Цецн селвгүд 4
4
Цецн Ухатаһар бийән бәрлһн
1Көвүд, эцкиннь сурһмҗ соңстн,
оньган өгтн, ухата болтн.
2Би таднд сән болдг ном өгчәнәв,
мини даалһвр бичә бастн.
3Би бас бичкн үрн биләв,
эцк-эк нанд йир дурта билә.
4Эцкм намаг иигҗ сурһдг билә:
мини келсиг зүркндән бәр,
мини заавр күцә, әмд йовхич.
5Цецн ухата болх медрлән өск,
мини келсиг бичә март, бичә буруша.
6Цецн Ухаһан бичә ге, терчнь чамаг бәрх,
терүг хәәрл – чамаг харсх.
7Цецн Ухана эклцнь юундв? Медрлд хә,
ю эс хоршав чигн, ухаһан гүүдүл.
8Цецн Ухаг үнл, тер чамаг өөдлүлх,
кемр терүг хадһлхла, чамаг туурулх.
9Чини толһад берк титм тәвх,
тер чамд гилвксн титм авч ирх.
10Көвүн минь, соңс намаг, мини үг ав –
тиигхлә чини насн утдх.
11Чамд би цецн ухана хаалһ заасув,
һо хаалһар йовулсув.
12Кемр йовхла, ишкдлән геешгоч,
кемр гүүхлә, бүдршгоч.
13Эн сурһмҗ ав, бичә хаҗи,
терүг хадһл, терүнд чини җирһл бәрәтә.
14Ичр уга әмтнә хаалһд бичә ор,
хорта әмтнә мөрәр бичә йов,
15терүгәр бичә йов, хаҗиһәд һар,
талдан үзгәр, хаҗуһарнь йов.
16Юңгад гихлә, кемр тедн хоран эс күргхлә, унтшго,
кемр күүг эс алхла, нүдән аньшго.
17Һарһсн хорта йовдлан тедн өдмг идсәр идҗәнә,
күч һарһсан чаһр мет тедн ууҗана.
18Цаһан седклтә әмтнә хаалһ – өрин герллә әдл,
урһҗах өдр дахад улм герлтнә.
19Ичр уга әмтнә хаалһнь харңһу таг,
альд бүдрхән тедн медҗәхш.
20Көвүн минь, мини үгиг соңс,
мини келснд оньган өг.
21Терчн чини хәләцәс алдрҗ салшго болтха!
Зүркнәннь гүүнд терүг хадһлх болтха!
22Юңгад гихлә, терчн терүг олҗ авсн күүндән әмн-җирһлнь болх,
цогц-махмудыг эмнх.
23Зөөрәс үлүһәр ухаһан әрвл,
юңгад гихлә, зүркн – җирһлин булг.
24Худл үгд бичә итк,
мек һарһҗ келхиг һәәл.
25Тус өмнән хәлә,
чи уралан хәләцтә бол.
26Хаалһан һооднь һарһ,
тиигхлә, чини хаалһ әәмшг уга болх:
27барун бий тал чигн,
зүн бий тал чигн бичә хаҗи,
болв хорта юмнас чи хооран һар.
Currently Selected:
Цецн селвгүд 4: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
