Нүүдл 25

Өргә гер тосхлһна бәрц бәрлһн

1Деед Эзн Мошед келнә:

2– Израилин улс Нанд бәрц бәртхә, күн болһнас седкләсн өгчәх бәрцинь автн. 3Иим бәрц цуглулҗ автн: алт, цаһан мөңг, улан мөңг, 4көк, чисм улан болн улавр күрң утцд, нимгн олс болн ямана ноос, 5хуцин ширдсн арс болн нимгләд кесн арс, акация мод, 6герлин гегәнд олив модна тос, сән үнртә тос келһн болн күҗ уңһдалһн, 7кевд орулҗ тәвх оникс чолу болн үнтә чолуд. Теднәр әрүн кергин төлә бәәдг заппу болн чееҗд өлгдг түңгрцг кеерүлхин төлә цуглултн. 8Израилин улс тедн дунд бәәх дүңгә әрүн бәәр Нанд бәрҗ өгтхә. 9Чамд Би үзүлснлә әдләр тиим бәәр – өргә гер болн дотрнь бәәх тоотыг Нанд кеҗ өгтн.

Деед Эзнә Бооцана хәәрцг

10Акация модар хәәрцг ке: утдан хойр дундур тоха, өргндән күсдундур, өндртән бас күсдундур тоха. 11Дотраснь, һазаһаснь цевр алтар буд, захарнь алтн тасм кеһәд буд. 12Дөрвн алтн төөлг кеһәд хәәрцгин дөрвн өнцгтнь батл: хойр төөлг нег бийәснь, хойр төөлг талдан бийәснь. 13Акацияс ут мод кеһәд алтар буд, 14хәәрцгин хойр таласнь тер төөлгүдт ут модд орул. Терүг ут модар авч йовдгар ке. 15Тер ут модд кезә чигн хәәрцгин төөлгд орулгдсн бәәх йоста. Терүнәс ут модыг һарһҗ авдмн биш. 16Хәәрцгт Бооцана хавтха чолуд тәвхич, Би чамд терүг бәрүлнәв.

17Хәәрцгт цевр алтар утдан хойр дундур тоха, өргндән күсдундур тоха бүркә ке. 18Бүркәһин көвәһәрнь хойр керүб#25:18 Керүбмүд – Бурхна күчтә җивртә элчнр. алтн сиилвртәһәр ке: 19негинь нег захаснь, хойрдгчинь хойрдгч захаснь. Тедн бүркәтә хамдан нег бәәдлтә болх йоста. 20Чирәһәрн нег-негнәннь өмн бүркәһән хәләһәд зогсад, бүркә деер далваган деләд бәәхмн. 21Бүркәһиг хәәрцг деер тәв. Хәәрцг дотр Бооцана хавтха чолуд тәв. Терүг Би чамд бәрүлнәв. 22Тенд, Бооцана хәәрцгин бүркә деер, хойр керүбин хоорнд чамла харһхларн Би бәәхүв. Израилин улст чамар дамҗад Эврәннь заавран теднд өгхүв.

Әрүн өдмг тәвдг ширә

23Акация модар утднь хойр тоха, өргнднь нег тоха, өндртнь күсдундур тоха болх ширә ке. 24Терүг цевр алтар будад, эргүләд алтн тасм ке. 25Ширән көвәһәр өндртнь альхн дүңгә рамк ке, тер рамкиг эргүләд алтн тасм ке. 26Дөрвн алтн төөлг кеһәд ширән дөрвн өнцгт тулһ талнь өлг. 27Төөлгүдиг рамк тал өөрдүләд тәвх кергтә. Терүнд ут модд тәвгдх, терүгәр кергтә цагт ширәг ормаснь талдан ормд тәвҗ болх. 28Ширә өргх ут моддыг акацияс кеһәд алтар буд. 29Тәрлкс болн шанһс цевр алтар ке. Шалдрң юм кехин төлә буһшс болн ааһс бас цевр алтар ке. 30Эн ширә деер чи оньдинд әрүн өдмг тәвх йостач. Тер өдмг Мини өмн бәәх.

Өргә герин герлин гегән

31Цевр алтар герлин гегә сииләд ке. Терүнә һол моднь, ац талкнь болн үйәрн – йоралнь болн делвнь – нег кевтәһәр ниилх йоста. 32Терүнд зурһан ац бәәх йоста: һурвнь нег бийәснь, һурвнь талдан бийәснь. 33Зурһан ац болһнднь һурваһад үй миндаль модна цецгин бәәдлтә. Терүнд йорал болн делвс бәәх. 34Болв көл деернь миндаль модна бәәдлтә дөрвн цецг, дәкәд йорал болн делвс бәәдмн. 35Түрүн хойр ац дор – үйин йорал, хойрдгч хойр ац дор – үйин йорал, һурвдгч хойр ац дор – үйин йорал; иим кевәр герлин гегәнә цуг зурһан ацмуд дор бәәтхә. 36Үйин йорал болн ацмуд нег кевәр герлин гегәнлә ниилх йоста; цугтан цевр алтар сиилгдх. 37Долан цөгц кеһәд герлин гегән деер тәв. Теднә өмн бийднь герл өгх. 38Цөгцин һол бәрдг чимкүр болн хавтха сав цевр алтар кегдх йоста. 39Герлин гегә болн терүнд туста тоот кехд нег талант#25:39 Талант – еврей келн-улсин чиңнүр 35 кг дүңгә. цевр алт өг. 40Хәлә, чамд уул деер үзүлснлә әдләр ке.

Currently Selected:

Нүүдл 25: ХКО_ӘБ

Highlight

Copy