4 โมเซ 1
1
ไอ โมเซ เมีญ เมาะ ไก โม อิซราเอน นึง ลาึน ซีไน
1เญือม เอีจ ฟวยจ โฮลฮ โม อิซราเอน โอก ฮา เมือง อียิป ลอา เนอึม เมอ, ปุก เญือม ฮาวก เคิ ลอา เซ ติ ซาวม. เญือม เซ พะจาว ฮอยจ อู ไม่ ไอ โมเซ นึง พากัง ก ฮอยจ ปุย เคะ พะจาว นึง ลาึน ซีไน. พะจาว อัฮ เฮี ละ อื, 2ปะ ไม่ อาโรน ไมจ เปอะ เมีญ เมาะ ไก เซน โม อิซราเอน เซ เตือง โอยจ อื, ละ ซ โจต เปอะ เมาะ ไก เซน โม ปรเมะ นึง อื เซ โครยญ โฆะ ปุย, ตัม ซฆลาวม ตัม ครอปครัว อื โครยญ โฆะ อื. 3ไมจ เปอะ เมีญ โม ปรเมะ ป เอีจ ไก อาญุ อื เคียง ง่า เนอึม ฮาวก ก ล่าวง, เมาะ โม ป เกียฮ โฮว รุป เซิก นึง อื. 4ไมจ โรฮ เปอะ เกือฮ โม ปรเมะ เรอึม เปอะ. ไอฮ โม ฮัวนา เจอ นึง อื ติ เจอ ติ ปุย.
5ป มัฮ ปรเมะ ป ซ เรอึม เปอะ เซ ตัม เจอ อื เซ มอยฮ อื มัฮ ตอก เฮี. เจอ รูเบ่น เนอ มัฮ เอลีซู กวน เชเด่เออ.
6เจอ ซิเมโอน เนอ มัฮ เชลูมิเอน กวน ซูรีชัตได่.
7เจอ ยูด่า เยอ มัฮ นาโชน กวน อัมมีนาดั่ป.
8เจอ อิตซคา เยอ มัฮ เนทันเอน กวน ซูอา.
9เจอ เซบู่ลุน เนอ มัฮ เอลีอัป กวน เฮโลน.
10ป มัฮ จัตเจือ โยเซป นึง อื, ไก ลอา เจอ.
เจอ เอฟราอิม เมอ มัฮ เอลีชามา กวน อัมมีฮุต.
เจอ มะนาเซ เยอ มัฮ กามาลิเอน กวน เปด่าซู.
11เจอ เบ่นยามิน เนอ มัฮ อาบี่ดั่น กวน กิเด่โอนี.
12เจอ ด่าน เนอ มัฮ อาฮิเยเซอ กวน อัมมีชัตได่.
13เจอ อาเชอ เยอ มัฮ ปากีเอน กวน โอครัน.
14เจอ กาต เตอ มัฮ เอลียาซัป กวน เด่อูเอน.
15เจอ นัปทาลี เยอ มัฮ อาฮิรา กวน เอนัน. อัฮ เซ พะจาว.
16ปุย โม เซ มัฮ โม ฮัวนา ลลาึง โม อิซราเอน เตือง โอยจ อื, นึง มัฮ อื ป เอีจ เลือก โม เซ ละ ซ เกือฮ อื แปน ตัว แทน เจอ ยุฮ แตะ.
17ไอ โมเซ ไม่ อาโรน เกือฮ โม ป เอีจ โจต แตะ อาึง มอยฮ อื เซ เรอึม แตะ. 18เญือม เอีจ ฮาวก เคิ ลอา เซ ติ ซาวม เมอ, โม เซ กอก โม ลัปซด่อน ฮอยจ โพรม เนอึม เตือง โอยจ แตะ, เมาะ ป เอีจ ไก อาญุ อื เคียง ง่า เนอึม ฮาวก ก ล่าวง ฮอยจ โจต เนอึม เซน แตะ โครยญ โฆะ แตะ ตัม จัตเจือ แตะ, ตัม ครอปครัว แตะ, ตัม เมาะ ไก เซน แตะ เตือง โอยจ อื. 19ไอ โมเซ เมีญ เนอึม ปุย นึง ลาึน ซีไน เซ ตัม ป เอีจ อัฮ พะจาว อาึง ละ แตะ. 20-46โม ป เมีญ อื เซ มัฮ โม ปรเมะ ป ไก อาญุ อื เคียง ง่า เนอึม ฮาวก ก ล่าวง, เมาะ ป เกียฮ โฮว รุป เซิก นึง อื ตัม เจอ อื โครยญ เจอ, มัฮ ตอก เฮี. รูเบ่น มัฮ กวน โรง อิซราเอน.
| เจอ รูเบ่น ไก | 46,500 ปุย. |
| เจอ ซิเมโอน ไก | 59,300 ปุย. |
| เจอ กาต ไก | 45,650 ปุย. |
| เจอ ยูด่า ไก | 74,600 ปุย. |
| เจอ อิตซคา ไก | 54,400 ปุย. |
| เจอ เซบู่ลุน ไก | 57,400 ปุย. |
| เจอ เอฟราอิม ไก | 40,500 ปุย. |
| เจอ มะนาเซ ไก | 32,200 ปุย. |
| เจอ เบ่นยามิน ไก | 35,400 ปุย. |
| เจอ ด่าน ไก | 62,700 ปุย. |
| เจอ อาเชอ ไก | 41,500 ปุย. |
| เจอ นัปทาลี ไก | 53,400 ปุย. |
รโจะ เตือง โอยจ อื แปน 603,550 ปุย.
โม เลวี ซ ยุฮ กัน เกว ไม่ พากัง ระ
47เญือม เซ ปุย ปังเมอ โอ เมีญ โม เลวี เลียก รโจะ ไม่ โม เจอ ไฮญ นึง อื, 48นึง อัฮ พะจาว อื ละ ไอ โมเซ ตอก เฮี, 49“ป มัฮ เจอ เลวี นึง อื ปะ ทัน โตว เมีญ, ไม่ โอ เปอะ ไมจ โจต เซน อื เกือฮ เลียก อาวต ไม่ โม อิซราเอน ไฮญ นึง อื. 50ปะ ปังเมอ ไมจ เปอะ ดุฮ อาึง โม เลวี ละ ซ ยุฮ อื กัน ป เกว ไม่ พากัง ระ นา ก อาวต อาึ เซ. เกือฮ แปน ป แลน แก โอเอีฮ เมาะ ป โกว ปุย นึง พากัง ระ เซ ไม่ เฌาะ อื พากัง ระ เซ เตือง โอเอีฮ ป โกว ปุย นึง อื ฮอยจ ก ไฮญ, ไม่ ยุฮ อื กัน เกว ไม่ พากัง ระ เซ. มัฮ โรฮ ป ลัง โบลวง พากัง อาวต โม โกะ แตะ เกือฮ อาวต รวิต พากัง ระ เซ โรฮ. 51เญือม ซ เติง เวลา เฌาะ ปุย พากัง ระ เซ มัฮ โม เลวี เซ โน่ง ป ลัง เญื่อฮ ฮา. เญือม ซ โบลวง โคระ แม อื มัฮ โรฮ โม เลวี เซ โน่ง ป ลัง โบลวง เงอ. ดัฮ ไก ปุย ไฮญ ป เลียก ซดิ ไม่ พากัง ระ เซ ไมจ ปุย เกือฮ ลอก ตุต แตะ ฆาื อื ฮอยจ ละ ยุม อื. 52ป มัฮ เจอ ไฮญ ไน โม อิซราเอน เซ, ไมจ อื โบลวง พากัง ยุฮ โกะ แตะ ไอฮ แปน มูๆ แตะ ตัม ก ลัง อาวต โม โกะ แตะ ไอฮ, นา ก ไก โทง ซุม เจอ ยุฮ อื เตือง ไพ เตือง มัน. 53โม เลวี ปังเมอ ไมจ เปอะ เกือฮ โบลวง พากัง ยุฮ โกะ แตะ เกือฮ อาวต รวิต พากัง ระ นา ก อาวต อาึ เซ, เดอึม อาึ โอ ซ โฮลฮ ฮาวก รพาวม ละ โม อิซราเอน เตือง โอยจ อื ฆาื เลียก ปุย ซดิ ไม่ นา เซ. ไมจ เปอะ เกือฮ โม เลวี เซ โซะโกะ ฮรักซา นึง พากัง ระ เซ,” อัฮ เซ พะจาว.
54โม อิซราเอน ยุฮ เนอึม อื ตัม ป อัฮ พะจาว อาึง ละ ไอ โมเซ เซ โครยญ เจือ.
Currently Selected:
4 โมเซ 1: lcp
Highlight
Copy
Compare
Share
Want to have your highlights saved across all your devices? Sign up or sign in
© (Active), Thai Bible Society
