Mat 18
18
1Hơtai noh lu bơngai pơhrăm păng Sư năm jet Sư khan: “Dôm lu bơngai 'Bok Kei-Dei pơgơ̆r bu pơm tih 'biơ̆?” 2Na Yêsu krao minh 'nu bơngai 'lơ̆p ăn kơ sư oei tŏk-bŏk lu sư. 3Na Yêsu khan: “Iĕm lăng bơngai 'lơ̆p âu sư ưh kơ đei layơ pơma pơang akâu kơdih. Inh khan kơ iĕm tơpă, dah iĕm khan wă kơ 'Bok Kei-Dei pơgơ̆r iĕm, lei iĕm athei tơplih ming jơhngơ̆m đon iĕm kiơ̆ thoi bơngai 'lơ̆p âu. 4Dah iĕm pơm kiơ̆ bơngai 'lơ̆p âu ưh kơ pơang akâu, lei bơngai noh boih pơm tih lu bơngai mă 'Bok Kei-Dei pơgơ̆r. 5Bơngai bu sơng iŏk bơngai 'lơ̆p âu yua kơ bơngai 'lơ̆p âu lui kơ Inh, bơngai noh dang sơng iŏk Inh. 6Bơngai bu pơtuah lu bơngai hơ'lơ̆p mă lui kơ Inh 'lơ̆ng hloh đe jah chô̆ ako sư hăm tơpăl tơmo tih, hơtat lê̆ sư tơ klŏng đak dơsĭ, lei sư hiôk 'biơ̆ yua kơ sư huay kơ gơh pơtuah lu hơ'lơ̆p. 7Tơpă yơh bơ̆n gô đei tơdrong đe pơhlŭ bơ̆n pơm yoch, mă-lei lu bơngai pơhlŭ bơ̆n noh, ning-mônh 'Bok Kei-Dei gô phak pơmat lu sư kal dêh.
8“Dah minh pah ti iĕm dah jơ̆ng iĕm pơm kơ iĕm yoch, chơ̆ng tŭk minh pah ti dah jơ̆ng noh, na oei pă minh pah ti dah jơ̆ng noh, mă-lei gơh mơ̆t oei hăm 'Bok Kei-Dei ling-lang. 'Noh 'lơ̆ng hloh kơ iĕm oei tôm 'bar pah jơ̆ng ti mă-lei wă huŏng pơđĭ hăm akâu tơ dơnâu ŭnh ưh kơ layơ păt. 9Dah minh pah măt iĕm pơm kơ iĕm yoch, kuek tŭk minh pah măt iĕm noh, na oei pă minh pah măt mă-lei gơh mơ̆t oei hăm 'Bok Kei-Dei ling-lang. 'Noh 'lơ̆ng hloh kơ iĕm oei tôm 'bar pah măt mă-lei huŏng tơ dơnâu ŭnh 'Bok Kei-Dei phak. 10Inh khan kơ iĕm tơpă, iĕm 'nĕ chă pơjăm pơjuă lu bơngai hơ'lơ̆p yua kơ lu sư đei linh jang 'lơ̆ng wei-lăng. Linh jang 'lơ̆ng noh oei hơdai hăm 'Bok Kei-Dei 'Bă Inh ling-lang. 11Inh Kon Bơngai truh wă pơklaih kon bơngai hiong hiơt kơ 'Bok Kei-Dei.
Triu hiong
12“Pơtih gia minh 'nu bơngai đei minh-hrĕng tŏ triu na hiong minh pôm tơ nai, sư lê̆ tơsĭn-jĭt tơsĭn noh chă sa tơ groi, na tơ'ngla sư năm chă minh pôm hiong noh tơ̆p 'bôh. 13Inh khan kơ iĕm dơ̆ng, lăp sư chă triu sư mă hiong noh 'bôh boih sư chhơp tơpă hloh kơ sư chhơp kơ tơsĭn-jĭt tơsĭn mă ưh kơ hiong noh. 14Mă 'Bă bơ̆n tơ plĕnh ti kư̆m thoi noh mơ̆n, Sư ưh kơ wă kơ minh 'nu bơngai 'lơ̆p thoi âu hiong răm.
'Nhŏng oh bơ̆n wă tơhil hăm bơ̆n
15“Dah bôl buăl bơngai lui pơm kơnê̆ kơ iĕm, iĕm athei khan kơ sư kơdrô̆ biĕm. Dah sư chu kơ iĕm khan, lei iĕm oei hiôk hăm sư. 16Dah sư ưh kơ chu kơ nơ̆r iĕm khan, lei iĕm krao 'bar pêng 'nu 'nhŏng oh bơngai lui năm kiơ̆ mơ̆ng biĕm pơma băl, wă kơ lu bơngai mă kiơ̆ mơ̆ng biĕm noh, băt kơ tơdrong iĕm pơma dih băl noh thoi yơ. 17Dah sư ưh tam mă chu kơ lu bơngai kơdranh pơma lei iĕm khan kơ lu bơngai mă akŭm lăm hnam 'Bok Kei-Dei. Dah sư oei sơngah ưh kơ chu kơ lu bơngai akŭm lăm hnam 'Bok Kei-Dei lei iĕm lăng sư thoi bơngai tơmoi khŭl nai păng thoi bơngai iŏk jên thuê̆ đĕch. 18Inh khan kơ iĕm tơpă, tơdrong kiơ iĕm khă kuă ăn đe pơm tơ teh âu, 'Bok Kei-Dei tơ plĕnh ti kư̆m khă ưh kơ ăn mơ̆n. Tơdrong kiơ iĕm wă kơ đe pơm tơ teh âu, Sư kư̆m wă thoi noh mơ̆n. 19Inh khan dơ̆ng thoi âu, dah 'bar 'nu bre bu oei tơ teh âu pôm đon dih băl krao khan wă apinh Sư tơdrong kiơ, 'Bă bơ̆n mă oei tơ plĕnh ti Sư gô asong tơdrong bre bu mă apinh noh tơpă. 20Mă rim anih tơ yơ yơ, mă 'bar pêng 'nu bơngai dah akŭm băl tơdrong Inh, Inh kư̆m oei hơdai lu bơngai noh tơ noh.”
Minh 'nu băt mơnat kơ bôl, minh 'nu ưh
21Pêtrôs năm jet Yêsu: “Ơ 'Bok, dah inh đei 'nhŏng oh bơngai lui, sư pơm kơnê̆ hil kơ inh, truh dôm 'măng sư hil inh huay kơ jô̆ yo? Hăm trŏ hloh kơ tơpơh 'măng na inh jô̆ yo?” 22Yêsu khan: “Ưh ôh. Inh wă kơ ih huay kơ jô̆ yo truh tơ dôm hrĕng 'măng. 23Inh khan thoi noh yua kơ 'Bok Kei-Dei wă pơgơ̆r bơ̆n thoi âu: Pơtih gia đei minh 'nu 'bok pơtao tak lăng hla bơar lu bơngai jang kơ sư hre đom kơ sư. 24Sư jet lu bơngai mă hre đom kơ sư noh, na đe năm ba kơ sư minh 'nu bơngai hre kơ sư mơjĭt-rơbâu jên hu. 25Mă-lei sư ưh kơ đei jên wă kla ôh. Na 'bok pơtao athei sư tĕch đĭ akâu sư, kon akăn sư păng mŭk tơmam sư, wă kla tơdrong sư hre noh jah tôch. 26Na bơngai mă hre kơ sư ei sơtơ̆p kŭl-tăng kơkuh kơ 'bok pơtao. Sư khan: ‘Ơ 'bok, apinh ih gô 'biơ̆, inh gô duh kơ ih tôm.’ 27'Bok pơtao 'bôh bơngai hre pơma sơdrĭ sơdrôi thoi noh na sư mơnat. Sư ăn bơngai mă hre kơ sư noh brŏk tơ hnam păng tŭk đĭ dôm rơbâu đêl hre noh. 28Bơngai mă hre kơ 'bok pơtao noh brŏk tơ hnam, sư tơ'bơ̆p minh 'nu bôl sư kư̆m jang kơ 'bok pơtao. Bôl sư hre kơ sư lăp minh hlak jên hu đĕch, mă-lei sư pơplŏng rôp ket ako bôl sư păng khan: ‘Duh tôm bĕ na inh achăng.’ 29Na bôl sư sơtơ̆p kŭl-tăng 'bơ̆t jơ̆ng sư păng khan: ‘Ơ 'nhŏng, apinh ih gô 'biơ̆, inh gô duh kơ ih tôm.’ 30Mă-lei bơngai mă đêl hre kơ 'bok pơtao noh ưh kơ băt mơnat kơ bôl sư, sư tah bôl sư lăm hnam phak tơ̆p mă bôl sư duh tôm na tơlĕch. 31Lu bôl buăl nai 'bôh sư pơm kơ bôl sư thoi noh, lu sư sơ'ngon dêh păng năm roi hloi kơ 'bok pơtao dôm tơdrong sư pơm kơ bôl sư noh. 32'Bok pơtao kơtơ̆ng thoi noh krao sư păng khan: ‘Ơ bơngai jang kơ inh, ih pơm kơnê̆ dêh. Inh tŭk đĭ dôm jên ih hre kơ inh noh boih yua kơ ih apinh inh athei mơnat kơ ih, 33na lơliơ ih ưh kơ băt mơnat kơ bôl ih thoi inh mơnat kơ ih?’ 34'Bok pơtao ơh kơ bơngai noh ưh kơ băt mơnat kơ bôl sư, na 'bok pơtao jao bơngai noh kơ 'bok tih wei hnam phak, chĭt sư lăm hnam phak tơ̆p sư duh tôm kơ 'bok pơtao. 35Tơdrong 'noh thoi noh boih, na 'Bă bơ̆n tơ plĕnh ti gô pơm kơ iĕm thoi noh mơ̆n, dah iĕm ưh kơ mơnat kơ tơdrong yoch 'nhŏng oh iĕm hăm đĭ jơhngơ̆m.”
Tơdrong kuă ăn achăng akăn
Currently Selected:
Mat 18: bdq
Highlight
Copy
Compare
Share
Want to have your highlights saved across all your devices? Sign up or sign in
©Bahnar Bible Association. All rights reserved.