Лукаца бицараб Рохалил хабар 1
1
1 бетӏер
Байбихьи
1-2Нилъер агьлуялда гьоркьор Аллагьас тӏуразарурал ишазул хӏакъалъулъ къисаби, байбихьудаса бахъараб гьеб кинабго жидеда бихьарал ва Аллагьасул Рагӏиялъе жидеца хъулухъ гьабурал гӏадамаз рицухъе хъвазе гӏемерав чияс хӏалбихьана. 3Гьединлъидал, бетӏерчӏахъаяв Теофил, дидаги лъикӏ бихьана, авалалдасанго цӏех-рех гьабун, тартибалда кинабго дуе хъвазе. 4Гьаб цӏалараб мехалъ дур ракӏчӏела дуда малъанщинаб жо хӏакъаб букӏиналда.
Закарияе вас гьавизе вуго
5Гьерод Ягьудиялъул ханлъун вугеб заманаялда вукӏана Абиял тухумалъул чилъун кколев Закария абулев цо кашиш. Гьесул чӏужуги йикӏана Гьарун аварагасул наслуялъул гӏадан. Гьелда цӏарги букӏана Элисабет. 6Гьел кӏиялгоги рукӏана Аллагьасул вализаби. Бетӏергьанасул тӏолабго амру-нагью ракӏбацӏцӏадго тӏубазабулаан гьез. 7Амма гьезул лъимал рукӏинчӏо. Элисабет йикӏана лъимер гьабуларей гӏадан. Гьел рукӏана гӏолохъанлъиялдаса арал гӏадамал.
8Гьале гьанжеги гьезул тухумалде ирга щола Мукъадасаб Рокъоб хъулухъ гьабизе. 9Кашишзабазул гӏадаталда рекъон, можоро тӏамидал, Закарияде тӏаде ккола, Аллагьасул Мукъадасаб Рокъове жаниве лъугьун, махӏгьуинаб нахул кьеккен гьабизе. 10Нахуда цӏа бакулев гьев вугеб мехалъ, киналго хутӏарал гӏадамал рукӏана къватӏирехун чӏун какал ралел. 11Кьеккеналъул кӏкӏуй тӏад беролеб хирияб бакӏалъул кваранаб рахъалде Бичасул малаик рещтӏана гьебмехалъ Закарияхъе. 12Малаик вихьараб мехалъ, Закария вихха-хочун лъугьана ва кутакалда хӏинкъана. 13Малаикас гьесда абуна:
– Мун хӏинкъуге, Закария, Аллагьас къабул гьабуна дур гьари-дугӏа. Дур лъади Элисабетица дуе вас гьавизе вуго. Яхӏя лъе дуца васасда цӏарги. 14Дуе талихӏги рохелги босун бачӏина гьес, цогидал гӏемерал гӏадамалги рохила гьев гьавиялдаса. 15Аллагьасда цебе кӏодолъи щвела гьесие, чагъирги цогидаб жаги гьекъеларо гьес, эбелалъул ургьив вугеб мехалъго Илагьияб Рухӏги лъугьина гьесулъе. 16Исраилил лъималазул#1:16 Исраилил лъимал – жугьутӏал. гӏемерисел жидерго Бетӏергьан Аллагьасде руссинарила гьес. 17Иляс аварагасул хӏалкӏолъигун ва къудратгун Тӏадегӏанасдаса цеве вачӏун, эбел-инсулги лъималазулги ракӏал цоцалъ журазарила гьес, къосун Аллагьасде мугъ рехаралги тӏадруссинарила муъминазул гӏакъиллъиялде. Тӏадегӏанав вачӏиналде къачӏала гьес хӏадур гьабураб халкъ.
18Гьебмехалъ Закарияца малаикасда гьикъана:
– Сундалъунха дида гьеб лъалеб? Дунги ригь арав чи вуго, дир чӏужуги гӏолохъанго гьечӏо.
19Малаикас гьесие жаваб кьуна:
– Дун вуго Аллагьасда цеве вугев Жабрагӏил малаик. Гьес дун витӏана дуда кӏалъазе ва дуда рохел бицине. 20Жиндир болжалалда тӏубазе бугеб дица бицараб рагӏиялда мун божичӏелъул, гьале дур кӏал-мацӏ кквела ва гьеб иш тӏубазегӏан кӏалъазе кӏвеларо дуда.
21Закария къватӏиве вачӏиналъухъ балагьун чӏун букӏана халкъ гьебмехалъ. Щайдай гьев Мукъадасаб Рокъов жанив кватӏаравилан хӏикмалъун рукӏана гӏадамал. 22Къватӏиве вачӏараб мехалъ, Закарияда кӏвечӏо гьезда кӏалъазе. Гьезда бичӏчӏана Мукъадасаб Рокъоб жаниб гьесие Аллагьасул илгьам лъугьараблъи. Гьелдаса хадуб, килщаз ишанал гьарун гурони, кӏал бичӏун тӏокӏаб рагӏи абичӏо Закарияца. 23Мукъадасаб Рокъоб хъулухъ гьабизе тӏадаб заман лъугӏидал, Закария жиндирго рокъове тӏадвуссана.
24Цинги Элисабетил ургьибе лъимер ккана, ва щуго моцӏалъ, къватӏи-рокъое яхъинчӏого, яхчун чӏана. Гьелъ абулаан:
25– Гьале, Аллагь гурхӏараб мехалъ, дие гьес гьабураб лъикӏлъи, лъимер гьечӏолъиялъул бугьтан гӏадамазда цебесан дида тӏаса ине.
Жабрагӏил малаикас Марямида рохел бицуна
26-27Анлъабилеб моцӏалъ Аллагьас Жабрагӏил малаик витӏана Галилея улкаялъул Назарет шагьаралде Давудил наслуялъул Юсупилан цӏар бугев чиясе абурай цо ясгӏаданалъухъе. Гьелда цӏар букӏана Марям. 28Гьелъухъе вачӏун Жабрагӏил малаикас абуна:
– Йорчӏами, Аллагьасул баркат рещтӏарай яс! Бетӏергьан вуго дуда аскӏов.
29Малаикас гьедин абидал, йихха-хочун лъугьана гьей, ва гьел рагӏабазул магӏна щибдайилан йикӏана.
30– Хӏинкъуге, Марям! – ан абуна гьелда малаикас. – Бичасул рахӏмат насиблъана дуе. 31Гӏенеккея, дур ургьибе лъимер ккела, ва дуца вас гьавила. Гӏиса абун лъела дуца гьесда цӏарги. 32Цӏакъ кӏудияв чи вахъина гьесул. Тӏадегӏанав Аллагьасул Василан абила гьесда. Жиндирго эмен#1:32 Гӏиса вукӏана Давуд аварагасул наслуялъул чи. Давудил тах кьела Аллагьас дур васасе. 33Абадиялъего вукӏина гьев Якъуб аварагасул халкъалъул Парччахӏлъун, ва гьесул Парччахӏлъиялъе ахирго букӏине гьечӏо.
34– Росасецин инчӏей дие гьеб кин лъугьунеб? – ан гьикъана гьесда Марямица.
35Малаикас абуна:
– Илагьияб Рухӏ рещтӏина духъе. Бетӏергьанасул хӏалкӏолъиялъул накӏкӏул парчаялъ яхчила мун. Гьединлъидал Аллагьасул Васлъун рикӏкӏина гьеб Илагьияб Лъимер. 36Лъимер-бетӏер лъугьунарей гӏадамилан рикӏкӏуней йикӏарай дур гӏагарай чӏужу Элисабетги, гьанже гӏолохъанго гьечӏониги, лъимаде йиго. Анлъабилеб моцӏ буго гьеб ккаралдаса. 37Аллагьасда хӏалкӏолареб жо щибго букӏунарелъулха!
38Гьебмехалъ Марямица абуна:
– Гьале, дун Бетӏергьанасул лагъ! Дуца абухъе ккезе биччанте дие!
Цинги малаик Марямида аскӏоса нахъе ана.
Марям Элисабетихъе гьоболлъухъ уна
39Гьел къоязда Марям гӏедегӏун ана Ягьудиялъул мугӏрузда бугеб шагьаралде. 40Закариял бакӏалде щведал, гьелъ Элисабетие салам кьуна. 41Марямил салам рагӏарабго, гьебсагӏат Элисабетил ургьиб лъимер кӏанцӏезе лъугьана. Илагьияб Рухӏалъул цӏуна гьей.
42– Руччабазулъ бищунго баркат кӏудияйлъун лъугьана мун, – ан ахӏун гьаракь гьабуна Элисабетица. – Баркат кӏудияблъун лъугьана дур ургьиб хулараб лъимерги. 43Дир Тӏадегӏанасул эбел къавулъе ячӏинегӏанасеб даражаялъул гӏаданищха дун! 44Гьале дур салам рагӏарабго, бохун кӏанцӏезе лъугьана дир ургьиб лъимер. 45Бетӏергьанасдасан дуде бачӏараб ругьел тӏубазе бугелъул, гьелда божарай мун гьардарай гурищ.
Марямица Аллагьасе рецц гьабула
46Марямица ахӏана:
– Аллагь кӏодо гьавизе лъугьун буго гьинал ракӏ.
47Гьес дун хвасар гьаюлин бохун буго дир рухӏги.
48Дун пакъирай лагъалда Бичасул бер речӏчӏидал,
Баркат бугей гӏаданлъун гӏаламалъ рикӏкӏина дун.
49Жиндир цӏар мукъадасав къудратав Бетӏергьанас
Кӏудаб даражаялде яхине гьаюна дун.
50Гӏибадат гьабуразул наслабазда гурхӏана.
51Гучаб гьесул къуваталъ чӏухӏарал къезарула,
Гьезул квешал къасдалги къинарула киналго.
52Бетӏергьанас пахруял тахидаса рехула,
Пакъирал, кӏодо гьарун, тӏадегӏанлъизарула.
53Ракъаразе Аллагьас къваригӏанщинаб кьола,
Бечедал рачахъула, щибго жоги кьечӏого.
54-55Дол нилъер умумузда абун букӏараб куцалъ,
Ибрагьимил лъугьарал киналго наслабазда
Абадул абадиялъ гурхӏилин кьураб рагӏи
Ракӏалде щун, Аллагьас жиндирго лагълъун кколеб
Исраилил халкъалъе кумек гьабуна гьанже.
56Гьениб лъабго моцӏги бан, Марям тӏадюссун жиндирго рокъое ана.
Яхӏя гьавиялъул хӏакъалъулъ
57Къо тӏаде щвараб мехалъ, Элисабетие вас гьавуна. 58Аллагь гурхӏун гьелъие лъимер гьабун бугин рагӏараб мехалъ, гьелда рахьи базе рачӏунел рукӏана Элисабетил мадугьалзабиги гӏагарал чагӏиги. 59Микьабилеб къоялъ васасе сунат гьабизе рачӏарал чагӏазе бокьана, инсудаго гӏадин, васасда цӏарги Закария лъезе. 60Гурин, васасда цӏар Яхӏя лъезе кколилан абуна Элисабетица. 61Гьез гьелда абуна:
– Нужер гӏагарал чагӏазда гьоркьов гьединаб цӏар бугев чи гьечӏо гури, – ян.
62Цинги, квераз ишан гьабун, Закарияда бичӏчӏизабуна васасда щиб цӏар лъезе дуе бокьун бугебилан. 63Цо хъарщиги бачӏинабун, Закарияца гьелда тӏад хъвана: «Васасда цӏар Яхӏя лъезе ккола», – ян. Киналго гӏажаиблъана гьебмехалъ. 64Гьеб лахӏзаталда Закариял кӏал ричӏун бачӏана, мацӏалдаса гарацӏ бичун ана ва Аллагьасе рецц гьабун кӏалъазе лъугьана. 65Мадугьалзабазул рекӏелъеги кутакаб хӏинкъи лъугьана гьебмехалъ, Ягьудиялъул киналго мугӏрузда тӏибитӏана гьелъул хӏакъалъулъ хабар. 66Гьеб рагӏанщинас, гьелъул пикру гьабулаго, абулеб букӏана:
– Щив чидай вахъина гьадав васасул?
Хӏакъикъаталдаги Бичасул хӏалкӏолъи букӏана гьесулъ.
Закарияца Аллагьасе рецц гьабула
67Яхӏял эмен Закария Илагьияб Рухӏалъул цӏуна, Аллагьасдасан рачӏарал гьадинал рагӏаби абуна гьес:
68– Исраилил халкъалъул Бетӏергьан Аллагьасе рецц гьабилин,
Нилъехъе вачӏун гьес нилъ тархъан гьаридал.
69Гьес жиндирго лагъ Давудил кьолбодасан нилъее кьела
Нилъ хвасар гьаризе къудрат бугев чи.
70Некӏо заманаялда жиндирго аварагзаби ритӏун,
Гьес нилъее рагӏи кьун букӏана:
71Нилъер тушбабаздаса ва нилъ рихаразул квердаса
Жинца хвасар гьарилилан,
72Нилъер умумузда гурхӏилилан
Ва мукъадасаб къотӏи тӏубазабилилан.
73Нилъер умматалъул эмен Ибрагьимие гьес гьа гьедун букӏана,
Тушбабазул квердаса хвасарлъун,
74Хӏинкъичӏого тӏубараб гӏумруялъ
75Ритӏухъго ва бацӏцӏадго
Жиндие тӏагӏат гьабизе изнуги ресги букӏинабилин.
76Мунги, дир лъимер, рикӏкӏина
Къудратав Аллагьасул авараглъун,
Тӏадегӏанав Масихӏидаса цеве вахъина мун,
Гьесие нух къачӏазе
77Ва, мунагьал чурун, нуж хвасарлъилилан
Халкъалда лъазабизеги.
78-79Аллагь гурхӏун, гьес нилъее зодисан рогьел рещтӏинабила,
Хвалил бецӏаб рагӏдукь ругезе канлъи букӏине,
Ракълиде рачунеб нухги бихьизабила нилъеда.
80Яхӏя кӏудияв гӏолев вукӏана, гӏакълу цӏубалеб букӏана. Исраилил халкъалда цеве вахъинегӏан гьес гӏумру гьабуна гӏицӏаб авлахъалда.
Currently Selected:
Лукаца бицараб Рохалил хабар 1: AvrNT
Highlight
Share
Copy
Want to have your highlights saved across all your devices? Sign up or sign in
© Библия таржама гьабиялъул институт Москва 2008