Левит 24
24
Герлин гегәнә тосна тускар
1Деед Эзн Мошед келнә:
2– Һарар кесн оливин цевр тос герлин гегән зогсл угаһар шатхин төлә, чамд авч иртхә гиҗ Израилин улст закад кел. 3Деед Эзнә өмн терүгәр зогсл угаһар Харһлтын Шатрт көшгин өмн зул өргәд бәәх. Асхнас өрүн күртл шатчах зул бәәдгәр, терүг Ахарон хәләһәд бәәтхә. Эннь таднд өгчәх зокал, үйәс үйд күцәх кергтә. 4Деед Эзнә өмн бәәх цевр алтар кесн герлин гегән деерк зулыг тер оньдин хәләһәд бәәтхә.
Өдмгин тәвцин тускар
5Буудян цаһан һуйр авад 12 хавтха өдмг болһ. Өдмг болһнд ефән арвна хойрнь орх зөвтә. 6Хавтха өдмгиг хойр баг кеһәд тәв. Баг болһнд зурһаһад өдмг Деед Эзнә өмн алтар кесн ширә деер орк. 7Баг болһна хаҗуд цевр ладан тәв. Эннь Деед Эзнд белг гиҗ авч ирҗәх өдмгин дееҗ болх. 8Бемб өдр болһн Израилин улсас зогсл угаһар эн өдмгиг Деед Эзнә өмн тәвтхә. Тегәд эннь Израилин улс мөңк бооцаг күцәҗәх бәрц болҗана. 9Эн өдмг Ахарона болн терүнә көвүдин. Тер өдмгиг тедн әрүн ормд идтхә. Эннь әрүнәс әрүн юмн. Деед Эзнд авч ирҗәх һалын бәрцәс мөңкинд Ахаронд болн хөөт үйнртнь нерәдгдҗәнә.
Бурхиг му келсн күүг цааҗллһн
10Израилин улс дунд нег күн бәәҗ. Терүнә экнь Израилин күн, эцкнь Египетин бәәҗ. Бәәрн һазрт тер Израилин улсин негнләнь ноолдна. 11Израилин күүкд күүнә тер көвүн Деед Эзнә нериг муурулад му келнә. Терүг Моше тал авч одна. Терүнә экин нерн Шеломит, тер Дан гидг отгин Диврин күүкн бәәҗ. 12Му келсн күүг бәрәнд авад, Деед Эзнә шиидвр күләнә.
13Деед Эзн Мошед келнә:
14– Му келсн күүг бәәрнәс һарһ. Терүнә келсиг соңссн әмтн толһа деернь һаран тәвәд, хамцанд бәәсн әмтн цугтан терүг чолуһар икәр шивтхә. 15Израилин улст кел: «Кемр кен-негнь эврәннь Бурхиг му келхлә, тер килнц һарһсндан засглгдх. 16Деед Эзнә нериг му келсн күн алгдх. Хамцанд бәәх әмтн цугтан терүг чолуһар икәр шивтхә. Нүүҗ ирсн әмтн болн бәәрн әмтн болну, Деед Эзнә нериг му келснь алгдх зөвтә.
17Кү алснь алгдх зөвтә. 18Мал алсн күн ормднь ялынь өгх йоста. Әмнә ормд әм даах. 19Өөрхн күүндән эрмдг һарһснднь бас тиим эрмдг терүнд һарһх кергтә: 20хамхлснд хамхлх, нүднә ормд нүдән, шүднә ормд шүдән өгх. Ямаран эрмдг күүнд һарһсинь, тиим эрмдг терүнд һарһх кергтә. 21Мал алсн болхла, тер күн ялынь даах йоста. Кемр кү алсн болхла, терүг бийинь алх кергтә. 22Нүүҗ ирсн әмтнд болн бәәрн әмтнд нег закан бәәтхә. Яһад гихлә Би – Деед Эзн, тадна Бурхн».
23Моше энүнә тускар Израилин улст келв. Му келсн күүг бәәсн ормаснь һарһад чолуһар икәр шивв. Израилин улс Мошед Деед Эзнә келсәр кеһәд күцәв.
Currently Selected:
Левит 24: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
