ᓬᐃᐱᑎᑲᐢ 7
7
1ᐁᐊᐧᑯ ᒫᑲ ᐅᒪ ᐁᑕᓱᐋᐧᒋᑳᑌᐠ ᐊᑖᒣᔨᑖᑯᓯᐃᐧ ᐸᑭᑎᓈᓱᐃᐧᐣ; ᐊᔨᐋᐧᐠ ᑲᓈᑕᐣ. 2ᐃᑕ ᑳ ᓂᐸᑖᕽ ᒪᒍᐢᑌᐦᐊᒫᑫᐃᐧᐣ ᐁᑯᑕ ᑫ ᓂᐸᑖᕽ ᐊᑖᒣᔨᑖᑯᓯᐃᐧ ᐸᑭᑎᓈᓱᐃᐧᐣ; ᐁᑯᓯ ᒥᐦᑯ ᐁᑯᑕ ᐅᐦᒋ ᑭᑕ ᓯᓭᐧᐸᔨᑖᐤ ᐸᑭᑎᓈᓱᐃᐧᓈᐱᐢᑯᕽ ᐋᐧᐢᑳ. 3ᑭᑕ ᐸᑭᑎᓇᒼ ᒫᑲ ᑲᐦᑭᔭᐤ ᐁ ᐃᐧᔨᓄᐊᓂᔨᐠ; ᑳ ᐃᐧᔨᓄᐊᐧᕽ ᐅᓱ, ᒥᓇ ᐃᐧᓯ; 4ᒥᓇ ᐁ ᓂᓯᑭ ᐅᑎᐦᑎᑯᓯᐊᐧ, ᒥᓇ ᐃᐧᔨᐣ ᐁᑯᑕ ᑳ ᐊᔮᐠ ᒋᑭ ᐋᐱᑐᓯᔭᐤ, ᒥᓇ ᐃᐧᔨᐣ ᐅᐢᑯᓂᕽ ᑳ ᐊᔮᐠ, ᑭᑭ ᐅᑎᐦᑎᑯᓯᐊᐧ, ᑭᑕ ᐅᑎᓇᒼ. 5ᐁᑯᓯ ᐊᔭᒥᐦᐁᐃᐧᔨᓂᐤ ᑭᑕ ᒣᐢᑎᑲᓴᒼ ᐸᑭᑎᓈᓱᐃᐧᓈᐱᐢᑯᕽ; ᐁᐊᐧᑯ ᐸᑭᑎᓈᓱᐃᐧᐣ ᐃᐢᑯᑌᐤ ᐅᐦᒋ ᐁ ᐸᑭᑎᓇᒫᐦᐟ ᑳ ᑎᐯᔨᐦᒋᑫᐟ; ᐁᐊᐧᑯ ᐊᑖᒣᔨᑖᑯᓯᐃᐧ ᐸᑭᑎᓈᓱᐃᐧᐣ. 6ᑕᐦᑐ ᑳ ᓈᐯᐃᐧᐟ ᐃᑕ ᑳ ᐊᔮᒋᐠ ᐊᔭᒥᐦᐁᐃᐧᔨᓂᐊᐧᐠ ᑭᑕ ᒥᒋᐊᐧᐠ; ᑭᑕ ᒥᒋᓈᓂᐊᐧᐣ ᐃᑕ ᐁ ᑲᓈᑕᕽ; ᐊᔨᐋᐧᐠ ᑲᓈᑕᐣ. 7ᑖᐱᐢᑯᐨ ᒪᒋᑐᑕᒧᐃᐧᓂ ᐸᑭᑎᓈᓱᐃᐧᐣ ᐁᑯᓯ ᑖᐱᐢᑯᐨ ᐊᑖᒣᔨᑖᑯᓯᐃᐧ ᐸᑭᑎᓈᓱᐃᐧᐣ; ᐯᔭᑲᐧᐣ ᐁᑕᓱᐋᐧᒋᑳᑌᑭ; ᐊᔭᒥᐦᐁᐃᐧᔨᓂᐤ ᐯᔭᑯᐃᑐᐃᐧᐣ ᑳ ᐅᓯᐦᑖᐟ ᐁᐊᐧᑫᐧᔨᐤ ᐅᐦᒋ ᑭᑕ ᐊᔮᐤ. 8ᐊᔭᒥᐦᐁᐃᐧᔨᓂᐤ ᒫᑲ ᑳ ᐸᑭᑎᓇᒫᐧᐟ ᓈᐣᑕᐤ ᐊᔨᓯᔨᓂᐊᐧ ᐅ ᒪᒍᐢᑌᐦᐊᒫᑫᐃᐧᓂᔨᐤ, ᐁᐊᐧᑯ ᐊᔭᒥᐦᐁᐃᐧᔨᓂᐤ ᑭᑕ ᐊᔮᐤ ᐸᑫᑭᐣ ᐊᓂᒪ ᒪᒍᐢᑌᐦᐊᒫᑫᐃᐧᐣ ᑳ ᑭ ᐸᑭᑎᓇᕽ. 9ᑲᐦᑭᔭᐤ ᒫᑲ ᐸᐦᑫᐧᓯᑲᓂ ᐸᑭᑎᓈᓱᐃᐧᐣ ᑳ ᑭᓯᓯᑳᑌᐠ ᑲᐢᑲᒧᑎᑲᓯᑲᓂᕽ, ᒥᓇ ᑲᐦᑭᔭᐤ ᑳ ᑭᓯᓯᑳᑌᐠ ᓵᓭᐢᑭᑳᐧᓂᕽ, ᒥᓇ ᐅᔮᑲᓂᕽ, ᑭᑕ ᐊᔮᐤ ᐊᓇ ᐊᔭᒥᐦᐁᐃᐧᔨᓂᐤ ᑳ ᐸᑭᑎᓇᕽ. 10ᑲᐦᑭᔭᐤ ᒫᑲ ᐸᐦᑫᐧᓯᑲᓂ ᐸᑭᑎᓈᓱᐃᐧᐣ ᐁ ᑭᔨᑲᐃᐧᓂᑳᑌᐠ ᐱᒥ ᐊᐦᐳ ᐁ ᐸᐦᑯᓯᐟ, ᑭᑕ ᐊᔮᐊᐧᐠ ᑲᐦᑭᔭᐤ ᐁᕒᐊᐣ ᐅᑯᓯᓴ ᑖᑖᐱᐢᑯᐨ ᐃᔨᑯᕽ.
11ᐁᐊᐧᑯᒪ ᒫᑲ ᐁᑕᓱᐋᐧᒋᑳᑌᑭ ᐸᑭᑎᓂᑫᐃᐧᓇ ᐯᔭᐦᑕᑫᔨᒧᐃᐧ ᐸᑭᑎᓈᓱᐃᐧᓇ, ᐊᐃᐧᔭᐠ ᐸᑭᑎᓇᒪᐋᐧᒋ ᑳ ᑎᐯᔨᐦᒋᑫᔨᐟ. 12ᑭᐢᐱᐣ ᓇᓈᐢᑯᒧᐃᐧᐣ ᐅᐦᒋ ᐸᑭᑎᓇᑭ, ᐁᑲᐧ ᑭᑕ ᐸᑭᑎᓇᒼ ᑭᑭ ᓇᓈᐢᑯᒧᐃᐧᓂ ᐸᑭᑎᓈᓱᐃᐧᐣ ᐁᑳ ᐁ ᐅᐦᐱᓱᒋᐠ ᐸᐦᑫᐧᓯᑲᓇᐠ ᐱᒥ ᐁ ᑭᔨᑲᐃᐧᓂᑳᑌᐠ, ᒥᓇ ᐁᑳ ᐁ ᐅᐦᐱᓱᒋᐠ ᐋᐧᐃᐧᔦᑲᓯᑲᓂᓴᐠ ᐁ ᑐᒥᓂᐦᒋᐠ, ᒥᓇ ᐊᔭᑯᓈᑳᓇᐠ ᐁ ᒥᔪᓯᐟ ᐸᐦᑫᐧᓯᑲᐣ ᑭᔨᑲᐤ ᐱᒥ ᐁ ᓵᐳᐸᔨᐦᐟ. 13ᑭᑭ ᐸᐦᑫᐧᓯᑲᓇᐠ ᐁ ᐅᐦᐱᓱᔨᐟ ᐸᐦᑫᐧᓯᑲᓇ ᑭᑕ ᐸᑭᑎᓀᐤ ᐁᐊᐧᑫᐧᔨᐤ ᐅ ᐸᑭᑎᓂᑫᐃᐧᐣ ᐁ ᐸᑭᑎᓇᕽ ᐅ ᐯᔭᐦᑕᑫᔨᒧᐃᐧ ᐸᑭᑎᓈᓱᐃᐧᓇ, ᐁᐊᐧᑯᓂ ᓇᓈᐢᑯᒧᐃᐧᓇ. 14ᐁᑯᑕ ᒫᑲ ᐅᐦᒋ ᐹᐯᔭᐠ ᑭᑕ ᐸᑭᑎᓀᐤ ᐁ ᐃᑕᑎᓂᔨᑭ ᐅ ᐸᑭᑎᓂᑫᐃᐧᓇ ᑭᑕ ᐅᐦᐱᓈᓱᐃᐧ ᐸᑭᑎᓇᒪᐋᐧᐟ ᑳ ᑎᐯᔨᐦᒋᑫᔨᐟ; ᐊᓇ ᒫᑲ ᐊᔭᒥᐦᐁᐃᐧᔨᓂᐤ ᑭᑕ ᐊᔮᐤ ᑳ ᓯᓭᐧᐸᔨᑖᐟ ᒥᐦᑯ ᐊᓂᐦᐃ ᐯᔭᐦᑕᑫᔨᒧᐃᐧ ᐸᑭᑎᓈᓱᐃᐧᓇ. 15ᐃᐧᔭᐢ ᒫᑲ ᐊᓂᐦᐃ ᐸᑭᑎᓂᑫᐃᐧᓇ ᐅ ᐯᔭᐦᑕᑫᔨᒧᐃᐧ ᐸᑭᑎᓈᓱᐃᐧᓇ ᓇᓈᐢᑯᒧᐃᐧᓇ ᑳ ᐃᑕᑭᑌᑭ, ᑭᑕ ᒥᒋᓈᓂᐊᐧᐣ ᐊᓂᒪ ᐁ ᑭᓯᑳᐠ ᑳ ᐸᑭᑎᓇᕽ ᐅ ᐸᑭᑎᓈᓱᐃᐧᐣ; ᐁᑯᓯ ᐁ ᐊᑎ ᐋᐧᐸᕽ ᐊᓂᒪ ᑳ ᐃᐢᑯᓂᑳᑌᐠ ᑭᑕ ᒥᒋᓈᓂᐊᐧᐣ. 16ᒫᑲ ᑭᐢᐱᐣ ᑭᐦᒋ ᐃᑌᐧᐃᐧᐣ ᑳ ᐸᑭᑎᓇᕽ ᐅ ᐸᑭᑎᓂᑫᐃᐧᐣ ᐊᐦᐳ ᑭᐢᐱᐣ ᑌᐯᔨᒧᐃᐧ ᐸᑭᑎᓈᓱᐃᐧᐣ, ᑭᑕ ᒥᒋᓈᓂᐊᐧᐣ ᐊᓂᒪ ᐁ ᑭᓯᑳᐠ ᑳ ᐸᑭᑎᓇᕽ ᐅ ᐸᑭᑎᓈᓱᐃᐧᐣ; ᐁᑯᓯ ᐁ ᐊᑎ ᐋᐧᐸᕽ ᑳ ᐃᐢᑯᐸᔨᐠ ᑭᑕ ᒥᒋᓈᓂᐊᐧᐣ. 17ᒫᑲ ᐊᓂᒪ ᑳ ᐃᐢᑯᓂᑳᑌᐠ ᐃᐧᔮᐢ ᐊᓂᒪ ᐸᑭᑎᓈᓱᐃᐧᐣ ᐁ ᐊᑎ ᓂᐢᑐ ᑭᓯᑳᐠ ᑭᑕ ᒣᐢᑎᑲᓯᑳᑌᐤ ᐃᐢᑯᑌᕽ. 18ᑭᐢᐱᐣ ᒫᑲ ᓈᐣᑕᐤ ᐃᐧᔮᐢ ᐊᓂᒪ ᑳ ᐸᑭᑎᓂᑫᐟ ᐯᔭᐦᑕᑫᔨᒧᐃᐧ ᐸᑭᑎᓈᓱᐃᐧᓇ ᒥᒋᓈᓂᐋᐧᐦᑭ ᐁ ᐊᑎ ᓂᐢᑐ ᑭᓯᑳᐠ, ᐁᐊᐧᑯ ᓇᒪᐃᐧᔭ ᑭᑕ ᐅᑎᓂᑳᑌᐤ ᒥᓇ ᓇᒪᐃᐧᔭ ᑭᑕ ᐊᑭᐦᑕᒪᐋᐧᐤ ᐊᓇ ᑳ ᐸᑭᑎᓈᓱᐟ; ᑭᑕ ᐸᑳᐧᑎᑲᐧᐣ, ᐁᑯᓯ ᐊᓇ ᐊᐦᒑᕽ ᑳ ᒥᒋᐟ ᑭᑕ ᓇᔭᑕᒼ ᐅ ᒪᒋᐃᑎᐃᐧᐣ. 19ᐊᓂᒪ ᐃᐧᔮᐢ ᒫᑲ ᑳ ᓵᒥᐢᑲᒧᒪᑲᕽ ᓈᐣᑕᐤ ᑫᑲᐧᐩ ᐁᑳ ᐁ ᐯᑲᕽ ᓇᒪᐃᐧᔭ ᑭᑕ ᒥᒋᓈᓂᐊᐧᐣ, ᑭᑕ ᒣᐢᑎᑲᓯᑳᑌᐤ ᐃᐢᑯᑌᕽ. ᒫᑲ ᐃᐧᔭ ᐃᐧᔮᐢ ᑲᐦᑭᔭᐤ ᐊᐃᐧᔭᐠ ᐁ ᐯᑭᓯᐟ ᑭᑕ ᑭ ᒥᒋᐤ ᐁᐊᐧᑫᐧᔨᐤ. 20ᒫᑲ ᐊᓇ ᐊᐦᒑᕽ ᑳ ᒥᒋᐟ ᐊᓂᒪ ᐃᐧᔮᐢ ᑳ ᐸᑭᑎᓂᑳᑌᐠ ᐯᔭᐦᑕᑫᔨᒧᐃᐧ ᐸᑭᑎᓈᓱᐃᐧᓂᕽ, ᑳ ᐅᐟ ᐊᔮᓂᐟ ᑳ ᑎᐯᔨᐦᒋᑫᐟ, ᐁ ᑭᑭᐢᑳᑯᐟ ᐁᑳ ᐁ ᐯᑭᓯᐟ, ᐁᐊᐧᑯ ᐊᐦᒑᕽ ᑭᑕ ᒪᓂᐁᐧᐸᐋᐧᐤ ᐅᐟ ᐊᔨᓯᔨᓂᒪ ᐅᐦᒋ. 21ᑭᐢᐱᐣ ᒫᑲ ᐊᐃᐧᔭᐠ ᓵᒥᓇᑭ ᓇᐣᑕᐤ ᑫᑲᐧᐩ ᐁᑳ ᐁ ᐯᑲᓂᔨᐠ, ᐁᑳ ᐁ ᐯᑭᓯᐟ ᐊᔨᓯᔨᓂᐤ, ᐊᐦᐳ ᐁᑳ ᐁ ᐯᑭᓯᐟ ᐱᓯᐢᑭᐤ, ᐊᐦᐳ ᓈᐣᑕᐤ ᑫᑲᐧᐩ ᐁᑳ ᑳ ᐯᑲᕽ ᑳ ᐸᑳᐧᑎᑲᐧᕽ, ᐁᑯᓯ ᒥᒋᒋ ᐃᐧᔮᐢ ᐊᓂᐦᐃ ᐸᑭᑎᓂᑫᐃᐧᓇ ᐯᔭᐦᑕᑫᔨᒧᐃᐧ ᐸᑭᑎᓈᓱᐃᐧᓇ, ᑳ ᐅᐟ ᐊᔮᓂᐟ ᑳ ᑎᐯᔨᐦᒋᑫᐟ, ᐁᐊᐧᑯ ᐊᐦᒑᕽ ᑭᑕ ᒪᓂᐁᐧᐸᐋᐧᐤ ᐅᐟ ᐊᔨᓯᔨᓂᒪ ᐅᐦᒋ.
22ᑳ ᑎᐯᔨᐦᒋᑫᐟ ᒫᑲ ᑭ ᐊᔭᒥᐦᐁᐤ ᒧᓯᓴ ᐁ ᐃᑌᐧᐟ, 23ᐊᔭᒥᐃᐠ ᐃᐢᕒᐁᐃᓬ ᐅᐟ ᐊᐋᐧᓯᒥᓴ, ᑭᑕ ᐃᑕᒋᐠ, ᓇᒪᐃᐧᔭ ᑭ ᑲ ᒥᒋᓈᐋᐧᐤ ᐃᐧᔨᐣ, ᒧᐢᑐᐢ ᐊᐦᐳ ᒪᔭᑎᕽ, ᐊᐦᐳ ᐋᐧᐸᑎᕽ. 24ᒥᓇ ᐅ ᐃᐧᔨᐣ ᐊᓇ ᓭᐦᑫ ᑳ ᓂᐱᐟ, ᒥᓇ ᐅ ᐃᐧᔨᐣ ᐊᓇ ᑳ ᐱᑯᐱᑎᑯᐟ ᐱᓯᐢᑭᐊᐧ, ᐱᑯ ᐃᓯ ᐱᑐᐢ ᑭ ᑲ ᑭ ᐃᑖᐸᒋᐦᑖᓈᐋᐧᐤ; ᒫᑲ ᓇᒪᐃᐧᔭ ᓈᐣᑕᐤ ᐃᓯ ᑭ ᑲ ᒥᒋᓈᐋᐧᐤ. 25ᒋᑫᒫ ᐱᑯ ᐊᐃᐧᔭᐠ ᒥᒋᒋ ᐅ ᐃᐧᔨᓄᔨᐤ ᐊᓂᐦᐃ ᐱᓯᐢᑭᐊᐧ ᐊᔨᓯᔨᓂᐊᐧᐠ ᑳ ᐸᑭᑎᓇᒪᐋᐧᒋᐠ ᐸᑭᑎᓈᓱᐃᐧᐣ ᐁ ᒪᒍᐢᑌᐊᒪᐋᐧᒋᐠ ᑳ ᑎᐯᔨᐦᒋᑫᔨᐟ, ᐁᐊᐧᑯ ᐊᐦᒑᕽ ᑳ ᒥᒋᐟ ᑭᑕ ᒪᓂᐁᐧᐸᐋᐧᐤ ᐅᐟ ᐊᔨᓯᔨᓂᒪ ᐅᐦᒋ. 26#ᒉᓂᓯᐢ 9:4; ᓬᐃᐱᑎᑲᐢ 17:10-14; 19:26; ᑎᔪᑕᕒᐊᓇᒥ 12:16,23; 15:23ᓇᒪᐃᐧᔭ ᒥᓇ ᓈᐣᑕᐤ ᑐᐃᐧ ᒥᐦᑯ ᑭ ᑲ ᒥᒋᓈᐋᐧᐤ, ᑭᐢᐱᐣ ᐱᔦᓯᐤ ᐊᐦᐳ ᐱᓯᐢᑭᐤ, ᓈᐣᑕᐤ ᑭᐟ ᐃᐦᑖᐃᐧᓂᐋᐧᕽ. 27ᐱᑯ ᐊᐃᐧᔭᐠ ᒥᒋᒋ ᓈᐣᑕᐤ ᒥᐦᑯ, ᐁᐊᐧᑯ ᐊᐦᒑᕽ ᑭᑕ ᒪᓂᐁᐧᐸᐋᐧᐤ ᐅᐟ ᐊᔨᓯᔨᓂᒪ ᐅᐦᒋ.
28ᑳ ᑎᐯᔨᐦᒋᑫᐟ ᒫᑲ ᑭ ᐊᔭᒥᐦᐁᐤ ᒧᓯᓴ, ᐁ ᐃᑌᐧᐟ, 29ᐱᑭᐢᑳᐧᓯᐠ ᐃᐢᕒᐁᐃᓬ ᐅᐟ ᐊᐋᐧᓯᒥᓴ, ᐁ ᐃᑌᐧᔭᐣ, ᐊᓇ ᑳ ᐸᑭᑎᓇᒪᐋᐧᐟ ᑳ ᑎᐯᔨᐦᒋᑫᔨᐟ ᐁ ᐸᑭᑎᓂᑫᐟ ᐅ ᐯᔭᐦᑕᑫᔨᒧᐃᐧ ᐸᑭᑎᓈᓱᐃᐧᓇ, ᑭᑕ ᐯ ᒥᔦᐤ ᐅ ᐸᑭᑎᓂᑫᐃᐧᐣ ᑳ ᑎᐯᔨᐦᒋᑫᔨᐟ ᐁ ᐅᐦᑎᓇᕽ ᑳ ᐸᑭᑎᓂᑫᐟ ᐅ ᐯᔭᐦᑕᑫᔨᒧᐃᐧ ᐸᑭᑎᓇᓱᐃᐧᓇ. 30ᑫᐦᒋᐋᐧᐠ ᐅᒋᐦᒋᔭ ᐅᐦᒋ ᑭᑕ ᐯ ᐸᑭᑎᓇᒪᐁᐧᐤ ᑳ ᑎᐯᔨᐦᒋᑫᔨᐟ ᐃᐢᑯᑌᐤ ᑳ ᐅᐦᒋ ᒥᔮᐟ; ᐃᐧᔨᐣ ᑭᑭ ᐅᑕᓯᓈᑫᐤ ᑭᑕ ᐯᑖᐤ, ᐊᓂᒪ ᐅᑕᓯᓈᑫᐤ ᑭᑕ ᐁᐧᐋᐧᒋᐸᔨᑖᕽ ᐁᐊᐧᑳᐧᓂᒪ ᐁᐧᐋᐧᒋ ᐸᑭᑎᓈᓱᐃᐧᐣ ᐅᐦᑎᐢᑲᐤ ᑳ ᑎᐯᔨᐦᒋᑫᐟ. 31ᐊᔭᒥᐦᐁᐃᐧᔨᓂᐤ ᒫᑲ ᑭᑕ ᒣᐢᑎᑲᓴᒼ ᐃᐧᔨᐣ ᐸᑭᑎᓈᓱᐃᐧᓈᐱᐢᑯᕽ; ᒫᑲ ᐅᑕᓯᓈᑫᐤ ᐁᕒᐊᐣ ᒥᓇ ᐅᑯᓯᓴ ᑭᑕ ᐊᔮᐊᐧᐠ. 32ᐁᑯᓯ ᐅᐸᐧᒼ ᑭᐦᒋᓂᐢᑭᕽ ᐃᑌᐦᑫ ᑭ ᑲ ᒥᔮᐤ ᐊᔭᒥᐦᐁᐃᐧᔨᓂᐤ ᐁᐊᐧᑯ ᑭᑕ ᐅᐦᐱᓈᓱᐃᐧ ᐸᑭᑎᓈᓱ ᐊᓂᐦᐃ ᐅᐦᒋ ᑳ ᐸᑭᑎᓂᑳᑌᑭ ᑭ ᐯᔭᐦᑕᑫᔨᒧᐃᐧ ᐸᑭᑎᓈᓱᐃᐧᓂᐋᐧᐊᐧ. 33ᐊᓂᐦᐃ ᐅᑯᓯᓴ ᐁᕒᐊᐣ ᑳ ᐸᑭᑎᓈᓱᐟ ᒥᐦᑯ ᐊᓂᐦᐃ ᐯᔭᐦᑕᑫᔨᒧᐃᐧ ᐸᑭᑎᓈᓱᐃᐧᓇ, ᒥᓇ ᐃᐧᔨᐣ, ᑭᑕ ᐊᔮᐤ ᐅᐹᐧᒼ ᐃᐧᔭ ᑭᑕ ᐋᐸᒋᐦᑖᐟ. 34ᒋᑫᒫ ᐊᓂᒪ ᐁᐧᐋᐧᒋ ᐅᑕᓯᓈᑫᐤ ᒥᓇ ᐅᐦᐱᓈᓱᐃᐧ ᒥᐹᐧᒼ ᓂ ᑭ ᐅᑎᓀᐣ ᐃᐢᕒᐁᐃᓬ ᐅᐟ ᐊᐋᐧᓯᒥᓯᐋᐊᐧ ᐅ ᐸᑭᑎᓂᑫᐃᐧᓂᐋᐧᕽ ᐅᐦᒋ ᒥᓇ ᐅ ᐯᔭᐦᑕᑫᔨᒧᐃᐧ ᐸᑭᑎᓈᓱᐃᐧᓂᐋᐧᕽ ᐅᐦᒋ, ᐁᑯᓯ ᓂ ᑭ ᒥᔮᐊᐧᐠ ᐁᕒᐊᐣ ᐊᔭᒥᐦᐁᐃᐧᔨᓂᐤ ᒥᓇ ᐅᑯᓯᓴ, ᐁ ᐃᑕᐢᑌᐠ ᑭᑕ ᒥᔨᑯᒋᐠ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑳᑭᑫ.
35ᐁᐊᐧᑯᒪ ᐅ ᒥᔨᑯᐃᐧᐣ ᑳ ᑐᒥᓂᐦᐟ ᐁᕒᐊᐣ ᒥᓇ ᐅ ᒥᔨᑯᐃᐧᓂᔨᐊᐧ ᑳ ᑐᒥᓂᒥᐦᐟ ᐅᑯᓯᓴ, ᐁ ᐅᑎᓂᑳᑌᐠ ᐸᑭᑎᓂᑫᐃᐧᓇ ᐅᐦᒋ ᐊᓂᐦᐃ ᐃᐢᑯᑌᐤ ᑳ ᐅᐦᒋ ᐸᑭᑎᓇᒫᐦᐟ ᑳ ᑎᐯᔨᐦᒋᑫᐟ, ᐊᓂᒪ ᐁ ᑭᓯᑳᐠ ᑳ ᑭ ᐅᔭᑭᒪᐟ ᑭᑕ ᐊᑐᐢᑲᐊᐧᒋᐠ ᑳ ᑎᐯᔨᐦᒋᑫᔨᐟ ᐊᔭᒥᐦᐁᐃᐧᔨᓂᐤ ᐅᐟ ᐊᑐᐢᑫᐃᐧᓂᕽ. 36ᑳ ᑭ ᐃᑕᓯᐁᐧᐟ ᑭᑕ ᒥᔨᑯᒋᐠ ᐃᐢᕒᐁᐃᓬ ᐅᐟ ᐊᐋᐧᓯᒥᓴ, ᐊᓂᒪ ᐁ ᑭᓯᑳᐠ ᑳ ᑭ ᑐᒥᓈᐟ. ᐃᑕᐢᑌᐤ ᑭᑕ ᒥᔨᐦᒋᐠ ᑳᑭᑫ ᐃᐢᑯ ᑫ ᐋᔮᓂᐢᑫ ᐱᒫᑎᓯᒋᐠ.
37ᐁᐊᐧᑯ ᐅᒪ ᐁᑕᓱᐋᐧᒋᑳᑌᐠ ᒪᒍᐢᑌᐊᒪᑫᐃᐧᐣ, ᐸᐦᑫᐧᓯᑲᓂ ᐸᑭᑎᓈᓱᐃᐧᐣ, ᒥᓇ ᒪᒋᑐᑕᒧᐃᐧᓂ ᐸᑭᑎᓇᓱᐃᐧᐣ, ᒥᓇ ᐊᑖᒣᔨᑖᑯᓯᐃᐧ ᐸᑭᑎᓈᓱᐃᐧᐣ, ᒥᓇ ᑲᓈᒋᐦᐃᐁᐧᐃᐧᐣ, ᒥᓇ ᑳ ᐸᑭᑎᓂᑳᑌᑭ ᐯᔭᑕᑫᔨᒧᐃᐧ ᐸᑭᑎᓈᓱᐃᐧᓇ. 38ᑳ ᑎᐯᔨᐦᒋᑫᐟ ᑳ ᑭ ᐃᑕᓱᐋᐧᑖᐟ ᒧᓯᓴ ᐊᓂᑕ ᓴᐃᓇᐩ ᐊᐧᒋᕽ, ᐊᓂᒪ ᐁ ᑭᓯᑳᐠ ᑳ ᑭ ᐃᑕᓱᐋᐧᑖᐟ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑭᑕ ᐸᑭᑎᓇᒪᐋᐧᔨᐟ ᐸᑭᑎᓈᓱᐃᐧᓇ ᑳ ᑎᐯᔨᐦᒋᑫᔨᐟ ᐁᑯᑕ ᓴᐃᓇᐩ ᐱᑲᐧᑕᐢᑭᕽ.
Currently Selected:
ᓬᐃᐱᑎᑲᐢ 7: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
