Цецн селвгүд 15
15
1Җөөләр өгсн хәрү уур дарна,
шүрүтә үгәс һалзурлт босна.
2Цецн күүнә келн медрлинь ясрулна,
һәргтә күүнә амнас му үг һарна.
3Деед Эзнә нүдн цугинь үзнә,
хар санатаһинь чигн, цаһан санатаһинь чигн үзнә.
4Ээлтә үг – җирһл батлна,
худлч келн седкл күүлнә.
5Муңхг күн эцкин сурһмҗ басна,
болв эцкин шоодвр соңсснь – ухата болх.
6Үннч күүнә герт дала зөөр бәәнә,
чик санан уга күүнә олзнь тус уга.
7Цецн күүнә келнәс медрл тарна,
муңхг әмтн тиигхш.
8Чик санан уга әмтнә бәрц Деед Эзнд җигшүртә,
үнн седклтә әмтнә Бурхнд мөрглһн Терүнд тааста.
9Чик санан уга әмтнә хаалһ Деед Эзнд җигшүртә.
Цецнәр бәәхәр седҗәх күүнд Тер дурта.
10Хаалһасн хаҗисн күн догшар засглгдх,
шоодврт дурго күн алгдх.
11Үклин һазр Деед Эзнә үлмәд –
тедү мет күүнә зүркн.
12Ичр уга күн шоодврт дурго,
тиим күн ухата әмтн дунд торшго.
13Зүркн байрлхла – чирә герлтнә.
Гейүрсн зүркн седкл күүлнә.
14Серлтә зүркн медрл хәәнә,
муңхг күн һәргәрн тетквр кенә.
15Угатя күүнд өдр болһнь күчр-күнд,
кишгтә күүнд өдр болһнь чилшго нәр.
16Зөөр хураһад, чичрҗ бәәснәс,
баһ тетквртә бәәһәд Деед Эзиг күндлсн деер.
17Тарһн бүрүһин мах дурго болҗ идсн дорхнь,
темсәр кесн хотыг дурлҗ идсн деер.
18Уурта күн цүүгә цацна,
тесвртә күн өшә зогсана.
19Хуурмг күүнә хаалһ хатханчгар бүтнә,
үнн седклтәнь у-өргн хаалһар йовна.
20Цецн көвүн эцкән байрлулна,
һәргтә көвүн экән һутана.
21Ухан тату күн һәргәрн бийән аадрулна,
ухата күн һоодан йовна.
22Селвгчнр уга болхла – кеҗәх кергт күцәмҗ уга,
кемр селвгчнр олн болхла – цугнь күцх.
23Кемр хәрү өгч чадхла – байрта.
Төвәр келсн үг ямаран сәәхн!
24Серлтә күн удандан бәәхәр деегшән өөдлнә,
үкләс хооран йовна.
25Деегүр әмтнә гериг Деед Эзн уга кех,
болв белвсн күүкд күүнә бәәриг харсх.
26Хар санан Деед Эзнд җигшүртә,
Терүнд күргсн сән үг таалта.
27Олзд дурта күн зовлң авчана,
авлһд дурго күн удан әмд йовх.
28Үннч күүнә зүркн хәрүһинь келҗ өгх,
чик санан уга күн хортаһар келнә.
29Деед Эзн чик санан уга күүнәс холд йовна,
болв үннч күүнә мөргүл соңсна.
30Цевр хәләц зүрк байрлулна,
сән зәңг эрүл-мендинь батлна.
31Туста шоодвр авчах күн
цецн әмтнәс салшго юмн.
32Сурһмҗ бурушасн күн – бийән зовах,
шоодвриг медсн күн уха авх.
33Деед Эзнәс әәхлә, цецн болдг дасх,
номһн бәәдләс туурмҗ эклнә.
Currently Selected:
Цецн селвгүд 15: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
