ᐅᔭᓱᐁᐧᐊᐧᐠ 6
6
1ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᒫᑲ ᑭ ᐃᑐᑕᒪᐧᐠ ᐊᓂᒪ ᑳ ᒫᔮᑕᕽ ᐁ ᐃᑖᐱᓯᒥᑯᐟ ᑳ ᑎᐯᔨᐦᒋᑫᐟ ᐁᑯᓯ ᑳ ᑎᐯᔨᐦᒋᑫᔨᐟ ᑭ ᐸᑭᑎᓂᑲᐧᐠ ᐅᒋᐦᒋᔨᕽ ᒥᑎᔭᓇᐃᑕ ᑌᐸᑯᑊ ᑕᐦᑐ ᐊᐢᑭ. 2ᐁᑯᓯ ᐅᒋᐦᒋ ᑳ ᑎᐯᔨᐦᒋᑫᐟ ᑭ ᓵᑯᒋᐦᐃᑲᐧᐠ ᐃᐢᕒᐁᐃᓬ; ᐁᐊᐧᑯᓂ ᒫᑲ ᒥᑎᔭᓇ ᐅᐦᒋ ᑳ ᑭ ᐅᓯᐦᑖᒋᐠ ᐋᐧᑕ, ᑳ ᐊᔮᑭ ᐊᐧᒋᕽ ᒥᓇ ᐃᐧᐹᐱᐢᑳᐊᐧ, ᒥᓇ ᑳ ᓴᓱᑲᑭ ᐋᐧᐢᑳᐦᐃᑲᐃᐧᓇ. 3ᐁᑯᓯ ᒫᑲ ᑭ ᐃᐦᑭᐣ, ᐃᐢᕒᐁᐃᓬ ᑳ ᑭᐢᑎᑫᒋᐠ, ᒥᑎᔭᓇᐃᑕᐠ ᒫᑲ ᑭ ᐯ ᐃᑐᐦᑌᐊᐧᐠ, ᒥᓇ ᐋᒪᓬᐃᑲᐃᑕᐠ, ᒥᓇ ᐋᐧᐸᓄᑖᕽ ᑯᐦᒋ ᓂᐦᑖᐃᐧᑭᒋᐠ; ᑭ ᐯ ᒫᓇ ᒪᐃᐧᓀᐢᑳᑲᐧᐠ; 4ᑭ ᑲᐯᓯᒧᑐᑖᑲᐧᐠ ᒫᑲ, ᒥᓇ ᑭ ᓂᓯᐊᐧᓈᒋᐦᑖᔨᐊ ᑳ ᐅᐦᐱᑭᕽ ᐅᐢᑭᕽ, ᐱᔨᐢ ᑫᓴ ᐃᐢᑯ, ᐁᑯᓯ ᓇᒪ ᑫᑲᐧᐩ ᒥᒋᐃᐧᐣ ᑭ ᐃᐢᑯᓇᒫᑲᐧᐠ ᐃᐢᕒᐁᐃᓬ, ᓇᒪᐋᐧᐨ ᒫᔭᑎᐦᑲᐧ, ᐊᐦᐳ ᒧᐢᑐᓴᐧ, ᐊᐦᐳ ᓱᓱᒥᐢᑕᑎᒪᐧ. 5ᒋᑫᒫ ᑭ ᐯ ᑭᑭᐊᐧᐠ ᐅ ᐱᓯᐢᑭᒥᐋᐧᐊᐧ ᒥᓇ ᐃᐧᑭᐋᐊᐧ, ᑖᐱᐢᑯᐨ ᑳᐧᐢᑯᑎᓯᓴᐠ ᑭ ᐯ ᐃᓯ ᐅᓵᒣᔭᑎᐊᐧᐠ ᐃᐧᔭᐋᐧᐤ ᒥᓇ ᐅ ᐱᐢᑳᐧᐃᐧᑲᓀᒥᐋᐊᐧ ᐁᑳ ᑭᑕ ᑭ ᐊᑭᒥᐦᒋᐠ ᑭ ᐃᑌᔭᑎᐊᐧᐠ; ᐁᑯᓯ ᑭ ᐯ ᐃᑐᐦᑌᐊᐧᐠ ᐊᐢᑭᕽ ᑭᑕ ᓂᓯᐊᐧᓈᒋᐦᑖᒋᐠ. 6ᐃᐢᕒᐁᐃᓬ ᒫᑲ ᒥᐢᑕᐦᐃ ᑭ ᑭᑎᒪᐦᐃᑲᐧᐠ ᒥᑎᔭᓇᐃᑕ; ᐁᑯᓯ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑭ ᒪᐃᐧᒧᐢᑕᐁᐧᐊᐧᐠ ᑳ ᑎᐯᔨᐦᒋᑫᔨᐟ.
7ᑭ ᐊᔨᑭᐣ ᒫᑲ ᐃᐢᐱ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᐁ ᒪᐃᐧᒧᐢᑕᐋᐧᒋᐠ ᑳ ᑎᐯᔨᐦᒋᑫᔨᐟ ᐊᓂᐦᐃ ᒥᑎᔭᐣ ᐅᐦᒋ, 8ᑳ ᑎᐯᔨᐦᒋᑫᐟ ᑭ ᐃᓯᑎᓴᐦᐊᒪᐁᐧᐤ ᐅᑭᐢᑭᐁᐧᐦᐃᑫᐊᐧ ᐊᓂᐦᐃ ᐃᐢᕒᐁᐃᓬ ᐅᐟ ᐊᐋᐧᓯᒥᓯᔨᐊᐧ; ᑭ ᐃᑌᐤ ᒫᑲ, ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ ᐅ ᑭᓭᒪᓂᑐᒪ ᐃᐢᕒᐁᐃᓬ, ᐃᒋᑊᐟ ᐊᐢᑭᕽ ᑭ ᑭ ᐯ ᐅᐦᑐᑕᐃᑎᓈᐋᐧᐤ, ᒥᓇ ᐊᐊᐧᑳᑎᑯᐃᐧᑲᒥᑯᕽ ᑭ ᑭ ᐯ ᐅᐦᒋ ᐊᐧᔭᐃᐧᑕᐦᐃᑎᓈᐋᐧᐤ; 9ᐁᑯᓯ ᐅᒋᐦᒋᐋᐧᕽ ᐅᐦᒋ ᐃᒋᑊᐟ ᐊᔨᓯᔨᓂᐊᐧᐠ ᑭ ᑭ ᐅᐦᒋ ᐸᐢᐱᐦᐃᑎᓈᐋᐧᐤ, ᒥᓇ ᐅᒋᐦᒋᐋᐧᕽ ᐅᐦᒋ ᑲᐦᑭᔭᐤ ᑳ ᑭᑎᒪᐦᐃᑯᔦᑯᐠ, ᒥᓇ ᓂ ᑭ ᐊᐧᔭᐃᑎᓴᐋᐧᐊᐧᐠ ᑭ ᓂᑳᓂᒥᐋᐧᕽ, ᐁᑯᓯ ᑭ ᑭ ᒥᔨᑎᓈᐋᐧᐤ ᐅᐟ ᐊᐢᑭᐋᐧᐤ; 10ᑭ ᑭ ᐃᑎᑎᓈᐋᐧᐤ ᒫᑲ, ᓂᔭ ᑳ ᑎᐯᔨᐦᒋᑫᔮᐣ ᑭ ᑭᓭᒪᓂᑐᒼ; ᓇᒪᐃᐧᔭ ᑭ ᑲ ᑯᐢᑎᒫᐋᐧᐊᐧ ᐅ ᒪᓂᑐᒥᐋᐧᐊᐧ ᐋᒪᕒᐊᐃᑕᐠ, ᐅᐟ ᐊᐢᑭᐋᐧᕽ ᑳ ᐊᔮᐋᐧᔦᐠ; ᒫᑲ ᓇᒪᐃᐧᔭ ᑭ ᓇᑐᐦᑌᓈᐋᐧᐤ ᓂᐟ ᐃᑌᐧᐃᐧᐣ.
11ᐁᑯᑕ ᒫᑲ ᑭ ᐯ ᑕᑯᓯᓂᔨᐊᐧ ᐅᑭᓯᑯᒪ ᑳ ᑎᐯᔨᐦᒋᑫᐟ ᑭ ᐊᐱᐤ ᒫᑲ ᓯᐹ ᒪᐢᑲᐋᐧᑎᑯᕽ ᐊᓂᑕ ᐋᐦᐸᕒᐊ ᑳ ᐊᔮᐟ, ᑳ ᐊᔮᐋᐧᐟ ᒍᐋᐢ ᐊᓇ ᐋᐱᔨᓴᕒᐊᐃᐟ; ᐁᑯᓯ ᑭᑎᔭᓇ ᐅᑯᓯᓴ ᑭ ᐸᐊᐧᐁᐧᔨᐊᐧ ᐸᐦᑫᐧᓯᑲᓂᑳᓇ ᐁᑯᑕ ᓱᒥᓈᐳᑳᓂᕽ, ᐁ ᐃᐧ ᑳᑕᒪᐋᐧᐟ ᒥᑎᔭᓇᐃᑕ. 12ᑳ ᑎᐯᔨᐦᒋᑫᐟ ᒫᑲ ᐅᑭᓯᑯᒪ ᑭ ᓄᑯᐦᐃᓱᐢᑖᐠ, ᒥᓇ ᑭ ᐃᑎᐠ, ᑳ ᑎᐯᔨᐦᒋᑫᐟ ᑭ ᐃᐧᒉᐃᐧᐠ, ᑭᔭ ᑳ ᓱᑳᔭᐃᐧᓯᔭᐣ ᐅᑭᐦᒋᐦᑖᐃᐧᔨᓂᐤ. 13ᑭᑎᔭᐣ ᒫᑲ ᑭ ᐃᑌᐤ, ᐋ ᓄᑭᒫᒼ, ᑭᐢᐱᐣ ᑳ ᑎᐯᔨᐦᒋᑫᐟ ᓂ ᐃᐧᒉᑯᓈᐣ, ᑖᓀᐦᑭ ᑲᐦᑭᔭᐤ ᐅᒪ ᑳ ᐃᓯ ᐅᑎᐦᑎᑯᔮᕽ? ᒥᓇ ᑖᓂᐁᐧᐦᐃ ᐁᑲᐧ ᑲᐦᑭᔭᐤ ᐅ ᒪᒫᑖᐃᐧ ᐃᓯᐦᒋᑫᐃᐧᓇ ᓄᑖᐃᐧᓈᓇᐠ ᑳ ᑭ ᐋᒋᒧᐢᑖᑯᔮᐦᑭᐠ, ᐁ ᐃᑌᐧᒋᐠ, ᓇᒪ ᒋ ᑳ ᑎᐯᔨᐦᒋᑫᐟ ᓂ ᑭ ᐯ ᐊᐧᔭᐃᐧᑕᐦᐃᑯᓈᐣ ᐃᒋᑊᑎᕽ ᐅᐦᒋ? ᒫᑲ ᐁᑲᐧ ᑳ ᑎᐯᔨᐦᒋᑫᐟ ᓂ ᑭ ᐁᐧᐱᓂᑯᓈᐣ, ᒥᓇ ᓂ ᑭ ᐸᑭᑎᓂᑯᓇᐣ ᐅᒋᐦᒋᔨᕽ ᒥᑎᔭᓇ. 14ᑳ ᑎᐯᔨᐦᒋᑫᔨᐟ ᒫᑲ ᑭ ᑲᓇᐋᐧᐸᒥᐠ ᒥᓇ ᑭ ᐃᑎᐠ, ᓯᐯᐧᐦᑌ ᐅᒪ ᐁ ᐃᓯ ᓱᑲᔭᐃᐧᓯᔭᐣ, ᒥᓇ ᐱᒫᒋᐦᐃᐠ ᐃᐢᕒᐁᐃᓬ ᐅᒋᐦᒋᕽ ᐅᐦᒋ ᒥᑎᔭᐣ; ᓇᒪ ᒋ ᓂᔭ ᑳ ᑭ ᐃᓯᑎᓴᐦᐅᑖᐣ? 15ᑭ ᐃᑌᐤ ᒫᑲ, ᑌᐯᔨᐦᒋᑫᔭᐣ, ᑖᓂᑌ ᑫ ᑭ ᐅᐦᒋ ᐱᒫᒋᐦᐊᐠ ᐃᐢᕒᐁᐃᓬ? ᒫᑎᑲ, ᓂ ᐊᐧᐦᑯᒫᑲᓇᐠ ᒫᐊᐧᐨ ᑭᑎᒫᑭᓯᐊᐧᐠ ᒪᓈᓯᐃᕽ, ᐁᑯᓯ ᓂᔭ ᒫᐊᐧᐨ ᓂᐟ ᐊᐱᐢᑌᔨᑖᑯᓯᐣ ᓄᑖᐃᐧ ᐃᐧᑭᕽ. 16ᑳ ᑎᐯᔨᐦᒋᑫᔨᐟ ᒫᑲ ᑭ ᐃᑎᐠ, ᑫᐦᒋᓈ ᑭ ᑲ ᐃᐧᒉᐃᐧᑎᐣ, ᐁᑯᓯ ᑭ ᑲ ᓂᐸᐦᐋᐊᐧᐠ ᒥᑎᔭᓇᐃᑕᐠ ᑖᐱᐢᑯᐨ ᐯᔭᐠ ᐊᔨᓯᔨᓂᐤ. 17ᑭ ᐃᑌᐤ ᒫᑲ, ᑭᐢᐱᐣ ᑳ ᒥᐢᑲᒧᐊᐧᓀ ᑭᑕ ᒥᔪᑲᓇᐋᐧᐸᒥᔭᐣ, ᑭᔮᒼ ᐋᐧᐸᐦᑕᐦᐃᐣ ᑭᐢᑭᓇᐊᐧᒋ ᐃᓯᐦᒋᑫᐃᐧᐣ ᑖᐯᐧ ᑭᔭ ᑳ ᐃᐧᒋᐱᑭᐢᑫᐧᒥᔭᐣ. 18ᐁᑳᐃᐧᔭ ᓯᐯᐧᐦᑌ, ᑭ ᐸᑯᓭᔨᒥᑎᐣ, ᐹᑎᒫ ᐃᔨᑯᕽ ᐯ ᓈᑎᑖᓂ ᒥᓇ ᐯᑖᔮᓂ ᓂ ᒣᑭᐃᐧᐣ, ᒥᓇ ᐅᐦᑎᐢᑲᐊᐧᐢᑖᐧᑖᓂ. ᑭ ᐃᑎᐠ ᒫᑲ, ᓂ ᑲ ᐯᐦᐅᐣ ᐃᔨᑯᕽ ᒥᓇ ᐯ ᐃᑐᐦᑌᔭᓂ.
19ᑭᑎᔭᐣ ᒫᑲ ᑭ ᐱᐦᑐᑫᐤ, ᑭ ᑲᐧᔮᒋᐁᐤ ᒫᑲ ᐋᐧᐸᑎᑯᓯᓴ, ᒥᓇ ᐊᔭᑯᓈᐊᐧ ᐁᑳ ᐁ ᐅᐦᐱᓱᔨᐟ ᐯᔭᐠ ᐃᐦᐸ ᐸᐦᑫᐧᓯᑲᐣ ᐃᔨᑯᕽ; ᐃᐧᔭᐢ ᑭ ᐊᓯᐊᐧᑖᐤ ᐃᐧᑯᐱᐊᐧᑎᕽ, ᐁᑯᓯ ᒧᐢᑲᒥ ᑭ ᐊᐢᑖᐤ ᐊᐢᑭᑯᕽ, ᐁᑯᓯ ᑭ ᐯ ᐊᐧᔭᐃᐧᑕᑕᒪᐁᐧᐤ ᓯᐹᔮᑎᐠ ᐁ ᐊᐱᔨᐟ ᒥᓇ ᑭ ᐸᑭᑎᓇᒪᐁᐧᐤ. 20ᐊᓂᐦᐃ ᒫᑲ ᑭᓭᒪᓂᑐ ᐅᑭᓯᑯᒪ ᑭ ᐃᑎᐠ, ᐅᑎᓇ ᐊᓂᒪ ᐃᐧᔮᐢ ᒥᓇ ᐊᓂᑭ ᐁᑳ ᑳ ᐅᐦᐱᓱᒋᐠ ᐊᔭᑯᓈᐊᐧᐠ, ᐊᐢᑖ ᒫᑲ ᐅᑕ ᑭᐢᑖᐱᐢᑯᕽ, ᐁᑯᓯ ᓯᑭᓇ ᒧᐢᑲᒥ. ᑭ ᐃᑐᑕᒼ ᒫᑲ.
21ᐁᑲᐧ ᐊᓇ ᑳ ᑎᐯᔨᐦᒋᑫᐟ ᐅᑭᓯᑯᒪ ᑭ ᐊᐢᑖᐤ ᐊᐧᓇᐢᑯᐨ ᓴᐢᑲᐅᓈᑎᐠ ᑳ ᑕᑯᓇᕽ, ᐁ ᓵᒥᑎᑖᐟ ᐃᐧᔮᓯᕽ ᒥᓇ ᐁᑳ ᑳ ᐅᐦᐱᓱᔨᐟ ᐊᔭᑯᓈᐊᐧ; ᑭ ᑳᐧᑯᑌᐸᔨᐤ ᒫᑲ ᑭᐢᑖᐱᐢᑳᕽ ᐅᐦᒋ ᐁᑯᓯ ᑭ ᒣᐢᑎᑲᑌᐤ ᐊᓂᒪ ᐃᐧᔮᐢ ᒥᓇ ᐊᓂᑭ ᐊᔭᑯᓈᐊᐧᐠ; ᐁᑲᐧ ᒫᑲ ᐊᓂᐦᐃ ᑳ ᑎᐯᔨᐦᒋᑫᔨᐟ ᐅᑭᓯᑯᒪ ᑭ ᓇᑲᑎᐠ ᐁᑳ ᐁ ᐋᐧᐸᒫᐟ. 22ᑭᑎᔭᐣ ᒫᑲ ᐋᐧᐸᐦᑕᒼ ᑖᐯᐧ ᐁᐊᐧᑯᓂ ᐅᑭᓯᑯᒪ ᑳ ᑎᐯᔨᐦᒋᑫᐟ; ᐁᑯᓯ ᑭᑎᔭᐣ ᑭ ᐃᑌᐧᐤ, ᐋᐃᐦᐋᐩ, ᑌᐯᔨᐦᒋᑫᔭᐣ ᑭᓭᒪᓂᑐ! ᒋᑫᒫ ᓂ ᑭ ᐋᐧᐸᒥᒫᐊᐧ ᐅᑭᓯᑯᒪ ᑳ ᑎᐯᔨᐦᒋᑫᐟ ᒧᓯᐢ ᐅᐦᑳᐧᑲᓂᕽ. 23ᑳ ᑎᐯᔨᐦᒋᑫᔨᐟ ᒫᑲ ᑭ ᐃᑎᐠ, ᐯᔭᐦᑕᑫᔨᒧᐃᐧᐣ ᑭ ᑲ ᐃᐧ ᐊᔮᐣ; ᐁᑳᐃᐧᔭ ᓭᑭᓯ; ᓇᒪᐃᐧᔭ ᑭ ᑲ ᓂᐱᐣ. 24ᐁᑯᑕ ᒫᑲ ᑭᑎᔭᐣ ᐸᑭᑎᓈᓱᐃᐧᓈᐱᐢᐠ ᑭ ᐅᓯᐦᑕᒪᐁᐧᐤ ᑳ ᑎᐯᔨᐦᒋᑫᔨᐟ, ᒥᓇ ᒋᐦᐆᐊᐧ ᓵᓬᐋᒼ ᑭ ᐃᓯᔨᐦᑳᑕᒼ; ᐱᔨᐢ ᐊᓄᐦᐨ ᑳ ᑭᓯᑳᐠ ᑫᔮᐱᐨ ᐊᔮᐤ ᐊᓂᑕ ᐋᐦᐸᕒᐊ ᑳ ᐊᔮᒋᐠ ᐋᐱᔨᓴᕒᐊᐃᑕᐠ.
25ᑭ ᐊᔨᑭᐣ ᒫᑲ ᐁᐊᐧᑯ ᐁ ᑎᐱᐢᑳᐠ, ᑳ ᑎᐯᔨᐦᒋᑫᔨᐟ ᑭ ᐃᑎᐠ, ᐅᑎᓂᒼ ᑯᑖᐃᐧ ᐅ ᒧᐢᑐᓱᒪ ᐊᓇ ᐅᑎ ᑭᐦᑖᐧᒼ ᔮᐯᒧᐢᑐᐢ ᑌᐸᑯᑊ ᐁ ᐃᑕᐦᑐᐱᐳᓀᐧᐟ, ᒥᓇ ᓂᐦᒋᐁᐧᐸᐦᐊᒼ ᐅ ᐸᑭᑎᓈᓱᐃᐧᓈᐱᐢᐠ ᐯᐊᓬ ᑯᑖᐃᐧ ᑳ ᐊᔮᐟ, ᒥᓇ ᑭ ᑲ ᑲᐊᐧᐋᐧᐤ ᒪᓂᑐᐋᐧᑎᐠ ᐁᑯᑕ ᒋᑭ ᑳ ᒋᒪᓱᐟ; 26ᐅᓯᐦᑕᒪᐤ ᒫᑲ ᐸᑭᑎᓈᓱᐃᐧᓈᐱᐢᐠ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ ᐅᑕ ᑕᐦᑯᐨ ᑭᐢᑖᐱᐢᑳᕽ, ᐁ ᐃᑕᐢᑌᐠ ᑭᑕ ᐃᓯᒋᑳᑌᐠ, ᐁᑯᓯ ᐅᑎᐣ ᐊᓇ ᑭᐦᑖᐧᒼ ᔮᐯᒧᐢᑐᐢ, ᒥᓇ ᐸᑭᑎᓈᓱ ᒪᒍᐢᑌᐦᐊᒫᑫᐃᐧᐣ ᐁ ᐅ ᒥᐦᑎᒥᔭᐣ ᐊᓇ ᒪᓂᑐᐋᐧᑎᐠ ᑫ ᑲᐊᐧᐊᐧᐟ. 27ᐁᑲᐧ ᑭᑎᔭᐣ ᑭ ᐅᑎᓀᐤ ᒥᑖᑕᐦᐟ ᓈᐯᐊᐧ ᐅᐟ ᐊᑐᐢᑫᔮᑲᓇ, ᒥᓇ ᑭ ᐃᑐᑕᒼ ᐊᓂᒪ ᑳ ᑎᐯᔨᐦᒋᑫᔨᐟ ᑳ ᑭ ᐃᑎᑯᐟ; ᐁᑯᓯ ᑭ ᐃᐦᑭᐣ, ᒋᑫᒫ ᐁ ᑯᐢᑖᐟ ᐅᑖᐃᐧᔭ ᐃᐧᑭᔨᕽ ᑳ ᐊᔮᔨᐟ ᒥᓇ ᐊᔨᓯᔨᓂᐊᐧ ᐅᑌᓈᕽ, ᐁᑳ ᒫᑲ ᐁ ᑭᓯᑳᔨᐠ ᐁ ᑭ ᐃᑐᑕᕽ, ᑭ ᓂᐹ ᐃᑐᑕᒼ.
28ᐃᐢᐱ ᒫᑲ ᐊᔨᓯᔨᓂᐊᐧᐠ ᐁᐊᐧᑯ ᐅᑌᓇᐤ ᐁᐧᓂᐢᑳᒋᐠ ᐃᐧᐸᐨ ᑫᑭᓭᐹ, ᐳᑎ, ᐅ ᐸᑭᑎᓈᓱᐃᐧᓈᐱᐢᐠ ᐯᐊᓬ ᑭ ᐱᑯᓇᒫᐧᐣ, ᒥᓇ ᒪᓂᑐᐋᐧᑎᐠ ᐁᑯᑕ ᒋᑭ ᑳ ᒋᒪᓱᐟ ᑭ ᑲᐊᐧᐋᐤ, ᐁᑯᓯ ᐊᓇ ᑭᐦᑖᐧᒼ ᔮᐯᒧᐢᑐᐢ ᐁ ᑭ ᐸᑭᑎᓈᓱᕽ ᐸᑭᑎᓈᓱᐃᐧᓈᐱᐢᑯᕽ ᑳ ᑭ ᐅᓯᐦᒋᑳᑌᐠ. 29ᐅᒥᓯ ᒫᑲ ᑭ ᐊᔨᑎᑐᐊᐧᐠ, ᐊᐁᐧᓇ ᐅᒪ ᑳ ᑭ ᐃᑐᑕᕽ? ᐃᐢᐱ ᒫᑲ ᑳ ᓇᑐᐢᑲᑭᐠ ᒥᓇ ᑳ ᑲᑫᐧᒋᑫᒧᒋᐠ, ᑭ ᐃᑌᐧᐊᐧᐠ, ᑭᑎᔭᐣ ᐅᑯᓯᓴ ᒍᐋᐢ ᐅᒪ ᑳ ᑭ ᐃᑐᑕᕽ. 30ᐁᑲᐧ ᒫᑲ ᐊᔨᓯᔨᓂᐊᐧᐠ ᐅᑌᓈᕽ ᑭ ᐃᑌᐊᐧᐠ ᒍᐋᓴ, ᐯ ᐊᐧᔭᐃᐧᑕ ᑭᑯᓯᐢ, ᑭᑕ ᓂᐱᐟ; ᒋᑫᒫ ᐁ ᑭ ᐱᑯᓇᒫᐧᐟ ᐅ ᐸᑭᑎᓈᓱᐃᐧᓈᐱᐢᑯᔨᐤ ᐯᐊᓬᐊ, ᒥᓇ ᐁ ᑭ ᑲᐊᐧᐋᐧᐟ ᒪᓂᑐᐊᐧᑎᑲᐧ ᒋᑭ ᑳ ᑭ ᒋᒪᓱᔨᐟ. 31ᒍᐋᐢ ᒫᑲ ᑭ ᐃᑌᐤ ᑲᐦᑭᔭᐤ ᐊᓂᐦᐃ ᑳ ᓂᐸᐃᐧᐢᑖᑯᐟ, ᑭ ᑲ ᑭᐢᐯᐊᐧᑖᐋᐧᐤ ᒋ ᐯᐊᓬ? ᐊᐦᐳ ᒋ ᑭ ᑲ ᐱᒫᒋᐦᐋᐋᐧᐤ? ᐊᓇ ᑳ ᐃᐧ ᑭᐢᐯᐋᐧᑖᐟ ᑭᔮᒼ ᑭᑕ ᓂᐸᐦᐋᐤ ᑫᔮᐱᐨ ᐁ ᑫᑭᓭᐹᔮᐠ; ᑭᐢᐱᐣ ᒣᓂᑐᐃᐧᑫᐧ ᑭᔮᒼ ᑭᑕ ᑭᐢᐯᐋᐧᑕᒫᓱ, ᒋᑫᒫ ᐊᐃᐧᔭ ᐁ ᑭ ᐱᑯᓇᒥᔨᐟ ᐅ ᐸᑭᑎᓈᓱᐃᐧᓈᐱᐢᐠ. 32ᐁᑯᓯ ᒫᑲ ᐁᐊᐧᑳᐧᓂᒪ ᐁ ᑭᓯᑳᔨᐠ ᒉᕒᐊᐯᐊᓬ ᑭ ᐃᓯᔨᐦᑳᑌᐤ, ᐁ ᐃᑌᐧᐟ, ᑭᔮᒼ ᐯᐊᓬ ᑭᑕ ᑭᐢᐯᐋᐧᑕᒫᓱ ᒋᑫᒫ ᐁ ᑭ ᐱᑯᓇᒥᔨᐟ ᐅ ᐸᑭᑎᓈᓱᐃᐧᓈᐱᐢᐠ.
33ᐁᑲᐧ ᒫᑲ ᑲᐦᑭᔭᐤ ᐊᓂᑭ ᒥᑎᔭᓇᐃᑕᐠ ᒥᓇ ᐋᒪᓬᐃᑲᐃᑕᐠ ᒥᓇ ᐋᐧᐸᓄᑖᕽ ᑳ ᓂᐦᑖᐃᐧᑭᒋᐠ ᑭ ᒫᒪᐃᐧ ᒫᐊᐧᒋᐦᐃᑐᐊᐧᐠ; ᐁ ᑭ ᐋᓱᐊᐧᐊᑭᐠ ᐁ ᑭ ᑲᐯᓯᒋᐠ ᒫᑲ ᒉᓴᕒᐃᓬ ᐋᐧᔮᒪᑎᓈᕽ. 34ᒫᑲ ᐅᐟ ᐊᐦᒑᐦᑲᐧ ᑳ ᑎᐯᔨᐦᒋᑫᐟ ᑭ ᐅᑎᐦᑎᐠ ᑭᑎᔭᐣ; ᑭ ᐳᑖᑕᒼ ᒫᑲ ᐱᐱᑲᐧᐣ; ᐋᐱᔨᓴᕒ ᒫᑲ ᑭ ᒫᒪᐃᐧ ᐱᒥᑎᓴᐦᐅᐠ. 35ᑭ ᐃᓯᑎᓴᐁᐧᐤ ᒫᑲ ᐅᑖᒋᒧᐊᐧ ᒥᓯᐁᐧ ᒪᓈᓯᐃᕽ; ᐁᑯᓯ ᐁᐊᐧᑯᓂ ᒥᓇ ᑭ ᒫᒪᐃᐧ ᐱᒥᑎᓴᐦᐅᐠ; ᐁᑯᓯ ᐅᑖᒋᒧᐊᐧ ᑭ ᐃᓯᑎᓴᐦᐊᒪᐁᐧᐤ ᐋᓴᕒᐊ, ᒥᓇ ᓭᑊᔪᓬᐊᓇ, ᒥᓇ ᓈᑊᑕᓬᐊᐩ; ᑭ ᐯ ᒫᒪᐃᐧ ᓇᑭᐢᑳᑲᐧᐠ ᒫᑲ.
36ᐁᑯᓯ ᑭᑎᔭᐣ ᑭ ᐃᑌᐤ ᑭᓭᒪᓂᑐᐊᐧ, ᑭᐢᐱᐣ ᑭ ᐃᐧ ᐱᒫᒋᐦᐋᐊᐧᐠ ᐃᐢᕒᐁᐃᓬ ᓂᒋᐦᒋ ᐅᐦᒋ, ᑖᐱᐢᑯᐨ ᑳ ᑭ ᐃᑌᐧᔭᐣ, 37ᒫᑎᑲ, ᓂ ᑲ ᐊᐢᑖᐣ ᐯᔭᑯ ᒪᓂᓯᑲᐣ ᒫᔭᑎᐦᑯᐱᐊᐧᔭ ᐸᐊᐧᐃᑫᐃᐧ ᐊᓈᐢᑳᓂᑕᑯᕽ; ᑭᐢᐱᐣ ᒫᑲ ᐅᐱᐋᐧᕽ ᐱᑯ ᑳ ᓂᐱᐊᐧᐢᑳᐠ ᐊᔮᑭ, ᐁᑯᓯ ᐹᐢᑌᑭ ᒥᓯᐁᐧ ᒧᐦᒋᕽ, ᐁᑲᐧ ᓂ ᑲ ᑭᐢᑫᔨᑌᐣ ᑭᑕ ᐱᒫᒋᐦᐊᐟ ᐃᐢᕒᐁᐃᓬ ᓂᒋᐦᒋ ᐅᐦᒋ, ᑖᐱᐢᑯᐨ ᑳ ᑭ ᐃᑌᐧᔭᐣ. 38ᐁᑯᓯ ᒫᑲ ᑭ ᐃᐦᑭᐣ, ᒋᑫᒫ ᐃᐧᐸᐨ ᑫᑭᓭᐹ ᑭ ᐊᐧᓂᐢᑳᐤ ᐁ ᐊᑎ ᐋᐧᐸᓂᔨᐠ, ᐁᑯᓯ ᑭ ᒫᑯᓇᒼ ᐊᓂᐦᐃ ᐅᐱᐊᐧᔭ, ᑭ ᓯᓂᐹᑎᓇᒼ ᒫᑲ ᓂᐱᐊᐧᐢᑳᐤ ᒫᔭᑎᐦᑯᐱᐋᐧᕽ ᐅᐦᒋ, ᐅᔮᑲᐣ ᐁ ᓵᑲᐢᑭᓀᐠ ᓂᐱ. 39ᑭᑎᔭᐣ ᒫᑲ ᑭ ᐃᑌᐤ ᑭᓭᒪᓂᑐᐊᐧ, ᑭᔮᒼ ᐁᑳᐃᐧᔭ ᑭ ᑲ ᑭᓯᐋᐧᐃᑎᐣ ᓂ ᑲ ᐱᑭᐢᑳᐧᐣ ᒫᑲ ᐁᑲᐧ ᐱᑯ ᐯᔭᑳᐧᐤ; ᓂ ᑲ ᑯᒋᐃᐧᑖᐣ ᑭ ᐸᑯᓭᔨᒥᑎᐣ, ᐁᑲᐧ ᐱᑯ ᐯᔭᑳᐧᐤ ᐅᐦᐃ ᒫᔭᑎᐦᑯᐱᐊᐧᔭ ᐅᐦᒋ; ᑭᔮᒼ ᐁᑲᐧ ᐱᑯ ᐅᐱᐊᐧᔭ ᑭᑕ ᐸᐢᑌᐊᐧ, ᒫᑲ ᒥᓯᐁᐧ ᒧᐦᒋᕽ ᑭᑕ ᓂᐱᐊᐧᐢᑳᐤ. 40ᑭᓭᒪᓂᑐ ᒫᑲ ᐁᑯᓯ ᑭ ᐃᑐᑕᒼ ᐁᐊᐧᑳᐧᓂᒪ ᐁ ᑎᐱᐢᑳᐠ; ᒋᑫᒫ ᐅᐱᐊᐧᔭ ᐱᑯ ᑭ ᐹᐢᑌᐊᐧ, ᒫᑲ ᑭ ᓂᐱᐊᐧᐢᑳᐤ ᒥᓯᐁᐧ ᒧᒋᕽ.
Currently Selected:
ᐅᔭᓱᐁᐧᐊᐧᐠ 6: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
