Әмтнә то авлһн 19
19
Шар өңгтә үкрин үмсн
1Деед Эзн Мошед болн Ахаронд келнә:
2– Деед Эзнә заасн диг-даран эн. Израилин улс чамд шар өңгтә үкр авч иртхә гиҗ кел. Тер үкр эрмдг уга, ө уга, дәкәд көдлмшт дарлт уга болтха. 3Терүг Элеазар гелңд өгтн. Бий бәәрнәсн хооран һарһад үкриг гелңгин хаҗуд алтхаг. 4Элеазар гелң хурһан терүнә цуснд норһад дола дәкҗ Харһлтын Шатр тал цацтха. 5Үкриг гелңгин нүднд шатах кергтә: үкрин арсиг, махинь, цусинь болн дотрк бузр юмсинь шатах. 6Гелң хошун модна тасрха, хуссопин ац болн улавр күрң өңгтә эдин тасрха авад шатачах үкрин һалд хайтха. 7Дарунь гелң эврәннь хувцан уһаһад, бийән уһах зөвтә. Терүнә хөөн гелң хәрү бәәрн талан одҗ чадҗана, болв асхн күртл цевр биш болх. 8Үкриг шатасн күн бас хувцан уһатха, бийән уһатха. Асхн күртл тер цевр биш болх. 9Шатасн үкрин үмсиг цевр күн хураһад, бәәрнәс хооран цевр һазрт һарһтха. Израилин хамцана улс тер үмсәр килнцәс цеврллһнә авъяс күцәхин төлә ус белдх йоста. Эннь килнцәс цеврллһнә бәрц. 10Шатасн үкрин үмс цуглулсн күн хувцан уһах йоста. Асхн күртл тер цевр биш. Эннь Израилин улст болн тедн дунд бәәх нүүҗ ирсн улст мөңкинд өггдҗәх зокал.
11Үксн күүг әрә көндәсн күн долан хонгтан цевр биш. 12Һурвдгч өдртнь болн доладгч өдртнь тер күн эн үмсәр цеврлгдхләрн цевр болх. Кемр тер күн һурвдгч болн доладгч өдртнь эс цеврлгдхлә, тиигхлә цевр биш болҗана. 13Үксн күүг әрә көндәһәд бийән эс цеврлсн күн Деед Эзнә өргә гериг бузрдаҗана. Тиим күн Израиләс уга кегдх йоста. Тер күн цеврллһнә усна цацл эс авсндан бузр болҗана. Цевр биш бәәдл терүн деер бас үлдҗәнә.
14Кемр шатрт кен чигн үкхлә диг-дарань иим: шатрт орҗ ирсн күн болһн, дотрнь бәәх күн болһн долан хонгтан цевр биш, 15бүркәг уга ямаран чигн сав цевр биш. 16Алгдсн, үксн, үкснә яс эс гиҗ үкәр әрә көндәсн күн долан хонгтан цевр биш. 17Тер күүг цеврлхин төлә килнцәс цеврллһнә бәрцд орулад, шатагдсн үкрин үмсиг урсхмлын уста савд тәвхмн. 18Нег цевр күн хуссоп авад тер уснд булхулад шатрт цацл цацтха, дотрнь бәәх юмсиг болн әмтиг болн ясинь әрә көндәсн, алгдсн, үксн болн үкәр әрә көндәсн күүнд цацл цацтха. 19Цевр күн цевр биш күүнд һурвдгч өдртнь цацл цацх йоста. Дәкәд доладгч өдртнь бас тиигх. Доладгч өдртнь тер күүг бузр бәәдләснь цеврлх. Цеврдсн күн эврәннь хувцан, бийән уһатха. Асхнднь тер цевр болх. 20Цевр биш болсн күн, бийән цеврләд угань хамцанас уга кегдх йоста. Тер күн Деед Эзнә өргә гер бузрдаҗана. Цеврллһнә цацлд тер күрсн уга, тер цевр биш. 21Эннь теднд мөңк зокал.
Цацл цацсн күн хувцан уһах йоста. Цеврллһнә ус әрә көндәсн күн асхн күртл цевр биш. 22Цевр биш күүнә көндәсн юмс цевр биш болх. Терүг әрә көндәсн күн асхн күртл цевр биш.
Currently Selected:
Әмтнә то авлһн 19: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
