Матай 12

Бемб өдрин тускар

1-2Энүнә хөөн бемб өдрлә Исус тәрсн тәрәһәр йовҗ йовла. Сурһульчнр өлсәд, тәрәнә толһас таслад идцхәв. Паршмуд энүг үзәд:

– Хәлә, Чини сурһульчнр бемб өдрт кех зөв уга юмиг кеҗәнә, – гиҗ келцхәв.

3– Өлсҗ йовсн Давид эврәннь үүртән ю кесинь умшсн угавт? 4-5Давид Бурхна герт орад, Бурхна өмн тәвсн өдмг теднлә хувалцҗ идв. Тер өдмгиг һанцхн гелңгүд иддмн. Сүмд бемб өдрин йосиг эвдсн гелңгүдиг бурушахш, гисиг Мошен заканд тадн умшсн угавт? 6Медҗ автн: энд сүмәс деер күн бәәнә. 7Кемр тадн «Бәрц бәрхин ормд өршәңгү болтн», – гисн үгмүдин чинринь медсн болхла, тадн буру уга әмтиг гемшәхн уга биләт. 8Яһад гихлә, Күмни Көвүн бемб өдрин Эзн мөн, – гиҗ Исус теднд хәрү өгв.

Әмн уга һарта күүнә тускар

9Тендәс һарад Исус хурлур ирв. 10Тенд әмн уга һарта күн бәәҗ.

– Бемб өдрлә кү эдгәх зөв бәәнү? – гиҗ Исусас зәрм әмтн сурцхав. (Терүг гемшәх учр хәәһәд тедн сурҗ.)

11– Кемр ор һанцхн хөөнтн бемб өдрлә нүкнд унҗ одхла, тадн хөөһән үлдәлго, нүкнәснь татҗ авхм бишвт? 12Күн болхла хөөнәс деер биший? Тиим эс мөний? Тер учрар закаһар бемб өдрлә күн сә кех зөвтә, – гиҗ Исус хәрү өгв.

13Цааранднь Исус әмн уга һарта күүнд:

– Һаран суңһ! – гив.

Тернь һаран суңһв, һарнь дарунь эдгәд одв. 14Паршмуд болхла хурлас һарч йовад, Исусиг яһҗ хорлҗ уга кехән селвлцхәв.

Бурхна онц йилһҗ авсн зарц

15Энүг медчкәд Исус тендәс әрләд йовҗ одв. Олн әмтн Исусин ардаснь дахҗ йовцхав. Исус тедниг цугинь эдгәһәд:

16– Мини тускар күүнд бичә келтн, – гиҗ әмтнәс үг авв.

17Эшья әәлдәчәр дамҗҗ келсн эн үгмүд күцәхин төлә тер йовдл учрв: « 18Мини онц йилһҗ авсн Хәәртә Зарц эн! Мини седклин байр эн! Эврәннь Әрүн Сәкүсән Энүнд белглҗ өгчәнәв! Эн келн әмтн болһнд Аврлһна тускар зәңглҗ келх! 19Күүнәс үг булалдҗ, уульнц болһнд дууһан өргҗ, үгән хәәкрҗ төрүц аман секшго. 20Унҗсн хулсиг хуһлшго, утан һарчах зулыг унтрашго. Үнн чик йосн орчлңд диилтл Эн төрүц зогсҗ амршго. 21Буру номта улс Терүнд нәәлх!»

Исус болн Баал-Зебүль

22Исусур нег сохр, келн уга күүг авч ирҗ. Тер хар сәкүснд эзлгдсн бәәҗ. Исус терүг эдгәв, өвчтә күн келдг, үздг болв. 23Әмтн алң болцхав.

– Энтн Давидин тохмта күн биший? – гиҗ тедн сурцхав. – 24Эрлгин, Баал-Зебүлин#Баал-Зебүль гидг үг «батхна нойн» гиҗ орчулгдна; эн эрлгин талдан нерн. күчн угаһар Энтн хар сәкүсдиг һарһҗ көөҗ чадшго билә, – гиҗ паршмуд әмтнә үг соңссн хөөн келцхәв. 25Паршмудын ухаһинь медәд, Исус:

– Кемр алвт болһн дотран дәәлдхлә, тер хоосрад ирх. Кемр балһсн болһн бүл болһн, дотран эс таархла, тер әңгрәд буурад одх. 26Тер учрар кемр эрлг эрлгиг көөҗ һарһхла, тер бийләһән дәәлдҗәх темдг. Тиигхлә алвтнь ормдан яһҗ торад бәәхмб? 27Кемр Би хар сәкүсдиг Баал-Зебүлин күчәр көөхлә, ямаран күчәр тадна көвүд хар сәкүсдиг көөдмб? Тер учрар тедн тадна зарһчнр болтха! 28Кемр Би Бурхна Сәкүсәр хар сәкүсдиг көөхлә, тертн Бурхна йосн ирснә темдг! 29Чидлтә күүг күләд уга бәәтл чидлтә күүнә герт орад, күн терүнә өлг-эдинь хулхалҗ чадхий? Эзинь күлсн хөөн күн терүнә геринь тонҗ, өлг-эдинь хулхалҗ чадх! 30Намаг эс дахсн күн Нанла сөрүд бәәнә. Нанла хурадго күн тарана. 31Тер учрар Би таднд келҗәнәв: Әмтнә килнцчн тәвгдх. Бурхиг му келдг күүнә гемньчн тәвгдх. Зуг Әрүн Сәкүсиг күн му келхлә, терүнә бурунь тәвгдшго. 32Кемр күн Күмни Көвүнә өмнәс үг келхлә, терүнә бурунь тәвгдх. Зуг күн Әрүн Сәкүснә өмнәс үг келхлә, терүнә бурунь өдгә цагтчн, иргч цагтчн төрүц тәвгдшго, – гиҗ келв.

Модн темсн хойр

33Сән темс авхин төлә сән урһцта модн кергтә. Му модн му темс өгнә. Модна сән мууһинь темсәрнь медгднә. 34Хойр көлтә моһа! Хар сана зүүһәд, сән үг яһҗ келҗ чаддмт? Седклд бәәсн юмн келн-амар дамҗҗ һардг эсий? 35Цаһан саната күн цаһан зөөрәсн цаһаһинь һарһна. Хар саната күн хар зөөрәсн харинь һарһна. 36Зарһин өдр ирхлә, санамр келсн үг болһнас көлтә күн тооцаһан өгх. 37Юңгад гихлә, келсн үгчн чини буруг болн буру угаг үзүлх, – гиҗ Исус келв.

Онц темдгин тускар

38– Багш, бидн Танас онц темдг үзх санатавидн, – гиҗ паршмуд болн ном цәәлһәчнр Исуст келцхәв.

39– Бурхн уга, хар саната үйнр онц темдг некәд бәәнә. Зуг Йона әәлдәчин темдгәс үлү онц темдг теднд үзүлгдшго. 40Йона теңгсин ик заһсна гесн дотр һурвн өдр болн һурвн сө бәәсн кевәр Күмни Көвүн һазр дор һурвн өдр болн һурвн сө бәәх. 41Зарһин өдрт Ниневин әмтн эн цагин үйнртә босад, эдниг гемшәх. Тедн Йонин келсн үгинь соңсад, килнцән хайцхав. Энд болхла, Йонас ик алдр күн бәәнә! 42Зарһин өдрт өмн үзгин һазрин хатн эн цагин үйнртә босад, эдниг гемшәх. Юңгад гихлә, тер ик холас Соломон хаана цецн уха авхар ирсмн билә. Энд болхла, Соломонас ик алдр күн бәәнә!

Хар сәкүсн хәрү ирҗәнә

43– Хар сәкүсн күүнә дотрас һарад, хатад хагсҗ одсн көдә эргәд, амрх орм хәәнә, зуг олхш. 44Тиигхлә тер: «Урдк бәәсн герүрн би хәрү йовнав», – гиҗ санад хәрү ирнә. Хәрү ирхләнь, эврәннь бәәсн герән цевр цер ахулчкснь, сул бәәсинь үзнә. 45Тиигхлә тер һарч йовад, бийәсн ик догшн хар сәкүсдиг дахулҗ авч ирнә. Тедн ирәд күүнә дотр бүүрлнә. Аштнь күн урдкас үлү му бәәнә. Эн цагин хар саната үйнрлә бас тиим юмн учрх! – гиҗ Исус келв.

Исусин эк болн дүүнр

46Исусиг олн әмтнлә күүндҗәхлә, Терүнә дүүнр эктәһән герин һаза зогсла. Тедн Исуста хамдан күүндхәр седҗ.

47– Тенд һаза эктн Тана дүүнртә зогсҗана, Танла күүндх саната, – гиҗ нег күн Исуст келв.

48-50– Мини эк гисн кемб? Мини дүүнр гисн кемб? – гиҗ тер күүнд хәрү өгәд, Исус хурһарн сурһульчнр тал зааһад, – Мини экм болн дүүнрм эн, Теңгрин Эцкимм заасинь күцәдгнь, Мини экм, ахнр-дүүнрм, – гив.

Currently Selected:

Матай 12: ХКО_ӘБ

Highlight

Copy