Риминхн 13

Йосна туск төр

1Күн болһн шаңһа йоснд соңсхврта болх йоста. Юңгад гихлә, Бурхна зөв уга йосн уга. Бәәсн цуг йосиг Бурхн тогтала. 2Тиигәд йосна өмнәс буцсн күн – Бурхна тогтасна өмнәс буцҗана. Тиим йовдл һарһҗах күн цааҗла харһх. 3Сән йовдл һарһҗах күн биш, хар саната йовдл һарһҗах күн йосна һардачнрас әәнә. Йоснас әәшго седклтәвч? Сән йовдл һарһҗ йов, тиигхлә йосн чамаг буульх. 4Йосна һардач чамд сә кехәр Бурхна зарц болҗана. Кемр чи хар саната йовдл һарһдг болхла, йосна һардачнрас ә. Яһад гихлә, чамаг засглх зөв терүнд бәәнә. Терчнь Бурхна зарц болад, хар саната йовдл һарһсн күүг Бурхна нерн деерәс засглна. 5Чи йосна һардачнриг зуг засглһнас әәһәд биш, болв Бурхнд церглх эврәннь дааврас соңс. 6Тиигәд тадн алван өгнәт. Йос һардҗах улс Бурхна зарцнр болҗана, тедн эврәннь даалһвр күцәҗәнә. 7Теднд өгх зөвтә юмиг өгтн: зүсн-зүүл алв өгтн, тедниг йир икәр күндлтн.

Ахнр-дүүнрин дурна тускар

8Кен чигн күүнд өгцтә бичә болтн. Зуг нег-негндән дурарн өгцтә болтн. Юңгад гихлә, хаҗудк күүндән дуртань зака күцәҗәнә. 9«Гергн залу хойр эврәннь иткл бичә эвдтн», «Бичә ал», «Бичә хулха ке», «Талдан күүнә эдл-ахуд седкл бичә тәв», – эн болн нань чигн зааврмудын һол төрнь иим: «Талдан улст бийләһән әдл дурта бол». 10Талдан улст дурта күн му юм үзүлшго. Талдан улст дурта болсн күн – Зака күцәнә. 11Тадн тиигҗ кех зөвтәт, яһад гихлә, нөөрәсн серх тадна цаг ирсиг меднәт. Деед Эзн иткҗәснәс ода таниг аврх цаг өөрхн бәәнә. 12Сө чилҗ йовна, өдр эклҗ бәәнә. Тиигәд харңһуһин йовдлмуд үлдәһәд, ода герлин зер-зев авий! 13Өдрин герлд бәәх әмтнлә әдл дигтәһәр бәәхмн. Тер төләд буру номта улсин шаҗна нәәрт орхмн биш, согтҗ әрк уухмн биш, цалдң йовдл һарһҗ аля кехмн биш, дәәлдҗ, үлү үзхмн биш. 14Деед Эзн Исус Христосин зер-зев автн. Тадн эврәннь килнцтә бәәдлд оньган өгдгән ууртн. Терүнә му седвәр бичә күцәтн.

Currently Selected:

Риминхн 13: ХКО_ӘБ

Highlight

Copy