2 Көринтинхн 3

Шин бооцана цергләчнр

1Бидн бийән буульҗах болҗ медгдҗәдг болвза? Тадна төлә эс гихлә таднас авх цәәлһвртә бичг зәрм улсла әдл маднд кергтәй? 2Тадн цугтан меддгәр болн умшдгар мана зүркнд бичгдсн бичг болҗанат. 3Тадн мана күргсн Христосин бичг болсан үзүлҗәнәт. Эннь бекәр биш, әмд Бурхна Сәкүсәр бичгдв, тиигчкәд дөрвлҗн чолун деер биш, күүнә зүркнд бичгдв.

4Тиим иткл Бурхнд бидн Христосар дамҗад аввидн. 5Иим көдлмш күцәх арһ маднас һарчана гиҗ би тоолҗахшв. Эн арһ Бурхнас ирҗәнә. 6Бурхн маднд Шин Бооцанд церглх арһ өгв. Шин Бооцан бичгдсн Заканас биш Сәкүснәс бүрдҗәнә. Бичгдсн Закан үкл авч ирнә, Сәкүсн болхла җирһл өгнә.

7Закан чолун деер үзгүдәр сиилгдҗ. Эннь туурмҗ үзүлҗәҗ. Тиигәд Израилин улс Мошен чирә хәләҗ чадлго бәәҗ. Юңгад гихлә, туурмҗнь баһрҗасн бийнь терүнә чирәнь туурмҗас мандлҗаҗ. Кемр үкл авч ирсн Закан тиим туурмҗта болхла, 8тиигхлә Сәкүснә көдлмш түүнәс туурмҗта эс болхий? 9Кемр әмтиг засгла харһулх көдлмш туурмҗта болсмн болхла, аврлт авч ирдг көдлмш түүнәс ямаран туурмҗта болх! 10Эн саамд өдгә туурмҗас көлтә Закана туурмҗ туурмҗ биш болҗана. 11Яһад гихлә, кемр уга болсн юмн туурмҗта бәәсмн болхла, тиигхлә оньдинд бәәдг юмн ямаран ик туурмҗта болҗахмб?

12Бидн тиим нәәлвртә болсндан, тиигәд зөргтә йовдл һарһҗанавидн. 13Бидн Мошелә әдл кеҗәхшвидн. Мошен туурмҗнь баһрад уга болҗасинь Израилин улс бичә үзтхә гиһәд, эврәннь чирәһән бүркәһәр бүркдг билә. 14Болв эн улсин ухан эндр күртл хаалһата. Хуучн бооцан тедн умшхла, ухань бүркәһәр бүркәтә. Эн бүркәг зуг Христосар авч хайгдх. 15Эндр өдр күртл Мошен бичсиг умшхла, Израилин улсин ухан бүркәһәр бүркәтә. 16Болв кемр күн Деед Эзн тал эргхлә, бүркә авгдна. 17Деед Эзн – Сәкүсн болҗана. Деед Эзнә Сәкүсн бәәҗәх һазрт сул бәәдл учрна. 18Бидн цугтан ил чирәһәрн Деед Эзнә туурмҗиг хәләҗәнәвидн. Деед Эзнә Сәкүсн мадниг Деед Эзнә дүрд хүврүлҗәнә, тиигәд улм ик туурмҗ үзүлҗәнәвидн.

Currently Selected:

2 Көринтинхн 3: ХКО_ӘБ

Highlight

Copy