Цецн селвгүд 21
21
1Хаана зүркн Деед Эзнә һарт урсхулин усн мет –
сансн талан терүг эргүлх.
2Күн болһн эврәннь хаалһан чик гиҗ санна,
болв Деед Эзн теднә зүрк сөрнә.
3Бәрц бәрснәс,
үннәр болн чикәр бәәсн Деед Эзнд таасгдна.
4Деегүр хәләц болн караг зүркн
хар саната әмтнд герллә әдл болҗ үзгднә,
болв теднь килнц болҗана.
5Килмҗ элвг бәәдлд күргх,
үүмән-шууган түрү бәәдлд орулх.
6Худл-мекәр хоршасн зөөртә күн –
киидән сахняд, үклүр адһна.
7Хар саната әмтнә хорнь тедниг алх:
юңгад гихлә, тедн чик йовдл һарһхар седсн уга.
8Мекч күүнә хаалһнь хаҗиһәд геедрәд йовна,
үннч күүнә хаалһнь һо болна.
9Керүлч гергнлә хамдан ик, у герт бәәхин ормд,
герин оран өнцгт бәәсн деер.
10Хар саната күн хорар буслна,
хаҗудк әмтән әрвлхш.
11Ичрән геесн күүг шоодхла – дамшлт уга әмтнд ухан орх,
цецн күүг сурһхла – медрл немгдх.
12Бурхн хар саната күүнә гериг хәләнә,
тегәд теднә күчинь авна, зовлң өгнә.
13Хәәкрәд дөң сурҗах цагт чикән бөглсн күн
эврән негт оркрх, терүнд дөң болшго.
14Нуувчар өгсн белг уур тәәлдг,
дораһар өгсн авлһас һалзурсн күн тогтндг.
15Үннч күн байрлтха гиһәд,
хорта күн әәтхә гиһәд,
чик йовдл кегднә.
16Чик хаалһасн хаҗисн күн
харңһу тамд тогтнх.
17Бахан хантл нәәрлхдән дурта күн угарх,
чаһрт дурта болн
сәәнәр бәәхдән дуртань байҗшго.
18Чик седклтә күүг сулдххин төлә,
терүг хар саната күүнә ормд сольҗ авна.
Үннч күүг сулдххин төлә,
терүг худлч күүнәс сольҗ авна.
19Айстан бурдг болн керүлч гергтә бәәсн дорхнь,
эҗго һазрт һанцарн бәәсн деер.
20Цецн күүнә ик үнтә зөөрнь чилдго,
һәргтә күн цугтаһинь һарһад чиләдг.
21Чик болн нәәлвртә бәәдл хәәсн күн
җирһлән чигн, үнниг чигн, тоомсран чигн олх.
22Цецн күн баатрмудын балһс диилх,
теднә итклин улынь күүлх.
23Келән татсн күн,
бийән зовлңгас харх.
24Сөрсхр болн караг күн – ичрән геесн күн,
тиим күн модьрун йовдлдан догшн.
25Хуурмг күүнә седвәрнь үкүд,
юңгад гихлә, терүнә һарнь көдлхәр седҗәхш.
26Өдр ирвәс тер седвәрәсн зовна,
болв үннч күн болхла хармнл уга эд-тавран түгәнә.
27Хар саната күүнә бәрцнь – Бурхна өмн һарһсн кишго йовдл,
кемр тернь хорта седвәрәр кегдхлә – терүнәс даву кишго йовдл.
28Худл герч зарһ деер келхләрн үкх,
үнн герч болсн күн диилх.
29Үннч биш күн ичр-һутр уга бәәдл һарһна,
болв үнн седклтә күн эврә хаалһарн йовна.
30Цецн ухан, тоолвр, селвг –
цугтан Деед Эзнә өмн юмн биш.
31Ноолдана өдрт әмтн мөрдән белднә,
болв диилвр Деед Эзнәс ирнә.
Currently Selected:
Цецн селвгүд 21: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
