Le 22
22
Tơdrong juăt duh tơtông klĕ
1Bơngai bu tơtông klĕ rơmo dah triu, klaih kơ noh pơlôch dah tĕch lê̆, sư athei duh pơđăm tŏ rơmo ăn kơ đơ̆ng minh pôm rơmo păng puăn tŏ triu ăn kơ đơ̆ng minh pôm triu, 2tơdah bơngai tơtông klĕ oei chơkơ̆ 'măng na đe rôp păng teh pơlôch, bơngai teh pơlôch ưh kơ đei yoch.
3Mă-lei tơdah teh pơlôch kơplah 'năr đĭ lĕch boih, 'noh sư pŭ yoch pơlôch bơngai. Mă-lei tơdah teh pơlôch kơ'năr boih, sư pŭ yoch pơlôch bơngai, bơngai tơtông athei duh; tơdah ưh kơ đei kiơ, thoi noh đe gô tĕch sư, yua kơ tơdrong tơtông klĕ sư. 4Dah tơmam mă bơngai tơtông kah đei iŏk, rơmo, aseh, dah triu, oei 'bôh arih lăm tơpang ti sư, lei bơngai tơtông khŏm duh hơgăt 'bar.
5Tơdah bu ngơ̆r pơrăm achăng sem dơrong sư chă sa tơ lăm na chŭn đe dah lăm pơgar hơmu, bơngai 'noh athei iŏk tơmam 'lơ̆ng hloh đơ̆ng lăm chŭn mir sư, dah đơ̆ng lăm pơgar hơmu sư na duh kơ đe.
6Tơdah bu soh jơ'bôt jơla na bơmrok truh tơ 'ba đe chô̆ bơih dah sa kơtă kơ tơm, bơyan 'ba, dah sa pơđĭ lăm chŭn, bơngai mă soh ŭnh sa 'noh athei duh tôm tơmam đêl ŭnh sa 'noh.
7Tơdah bơngai bu pơjao jên dah tơmam ăn kơ bôl buăl sư wei, na đei bơngai tơtông đơ̆ng hnam bơngai wei 'noh, dah đei rôp bơngai tơtông 'noh sư athei duh hloh 'bar wơ̆t. 8Tơdah ưh kơ đei rôp bơngai tơtông, tơ'ngla hnam wei jên noh athei năm pơdah sư kơdih 'bơ̆t anăp 'bok sek tơlang đơ̆ng Kră Yang 'Bok Kei-Dei, pơdah wă kơ tơbăt sư ưh kơ đei iŏk tơmam buôl buăl sư noh.
9Lăm tơdrong tơmam hiong đe oei pơjah băl gah kon rơmo, aseh, minh pôm kon triu, hơbĕn ao dah tơmam kiơ hiong, na đei bơngai khan: Noh tơmam inh tơpă athei anhăk ba bre sư 'noh 'bơ̆t anăp sek tơlang đơ̆ng Kră Yang 'Bok Kei-Dei, dah 'bok sek tơlang khan trŏ kơ bu noh athei duh ăn kơ buăl sư hloh 'bar 'măng,
10Tơdah bơngai bu pơjao ăn aseh, rơmo, triu dah sem dơrong nai ăn kơ buăl sư wei, na lôch, tơgơ̆ jơ̆ng dah đe puh iŏk, ưh kơ đei bu 'bôh, 11'bar pah bre sư athei yua anăn Kră Yang pơkă pơkăm bơngai mă wei gô roi sư kơdih ưh kơ đei chro ti hơtŭt 'bơm tơmam buăl sư, bơngai tơ'ngla sem dơrong athei lui kơ nơ̆r sư pơkăm, lei bơngai wei 'noh huay kơ duh ôh.
12Mă-lei tơdah đei bơngai tơtông sem dơrong 'noh đơ̆ng lăm hnam sư, bơngai rong 'noh athei duh kơ tơ'ngla sư. 13Tơdah sem dơrong 'noh sem bri rôp châu sa, bơngai rong athei anhăk ba tơ'bôh wă kơ băt, lei ưh kơ duh.
14Tơdah bơngai bu mưng iŏk đơ̆ng buăl sư minh tŏ sem dơrong na tơgơ̆ jơ̆ng, dah lôch krŭl tơ'ngla sư, bơngai 'noh athei 'mong. 15Tơdah tơm măt tơ'ngla sư tơ 'noh, ưh kơ 'mong ôh, dah sem dơrong noh ăn tŏk iŏk, na tơmam tŏk iŏk 'noh jô̆ hăm jên 'mong ăn.
Tơdrong phak kiơ̆ kơ juăt
16Tơdah bơngai bu pơhlŭ păng ngôi kư̆ kă hăm minh 'nu adruh hle ưh tam mă đei buăl, bơngai 'noh athei duh pơ'lơ̆ng păng athei iŏk hloi bơngai adruh 'noh pơm akăn. 17Tơdah 'bă adruh ưh kơ wă rôp ăn, bơngai 'noh kư̆m athei duh jên kiơ̆ kơ juăt đei hơgăt bơngai adruh oei hơlai.
Kiơ̆ tơdrong juăt so
18Ih 'nĕ kơ lê̆ minh 'nu drŏ-kăn pơjâu arih ôh.
19Bơngai bu ngôi kư̆ kă păng sem brem đe gô pơlôch.
20Bơngai bu kơkuh soi sơmah kơ lu yang nai ưh kơ trŏ kơ Kră Yang đe gô pơlôch sư.
Pơm 'lơ̆ng băl
21Ih 'nĕ kơ pơm kơnê̆ kơ lu bơngai tơmoi păng kư̆m 'nĕ kơ pơjuă lu sư, yua kơ lu iĕm kư̆m đêl jing bơngai tơmoi oei lăm dêh Êyiptơ.
22Lu iĕm 'nĕ kơ pơjuă yă adro dah bơngai mơti. 23Tơdah lu iĕm pơm kơnê̆ kơ sư, na sư ôr krao truh tơ Inh, sĭt Inh gô kơtơ̆ng nơ̆r sư krao; 24Inh hil mĭl dêh; gô pơlôch lu iĕm, hăm đao gưm na akăn lu iĕm gô adro păng kon lu iĕm gô mơti.
25Tơdah lu iĕm ăn kơ lu 'nhŏng oh dơnuh tŏk iŏk jên, 'nĕ kơ iŏk jên kiĕng thoi bơngai juăt ăn đe tŏk iŏk. 26Tơdah ih iŏk ao tai bôl buăl ih hăm nơ̆r pơkă pơkăm ih athei pơdrâu ăn kơ sư adrol kơ 'năr mơ̆t; 27yua kơ sư đei ao lăp klơ̆p akâu đĕch; tơmam yă kiơ dơ̆ng sư wă tep, tơdah sư ôr krao Inh, Inh gô mơ̆ng nơ̆r sư yua kơ Inh boih Tơ'ngla mă 'mêm mơnat.
28Ih 'nĕ kơ pơma kơnê̆ 'bơm Kră Yang 'Bok Kei-Dei păng kư̆m 'nĕ kơ hiap pơtê̆ yŏng pơlei pơla ih.
Tơdrong juăt kơkuh pơyơ̆r
29Ih 'nĕ kơ pơhiơ̆ pơyơ̆r kơ Inh dôm lu plei blŭng-a ih đơ̆ng mir chŭn păng sik hơmu ih, ih kư̆m athei pơyơ̆r ăn kơ Inh kon kơdră drŏ-nglo ih. 30Gah lu triu păng rơmo ih kư̆m athei pơm thoi noh mơ̆n, lăm tơpơh năr blŭng-a lê̆ oei hơdai mĕ sư, năr mă tơhngam ih athei pơyơ̆r sư kơ Inh.
31Lu iĕm gô jing bơngai 'lơ̆ng rơgoh 'măn kơ Inh, yua kơ thoi noh 'nĕ kơ sa 'nhĕm mă đơ̆ng sem bri kăp tơ bri brah; athei klơ̆m ăn kơ kŏ sa.
Currently Selected:
Le 22: bdq
Highlight
Copy
Compare
Share
Want to have your highlights saved across all your devices? Sign up or sign in
©Bahnar Bible Association. All rights reserved.
