มาระโก 5

ปุย เลียก พี นึง

(มท. 8:28-34; ลก. 8:26-39)

1ฟวยจ เซ พะเยซู ไม่ โม ลุกซิก อื ฮอยจ บลัฮ ปลัฮ รอาวม ลั่กเติต. นา เซ มัฮ แควน ย่วง เกราซา. 2เญือม โอก พะเยซู ฮา โตะ โล่ง เซ ฮอยจ ปุย เคะ อื ติ. ปุย เซ กอ อาวต โตะ อูโมง นึง รมอยจ ฆาื เลียก พี นึง แตะ. 3ปัง ปุก ปุย นึง โม่ะเฮลีจ ปุ ลั่ง อาวต ยุฮ อื. 4เอีจ ลอก โม่ะ ลอก เฮลีจ โฮวน โฮน. โปวต อื. ดุต บลวย ยุฮ อื โครยญ โฮน. ปุย เซ เรียง ลอน ปอ โอ ปุย ปุน อาวต โฆย ยุฮ ติ ปุย เนอึม. 5ไร แนฮ นึง รมอยจ เซ ไม่ นึง บลาวง. ครวก ลอป เตือง ซเง่ะ รซาวม. ไรจ ไอฮ ติ แตะ ไม่ อื นึง ซโมะ.

6ปุย เซ เญือม ชวน อื พะเยซู เน่อึม ก ซไง อื ตอ เอิน เอีญ นุ่ม ไว อื. 7อัฮ เฮี เรียง, “โอ เยซู, กวน พะจาว ป ตึก นึง ฮลาวง แตะ, ปะ เมอ ซ ยุฮ เปอะ ละ อาึ อื? อาึ ปัว ปะ นึง มอยฮ พะจาว ปัว เปอะ โอ คัม ตุง แตะ,” อัฮ เซ.

8ปุย เซ มัฮ อัฮ อื ตอก เซ นึง เอีจ ดวน พะเยซู พี เซ โอก ฮา แตะ. 9เญือม เซ พะเยซู ไฮมญ อื, “ปุย มอยฮ เปอะ?” อัฮ เซ. ปุย เซ โลยฮ อื ละ อื, “อาึ มัฮ โกต กอง. เอะ โฮวน ไม่ ปุ แตะ,” อัฮ เซ ละ อื. 10พี โม เซ ปัว เนอึม ปัว แนม พะเยซู โอ โครฮ แตะ โอก ฮา แควน เมือง เซ.

11แควน เซ ไก เลีจ นึง ติ มู ระ, กัมลัง โฮว ซาวป โซม นึง ดิป. 12พี โม เซ อัฮ เฮี ละ พะเยซู, “ปัว ปะ เกือฮ เอะ โฮว เลียก อาวต นึง เลีจ เซ,” อัฮ เซ. 13พะเยซู โปง อื. เญือม เซ พี โฮวน เซ โอก ฮา ปุย เซ โฮว เลียก นึง เลีจ โม เซ. เลีจ ติ มู เซ, ไก ด่าว ลอา เปือน ตัว, เตน เลีฮ นึง ไกญ รอัง รมั่ม นึง ปลัฮ รอาวม เซ. ยุม เอิน เตือง โอยจ อื.

14ป เลียง เลีจ เซ ตัง โคน ตัง ตอ เอีญ รโฮงะ ไลลวง เซ ละ ปุย นึง ย่วง ไม่ ปุย ก พริ ย่วง. เญือม เอีจ ฮมอง ปุย โอเอีฮ ตอก เซ โฮวน ป โฮว แลน ฆาื อื. 15เญือม เอีจ ฮอยจ อื เคะ พะเยซู, ยุ ปุย ไก พี โฮวน นึง ไพรม อื เซ, งาวม นา เซ. เอีจ ยุง จาวป เครอึง เซอึก แตะ. เอีจ ยุง ไมจ คิง แตะ. โม เซ บระ ฮลัต ฆาื อื. 16โม ป เอีจ โฮลฮ ยุ เซ รโฮงะ ไลลวง ปุย เลียก พี เซ นึง ไม่ ไลลวง เลีจ เซ เกือฮ ปุย ฮมอง อื. 17เญือม เซ ปุย เตือง โอยจ อื ปัว เนอึม ปัว แนม พะเยซู เอีญ ฮา เมือง แตะ เซ ฆาื อื.

18เญือม เอีจ ซ เลียก พะเยซู โตะ โล่ง, ปุย เลียก พี นึง เซ ปัว โรฮ โฮว ฟวต พะเยซู. 19พะเยซู ปังเมอ โอ เกือฮ อื โฮว ไม่ แตะ. อัฮ เฮี ละ อื, “เอีญ เคะ เอียกปุ ตุเจอ เปอะ. รโฮงะ ละ อื ไลลวง โอเอีฮ ป เอีจ ยุฮ พะจาว ละ เปอะ ไม่ ตอก เลียก พาวม อื นึง เปอะ,” อัฮ เซ ละ อื. 20ปุย เซ เอีญ เนอึม, ครอฮ อื ไคว จังวัต เด่คาโพลี ไลลวง ป ยุฮ พะเยซู ละ แตะ เซ. ปุย เตือง โอยจ อื เงอึต เนอึม ฆาื อื.

ไยโร ปัว พะเยซู เรอึม แตะ

(มท. 9:18-26; ลก. 8:40-53)

21พะเยซู เตือง แม ปลัฮ รอาวม ฮอยจ บลัฮ ลั่ก ย่วง แตะ. เญือม อาวต ลั่ง พะเยซู เฆียง รอง เงอ โฮวน ป ฮอยจ เคะ อื. 22ไก ป กวต นึง โฮงซุต ยุฮ โม ยิว ติ ปุย ฮอยจ โรฮ เคะ อื. มอยฮ อื มัฮ ไยโร. เมือต เอีจ ยุ พะเยซู, นุ่ม เอิน โบ ชวง อื. 23ปัว เนอึม ปัว แนม นึง อื, อัฮ เฮี, “กวน เครีฮ อาึ อื เอีจ ซ ยุม ลอป เนอึม. ปัว ปะ โฮว ย่อง เตะ แตะ ราว อื เดอึม ซ ไฮ โซะ ไม่ โอ อื ซ ยุม,” อัฮ เซ ละ อื. 24พะเยซู โฮว เนอึม ไม่ ปุย เซ. โฮวน ป โฮว ฟวต เตอ. ซแน่ต เอิน พะเยซู.

ปรโปวน ติ ปุย เดือะ เบื่อ ลปิ พะเยซู

25ไก ปรโปวน ติ, โซะ บราึง ฮนัม. เอีจ ไก กาว โรฮ ลอา เนอึม โซะ อื เซ. 26เอีจ โกว มวต โกว มอ โฮวน ปุย, ปังเมอ โอ ฌักแฟน นึง อื เฟือฮ. โฮว แม ละ เซอึป แตะ ฮา ไพรม แตะ. โอยจ ตื เละ มาื ยุฮ อื. 27เญือม เอีจ ฮมอง ปรโปวน เซ ไลลวง พะเยซู, โฮว ฆาื อื ฮอยจ ลลาึง โม ป ซแน่ต พะเยซู ลั่กเคะ อื, เดือะ เบื่อ ลปิ อื ไม่ อื. 28อัฮ เฮี โตะ รพาวม แตะ, “อาึ ปัง มัฮ เมาะ โฮลฮ เดือะ เบื่อ ลปิ อื โน่ง อาึ แจง ซ ไฮ โซะ โอ,” อัฮ เซ. 29เญือม เซ ไฮจ เอิน ฮนัม อื เซ. ปรโปวน เซ อาวม เอิน ไฮ แตะ จุบั่น เอิน.

30เญือม เซ พะเยซู เอีจ อาวม โรฮ อื โอก อัมนัต แตะ ฮา แตะ ง่อน เนอ. แมฆี ลั่กเคะ แตะ ฆาื อื ลลาึง ปุย โฮวน เซ. อัฮ เฮี, “ปุย ป เดือะ เบื่อ ลปิ อาึ อื?” อัฮ เซ.

31โม ลุกซิก อื อัฮ เฮี, “ปะ เอีจ ยุ เปอะ ซแน่ต ปุย โฮวน แตะ. เกียฮ ไฮมญ โน่ง เปอะ ป เบื่อ แตะ เมอ?” อัฮ เซ.

32พะเยซู แก ลั่ง รวิต รเวียง แตะ, ฆวต ยุ ป เดือะ เบื่อ แตะ เซ. 33ปรโปวน เซ อาวม ไฮ แตะ. เอีญ ฆาื อื เคะ พะเยซู ไม่ ฮลัต เตีจ แตะ ปอ รกุฮ แตะ. นุ่ม โบ ชวง อื. รโฮงะ ไลลวง แตะ ละ อื ตัม ซื อื. 34พะเยซู อัฮ เฮี ละ ปรโปวน เซ, “กวน, รพาวม เจือ เปอะ เอีจ เกือฮ ปะ ไฮ. เอีญ ไมจ เอีญ มวน ไม่ ไฮ เปอะ,” อัฮ เซ ละ อื.

กวน ไยโร โกฮ ไอม แม

35ลไล โอ อื ดิ เตือน ลอยจ ลปุง, ฮอยจ ปุย เน่อึม เญือะ ป กวต โฮงซุต เซ ง่อน. อัฮ เฮี, “กวน เครีฮ ปะ เอีจ ยุม. อัม ทา เญือะ เกือฮ ปอคู ตุก รพาวม นึง?” อัฮ เซ.

36พะเยซู ง่อต โตว อื ป อัฮ ปุย โม เซ เยอ, อัฮ เฮี ละ ป กวต โฮงซุต เซ, “ปุ โตวฮ ฆราึง ฆาื. ไมจ เปอะ เจือ พะจาว ติ คระ โน่ง,” อัฮ เซ ละ อื.

37พะเยซู เกือฮ โตว ปุย ไฮญ โฮว ไม่ แตะ โนก ฮา เปโตร ไม่ ยาโคโบ่ ไม่ โยฮัน ป มัฮ ปุ ยาโคโบ่ เซ. 38เญือม เอีจ ฮอยจ อื นึง เญือะ ป กวต โฮงซุต เซ, ยุ วุนไว ปุย เยือม เนอึม ไอฮ พาวม แตะ. 39พะเยซู เลียก ไฮมญ โม เซ, “โม เปะ เมอยุ เยือม เปอะ เนอึม ไอฮ พาวม แตะ? กวนดุ เซ ดิ ยุม โตว, มัฮ ปุน อื ไอจ,” อัฮ เซ ละ อื. 40โม เซ โล่ ญวยฮ พะเยซู ฆาื อื. เญือม เซ พะเยซู โครฮ ปุย ติ มู เซ โอก. บะ มะเปือะ อื ไม่ ลุกซิก ลอวย ปุย ป โฮว ฟวต แตะ เซ. เลียก ฮอยจ ก ไอจ กวนดุ รโปวน เซ. 41โตวก เตะ กวนดุ เซ, อัฮ เฮี, “ทาลีทาคุม,” อัฮ เซ. มัฮ อัฮ อื เฮี, “กวน เครีฮ, อาึ อัฮ ละ เปอะ, โกฮ เอิน เมอะ,” มัฮ อัฮ อื เซ ละ. 42เญือม เซ กวนดุ เซ โกฮ โฮว เอิน. ปุย เตือง โอยจ อื เงอึต เนอึม เงอึต แนม นึง อื. กวนดุ เซ อาญุ อื ไก กาว โรฮ ลอา เนอึม. 43พะเยซู คัต เนอึม คัต แนม ปุย โอ รโฮงะ อื ละ ปุย ไฮญ ติ ตื เนอึม ไลลวง เซ. ฟวยจ เซ ดวน ปุย โฮว ตาว ป โซม ละ กวนดุ เซ.

Currently Selected:

มาระโก 5: lcp

Highlight

Copy

Compare