Цецн селвгүд 2
2
Цецн Уха хәәлһн
1Көвүн минь, кемр мини үг авхла,
келсн зааврим седклдән бәрхлә,
2Цецн Уханд оньган өгәд соңсхла,
зүркәрн үннд иткхлә;
3кемр медрләрн һардвр кехлә,
үнн бәәдлд дуудвр кехлә;
4тиим юмиг цаһан мөңгнлә әдләр авхар седхлә,
булата зөөрән хәәҗәх мет, хәәхич –
5тиигхләрн Деед Эзнә әәмшг медҗ авхич,
Бурхна медрл олҗ авхич.
6Юңгад гихлә, Деед Эзн цецн уха өгнә,
Терүнә келснь – медрл болн тоолвр;
7Деед Эзн үннч күүнә диилвр белдҗ,
цеврәр бәәх улст халхцинь белдҗ.
8Тер чикәр бәәлһнә хаалһинь харна,
итклтә әмтнә хаалһинь харна.
9Тиигәд чи чик йовдл, үнн болн
үнн бәәхәр седлһнә һо бәәдлинь кевтнь медхич.
10Яһад гихлә, чини зүркнд цецн ухан орх,
медрл чини седкл девтәх.
11Чамаг мергн бәәдл хәәрлх,
чамаг тоолврта бәәдл харх,
12чамаг хар саната йовдлас аврх,
худл үгтә күүнәс аврх,
13һо хаалһасн хаҗисн әмтнәс,
харңһу таңгар йовсн күүнәс аврх.
14Тедн хорта йовдл һарһсндан байрлна,
хар санаһарн болн цалдң йовдларн бахан хаңһана.
15Тедн эврә җирһлдән төөрч йовна,
йовсн мөрәрн зүүләд эргнә.
Аля гергчүдәс яһҗ зулхин тускар
16Тиим кевәр чи әмтәхн келтә
күүнә гергнәс бийән хархич.
17Баһ цагтан мордсн залуһан хайсн терүнәс болн
эврә Бурхна андһар мартснас бийән хархич.
18Тер юңгад гихлә, эн күүкд күүнә гер – үклин бәрән,
хаалһнь үклин һазр тал һарна.
19Тер гергнә герт орсн күн хәрү һаршго,
җирһлин хаалһд дәкҗ оршго юмн.
20Тер учрар цаһан саната улсин хаалһар йов,
үннч әмтнә хаалһ темц.
21Юңгад гихлә, чик саната әмтн һазр деер бәәх,
цеврәр бәәх әмтн тенд бүүрлх.
22Ичр уга әмтиг болхла, һазр таасшго,
иткл уга әмтнә уңгинь таслх.
Currently Selected:
Цецн селвгүд 2: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
