kơ iĕm, iĕm iŏk tơmo klơ̆m pơlôch lu sư? Inh lung iĕm năm akŭm tơ Inh lơ wơ̆t boih ră, dang iĕr krao kon sư wă krôp ră, mă-lei iĕm kuă kơ năm. 38Na dang ei 'Bok Kei-Dei wă achăng tŭk pơlei iĕm boih. 39Inh khan kơ iĕm tơpă, iĕm pă 'bôh muh măt Inh boih tơ̆p truh năr Inh jur dơ̆ng ning-mônh na iĕm khan: ‘Ư-ang kơ Yêsu đơ̆ng 'Bok Kei-Dei wơh jur tơ bơ̆n dơ̆ng.’ ”
Đei tơdrong gleh truh
Currently Selected:
Mat 23: bdq
Highlight
Copy
Compare
Share
Want to have your highlights saved across all your devices? Sign up or sign in
©Bahnar Bible Association. All rights reserved.