Mat 1
1
Anăn lu 'bok kơdră Yêsu sơ̆
1Yêsu Krist kon sâu pơtao Đawit, mă 'bok kơdră lu sư Abraham. Na tơ ala âu jô̆ tôm lu anăn 'bok kơdră Yêsu Krist sơ̆:
2Abraham pơjing Isăk, Isăk pơjing Jakôp, Jakôp pơjing Juđa hăm lu 'nhŏng oh sư. 3Juđa pơjing Pêres hăm Sêra, mĕ bre sư Tamar, Pêres sư pơjing Hêsrôn, Hêsrôn pơjing Ram, 4Ram pơjing Amminađap, Amminađap pơjing Nasôn, Nasôn pơjing Salmôn. 5Salmôn hăm akăn sư Rahap pơjing đei kon drŏ-nglo, anăn sư Bôas. Bôas hăm akăn sư Rut kư̆m pơjing đei kon drŏ-nglo anăn sư Ôbêt, Ôbêt pơjing Jesê. 6Jesê âu boih pơjing pơtao Đawit. Akăn Đawit đơ̆ng akăn Uri sơ̆ bre sư Đawit pơjing Sôlômôn. 7Sôlômôn pơjing Rôbôam, Rôbôam pơjing Abijah, Abijah pơjing Asa, 8Asa pơjing Jêhôsaphat, Jêhôsaphat pơjing Jôhôram, Jôhôram pơjing Ussia, 9Ussia pơjing Jôtham, Jôtham pơjing Ahas, Ahas pơjing Hesekia, 10Hesekia pơjing Manase, Manase pơjing Amôn, Amôn pơjing Jôsia, 11Jôsia pơjing Jekonia hăm lu 'nhŏng oh sư. Đơ̆ng noh boih lu bơngai Babilôn rôp anhăk lu bơngai Isơrael tơ dêh lu sư.
12Kơplah lu sư oei tơ dêh Babilôn na Jekonia pơjing Sealtien, Sealtien pơjing Serupbabel, 13Serupbabel pơjing Abiut, Abiut pơjing Êliakim, Êliakim pơjing Asôr, 14Asôr pơjing Satôk, Satôk pơjing Achim, Achim pơjing Êliut, 15Êliut pơjing Êlêasar, Êlêasar pơjing Mathan, Mathan pơjing Jakôp, 16Jakôp pơjing Yôsep, Yôsep klo Mari. Mari pơjing Yêsu, mă đe anăn Krist. Yêsu Krist âu boih bơngai mă 'Bok Kei-Dei ăn wă pơm pơtao bơ̆n.
17Đơ̆ng Abraham truh tơ Đawit đei mơjĭt-puăn jơhnơr, đơ̆ng Đawit truh tơ đe rôp anhăk lu bơngai Isơrael tơ dêh Babilôn đei mơjĭt-puăn jơhnơr, đơ̆ng đe rôp bơngai Isơrael truh tơ đe đei tơpŭ kơ nge Yêsu Krist đei mơjĭt-puăn jơhnơr mơ̆n.
Mari tơpŭ kơ Yêsu Krist
18Đe tơpŭ kơ Yêsu sơ̆ thoi âu: Mari sơkơ̆t hăm Yôsep. Adrol kơ bre sư tơoei băl Mari băt akâu sư anăp boih, yua kơ Yang Bơhngol 'Lơ̆ng đơ̆ng 'Bok Kei-Dei ăn kơ sư thoi noh. 19Klo sư Yôsep bơngai 'lơ̆ng tơpăt, sư ưh kơ pơjăm Mari ngôi kư̆ kă hăm đe wă kơ sư mơlâu kơ đe ôh. Sư tơchĕng wă achăng Mari ră, mă-lei sư ưh kơ đei roi kơ đe ôh. 20Kơplah sư oei tơchĕng tơdrong 'noh, na măng noh sư apo 'bôh linh jang 'lơ̆ng 'Bok Kei-Dei jur khan kơ sư thoi âu: “Ơ Yôsep, kon sâu Đawit, ih 'nĕ kơ hli iŏk Mari pơm akăn ih, mă sư oei anăp dang ei noh đơ̆ng Yang Bơhngol 'Lơ̆ng ăn kơ sư. 21Sư gô tơpŭ kơ minh 'nu kon drŏ-nglo, ih anăn Sư Yêsu, yua kơ Sư wă dŏng pơklaih bơngai bu mă lui kơ Sư đơ̆ng tơdrong yoch.” 22Dôm tơdrong 'noh 'blep trŏ thoi 'Bok Kei-Dei ăn kơ minh 'nu bơngai khan lê̆ hơdrol sơ̆ thoi âu:
23“Đei minh 'nu adruh gô anăp wă tơpŭ kon drŏ-nglo,
Đe anăn kon Sư noh Êmanuel,”
Êmanuel wă khan: 'Bok Kei-Dei oei hơdai hăm bơ̆n.
24Yôsep iung đơ̆ng tep, sư pơm kiơ̆ dôm tơdrong thoi linh jang 'lơ̆ng 'Bok Kei-Dei khan kơ sư păng sư oei hloi kơ Mari pơm akăn sư. 25Mă-lei sư ưh kơ đei ngôi hơdai hăm Mari truh tơ năr Mari tơpŭ kơ kon nge 'noh. Na Yôsep anăn kon nge 'noh Yêsu.
Lu 'bok pơjâu chă Yêsu 'nao tơpŭ
Currently Selected:
Mat 1: bdq
Highlight
Share
Copy
Want to have your highlights saved across all your devices? Sign up or sign in
©Bahnar Bible Association. All rights reserved.