4 โมเซ 34
34
1 พะจาว อัฮ เฮี ละ ไอ โมเซ, 2“ไมจ เปอะ อัฮ ละ โม อิซราเอน ตอก เฮี, เญือม เอีจ เลียก เปอะ นึง เมือง คะนาอัน เซ, ป มัฮ เคต ปลัฮเตะ ป อาวต รวิต เปอะ ซ มัฮ ตอก เฮี. 3ลวง ลั่กเซฮ อื มัฮ เน่อึม ลาึน ซิน โฮว ตัม เฆียง ปะเทต เอโด่ม, เน่อึม นึง ลอยจ ปลัฮ รอาวม ยุม ลวง ลั่ก โอก ซเงะ. 4ฟวยจ เซ โฮว รวอง แม ลวง ลั่กเซฮ ตัม คระ เงียก อาครัปบิ่ม เซ. โฮว เตือง นึง ลาึน ซิน เซ, โฮว ลอยจ นึง ลวง ฆรึม ย่วง คาเด่ต บ่าเนีย, โฮว แม ฮอยจ นึง ฮาซารัตด่า, โฮว แม ฮอยจ นึง อัตโมน. 5ฟวยจ เซ โฮว รวอง แม เน่อึม อัตโมน เซ ฮอยจ นึง โกลง เมือง อียิป, โฮว ลอยจ นึง ทะเล ระ เซ.
6“ม่าื เตะ ลวง ลั่ก เลียก ซเงะ นึง อื มัฮ เอิน ทะเล ระ เซ.
7“ม่าื เตะ ลวง ลั่กล่าวง, มัฮ โรฮ โฮว เน่อึม นึง ทะเล ระ เซ, โฮว ซื ฮอยจ นึง บลาวง โฮ. 8เน่อึม นึง บลาวง โฮ เซ, โฮว ฮอยจ นึง เงียก ฮามัต, โฮว แม ฮอยจ นึง ย่วง เซดั่ต, 9โฮว แม ฮอยจ นึง นาตี ซิโฟรน. โฮว ลอยจ นึง ย่วง ฮาซาเรนัน, เซ มัฮ ม่าื เตะ ลวง ก ล่าวง นึง อื.
10“ม่าื เตะ ลวง ลั่ก โอก ซเงะ นึง อื, มัฮ โฮว เน่อึม ย่วง ฮาซาเรนัน เซ ฮอยจ นึง ย่วง เชฟัม. 11ฟวยจ เซ โฮว แม ลวง ลั่กเซฮ ฮอยจ นึง ย่วง ริปลา ปุก ลวง ลั่ก โอก ซเงะ ละ เมือง อายิน, โฮว แม ฮอยจ นึง บลาวง ลั่ก โอก ซเงะ ละ ปลัฮ รอาวม กาลิลี, 12โฮว แม ลวง ลั่กเซฮ โฮว ตัม โกลง จอแด่น โฮว ลอยจ นึง ปลัฮ รอาวม ยุม, มัฮ ตอก เซ ม่าื เตะ ยุฮ เปอะ เตือง ปาวน ลวง อื,” อัฮ เซ ละ อื.
13ไอ โมเซ รโฮงะ อื ละ โม อิซราเอน ตอก เฮี, “มัฮ เมาะ เซ ปลัฮเตะ ป ซันญา พะจาว ซ เกือฮ แตะ แปน คอง โม เปะ เซ, ละ ซ โฮลฮ เปอะ โจก เบ่อ อื ตา ซไตม เจอ ไม่ บลัฮ เซ. 14ป มัฮ เจอ รูเบ่น ไม่ เจอ กาต ไม่ เจอ มะนาเซ ตา บลัฮ เจอ, ป อาวต ลวง ลั่ก โอก ซเงะ เซ, เอีจ โฮลฮ รัป ปลัฮเตะ รโตง แตะ ตัม เจอ ตัม ซฆลาวม แตะ โครยญ โฆะ อื. 15ปุย ตา ลอา เจอ ไม่ บลัฮ เซ, มัฮ ป อาวต บลัฮ โกลง จอแด่น ลวง ลั่ก โอก ซเงะ ปุก รเตือป เมือง เยรีโค,” อัฮ เซ.
โม ฮัวนา มัฮ ป รฆุ ปลัฮเตะ ละ ปุย
16 พะจาว อัฮ เฮี ละ ไอ โมเซ, 17เอเลอาซา ป มัฮ ซตุ เซ, ไม่ โยชูวา กวน นูน เซ, ซ แปน ป เรอึม รฆุ ปลัฮเตะ ละ ปุย. 18ไมจ โรฮ เปอะ เกือฮ โม ฮัวนา เจอ เซ ติ เจอ ติ ปุย เรอึม รฆุ ไม่ อื โรฮ. 19มอยฮ โม ฮัวนา เจอ ป ซ เรอึม เซ มัฮ ตอก เฮี.
คาเลป กวน เยฟูเน มัฮ ฮัวนา เจอ ยูด่า.
20เชมูเอน กวน อัมมีฮุต มัฮ ฮัวนา เจอ ซิเมโอน.
21เอลีดั่ต กวน คิตโลน มัฮ ฮัวนา เจอ เบ่นยามิน.
22บุ่กคี กวน โยกลี มัฮ ฮัวนา เจอ ด่าน.
23ฮันนิเอน กวน เอโฟต มัฮ ฮัวนา เจอ มะนาเซ.
24เคมูเอน กวน ชิปทัน มัฮ ฮัวนา เจอ เอฟราอิม.
25เอลีซาฟัน กวน ปันนัก มัฮ ฮัวนา เจอ เซบู่ลุน.
26ปันทีเอน กวน อัตซัน มัฮ ฮัวนา เจอ อิตซาคา.
27อาฮิฮุต กวน เชโลมี มัฮ ฮัวนา เจอ อาเชอ.
28ไม่ เปด่าเฮน กวน อัมมีฮุต มัฮ ฮัวนา เจอ นัปทาลี. อัฮ เซ.
29ปุย โม เซ มัฮ ป เลือก พะจาว ละ ซ เกือฮ อื แปน ป เรอึม รฆุ ปลัฮเตะ คะนาอัน เซ ละ โม อิซราเอน.
Currently Selected:
4 โมเซ 34: lcp
Highlight
Copy
Compare
Share
Want to have your highlights saved across all your devices? Sign up or sign in
© (Active), Thai Bible Society
