Josueya 3
3
Ashiriya, na yuwaatssha Israelchich tputs kungoo Ortagaa kitarangana anootsshat kamanchintspa
1Putamshat, zar puturi Josuey ichingaru tiptsirpatari Israelchichpa Sitimmand tsap káyarandsin, Ortagamun kung kusaranganaya. Itaru, ndatuma kitarusin, anootsiritama shaniyaranganaya. 2Anootsirisha kutaksin, tuchip zar maaranganaya. Anush kurakshitisin ichingaru tsiyatssee kamanirangiya. 3Siysat Israelchichee wamachtash payungtsa. Apanllee kajonarini Leviychich apanllpanirini urkar yáyarusin, yap naakchinllina ambitam siysat tchitangtsa. 4Ambtanda ngoots chiy naachich watam siy amb ngoots nda minumtiyam patarsawa. Itaru, watsiri Apanllinung kajonarini káyamarintspa. Arapiri kuzizimun minum kilometor tamapari ashiru tchitangtsa, tárangiya.
5Josueysha tputsee, Chtaru Apanlleem mangeetsis yarangtsa. Watam pu zar Apanll waanaatsi wizpur tuyamandachuwa, tárangiya. 6Apanllpaneetssha urkar: Siysat wasina imazayarus, kung Ortagaa arachich kitkachus, Apanllee kajonarini payutatssa, tárangiya.
Apanllpanshitisin anuritam Apanllee kajonarini, yáyarandsin, wasina imazayarandsin naataranganaya. 7Apanllsha Josueyaa, Ashiriya, na nuw shiyaam kapung istachinllpa. Ashkachuri, Israelchich tputs ichingarusin shiyaa wanasireem ínachinllinaya. Apanll Josueyaa kapung chinakiya. Móysisarineem kapung istarangu, na Josueyaamsha ashiritam istakiya, táchapsinaya shiyaatsiya. 8Ashiriya, na shiyshat apanllpanee urkar kamachtangcha; Nuwaa kajonarini kuyarus, kung Ortagap naangints. Kungumun wing kuseerus, ambiri kungup iriptara sheerus, apusanand kung xiyangtsa, tángi, Apanll Josueyaa tárangiya.
9Ashiriya, Josueysha Israelchichee: Naanints ningeema. Apanllee kuk mazinangints. Yuwaa Apanll tárangu anoo kamanchintspa. 10Apanll siyaa yachamaam zandkiya. Itaru, watam Apanll waana ksutaruwa. Uru iyaam kapung istakchu, Kanaanshuchee, Hititshucheetstam, Hebewshucheetstam, Feresewshucheetstam, Gergesewshucheetstam, Amorrewshucheetstam, mishat Jebusewshucheetstam, wamari tpachingachiya. Anumun yasakchus, Apanll iyaa ksutariya,#3.10 Matiwa 26.63; Utaáshucheema 10.31 tsiyatsis nipta tatsamooru taaritamta. tátssa. 11Apanllee kajonarini, yuwaa wamari tsapurunasee kasiru, anoo yáyarus, wasina imazayarus, kungoo Ortaga arachich kitatssa. 12Ashirucha, nuwshat siyaa atina. Ndatuma naachus, wasina Israelchichpatatis, minchich tputs minumtam, minchich tputs minumtam sheerus, washunand 12 tputs patumbchee kumpaneem ipusangints. 13Ashiriya, apanllpan Apanllee kajonarini, tsapurunasee wamari kasiru taaku anoo yáyarusin, wats kungush kayapkamchusin, Apanllsha wizpur kungoo kámanakchu, kungsha yuw naantaru an anootsirisha zanayta ashtachiya. Ashkachu, kungsha apusash puzatara ashchiya, Josuey tárangiya.
14-16Ashiriya, Israelchichshitisin anuritam, arachichshat kung Ortagaa kitkatssin, chtaru apanllpaneetsima urkar tuyamzaranganaya. Uwshtisin Apanllee kajonarini yáyarandsin, wasina imazaranganaya. Anpurshat zar, kung kizpur kumbiytspasamuna. Iwarzee anpur zar pusataranaya. Ashirucha, anpasaru zar apanllpanshitisin urkar Apanllee kajonarini kuyarandsin, kungumun wing napiwakamchusin, wats kungush kayapkamchu, kungootssha yuwaa naantaru anoo Apanll kámanarangu, anootsirishat kung zanayarangiya. Kung ambirisha tashtap yakat Adamnung, yuwash pangus Mbammash sur Saretán taarangu annungirishat, kayanuru, musaam kinarangiya. Yuwshat kung tuwash zaw ashirangu, anshat Mar Tsipari atana ambirishat kayanurangiya. Kungshat pseertarangu, apusashsha kung puzarangiya.
Currently Selected:
Josueya 3: cbu
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.