Соломона хамгин сән дун 5
5
[Көвүн:]
1– Келсн күүкн, эңкр минь,
Эврәннь садт би ирүв.
Энд мирр, каңкнсн өвс цуглулув,
Балан идәд хәләвүв,
Бас чаһран болн үсән уувув.
[Ерусалимин күүкд:]
– Үүрмүд, эдлтн, уутн!
Дурнасн согттн, иньгүд!
Дөрвдгч дун
[Күүкн:]
2– Би унтв – зүркм унтҗахш…
Би соңсҗанав – эңкр иньгм үүд цокҗана!
«Мини эңкр, иньг минь, мини һууҗа,
Орчлңд әдлцдгнь төрүц уга, секәд орк!
Мини толһа чиигәс норч одв,
Мини үсн сөөһин чиигәс норв!» –
гиҗ тер келдг билә.
3«Би ода хувцн угав –
Дәкн бийән хувцлхмби?
Би көлән уһачклав –
Дәкн терүг киртәхмби?»
4Һаран үүднә заагар иньгм орулхла –
Генткн зүркм дольглад одв.
5Би иньгән орулхар һархла,
Мини һарас мирр дусҗав,
Хурһдасм мирр төдг деер дусҗав.
6Иньгтән үүд секҗ өгхлә –
Иньгм йовҗ одсн бәәҗ!
Тер уга болҗ одв –
тегәд би менрәд одв.
Терүг хәәсн бийнь, олдсн уга.
Терүг дуудсн бийнь, хәрү уга.
7Балһс эргдг маначнр харһв:
Бийим цокад, гүвдәд,
Деерк бүркәһим шуулад хайв.
Дәкн тедн балһсна маначнр!
8Ерусалимин күүкд, тадниг
йир эрҗ сурҗанав!
Таднд кемр иньгм харһхла,
Терүнд ю келхвт?
Дурн намаг авлҗана гитн.
[Ерусалимин күүкд:]
9– Сәәхләс дунд хамгин сәәхн күүкн,
Чини иньг юуһарн
талдан көвүдәс сән болҗахмб?
Маднас эн андһар авчахлаг,
Чини иньг юуһарн
талдан көвүдәс сән болҗахмб?
[Күүкн:]
10– Мини иньг цаһан, улан нүүртә,
Арвн миңһн әмтнәс темдгтә.
11Терүнә толһань – цевр алтн,
Терүнә үснь отхта,
Тернь керән өңгтә – хар.
12Терүнә нүднь – усна урсхулд
бәәх көглҗрһнслә әдл:
Тедн үснд өөмнә.
Тедн боодгин хаҗуд сууна.
13Терүнә хойр халхнь – сәәхн цецгүд,
Теднәс каңкнсн үнр һарна.
Терүнә урлнь лилия цецг мет,
Терүнәснь мирр дусна.
14Терүнә һарнь – алтн шуург модн
Тернь топаз чолуһар сииләтә.
Терүнә геснь – занын яснас кегдҗ,
Тернь сапфир чолуһар кеерүлгдҗ.
15Терүнә көлнь – хаш чолун бахнсин бәәдлтә,
Тернь алтн улта.
Хәләхлә – Ливана бәәдлтә,
Хошун моднла әдл сәәхн!
16Терүнә урлнь – шикр мет әмтәхн,
Тер бийәрн – йир авта,
Седклим авлсн иньгм иим,
Иим мини үр,
О, Ерусалимин күүкд!
Currently Selected:
Соломона хамгин сән дун 5: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
