Цецн Ухана Багш 12
12
Көгшрлһнә болн үклин тускар
1Хар саната өдрмүд болн җилмүд уга деер
баһ настаһасн авн эврәннь Үүдәчиг сан,
тер цагин тускар «Терүнәс би бахан хаңһаҗахшв», – гиҗ келхич.
2Нарн болн герл,
сар болн одд эс харңһуртл,
әрә хур орад эс давтл,
дәкн үүлн бүтәх.
3Маначнр чичрдг болхла, чидлтәнь бөгдиһәд ирхлә, теермддг улс эс теермддҗ чадхла –
тедн дегд тооһарн баһрх,
терзәр хәләҗәхнь төрүц юм үзҗ чадшго.
4Һазаран һардг үүдн хаагдх,
теермин әнь тагчгрх;
шовуна түрүн дуунас күн серх,
дуулдгнь цугтан тагчгрх.
5Өндр юмнас әәх
болв хаалһ деер – әәмшг;
миндаль цецгәлх,
царцахас әрә көндрх,
каперс буран намчнь унх.
Күн эврәннь мөңк герт орҗана,
терүг оршахла, уульдг әмтн
уульнцар эргәд йовна.
6Цаһан мөңгн боодһа шуурад уга деер,
алтн ааһ хамхрад уга деер,
булгин хаҗуд буһш хамхрад уга деер,
худг деерк төгә нурад уга деер –
7күүнә цогц, урднь бәәснлә әдләр
һазрин тоосн болх,
күүнә сүмсн әм өгсн Бурхнд хәрү одх.
8Тус уга, – гиҗ Цецн Ухана Багш келв, – цугтан тус уга.
Аштнь
9Тер Багш цецн бәәҗ, әмт сурһдг бәәҗ;
ухалад, шинҗләд, цецн селвгүд олар тер цуглулҗ авв.
10Цецн Ухана Багш төв үгмүд хәәв,
үннә үгмүдиг тер чикәр бичв.
11Цецн әмтнә үг – хурц шор мет, цуглулсн үлгүрмүд – нег хөөчин#12:11 «Хөөч» гисн үг Израилин Хөөч Бурхн гисн чинртә, эс гиҗ эн Цецн Ухана Багш Соломон хан гисн чинртә. хадсн олн һасн мет.
12Көвүн минь, күүнә кехкүцәх тоотас даву бәәхәс сагл:
олн дегтрмүд бичхлә – чилдмн биш,
чидл күршго сурһуль чамаг муурулх.
13Аштнь соңсхмн: Бурхнас ә,
Терүнә заквр бәр,
яһад гихлә энүг цугтаһинь күн кех йоста.
14Ямаран чигн кергиг Бурхн зарһд орулна,
цугтан нуувчта – сәнь чигн, хар санатань чигн.
Currently Selected:
Цецн Ухана Багш 12: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
