Һалатьянхн 1

Мендллһн

1-2Һалатьяд бәәх сүзгтни багмудт Павел иигҗ бичҗ. Нанла хамдан бәәх цуг ахнр-дүүнр танла мендлҗәнә. Намаг апостол болтха гиҗ күн чигн биш, күүһәр дамҗад чигн биш һанцхн Исус Христос болн Терүг үкләс әмдрүлсн Бурхн-Эцк дуудвр кев.

3Мана Бурхн Эцк болн Деед Эзн Исус Христос цаһан сана, амулң-төвкнүн бәәдл таднд өгтхә.

4Мадниг эн цагин му җирһләс сулдххин төлә мана килнцәс көлтә мана Бурхна болн Эцкин таалар Христос әмән өглә. 5Бурхн мөңкинд тууртха. Тиигтхә!

Оңдан Сән Зәңг уга

6Христосин хәәрлтәр дамҗад таниг дуудсн Бурхиг тиим шулуһар үлдәһәд, талдан Сән Зәңг авситн би өврҗәнәв. 7Йосндан болхла, оңдан Сән Зәңг уга. Болв таниг үүмүлхәр седҗәх, Христосин Сән Зәңгиг хаҗилһхәр седҗәх улс бас бәәдг чигн. 8Кемр бидн эврән, эс гихлә теңгрәс Бурхна элч таднд цәәлһсн Сән Зәңгәс оңдан Сән Зәңг цәәлһсн болхла, хамгин ик цааҗла харһтха. 9Урднь мана келсиг би дәкн келҗәнәв: кемр таднд кен болв чигн тана авсн Сән Зәңгәс талдан Сән Зәңг цәәлһхлә, тер күн хамгин ик цааҗла харһтха.

10Би күүнә зөв хәәҗәхшв. Би Бурхна зөвшәл хәәҗәнәв. Күүнд таасгдхар седҗәхшв. Кемр би эндр күртл күүнд таасгдҗасн болхла, Христосин зарц болшго биләв.

Павел апостол болсна тускар

11Ахнр-дүүнр, мини цәәлһҗ өгчәх Сән Зәңг күүнәс үүдсмн биш. Тедниг медтхә гиҗәнәв. 12Сән Зәңгиг би күүнәс авсн уга биләв. Терүг күүнәс дассн угав. Нанд терүг Исус Христос медүлв.

13Намаг урднь евреймүдлә әдләр Бурхнд иткҗ йовсиг тадн соңссн болхит. Би Бурхна сүзгтни багмудыг догшар көөһәд, уга кехәр седләв. 14Евреймүдин шаҗна кергиг күцәлһәрн би эврә үйин көвүдәс өмн йовлав. Мана өвкнрин авъясиг би йир халурхч күцәдг биләв.

15Болв Бурхн намаг эврәннь хәәрлтәрн һазр деер төртлм шүүҗ авад, Бийдән церглтхә гиҗ дуудҗ. 16Христосин туск Сән Зәңг буру номта улст тархахин төлә Бурхн нанд Эврәннь Көвүг үзүлв. Тер цагт би нег чигн күүнлә селвлцсн угав. 17Нанас өмн болсн апостолмудла харһхин төлә би Ерусалим балһсн тал одсн угав. Түүнә ормд Арабья тал йовад, дәкәд Дамаск тал хәрҗ ирв. 18Һурвн җил болад би Ерусалим тал Кеплә харһхар одв. Тенд би арвн тавн хонг бәәвв. 19Деед Эзнә дү Яковас талдан апостолмудла би харһсн угав.

20Мини бичсн үнн. Би худл келҗәхшв. Бурхн меднә.

21Түүнә хөөн Сирий болн Киликья Һазр тал һарв. 22Тиигхд Йудья һазрт, Христосин сүзгтни багмудт намаг меддго бәәҗ. 23«Эн күн урднь мадниг көөҗ йовла. Ода болхла, урднь уга кехәр бәәсн иткл цәәлһҗ йовна», – гиҗ тедн соңсҗ. 24Мини төлә тедн Бурхиг магтдг чигн.

Currently Selected:

Һалатьянхн 1: ХКО_ӘБ

Highlight

Copy