Матай 18

2) Теңгрин орн-нутг

1Тер цагт Исус тал сурһульчнр ирәд:

– Теңгрин орнд хамгин икнь кемб? – гиҗ сурцхав.

2-3Исус бичкн көвүг дуудҗ авад, сурһульчнрин өмн зогсаһад:

– Кемр тадн хүврәд, үрдүдлә әдл эс болхла, Теңгрин орнд орҗ чадшгот гиҗ үнәр келҗәнәв. 4Бийән номһрулад, эн үрнлә әдл бичкн болҗ чадсн күн Теңгрин орнд хамгин ик болх. 5Мини нернә төлә иим бичкн үриг орулҗ авдг күн, тер намаг орулҗ авна.

Иткл эвдснә тускар

6Нанд итксн хамгин бичкн күүнә иткл эвдсн күүнд әмд бәәхин ормд теермин чолу күзүнднь бооһад, теңгсин гүүнд шивҗ хайхла, деер болх. 7Күүнә иткл эвдсн учрас әмтн муулян эдлх. Әмтн күүнә иткл эвдлго бәәхш. Зуг энүг кедг күн басл муулян эдлх. 8Кемр һарчн эс гиҗ көлчн иткл эвддг йовдлла харһулхла, тәәрәд цааран шивчк. Хойр һар көлтәһән мөңк һалд тусхин ормд өрәсн һар көлтәһән әмн җирһлд орсн деер. 9Кемр зүн нүднчн иткл эвддг йовдлла харһулхла, салһад авад шивчк. Хойр нүдтәһән мөңк һалд тусхин ормд өрәсн нүдтәһән әмн җирһлд орсн деер, – гиҗ Исус келв.

Төөрсн хөөнә тускар

10-11– Хәләтн, Нанд иткдг хамгин бичкн күүг бичә бастн. Теднә Бурхна элчнр Мини Теңгрин Эцкин өөр оньдин зогсна. 12Тадн ю санҗанат? Кемр нег күн зун хөөтә болад негинь геехлә, йирн йисн хөөһән уул заагт үлдәһәд, төөрсн хөөһән хәәхм, тиим эсий? 13Болв түүгән олҗ авсн цагтан йирн йисн хөөндән тиигҗ байрлл уга, олсн хөөндән теңкән уга байрлх, – гиҗ Би үнәр келҗәнәв. 14Тиим кевәр тадна Теңгрин Эцктн эврәннь хамгин бичкнән үкүлшгоһар седҗәнә.

Килнц кесн ах

15– Ахчн чини өмнәс килнц һарһхла, әмтнд медүллго терүн тал йовад, килнцин тускар чирәднь кел. Кемр үгичинь соңсхла, чи төөрсн ахан олҗ аввч. 16Кемр ахчн үгичинь эс соңсхла, «хойр эс гиҗ һурвн герчтә керг төр хаһлгдх зөвтә», гидг төләд нег эс гиҗ хойр кү авч ирәд, терүнә килнцин тускар кел. 17Кемр ахчн тедниг чигн эс соңсхла, хургт кел, кемр хургиг эс соңсхла, тер буру номта болн алв цуглулдг күүнлә әдл болв гиҗ сан. 18Үнәр келҗәнәв, эн һазр деер тадна хөрсн юмн теңгрт хөргдх, эн һазр деер зөвшәрсн юмн теңгрт зөвшәргдх. 19Эн орчлңд бәәсн тадн дундас хойрнь зөвшәрҗ ю эс сурв чигн Теңгрин Эцкм сурситн өгх, үнәр келҗәнәв. 20Кемр хойр эс гиҗ һурвн күн Мини төлә цуглрхла, теднә дунд Би бәәхв, – гиҗ Исус келв.

Күүнә гем тәвҗ өгдго зарцин тускар

21– Деед Эзн! Кемр ахм нанд гем кесн болхла, кедү дәкҗ би геминь тәвх зөвтәв? Дола дәкҗий? – гиҗ Пётр Исусас сурв.

22– Уга, долан биш, дал дәкҗ долан. 23Теңгрин йосн гисн эн: Нег хан эврәннь зарцнрин тооцаг шүүхәр седв. 24Мөңгнә тооцан эклхлә, терүн тал нег зарциг авч ирнә. Тернь кесг тербум арслң өртә бәәҗ. 25Өртә күн мөңгинь хәрү өгч эс чадхлань, эзн терүг гергтәһинь, гер-малтаһинь мухла кеҗ хулдад, өрән авхар шиидв. 26Зарц эзнәннь көлднь мөргәд:

– Буйн болтха! Дәкәд невчкн зуур күләҗәтн. Би өритн цугинь цуглулҗ өгчкнәв! – гиҗ сурв.

27Эзн зарцдан санань зовад, өринь хәрүләд тәвчкв. 28Энүнә хөөн зарц цааран һарч йовад, нег хамдан көдлҗәсн күүнлә харһв. Тернь зуухн цаһан мөңг өгх зөвтә бәәҗ. Зарц өртә күүг бахлураснь базһад:

– Өрим ас нааран! – гиҗ келв.

29Өртә күн өвдглҗ унад:

– Буйн болтха, күләҗә! Би удл уга өричинь өгчкнәв! – гиҗ ээрв.

30Зуг зарц терүг хәәрлл уга өринь эс өгтлнь түүрмд суулһна. 31Талдан зарцнр энүг үзәд, икәр уурлад, цугинь эзнд медүлнә. 32Тиигхлә эзн тер зарциг дуудҗ авад:

– Муульта мухла! Чи намаг ээрәд сурад бәәхлә, би чини өричинь хәрүлүв. 33Яһҗ би чамаг өршәләв, тиим кевәр чи өртә күүг өршәх зөвтә биләч, – гиҗ келв.

34Дәкәд эзнь ууртан бүтәд:

– Эн зарциг өрән эс өгтл засгла харһултн, – гиҗ талдан зарцнрт закв.

35Кемр тадн әрүн седкләрн ахиннь геминь эс тәвхлә, тиим кевәр Теңгрин Эцкм тадна гемитн тәвшго.

Currently Selected:

Матай 18: ХКО_ӘБ

Highlight

Copy