Цецн селвгүд 25
25
Хизкийин хаана цуглулсн Соломона цецн селвгүд
1Соломона талдан цецн селвгүд. Тернь Иудейин хан
Хизкийин әмтәр цуглулгдҗ.
2Нуувчиг үүдәсн Бурхн туурмҗта,
нуувчиг медсн Хан туурмҗта.
3Теңгрин өндриг, һазрин гүүниг болн
хаана ухаг медҗ болшго.
4Цаһан мөңгнәс хутхгдсн керг уга тоотыг авад хайхла,
урч ааһ кеһәд һарһх.
5Хаана хаҗудк хар саната күүг уга кехлә,
чик йосар ширәнь батрх.
6Хаана өмн бичә бардмнад бә,
бийәсн деегшән ямта улсин нүүрт бичә деегүр бәәдл һарһ.
7Сәәчүдин нүүрт чамаг бассн дорхнь,
«Деегшән һар», – гиҗ келснь деер болх.
Нүдәрн үзсән,
8зарһинь келһхәр бичә адһ.
Эс гихлә, өөрхн әмтнчнь чамаг ичәхлә,
хөөннь ямаран болх?
9Өөрхн күүнлә эврә кергәр зарһд ор,
күүнә нуувчиг бичә тара.
10Кемр келхләг – чамд му нер зүүлһх,
тегәд чамаг һутахнь маһд уга.
11Цаглань келсн үг –
цаһан мөңгн сиилвр деер бәәх алтн альмн.
12Цецн күүнә кесн бурушалһн
алтн чимкүр, улан мөңгн кегдл мет.
13Эзндән нәәлвртәһәр кергән күцәдг күн
тәрә хадлһна гүргүд цасна киит орулснла әдл болна,
эврә нойнд чидл орулна.
14Үүлн хурна, салькн көдлнә,
болв хур мел орхш.
Тедү мет хоосар белг өгнәв гиҗ келсн күүнлә әдл болҗана.
15Удан тесвр һардачиг чигн иткүлх,
җөөлн келн ясиг чигн күүлх.
16Бал олҗ авхларн – цадтлан ид,
болв бөөлҗтлән бичә ховдгл;
17нәәҗ талан дегд дару-дарунь бичә одад бә,
эс гихлә чамас тер цуцрх.
18Өөрхн күүнә худл герчнь –
бүдүн модн, селм, хурц сумн мет тиим.
19Хамхрсн шүднәс, доһлң көләс тус уга,
тедү мет зовлңта өдрлә нәәлвр уга күүнәс тус уга.
20Киитн өдрт хувц таслҗ тәәлсн мет,
шав деер давс цацсн мет –
тиигҗ күүнд зовлңта цагтнь байрта ду дуулснла әдл болҗана.
21Кемр чини хортн өлсҗәхлә – өдмг өг,
кемр ундасҗахла – ус уулһ:
22тиигҗ чи терүнә толһа деер шатҗах нүүрс хураҗанач,
чамаг болхла, Деед Эзн ачлх.
23Ар үзгин салькн нигт хур авч ирнә,
ховч күүнә келнәс му хәләц һарна.
24Керүлч гергнлә хамдан ик, у герт бәәхин ормд,
герин оран өнцгт бәәсн деер.
25Ундасад зовсн күүнд киитн усн тааста,
тедү мет холас ирсн сән зәңг тааста.
26Хар саната күүнә өмн чичрҗәх үннч күн
бузрдсн худгла, киртә булгла әдл.
27Балыг ховдглад идхлә му,
эс гихлә буульмҗ күләсн бас му.
28Бийән бәрҗ чаддго күн,
хаша уга хамхрсн балһсна бәәдлтә.
Currently Selected:
Цецн селвгүд 25: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
