Цецн селвгүд 19
19
1Һәргтә болчкад, худлч күүнәс
цеврәр бәәдг угатя күн деер.
2Медрл уга болхла, күүнд тус уга,
шулун-шудрмг көл чигн хаҗиҗ ишкх.
3Кемр күүг хаалһаснь һәргнь хаҗилһхлә,
тер күн Деед Эзиг гемшәнә.
4Зөөртә болхла, нәәҗнр икднә,
түрү зүдү бәәдл, нәәҗнриг салһна.
5Худл герч шоодврас гетлгдшго,
худлд бәргдсн күн әмд үлдшго.
6Кесгнь баячудт зуһудна,
элвгәр белг өгдг күүнлә кен чигн үүрлнә.
7Угатя күүнд ах-дүүнр чигн дурго,
теднәс даву – нәәҗнрнь харһхар седхш:
ам аңһатл тедн уга болна.
8Бийдән сә хәәҗәх күн – уха көөлднә:
цецн болхларн, бийдән сә кех.
9Худл герч шоодврас гетлгдшго,
худлд бәргдсн күн үкх.
10Һәргтә күүнд байн бәәдл ирлцҗәхш,
терүнәс даву – ялч нойниг һардшго.
11Цухлта йовдлас чик бәәдл зогсах,
эндүг тәвҗ өгснд күүнә алдр нернь медгднә.
12Хаана цухл – арслң аңгин оркрлһнла әдл,
хаана хәәрлт ноһан деерк чииглә әдл.
13Муңхг көвүн – эцкин мууль,
керүлч гергн оран оңһрха мет.
14Гер болн зөөр – эцкин үлдәсн зөөр,
ухата гергн – Деед Эзнә белг.
15Хуурмгас нөөрмү һәрг ирнә,
хоома бәәдләс күн харһнна.
16Бурхна заавр хадһлсн күн әмән хадһлна,
эврәннь бәәдлән эс хәләсн күн – үкнә.
17Һуульһнчд өгсн юмн – Деед Эзнд өггдҗәнә,
тегәд Деед Эзн терүнд дүүрңгәр хәрүлх.
18Баахн деернь көвүһән сурһ,
терүгән шоодад алчквзач.
19Модьрун заңгта күн засглгдх,
терүнд тәвҗ өгәд бәәхлә – му болх.
20Селвг соңс, сурһмҗ ав,
тегәд цаг ирвәс ухата болхич.
21Күүнә зүркн олн седвәртә,
болв зуг Деед Эзнә шиидвр күцнә.
22Күн иткләрн үнлгднә,
угатя күн худлчас хәәртә.
23Күн Деед Эзнә әәмшгәр әмд –
терүг күцәсн күн санамр унтна,
терүг зовлң дәвршго.
24Хуурмг күн һаран ааһд орулна,
зуг амндан күргтлән цуцрх.
25Ичрән геесиг засглхла, дамшлт уга әмтн серглң болх,
ухата күүг шоодхла, чини келсн селвг медх.
26Эцкән, экән гертәсн көөсн көвүн –
ичр уга, му нертә.
27Көвүн минь! Сурһмҗ эс соңсхла,
ухата үг угаһар эндүрәд бәәхич.
28Мектә герч йосиг басна,
хоран күргсндән хар саната күн байрлна.
29Ичрән геесн күн зарһас давшго,
муңхг күүнә нурһн кезә чигн цокулгддг.
Currently Selected:
Цецн селвгүд 19: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
