Hebrews 1
1
1Handih done ya namindakol ya nunhihinnatkon di inat Apu Dios an nangipainilah kalina handidah aammod taku an hay nunhapitona ya handidan profetas. 2Mu hantudah nanguddidin algo ya nan Imbabalenay nangipainilah kalinan ditaku. Gapu ke hiya ya lintu dan Apu Dios am-in hantudan wadad uwani. Ya hiya boy pinili nan mamoltan am-in ke datuwe. 3Hiyay kitib-an di kinatag-en Apu Dios an hi Amana. Dida ya naka-ingngo da hi am-in. Te am-in di wadan Apu Dios ya wada bo nah Imbabalena. Hiyay mangipaptok am-in hi naltu. Waday kabaelanan mangat ketuwe. Takon di kalina ya abu ya maat di pinhod na. Handih ingkatenay kapakawanan di liwat taku ya imbangngad nah langit ot umbun di winawwan Apu Dios an Katagtag-ayan te hidiy ubunanan makiap-apu ke Amana.
Natagtag-eh Jesus mu nadan anghel
4Kinali nainilan hiya ya natagtag-e mu nadan anghel, te takon di hay nangalyan Apu Dios an Imbabalena hiya ya umustuh diyen kitib-anan hiya ya natagtag-e mu nadan anghel. 5Te bokon nadan anghel, mu hiyay nangalyan Apu Dios nah kananay
“Imbabale dakan ha-on. Ipainilak mod uwani an ha-oy hi Amam.”#1:5 Tibon yuy Psalm 2:7, Acts 13:33 ya Hebrews 5:5.
Ya bokon bo nadan anghel di nangalyana nah kananay
“Ha-oy di ahi mainilan Amana ya athidi bon hiyay ahi mainilan Imbabalek.”
6Am-in datuwen kinalina ya nan nakattag-en Imbabale nay nangalyana. Handih nangitud-akan Apu Dios ke hiya tuh luta ya kananay
“Am-in nadan anghel ku ya mahapul an dayawon da tun Imbabalek.” 7Ya hay kinali damdaman Apu Dios mipanggep nadah anghel ya kananay “Hanadan anghel ya ba-ba-alok ya abu didan mangat hi pinhod ku, takon di pumbalinok didah dibdib weno apuy an mundadalang hin pinhod ku.”#1:7 Psalm 104:4
8Mu hay kinalin bon Apu Dios mipanggep nah Imbabalena ya kananay
“He-a an Dios ya maandong ya munnananong ta nangamung di pun-ap-apuwam di pangat mun mun-ap-apu. 9Pinpinhod muy maphod an pangi-e ya kahingngitam di gaga-iho. Kinali ha-oy an Dios an un-unudom ya tinuddu dakan madaydayaw mu nadan ibbam, ta umamlong ka.”#1:8-9 Psalm 45:6-7
10Ya hay impitudok na bo mipanggep nah Imbabalena ya kananay
“Handih lappuna ya lintum di luta, hay kabunyan ya am-in nadan wadah di. 11Ya ahida mama-id te umat dah bulwatin mumbalin hi layut, mu he-a ke ya wadawada kat nangamung. 12Te ahim kaanon datuwen lintum ta hannotam didah balu. Mu he-a ke nimpe ya adika mumbaliw, mu munnananong kat nangamung.”#1:10-12 Psalm 102:25-27
13Ya bokon nadan anghel di nangalyan Apu Dios ketuwe an kananay
“Umbun kah winawwan ku inggana paka-apputok am-in di buhul mu.”#1:13 Psalm 110:1
Mu hay nangalyanan tuwe ya hi Jesu Kristo ya abu an Imbabalena.
14Te nada ken anghel ya ba-ba-alon Apu Dios ya abu didan bumaddang nadah tatagun mihwang.
Hay ipaanhan taku ya hay kihwangan taku
Currently Selected:
Hebrews 1: ifkWB
Highlight
Copy
Compare
Share
Want to have your highlights saved across all your devices? Sign up or sign in
© 2004, Wycliffe Bible Translators, Inc. All rights reserved.
