Цецн селвгүд 13
13
1Көвүнә ухань эцкин сурһмҗас,
деегүр күн шоодлһ соңсхш.
2Сән күн келсн үгдән ханна,
хар саната күүнә седвәр күч үзүлһнд күргнә.
3Үгән төвлсн күн – җирһлән хадһлх,
үгән ухаллго келсн күн – бийән барх.
4Хуурмг күн күләҗ-күләҗ күләсән авч чаддго,
кинән күүнд цугнь элвг.
5Чик седклтә күн худлд дурго,
му седклтә күн бийән һутана, бийән ичәнә.
6Сән керг һо хаалһд һарһна,
му йовдл килнцтә әмтиг хаалһаснь хаҗилһнә.
7Зәрм күн, юмн уга болвчн, бийән баяч кевтәһәр бәрнә.
Зәрмнь, зөвәр байн болв чигн, түрү бәәдл һарһна.
8Зөөр күүнә җирһл хадһлна,
болв угатя күүг күн зовашго.
9Цаһан саната күүнә герл байртаһар һарх,
хар саната әмтнә герлнь унтрх.
10Ик сананас цүүгән болна,
болв селвг авсн күн цецн.
11Эндүһәр олсн зөөр генткн уга болх,
болв терүг умшар олсн болхла, күн байҗх.
12Эс күцсн нәәлвр – зүркнә өвдкүр,
кемр иткл күцхлә, җирһл дүүрнә.
13Келсиг эс итксн күн – бийдән му кенә,
заавриг итксн күн ачлгдна.
14Цецн күүнә селвг – җирһлин булг,
тернь үклин гөлмәс харна.
15Серглң ухан хәәрлт өгнә,
хорта йовдл үкл тал көтлнә.
16Ухата күн кехәсн өмн ухална,
һәргтә күн һәргән му йовдларн үзүлнә.
17Һәргтә зәңгч үүлән үзх,
итклтә зәңгч әмдрлд күргнә.
18Сурһмҗ эс авсиг ичртә йовдл болн түрү бәәдл күләнә,
хөрлт соңссн болхла, тиимнь ачта.
19Седвәр күцхлә, седкл байрлна,
һәргтә күүнд хар санаһан хайснас мунь уга.
20Цецн күүнлә үүрлхлә, эврән цецн болхич,
һәргтә күүнлә үүрлхлә, эврән зовлңла харһхич.
21Килнцтә күүг зовлң ээрнә,
цаһан саната күүнд юмна сәнь өггднә.
22Сән күн үрндән болн ачнртан зөөрән үлдәнә,
хар саната күүнә зөөр аштнь үннч күүнә һарт орна.
23Түрү-яду улсин урһцнь элвг болсн бийнь,
йоснд уга йовдл һарһдг әмтн
терүгинь күчәр булаҗ авна.
24Шоодхасн әрвлснь, көвүһән әрвлшго,
үрндән дуртань, уха орулхан мартшго.
25Цаһан саната күн цадтлан иднә,
хар саната әмтнә геснь хоосн.
Currently Selected:
Цецн селвгүд 13: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
