Нүүдл 17
17
Уулын хадас һарчах усн
1Син гидг көдә һазрас һарад, Израилин улсин хамцан Деед Эзнә зааврла ирлцҗ бүүрән соляд йовв. Эдн Рефидим гидг нертә һазрт зогсв. Тенд олн-әмтнд уух усн уга билә. 2Әмтн Мошег гемшәһәд бәәв.
– Маднд ус өгтн! – гиҗ эдн некв. – Бидн уухар седҗәнәвидн.
– Тадн юңгад намаг гемшәҗәхмбт? – гиҗ Моше сурв. – Юңгад тадн Деед Эзиг сөрҗәхмбт?
3Болв олн-әмтн ундасад Мошег керлдв:
– Ю хәәҗ чи мадниг Египетәс авч һарвч? Мадниг күүкдтәһимвидн болн малтаһимвидн ундасулад муурулхарий?
4Моше Деед Эзиг дуудҗана:
– Эн әмтнлә би ю кехмб? Эдн ода намаг чолуһар цокн гиҗәнә.
5Деед Эзн Мошед закчана:
– Өмәрән һарад, улсин өмн зогс, Израилин көгшдәс зәрминь бийләһән ав. Нил һолын усар цоксн тайган авад йов. 6Тенд, Хорив уулын хад деер, чини өмн Би зогснав. Чи хадыг цокхла, энүнәс усн гүүх, әмтн энүг уутха.
Израилин көгшдин нүднд Моше мел тиигҗ кев. 7Эн бәәрн Масса болн Мериба#17:7 Еврей келәр «Масса» гисн үг – сөрлһн. «Мериба» гисн үг – гемшәлһн. гиҗ нерәдгдв, юңгад гихлә тенд Израилин улс: «Деед Эзн маднла аль угай?» – гиҗ келәд Деед Эзиг шоодад сөрв.
Амалекин улсиг дииллһн
8Амалекин улс Рефидимд ирәд, Израилин улс тал дәврв. 9Моше Ешуад келв:
– Амалекмүд тал одх әмтиг шүүҗ ав. Би болхла маңһдур һартан Бурхна өгсн мотрта уулын толһа деер һарнав.
10Ешуа Мошен заквриг күцәһәд, амалекмүдлә дәәлдв. Моше болхла Ахаронла болн Орла хамдан уулын толһа деер һарв. 11Моше һаран өргхлә, Израиль диилнә, дорагшан буулһхла – амалекмүд. 12Зуг Мошен һарнь күндрв. Тиигхлә чолу авч ирхлә, Моше терүн деер суув. Ор болн Ахарон болхла, хойр таласнь энүнә һаринь дөңнв. Нарн суутл, Моше һаран деегшән өргәд бәәв. 13Ешуа Амалекиг болн терүнә әмтиг селмәр цокад энүг диилв.
14Деед Эзн Мошед келв:
– Мартгдшгон төләд дегтрт бичәд, Ешуад медүлҗ кел: Би Амалекиг һазр деерәс уга кенәв – энүнә нернь чигн үлдшго!
15Моше бәрц бәрлһнә орм босхад, терүнд Яхве-Нисси#17:15 «Деед Эзн – мини туг» – еврей келнәс орчулгдҗана. гидг нер өгәд 16келв:
– Эннь Деед Эзнә туг һарт бәрәтә гиҗәнә. Амалекин улсин өмнәс кеҗәх Деед Эзнә дән үйәс үйд гиҗ герчлҗәнә!
Currently Selected:
Нүүдл 17: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
