Sekariah 4

Hanan nipatibon pangipattukan hi dilag ya duwan kaiw an oliba

1Indani ya immali bo nan anghel an mungkalkallin ha-on ot bangunonak an kayak nahuyop. 2Kananan ha-on di “Nganney tinibom?”

Himmumangak an kanak di “Tinibok di pangipattukan hi dilag an nakapyah balituk ya nipattuk on malukung an naha-adan hi lanan umayu nadah kingke. Hidiyen pumpattukan ya waday pitun kingke an nip-ong di pitu bon metsan mundadalang. 3Ya waday duwan kaiw an oliba an numbattanan da nan malukung an waday ohah kannawan ya ohah kannigid.”

4Hinanhanak bo nah anghel hin tipe dadiye. 5Ya kananay “Kon uggem inila?”

Himmumangak an kanak di “Uggek inila, apu.”

6Indani ya kanan nan anghel ke ha-on di “Kalyom ke Serubbabel an kanan APU DIOS di ‘Ha-oy ya Kabaelak am-in, kinali mangapput ka, Serubbabel gapuh kabaelan di Espirituk, bokon gapuh kabaelan ya inlot di tagu. 7Mama-id di humanih pangatam hi implanuk an aton, takon di umat hi kaongal di bilid. Ahim gibbuwon an mamohwat nah Templo. Ya hantuh pangiha-adam nah manguddidin batu ya itkuk di tataguy ‘Hana ot ta bendisyonan Apu Dios!’”

8Indani ya kimmali boh APU DIOS ke ha-on an kananay “Hituwey kalyom: 9‘Hi Serubbabel di nangikapya nah nipab-unan nan Templo ya hiya metlaing di mangibbu. Ta panginilaan nadan tataguk an ha-oy an DIOS an Kabaelanan am-in di nangitud-ak ke he-an mun-abig. 10Hay panibon nadan tatagu ya ittay di ningunu, kinali nadismaya da. Mu ahida umamlong hi panib-an dan itultuluy Serubbabel an mangiphod nah Templo.’”

Indani ya kinalin nan anghel di kibalinan nan impatibonan ha-on an kananay “Dadiyen pitun dilag ya diday paddungnan matan APU DIOS an manmanniboh at-atton di tataguh kabobboble tuh luta.”

11Kanak bo nah anghel di “Tipe datuwen duwan kaiw an olibah kannawan ya kannigid nan pangipattukan hi dilag? 12Ya tipe bo datuwen duwan hapang di olibah paldang di duwan balituk an gulipun bumuddalan di lanan di oliba?” 13Kanan nan anghel di “An uggem inila hin tipe datuwe?” Hinumang kun kanak di “Uggek inila, apu!” 14Ot kananan ha-on di “Hay kibalinan da ya nan duwan natuddun bumaddang ke Apu Dios an Ap-apun am-in hi luta.”

Currently Selected:

Sekariah 4: ifkWB

Highlight

Copy

Compare