Әмтнә то авлһн 6
6
Назореймүдин#6:1-2 Назорей – еврей келәр иим күн эгл әмтнәс холҗад, бийән Бурхнд нерәддг чигн. өгх андһарин тускар
1-2Израилин улст келтхә гиҗ Деед Эзн Мошед иигҗ келнә:
– Кемр кен-негнь залу күн болну, күүкд күн болну Деед Эзнд бийән нерәдәд андһар өгхлә – назореймүдин андһар. 3Тер күн чаһр болн искәсн әрк уушго, чаһрас кесн цу эс гиҗ искәсн әркәс кесн цу уушго, уста үзмин шүүс уушго, шиңкән болсн эс гиҗ хагсасн уста үзм идшго болҗана. 4Назореймүдин цагт бәәсн саамд уста үзмәр кесн юм, нам уста үзмин ясинь эс гиҗ терүнә хальс идшго. 5Терүнә андһар өгсн цагин туршарт үсән хәәчлшго болҗана. Бийинь Деед Эзнд нерәдәд андһар өгсн болзг эс чилтл тер күн әрүн: үсән урһатха. 6Деед Эзнд нерәдәд андһар өгсн цагин туршарт тер үксн күүнә цогц тал өөрдшго болҗана. 7Нам эцкнь эс гиҗ экнь, ахнь эс гиҗ эгчнь үкв чигн, тер күн үксн улсиг көндәшго юмн. Яһад гихлә назореймүдин андһар өгсн күүнә толһа деерк ут үсн – Бурхнд нерәдснә темдг. 8Назорей болҗасн цагин туршарт тер күн бийән Бурхнд нерәдсн болҗана.
9Кемр кен чигн күн назорей күүнә хаҗуд үкҗ одхла, тернь Бурхнд нерәдсн ут үсинь бузрдах. Дәкн назорей цевр болхларн үсән хәәчлх зөвтә. Бузрдсна хөөн доладгч өдртән үсән хәәчлтхә. 10Нәәмдгч өдр тер күн Харһлтын Шатрин үүднд гелңд хойр көглҗрһн эс гиҗ хойр баахн көглҗрһн шову илгәтхә. 11Тер шовудар гелң бәрц бәртхә. Негинь килнцәс цеврллһнә бәрцд орултха, хойрдгчинь шаталһна бәрцд. Тиигҗ тер үксн күүнәс гемән хәрүлх. Тегәд назорей тер өдр шинәс толһаһан әрүслтхә, 12Деед Эзнә өмн шин болзгт тер андһар өгтхә, нег җил болсн хурһ авч ирәд һаруһинь дааҗах бәрцд орултха. Урдк болзгнь үрв, яһад гихлә терүнә назорейин бәәдл бузрдв.
13Назорейин закан эн: назорей болх болзг чилхлә, тер күүг Харһлтын Шатрин үүдн тал авч иртхә. 14Эврәннь бәрцән тер Деед Эзнд авч ирх йоста – шаталһнд орулх эрмдг уга нег җил болсн хурһ, килнцәс цеврллһнә бәрцд орулх эрмдг уга нег җил болсн хө, эвцлһнә бәрцд орулх эрмдг уга хуц. 15Дәкәд нег зембль исклго буудян һуйрар болһсн өдмг (олив тоснд элдсн һуйр, олив тос түрксн исклго болһсн һуйр), кергтә өдмгин бәрц болн чаһр. 16Эн бәрциг гелң Деед Эзнд бәртхә. Терүгәрн цеврллһнә болн шаталһна тәкл тәктхә. 17Дәкәд Деед Эзнд эвцлһнә бәрц авч иртхә – нег хуц болн нег зембль эс искәсн һуйр. Теднәр гелң өдмгин бәрц бәрәд, чаһрин бәрц өргтхә. 18Назорей Харһлтын Шатрин үүднд үсән хәәчләд, эврәннь назорейин авъясар, эвцлһнә бәрц шатаҗах һалд терүгән хайх зөвтә. 19Тегәд назорейин авъясар үсән хәәчлснә дарунь, гелң хуцин чансн өмнк көлинь болн нег эс искәсн өдмг, эс искәсн һуйр зембләс авад назорейин һарт бәрүлхмн болҗана. 20Тедниг цугтаһинь гелң Деед Эзнә өмн өргтхә. Бәрцин өрч болн һуйин махар өгсн белг – эннь әрүн юмс гелңгин болҗана. Энүнә дару назорей чаһр ууҗ чадҗана.
21Эннь назорейин андһар өгсн күүнә закан. Назореймүдин авцар тер күн Деед Эзнд бәрц бәрҗәнә. Терүнәс икәр өгч чадхла, өгхмн болҗана. Назореймүдин диг-дараһар тер күн андһаран күцәх йоста.
Ахарона әдсллһн
22Деед Эзн Мошед келнә:
23– Ахаронд болн терүнә көвүдт келүл: «Израилин әмтиг йөрәх үгмүд эн:
24– Чамаг Деед Эзн йөрәтхә,
чамаг хартха!
25Чамд туссн Терүнә хәләц герлтә болтха,
чамаг хәәрлтхә!
26Чамаг Деед Эзн хәләтхә,
чамд амулң җирһл учратха!»
27Тегәд гелңгүд Мини нериг Израилин әмтнд дуудвр кеһәд бәәтхә. Би тедниг йөрәхүв.
Currently Selected:
Әмтнә то авлһн 6: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
