ᐃᓯᑭᐁᓬ 16

1ᒥᓇ ᒫᑲ ᐅᐟ ᐃᑌᐧᐃᐧᐣ ᑳ ᑎᐯᔨᐦᒋᑫᐟ ᓂ ᑭ ᐅᑎᐦᑎᑯᐣ, ᐁ ᐃᑌᐧᐟ, 2ᐃᔨᓂᐃᐧᑯᓯᓵᐣ, ᐃᓯᐦᒋᑫ ᒉᕒᐅᓴᓬᐊᒼ ᑭᑕ ᑭᐢᑫᔨᑕᕽ ᑳ ᓭᓭᐢᑫᔨᑖᑲᐧᓂᔨᑭ ᐅᐟ ᐃᓯᐦᒋᑫᐃᐧᓇ, 3ᐃᑌᐧ ᒫᑲ, ᐅᒥᓯ ᑳ ᑎᐯᔨᐦᒋᑫᐟ ᑭᓭᒪᓂᑐ ᐃᑌᐤ ᒉᕒᐅᓴᓬᐊᒪ; ᑭ ᑭ ᓂᐦᑖᐃᐧᑭᐣ ᒥᓇ ᑭ ᑭ ᐅᐦᒋᐣ ᑫᓇᐣ ᐊᐢᑭᕽ; ᐊᓇ ᐋᒪᕒᐊᐃᐟ ᑭ ᑭ ᐅᔪᑖᐃᐧᐣ, ᐁᑯᓯ ᐦᐃᑕᐃᐟ ᑭ ᑭ ᐅᔪᑳᐃᐧᐣ. 4ᒫᑲ ᐃᐧᔭ ᑳ ᑭ ᐃᓯ ᓂᐦᑖᐃᐧᑭᔭᐣ, ᐊᓂᒪ ᐁ ᑭᓯᑳᐠ ᑳ ᑭ ᓄᑯᓯᔭᐣ ᓇᒪᐃᐧᔭ ᑭ ᑭ ᑭᐢᑳᐯᓱᑲᐃᐧᐣ, ᓇᒪᐃᐧᔭ ᐊᐦᐳ ᑭ ᑭ ᑭᓯᐯᑭᓂᑲᐃᐧᐣ ᑭᑕ ᐯᑭᓯᔭᐣ; ᓇᒪᐋᐧᐨ ᑯᐦ ᓯᐃᐧᑖᑲᓇᐅᑲᐃᐧᐣ ᐊᐦᐳ ᓇᒪᐃᐧᔭ ᑯᐦᒋ ᐋᐧᐢᐱᑎᑲᐃᐧᐣ. 5ᓇᒪᐋᐧᐨ ᐊᐃᐧᔭᐠ ᑯᐦ ᑭᑎᒫᑭᓈᐠ ᓈᐣᑕᐤ ᐅᐦᐃ ᑭᑕ ᐃᐦᑐᑖᐢᐠ, ᑭᑕ ᓴᐃᐧᑌᐦᐁᑐᑖᐢᐠ; ᒫᑲ ᐊᐧᔭᐃᐧᑎᒥᕽ ᑭ ᑭ ᐃᓯᐁᐧᐱᓂᑲᐃᐧᐣ, ᒋᑫᒫ ᐁ ᐸᑳᐧᑎᑲᐃᐧᔭᐣ ᐊᓂᒪ ᐁ ᑭᓯᑳᐠ ᑳ ᑭ ᓂᐦᑖᐃᐧᑭᔭᐣ.

6ᐁᑯᑕ ᒫᑲ ᐁ ᐱᒧᐦᑌᔮᐣ, ᐁᑯᓯ ᐁ ᐋᐧᐸᒥᑖᐣ ᐁ ᑭᑯᐯᑭᓯᓂᔭᐣ ᑭ ᒥᐦᑯ, ᑭ ᑭ ᐃᑎᑎᐣ, ᐋᑕ ᐁ ᑭᑯᑫᐧᓯᓂᔭᐣ, ᐱᒫᑎᓯ; ᐁᐦᐁ, ᑭ ᑭ ᐃᑎᑎᐣ, ᐋᑕ ᐁ ᑭᑯᑫᐧᓯᓂᔭᐣ, ᐱᒫᑎᓯ. 7ᑭ ᑭ ᔭᑭᑭᐃᑎᐣ ᑖᐱᐢᑯᐨ ᐅᓯᒥᐢᐠ ᑭᐢᑎᑳᓂᕽ, ᐁᑯᓯ ᑭ ᑭ ᔭᑭᑭᐣ ᒥᓇ ᑭ ᑭ ᒥᓯᑭᑎᐣ, ᒥᓇ ᑭ ᑭ ᐅᑎᑌᐣ ᒥᑐᓂ ᐁ ᑲᑕᐋᐧᓯᓯᔭᐣ; ᑭᑐᑐᓯᒪᐠ ᑭ ᑭᓯᓂᑖᐃᐧᑭᐊᐧᐠ, ᒥᓇ ᑭᐢᑕᑲᔭ ᑭ ᑭᓈᐧᐊᐧ; ᒫᑲ ᑭ ᑭ ᒧᓭᐢᑲᑖᐣ ᒥᓇ ᑭ ᑭ ᒧᓭᓯᐣ. 8ᐃᐢᐱ ᒫᑲ ᐁᑯᑕ ᒥᓇ ᐁ ᐱᒧᐦᑌᔮᐣ ᐁ ᐋᐧᐸᒥᑖᐣ, ᐳᑎ, ᑯᑎᐦᑌᐣ ᑭᑕ ᓵᑭᐦᐃᑲᐃᐧᔭᐣ; ᐁᑯᓯ ᓂ ᑭ ᑕᓭᐧᑭᓀᐣ ᓂᐢᑯᑖᑲᐩ ᐁ ᐊᑲᐧᓇᐅᑖᐣ ᒥᓇ ᓂ ᑭ ᐋᑯᐦᐁᐣ ᑭ ᒧᓭᐢᑲᑌᐃᐧᐣ; ᐁᐦᐁ, ᑭ ᑭ ᑭᐦᒋᐃᑎᑎᐣ, ᒥᓇ ᑭ ᑭ ᑭᐢᑭᒥᑎᐣ, ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ, ᑭ ᑭ ᐊᔮᐃᐧᑎᐣ ᒫᑲ. 9ᐁᑲᐧ ᑭ ᑭ ᑭᓯᐯᑭᓂᑎᐣ ᓂᐱ ᐅᐦᒋ; ᐁᐦᐁ ᒥᑐᓂ ᓂ ᑭ ᑭᒋᐢᑖᐸᐊᐧᑖᐣ ᑭ ᒥᐦᑯ, ᒥᓇ ᑭ ᑭ ᑐᒥᓂᑎᐣ ᐱᒥ ᐅᐦᒋ. 10ᑭ ᑭ ᐳᐢᑕᓵᑲᐦᐃᑎᐣ ᒥᓇ ᐁ ᒪᓯᓂᐢᑕᐃᑳᑌᐠ, ᐁᑯᓯ ᑭ ᑭ ᐳᐢᑕᐢᑭᓯᓇᐃᑎᐣ ᐋᐦᑭᑯᔮᐣ, ᒥᓇ ᑭ ᑭ ᐸᑲᐧᑌᐦᐅᑎᐣ ᐁ ᒥᔮᐧᓯᐠ ᐋᐧᐱᐢᑫᑭᐣ, ᒥᓇ ᓯᓂᐹᐣ ᑭ ᑭ ᐳᐢᑕᓵᑲᐦᐃᑎᐣ. 11ᐊᐧᐁᐧᓯᐅᓇ ᒥᓇ ᑭ ᑭ ᐅᐦᒋ ᐊᐧᐁᐧᓯᐃᑎᐣ, ᒥᐢᐱᑐᓈᐱᐢᑲᐧ ᓂ ᑭ ᐊᐢᑖᐣ ᑭᒋᐦᒋᕽ, ᒥᓇ ᑖᐱᐢᑳᑲᓀᔮᐱ ᑭᑲᐧᔮᕽ. 12ᒥᓇ ᓂ ᑭ ᐊᐢᑖᐣ ᓱᓂᔮᐋᐧᐱᐢᐠ ᑭᐢᑲᑎᑯᕽ, ᒥᓇ ᑖᐱᑌᐱᓱᓇᐠ ᑭᑕᐊᐧᑳᕽ, ᒥᓇ ᐁ ᑲᑕᐊᐧᓯᓯᐠ ᐅᑭᒫᐢᑫᐧᐊᐧᐢᑐᑎᐣ ᑭᐢᑎᑳᐧᓂᕽ. 13ᐁᑯᓯ ᑳ ᑭ ᐃᓯ ᐊᐧᐁᐧᓯᐅᐋᐧᑫᔭᐣ ᐅᓵᐃᐧᓱᓂᔮᐤ ᒥᓇ ᐋᐧᐱᐢᑭᓱᓂᔮᐤ; ᐁᑯᓯ ᑭ ᑭᑭᐢᑳᒋᑲᓇ ᐁ ᒥᔮᐧᓯᐠ ᐋᐧᐱᐢᑫᑭᐣ, ᒥᓇ ᓯᓂᐹᐣ, ᒥᓇ ᒪᓯᓂᑳᐧᓱᐃᐧᐣ; ᑭ ᑭ ᒧᐋᐧᐤ ᐁ ᒥᔪᓯᐟ ᐸᐦᑫᐧᓯᑲᐣ, ᒥᓇ ᐋᒧᓯᓯᐹᐢᑲᐧᐟ, ᒥᓇ ᐱᒥ; ᐁᑯᓯ ᒥᐢᑕᐦᐃ ᑭ ᑭ ᑲᑕᐊᐧᓯᓯᐣ ᒥᓇ ᑭ ᑭ ᐊᑎ ᐅᑎᑌᐣ ᑭᐦᒋ ᐅᑭᒫᐢᑫᐧᐃᐧᐃᐧᐣ. 14ᑭ ᐋᑐᑖᑲᐧᐣ ᒫᑲ ᓇᓈᑐᑯᐢᑳᓀᓯᓈᕽ ᑭ ᑲᑕᐊᐧᓯᓯᐃᐧᐣ; ᒋᑫᒫ ᒥᑐᓂ ᑭ ᑭᓯᒪᑲᐣ, ᓂ ᑭᐦᒋ ᐅᑭᒫᐃᐧᐃᐧᐣ ᐅᐦᒋ ᑳ ᑭ ᒥᔨᑖᐣ, ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ.

15ᒫᑲ ᑭ ᑭ ᒪᒥᓯᑐᑌᐣ ᑭ ᑲᑕᐊᐧᓯᓯᐃᐧᐣ, ᒥᓇ ᑭ ᑭ ᓄᒋᐦᑖᐣ ᐱᓯᑳᐧᑎᓯᐃᐧᐣ ᑭᐟ ᐋᒋᒥᑯᐃᐧᐣ ᐅᐦᒋ, ᒥᓇ ᑭ ᑭ ᑲᐧᔭᑯᓇᒪᐋᐧᐤ ᑭ ᐱᓯᑳᐧᑎᓯᐃᐧᓇ ᑲᐦᑭᔭᐤ ᐊᐃᐧᔭᐠ ᑳ ᐱᒧᐦᑌᐟ; ᐃᐧᔭ ᑭ ᐊᔮᐤ. 16ᑭ ᑭ ᐅᑎᓀᐣ ᒫᑲ ᐊᓂᐦᐃ ᑭ ᑭᑭᐢᑳᒋᑲᓇ, ᐁᑯᓯ ᑭ ᑭ ᐅᓯᐦᑕᒫᓱᐣ ᐃᐢᐹᔭᓇᐧ ᐁ ᐊᐧᐁᐧᓯᒋᑳᑌᑭ ᓇᓈᑐᕽ ᑳ ᐃᑕᓯᓈᐢᑌᐠ, ᐁᑯᑕ ᒫᑲ ᐱᓯᑳᐧᑎᓯᐃᐧᐣ ᑭ ᑭ ᓄᒋᐦᑖᐣ; ᓇᒪᐃᐧᔭ ᐁᑯᓯ ᑭᑕ ᑭ ᐃᐦᑭᕽ ᒥᓇ ᓇᒪᐃᐧᔭ ᐁᑯᓯ ᑭᑕ ᐃᐦᑭᐣ. 17ᑭ ᑭ ᐅᑎᓀᐣ ᒥᓇ ᑳ ᒥᔮᐧᓯᑭ ᑭ ᐊᐧᐁᐧᓯᐅᓈᐱᐢᑲᐧ ᓄᓵᐃᐧᓱᓂᔮᒼ ᒥᓇ ᓂ ᐋᐧᐱᐢᑭᓱᓂᔮᒼ, ᑳ ᑭ ᒥᔨᑖᐣ, ᐁᑯᓯ ᑭ ᑭ ᐅᓯᐦᑕᒫᓱᐣ ᐊᔨᓯᔨᓂᐃᐧ ᓇᐢᐱᓯᒋᑲᓇ, ᐁᐊᐧᑯᓇ ᒫᑲ ᐅᐦᒋ ᑭ ᑭ ᐊᑐᐢᑳᑌᐣ ᐱᓯᑳᐧᑎᓯᐃᐧᐣ; 18ᑭ ᑭ ᐅᑎᓀᐣ ᒫᑲ ᑳ ᒪᓯᓂᑳᑌᑭ ᑭ ᑭᑭᐢᑳᒋᑲᓇ ᒥᓇ ᑭ ᑭ ᐊᑲᐧᓇᐋᐧᐊᐧᐠ, ᐁᑯᓯ ᓂ ᐱᒥᒼ ᒥᓇ ᓂ ᐃᐧᑭᒫᓯᑲᐣ ᑭ ᑭ ᐅᑎᐢᑲᐊᐧᐢᑐᐋᐧᐊᐧᐠ. 19ᓂ ᐸᐦᑫᐧᓯᑲᐣ ᒥᓇ ᑳ ᑭ ᒥᔨᑖᐣ, ᐁ ᒥᔪᓯᐟ ᐸᐦᑫᐧᓯᑲᐣ ᒥᓇ ᐱᒥ, ᒥᓇ ᐋᒧᓯᓯᐹᐢᑲᐧᐟ, ᑳ ᑭ ᐅᐦᒋ ᐊᓴᒥᑖᐣ, ᑭ ᑭ ᐅᔭᐢᑐᐋᐧᐊᐧᐠ ᑭᑕ ᒪᓂ ᐃᐧᑭᒫᐦᑕᑭᐠ, ᐁᑯᓯ ᐅᒪ ᑳ ᐃᐢᐸᔨᐠ, ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ. 20ᐁᑲᐧ ᒥᓇ ᑭ ᑭ ᐅᑎᓈᐊᐧᐠ ᑭᑯᓯᓴᐠ ᒥᓇ ᑭᑖᓂᓴᐠ, ᑳ ᑭ ᓂᐦᑖᐃᐧᑭᑕᒪᐃᐧᔭᐣ, ᐁᐊᐧᑯᓂ ᐅᐦᐃ ᑳ ᑭ ᐸᑭᑎᓇᒪᐊᐧᒋᐠ ᑭᑕ ᓂᓯᐊᐧᓈᒋᐃᐦᒋᐠ. ᑭ ᐊᐱᐢᑌᔨᑖᑲᐧᓇᐧ ᒋ ᑭ ᐱᓯᑳᐧᑎᓯᐃᐧᓇ, 21ᑳ ᑭ ᓂᐸᐊᒋᐠ ᓂᐟ ᐊᐋᐧᓯᒥᓴᐠ, ᒥᓇ ᑳ ᑭ ᐸᑭᑎᓇᒋᐠ, ᐁ ᓴᐳᑕᐃᒪᐟ ᐃᐢᑯᑌᕽ? 22ᐁᑯᓯ ᑲᐦᑭᔭᐤ ᑳ ᓭᓭᐢᑫᔨᑖᑲᐧᐦᑭ ᑭᐟ ᐃᓯᐦᒋᑫᐃᐧᓇ ᒥᓇ ᑭ ᐱᓯᑳᐧᑎᓯᐃᐧᓂᕽ ᓇᒪᐋᐧᐨ ᑭ ᑭᐢᑭᓱᐸᔨᐣ ᒣᑳᐧᐨ ᑳ ᐅᐢᑳᑎᓯᔭᐣ, ᐃᐢᐱ ᑳ ᒧᓭᐢᑲᑌᔭᐣ ᒥᓇ ᑳ ᒧᓭᓯᔭᐣ, ᒥᓇ ᑳ ᑭ ᑭᑯᐦᑫᐧᓯᓂᔭᐣ.

23ᐁᑯᓯ ᐊᐧᔪᑎᒋᐸᔨᐤ ᑲᐦᑭᔭᐤ ᐅᒪ ᑳ ᑭ ᐃᓯ ᒪᒑᔨᐃᐧᔭᐣ, (ᐦᐊᐩ, ᒥᐢᑕᐦᐃ ᐊᓂ ᑭ ᑲ ᑯᑕᑭᑖᐣ! ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ,) 24ᑭ ᑭ ᐅᓯᐦᑕᒫᓱᐣ ᐁ ᐸᔭᑌᓈᑲᐧᕽ ᐃᐦᑖᐃᐧᐣ, ᒥᓇ ᑭ ᑭ ᐅᓯᐦᑕᒫᓱᐣ ᐁ ᐃᐢᐹᐠ ᐃᐦᑖᐃᐧᐣ ᑕᐦᑐ ᐱᒧᐦᑌᐢᑲᓈᕽ. 25ᑭ ᑭ ᐅᓯᐦᑕᒫᓱᐣ ᑳ ᐃᐢᐹᐠ ᑭᐟ ᐃᐦᑖᐃᐧᐣ ᑕᐦᑐ ᐁ ᑭᓯᐸᒧᐠ ᒣᐢᑲᓇᐤ, ᐁᑯᓯ ᑭ ᑲᑕᐊᐧᓯᓯᐃᐧᐣ ᑭ ᑭ ᓭᓭᐢᑫᔨᑖᑯᑖᐣ, ᒥᓇ ᑭ ᑭ ᐅᑎᓇᐤ ᑲᐦᑭᔭᐤ ᐊᐃᐧᔭᐠ ᐁᑯᑕ ᑳ ᐱᒧᐦᑌᐟ, ᒥᓇ ᑭ ᑭ ᒥᐦᒉᑐᑖᐣ ᑭ ᐱᓯᑳᐧᑎᓯᐃᐧᓇ. 26ᑭ ᑭ ᐃᐧᒋᐱᓯᑳᐧᑎᓯᒫᐊᐧᐠ ᒥᓇ ᐃᒋᑊᐟ ᐊᔨᓯᔨᓂᐊᐧᐠ, ᑭᓯᐋᐧᐠ ᑳ ᐃᐧᑕᐱᒥᐢᑭᐠ, ᑳ ᒫᒪᑫᐁᐧᒋᐠ; ᐁᑯᓯ ᑭ ᑭ ᒥᒉᑐᑖᐣ ᑭ ᐱᓯᑳᐧᑎᓯᐃᐧᓇ, ᑭᑕ ᑲᑫᐧ ᑭᓯᐋᐧᐃᔭᐣ. 27ᐁᑯᓯ ᒫᑎᑲ, ᑭ ᑭ ᓱᐃᐧᓂᐢᑫᑐᑖᑎᐣ, ᒥᓇ ᓂ ᑭ ᐊᒋᐃᐧᓀᐣ ᑭᐟ ᐊᓴᒥᑯᐃᐧᐣ, ᒥᓇ ᑭ ᑭ ᐸᑭᑎᓂᑎᐣ ᐁ ᐃᑌᔨᑕᐦᑭᐠ ᑭᑕ ᐃᑐᑖᐢᑭᐠ ᐊᓂᑭ ᑳ ᐸᑳᐧᑎᐢᑭᐠ, ᐅᑖᓂᓯᐋᐧᐊᐧ ᐱᓬᐃᐢᑎᓇᐠ, ᑳ ᓇᓀᐯᐃᐧᐃᑯᒋᐠ ᑭ ᑭᐢᑫᐧᔮᑎᓯᐃᐧᐣ. 28ᑭ ᑭ ᐃᐧᒋᐱᓯᑳᐧᑎᓯᒫᐊᐧᐠ ᒥᓇ ᐊᓯᕒᐃᔭᓇᐠ, ᐊᔨᐢ ᓇᒪᐃᐧᔭ ᐊᐃᐧᔭᐠ ᑭ ᐯᔭᑯᐋᐤ; ᐁᐦᐁ, ᑭ ᑭ ᐃᐧᒋᐱᓯᑳᐧᑎᓯᒫᐊᐧᐠ, ᑫᔮᐱᐨ ᒫᑲ ᓇᒪᐃᐧᔭ ᑭ ᑭ ᑌᐯᔨᑌᐣ. 29ᑭ ᑭ ᒥᒉᑐᑖᐣ ᒥᓇ ᑭ ᐱᓯᑳᐧᑎᓯᐃᐧᓇ ᑫᓇᐣ ᐊᐢᑭᕽ, ᐱᔨᐢ ᑳᓬᑎᔭ ᐃᐢᑯ; ᐁᑯᓯ ᑫᔮᐱᐨ ᓇᒪᐃᐧᔭ ᑭ ᑌᐯᔨᑌᐣ ᐁᐊᐧᑯ.

30ᑖᐯᐧ ᓀᓱᐊᐧᐣ ᑭᑌᐦ, ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ, ᑲᐦᑭᔭᐤ ᐅᐦᐃ ᑳ ᐃᑐᑕᒪᐣ, ᐅᐟ ᐊᑐᐢᑫᐃᐧᐣ ᑳ ᐋᔨᒥᓯᐟ ᐁ ᐱᓯᑳᐧᑎᓯᐢᑭᐟ ᐃᐢᑫᐧᐤ; 31ᐁ ᐅᓯᐦᑖᔭᐣ ᑳ ᐸᔭᑌᓈᑲᐧᑭ ᑭᐟ ᐃᑖᐃᐧᓇ ᑕᐦᑐ ᒣᐢᑲᓇᐤ ᐁ ᑭᓯᐸᒧᐠ, ᒥᓇ ᑳ ᐅᓯᐦᑖᔭᐣ ᑳ ᐃᐢᐹᐠ ᑭᐟ ᐃᐦᑖᐃᐧᐣ ᐁ ᐃᑕᐦᑎᕽ ᐱᒧᐦᑌᐢᑲᓇᐤ; ᐁᑯᓯ ᓇᒪᐃᐧᔭ ᑭᐟ ᐃᐦᑐᑌᐣ ᑖᐱᐢᑰᐨ ᐱᓯᑳᐧᑎᐢᑫᐧᐤ, ᐁ ᐋᑕᐁᐧᔨᑕᒪᐣ ᑎᐸᐦᐊᒫᑯᐃᐧᐣ. 32ᑳ ᐃᐧᑭᑐᐟ ᐃᐢᑫᐧᐤ ᑳ ᐃᑐᑕᕽ ᐱᓯᑳᐧᑎᓯᐃᐧᐣ! ᑳ ᐅᑎᓈᐟ ᐱᑐᐢ ᓈᐯᐊᐧ ᐃᔨᑯᕽ ᐃᐧᔭ ᐅ ᓈᐯᒪ! ᐁᑯᑐᐊᐧ ᑭᔭ. 33ᒥᔦᐊᐧᐠ ᒣᑭᐃᐧᓇ ᑲᐦᑭᔭᐤ ᐱᓯᑳᐧᑎᐢᑫᐧᐊᐧ; ᒫᑲ ᑭᔭ ᑭ ᒥᔮᐊᐧᐠ ᒣᑭᐃᐧᓇ ᑲᐦᑭᔭᐤ ᑳ ᓵᑭᐦᐊᒋᐠ, ᐁᑯᓯ ᑭ ᑎᐸᐦᐊᒪᐋᐧᐊᐧᐠ, ᑭᑕ ᐯ ᓇᑕᐋᐧᐸᒥᐢᑭᐠ ᒥᓯᐁᐧ ᐃᑕ ᐅᐦᒋ ᑭᑕ ᐱᓯᑳᐧᑎᓯᔭᐣ. 34ᐁᑯᓯ ᐱᑐᐢ ᑭᔭ ᑭᐟ ᐃᑐᑌᐣ ᐃᔨᑯᕽ ᑯᑕᑲᐠ ᐃᐢᑫᐧᐊᐧᐠ ᑭ ᐱᓯᑳᐧᑎᓯᐃᐧᓂᕽ ᐁᑳ ᐊᐃᐧᔭᐠ ᐁ ᐱᒥᑎᓴᐦᐅᐢᐠ ᑭᑕ ᐃᐦᑐᑕᕽ ᐱᓯᑳᐧᑎᓯᐃᐧᐣ; ᐁᑯᓯ ᒥᓇ ᐁ ᑎᐸᐦᐊᒫᑫᔭᐣ, ᐁᑳ ᒫᑲ ᑭᔭ ᐁ ᑎᐸᐦᐊᒫᑲᐃᐧᔭᐣ, ᐁᐊᐧᑯ ᑳ ᐃᓯ ᐱᑐᐢ ᐃᓯᐦᒋᑫᔭᐣ.

35ᐁᐊᐧᑯ ᐅᐦᒋ ᑭᔭ ᐱᓯᑳᐧᑎᐢᑫᐧᐤ, ᓇᑐᐦᑕ ᐅᐟ ᐃᑌᐧᐃᐧᐣ ᑳ ᑎᐯᔨᐦᒋᑫᐟ; 36ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ, ᐃᐧᔭ ᑭ ᐃᐧᓀᔨᑖᑯᓯᐃᐧᐣ ᐁ ᑭ ᑲᐧᔭᑯᓂᑳᑌᐠ, ᒥᓇ ᑭ ᒧᓭᐢᑲᑌᐃᐧᐣ ᐁ ᑭ ᒧᓭᓂᑳᑌᐠ ᐁ ᐃᓯ ᐃᐧᒋᐱᓯᑳᐧᑎᓯᒪᒋᐠ ᑳ ᓵᑭᐦᐊᒋᐠ; ᒥᓇ ᑲᐦᑭᔭᐤ ᒪᓂᑐᑳᓇᐠ ᐅᐦᒋ ᑳ ᐃᓯ ᓭᓭᐢᑫᔨᑖᑲᐧᕽ ᐁ ᐃᓯ ᐊᑐᐢᑲᐊᐧᒋᐠ, ᒥᓇ ᐅ ᒥᐦᑯᐋᐧᐤ ᑭᐟ ᐊᐋᐧᓯᒥᓴᐠ ᐅᐦᒋ, ᑳ ᑭ ᒥᔭᒋᐠ; 37ᐁᐊᐧᑯ ᐅᐦᒋ, ᒫᑎᑲ, ᓂ ᑲ ᒫᐊᐧᒋᐦᐋᐊᐧᐠ ᑲᐦᑭᔭᐤ ᑭ ᓵᑭᐦᐋᑲᓇᐠ ᐊᓂᑭ ᑳ ᑭ ᒋᑫᔨᒪᒋᐠ, ᒥᓇ ᑲᐦᑭᔭᐤ ᐊᓂᑭ ᑳ ᑭ ᓵᑭᐦᐊᒋᐠ, ᑭᑭ ᑲᐦᑭᔭᐤ ᐊᓂᑭ ᑳ ᑭ ᐸᑳᐧᑕᒋᐠ; ᓂ ᑲ ᒫᒪᐃᐧ ᒫᐊᐧᒋᐋᐊᐧᐠ ᒥᓯᐁᐧ ᐋᐧᐢᑳ, ᑭᑕ ᒪᐃᐧᓀᐢᑳᐢᑭᐠ, ᒥᓇ ᓂ ᑲ ᒧᓭᓇᒪᐋᐧᐊᐧᐠ ᑭ ᒧᓭᐢᑲᑌᐃᐧᐣ, ᑭᑕ ᐋᐧᐸᐦᑕᐦᑭᐠ ᑲᐦᑭᔭᐤ ᑭ ᒧᓭᐢᑲᑌᐃᐧᐣ. 38ᐁᑯᓯ ᑭ ᑲ ᐅᔭᓱᐋᐧᑎᑎᐣ ᑳ ᐃᑕᓱᐋᐧᑎᒋᐠ ᐃᐢᑫᐧᐊᐧᐠ ᑳ ᐱᑯᓇᑭᐠ ᐃᐧᑭᑐᐃᐧᐣ ᒥᓇ ᑳ ᓯᑭᓇᑭᐠ ᒥᐦᑯ; ᒥᓇ ᑭ ᑲ ᐃᐢᐸᔨᑖᐧᑎᐣ ᐁ ᒥᐦᑯᐊᐧᕽ ᐋᐦᑯᔭᐁᐧᓯᐃᐧᐣ ᒥᓇ ᑳᑫᐧᔨᑕᒧᐃᐧᐣ. 39ᑭ ᑲ ᐸᑭᑎᓂᑎᐣ ᒫᑲ ᐅᒋᐦᒋᐋᐧᕽ, ᐁᑯᓯ ᑭᑕ ᓂᐦᒋᐁᐧᐱᓇᒪᐧᐠ ᑳ ᐸᔭᑌᓈᑲᐧᑭ ᑭᐟ ᐃᐦᑖᐃᐧᓇ, ᒥᓇ ᑭᑕ ᐱᑯᓇᒪᐧᐠ ᑳ ᐃᐢᐹᑭ ᑭᐟ ᐃᐦᑖᐃᐧᓇ; ᑭ ᑲ ᑫᑕᓵᑫᓂᑲᐧᐠ ᒫᑲ ᑭ ᑭᑭᐢᑳᒋᑲᓇ, ᒥᓇ ᑭᑕ ᐅᑎᓇᒪᐧᐠ ᑳ ᒥᔪᓈᑲᐧᑭ ᑭ ᐊᐧᐁᐧᓯᐅᓈᐱᐢᑲᐧ; ᐁᑯᓯ ᑭᑕ ᓇᑲᑎᐢᑭᐠ ᐁ ᒧᓭᐢᑲᑌᔭᐣ ᒥᓇ ᐁ ᒧᓭᓯᔭᐣ. 40ᑭᑕ ᐯᓯᐁᐧᐊᐧᐠ ᒥᓇ ᐁ ᒫᒪᐁᐧᔭᑎᔨᐟ ᑭᑕ ᒪᐃᐧᓀᐢᑳᐢᑭᐠ, ᐁᑯᓯ ᑭ ᑲ ᐱᒫᐧᐱᐢᑲᐅᑲᐧᐠ ᐊᓯᓂᔭ ᐅᐦᒋ, ᒥᓇ ᑭ ᑲ ᓵᐳ ᑕᐦᑲᒥᑲᐧᐠ ᐅ ᓯᒫᑲᓂᑯᒫᓂᐋᐧᐊᐧ ᐅᐦᒋ. 41ᑭᑕ ᓴᐢᑲᐦᐊᒪᐧᐠ ᒫᑲ ᑭ ᐋᐧᐢᑳᐦᐃᑲᓇ ᐃᐢᑯᑌᐤ ᐅᐦᒋ, ᒥᓇ ᑭ ᑲ ᐃᐦᑐᑖᑲᐧᐠ ᐅᔭᓱᐋᐧᓯᐁᐧᐃᐧᓇ ᐁ ᐋᐧᐸᒥᐢᑭᐠ ᒥᐦᒉᐟ ᐃᐢᑫᐧᐊᐧᐠ; ᓂ ᑲ ᑭᐱᐦᒋᑖᐣ ᒫᑲ ᑳ ᐃᓯᐦᒋᑫᔭᐣ ᐁ ᐱᓯᑳᐧᑎᐢᑫᐧᐃᐧᔭᐣ, ᐁᑯᓯ ᓇᒪᐃᐧᔭ ᒥᓇ ᑭ ᑲ ᒣᑭᐣ ᑎᐸᐦᐊᒫᑫᐃᐧᐣ. 42ᐁᑯᓯ ᑫ ᐃᓯ ᓇᐃᐃᐧᓯᔮᐣ ᑳ ᐋᐦᑯᔭᐁᐧᓯᐢᑖᑖᐣ, ᒥᓇ ᑭ ᑲ ᐳᓂ ᑳᑫᐧᔨᒥᑎᐣ, ᐁᑯᓯ ᓂ ᑲ ᑭᔮᒪᐱᐣ, ᒥᓇ ᓇᒪᐃᐧᔭ ᐊᐊᐧᓯᒣ ᓂ ᑲ ᑭᓯᐋᐧᓯᐣ. 43ᒋᑫᒫ ᐁᑳ ᐁ ᑭ ᑭᐢᑭᓯᑐᑕᒪᐣ ᐃᐢᐱ ᑳ ᑭ ᐅᐢᑳᑎᓯᔭᐣ, ᒫᑲ ᐁ ᑭ ᒥᑯᐢᑳᑌᔨᑕᒥᐦᐃᔭᐣ ᑲᐦᑭᔭᐤ ᐅᐦᐃ; ᐁᐊᐧᑯ ᐅᐦᒋ ᒫᑎᑲ, ᓂᔭ ᒥᓇ ᑭ ᑲ ᐸᑲᒥᑖᐧᑎᐣ ᑭᐟ ᐃᑖᑎᓯᐃᐧᐣ ᑭᐢᑎᑳᐧᓂᕽ, ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ; ᐁᑯᓯ ᓇᒪᐃᐧᔭ ᑭ ᑲ ᐃᐦᑐᑌᐣ ᑲᐦᑭᔭᐤ ᐅᒪ ᑭᐢᑫᐧᐃᐧᐣ ᑕᐦᑯᐨ ᑲᐦᑭᔭᐤ ᑳ ᓭᓭᐢᑫᔨᑖᑲᐧᐦᑭ ᑭᐟ ᐃᓯᐦᒋᑫᐃᐧᓇ.

44ᒫᑎᑲ, ᑲᐦᑭᔭᐤ ᐊᐃᐧᔭᐠ ᑳ ᐋᐸᒋᐦᑖᐟ ᓀᑳᒣᐧᐃᐧᓇ ᑭᑕ ᐋᐸᒋᐦᑖᐤ ᐅᒪ ᓀᑳᒣᐧᐃᐧᐣ ᑭᔭ ᐁ ᐃᑎᐢᐠ, ᐁ ᐃᑌᐧᐟ, ᑳ ᐃᐦᑎᔨᐟ ᐅᑳᐃᐧᔭ, ᐁᑯᓯ ᐁᐦᑎᐟ ᐅᑖᓂᓯᒫᐤ. 45ᑭᔭ ᒫᑲ ᑭᑳᐃᐧ ᐅᑖᓂᓴ, ᑳ ᐸᑳᐧᑖᐟ ᐅ ᓈᐯᒪ ᒥᓇ ᐅᐟ ᐊᐋᐧᓯᒥᓴ; ᒥᓇ ᑭᔭ ᐅᒋᐋᐧᒥᐢᑫᐧᒥᐋᐧᐊᐧ ᑭᒋᐋᒥᐢᑫᐧᒪᐠ, ᑳ ᑭ ᐸᑳᐧᑖᒋᐠ ᐅ ᓈᐯᒥᐋᐧᐊᐧ ᒥᓇ ᐅᐟ ᐊᐋᐧᓯᒥᓯᐋᐧᐊᐧ; ᑭᑳᐃᐧ ᐁᐊᐧᑳᐧᓇ ᐦᐃᑕᐃᐟ ᐁᑯᓯ ᑯᑖᐃᐧ ᐁᐊᐧᑳᐧᓇ ᐋᒪᕒᐊᐃᐟ. 46ᑭᒥᐢ ᒫᑲ ᐁᐊᐧᑯ ᓴᒣᕒᐃᔭ, ᑭ ᓇᒪᑎᓂᕽ ᐃᑌᐦᑫ ᑳ ᐊᔮᐟ, ᐃᐧᔭ ᒥᓇ ᐅᑖᓂᓴ; ᐁᑯᓯ ᑭᓯᒼ ᑭ ᑭᐦᒋᓂᐢᑭᕽ ᐃᑌᐦᑫ ᑳ ᐊᔮᐟ, ᐁᐊᐧᑯ ᓵᑕᒼ ᒥᓇ ᐅᑖᓂᓴ. 47ᐁᔨᐁᐧᕽ ᒫᑲ ᓇᒪᐃᐧᔭ ᑯᐦ ᒥᑎᒣᐋᐧᐣ ᐅ ᒣᐢᑲᓈᐋᐧᐊᐧ, ᒥᓇ ᓇᒪᐃᐧᔭ ᑯᐦ ᑭᐢᑭᓇᐋᐧᐸᐦᑕᒫᐧᐣ ᑳ ᓭᓭᐢᑫᔨᑖᑲᐧᓂᔨᑭ ᑳ ᑐᑕᐦᑭᐠ; ᒫᑲ ᑖᐱᐢᑯᐨ ᐁᐊᐧᑯ ᒥᑐᓂ ᐁ ᐊᐱᐢᑌᔨᑖᑲᐧᕽ, ᐊᔨᐋᐧᐠ ᑭ ᑭ ᓂᓯᐊᐧᓈᑕᑲᒥᑭᓯᐣ ᐃᔨᑯᕽ ᐃᐧᔭᐋᐧᐤ ᑲᐦᑭᔭᐤ ᑭᐟ ᐃᓯᐦᒋᑫᐃᐧᓂᕽ. 48ᐁ ᐃᓯ ᐱᒫᑎᓯᔮᐣ ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ, ᓵᑕᒼ ᑭᒋᐋᐧᒥᐢᑫᐧᒼ ᓇᒪᐃᐧᔭ ᐅᐦᒋ ᐃᐦᑐᑕᒼ ᐃᐧᔭ ᒥᓇ ᐅᑖᓂᓴ, ᑖᐱᐢᑯᐨ ᑭᔭ ᑳ ᑭ ᑐᑕᒪᐣ, ᑭᔭ ᒥᓇ ᑭᑖᓂᓴᐠ. 49ᒫᑎᑲ, ᐁᐊᐧᑫᐧᔨᐤ ᐅᒪ ᐅ ᒪᒋᐃᑎᐃᐧᐣ ᑭᒋᐋᐧᒥᐢᑫᐧᒼ ᓵᑕᒼ; ᑭᐢᑌᔨᒥᓱᐃᐧᐣ, ᐁ ᑭᐢᐳᐟ ᐸᐦᑫᐧᓯᑲᓇ, ᒥᓇ ᐁ ᒪᒥᔦᐧᐃᐧᐅᐟ ᐁᑳ ᐁ ᐊᑐᐢᑫᐟ ᐃᐧᔭ ᒥᓇ ᐅᑖᓂᓴ; ᓇᒪᐃᐧᔭ ᒥᓇ ᑭ ᐃᐧᒋᐁᐤ ᑳ ᑭᑎᒫᑭᓯᔨᐟ ᒥᓇ ᑳ ᑭᐧᑕᒫᔨᐟ. 50ᒥᐢᑕᐦᐃ ᒫᑲ ᑭ ᐊᔨᐋᐧᑫᔨᒥᓱᐊᐧᐠ, ᐁᑯᓯ ᑭ ᑐᑕᒪᐧᐠ ᑳ ᓭᓭᐢᑫᔨᑖᑲᐧᐦᑭ ᓂᔭ ᐁ ᐃᓯ ᐋᐧᐸᐦᑕᒫᐣ; ᐁᐊᐧᑯ ᐅᐦᒋ ᓂ ᑭ ᐃᑲᑌᓈᐊᐧᐠ ᐁ ᐃᓯ ᒥᔮᐧᐱᓯᒥᑯᔮᐣ. 51ᐁᑯᓯ ᒥᓇ ᓴᒣᕒᐃᔭ ᓇᒪᐋᐧᐨ ᐋᐱᑕᐤ ᑭ ᑐᑕᒼ ᑭ ᒪᒋᐃᑎᐃᐧᓇ; ᒫᑲ ᑭᔭ ᑭ ᑭ ᐅᓵᒣᔭᑎᑖᐣ ᑳ ᓭᓭᐢᑫᔨᑖᑲᐧᐦᑭ ᑭᐟ ᐃᓯᐦᒋᑫᐃᐧᓇ ᐃᔨᑯᕽ ᐃᐧᔭᐋᐧᐤ, ᒥᓇ ᑭ ᑭ ᑲᐧᔭᐢᑳᐧᑎᓯᐊᐧᑫᔨᑖᑯᐋᐊᐧᐠ ᑭᒋᐋᐧᒥᐢᑫᐧᒪᐠ ᑲᐦᑭᔭᐤ ᑳ ᓭᓭᐢᑫᔨᑖᑲᐧᐦᑭ ᑭᐟ ᐃᓯᐦᒋᑫᐃᐧᓇ ᐅᐦᒋ ᑳ ᑭ ᑐᑕᒪᐣ. 52ᑭᔭ ᒥᓇ, ᓇᔭᑕ ᑎᐱᔭᐤ ᑭ ᓇᓀᐯᐃᐧᓯᐃᐧᐣ, ᐃᐧᔭ ᐁ ᑭ ᐅᔭᓱᐋᐧᑕᒋᐠ ᑭᒋᐋᐧᒥᐢᑫᐧᒪᐠ; ᑭ ᒪᒋᐃᑎᐃᐧᓇ ᐅᐦᒋ ᑳ ᑭ ᑐᑕᒪᐣ ᐊᐊᐧᓯᒣ ᐁ ᓭᓭᐢᑫᔨᑖᑲᐧᐦᑭ ᐃᔨᑯᕽ ᐃᐧᔭᐋᐧᐤ, ᐊᐊᐧᓯᒣ ᑲᐧᔭᐢᑭᑖᑎᓯᐊᐧᐠ ᐃᔨᑯᕽ ᑭᔭ; ᐁᐦᐁ ᑭᔭ ᒥᓇ ᐊᐧᐋᐧᓀᔨᑕ ᒥᓇ ᓇᓀᐯᐃᐧᓯ, ᐊᓂᒪ ᐅᐦᒋ ᐁ ᑭ ᑲᐧᔭᐢᑭᑖᑎᓯᐊᐧᑫᔨᑖᑯᐊᒋᐠ ᑭᒋᐋᐧᒥᐢᑫᐧᒪᐠ.

53ᐁᑯᓯ ᓂ ᑲ ᑫᐧᐢᑭᓇᒫᐧᐣ ᐅᐟ ᐊᐋᐧᑳᑎᑯᐃᐧᓂᐋᐧᐤ, ᐅᐟ ᐊᐊᐧᑳᑎᑯᐃᐧᓂᐋᐧᐤ ᓵᑕᒼ ᒥᓇ ᐅᑖᓂᓴ, ᒥᓇ ᐅᐟ ᐊᐊᐧᑳᑎᑯᐃᐧᐣ ᓴᒣᕒᐃᔭ ᒥᓇ ᐅᑖᓂᓴ, ᒥᓇ ᐅᐟ ᐊᐋᐧᑳᑎᑯᐃᐧᓂᐋᐧᐤ ᑭᔭ ᐅᐦᒋ ᒪᓇᐊᐧᑳᑖᑲᓇᐠ ᐁᑯᑕ ᒣᑳᐧᐨ ᑳ ᐊᔮᒋᐠ. 54ᑭᑕ ᓇᔭᑕᒪᐣ ᑭᔭ ᑭ ᓇᓀᐯᐃᐧᓯᐃᐧᐣ, ᒥᓇ ᑭᑕ ᓇᓀᐯᐃᐧᐃᑯᔭᐣ ᑲᐦᑭᔭᐤ ᑳ ᑭ ᐃᐦᑐᑕᒪᐣ, ᑭᔭ ᐅᐦᒋ ᐁ ᒥᔪᑌᐦᐁᒋᐠ. 55ᐁᑯᓯ ᑭᒋᐋᐧᒥᐢᑫᐧᒪᐠ, ᓵᑕᒼ ᒥᓇ ᐅᑖᓂᓴ, ᑳᐃᐧ ᑭᑕ ᓈᑕᒪᐧᐠ ᑲᔭᐦᑌ ᑳ ᑭ ᐃᓯ ᐊᔮᒋᐠ, ᐁᑯᓯ ᓴᒣᕒᐃᔭ ᒥᓇ ᐅᑖᓂᓴ ᑭᑕ ᑭᐁᐧᑐᑕᒪᐧᐠ ᑲᔭᐦᑌ ᑳ ᑭ ᐃᓯ ᐊᔮᒋᐠ, ᐁᑯᓯ ᑭᔭ ᒥᓇ ᑭᑖᓂᓴᐠ ᑭ ᑲ ᑭᐁᐧᑐᑌᓈᐋᐧᐤ ᑲᔭᐦᑌ ᑳ ᑭ ᐃᓯ ᐊᔮᔦᐠ. 56ᒋᑫᒫ ᑭᓯᒼ ᓵᑕᒼ ᓇᒪᐃᐧᔭ ᑭ ᑭ ᒫᒥᐢᑯᒫᐤ ᑭᑐᓂᕽ ᒣᑳᐧᐨ ᑳ ᑭᐢᑌᔨᒧᔭᐣ; 57ᒪᐧᔦᐢ ᑭ ᒪᒑᔨᐃᐧᐃᐧᐣ ᑭᐢᑫᔨᐦᒋᑳᑌᐠ, ᑖᐱᐢᑯᐨ ᐃᑕ ᑳ ᑭ ᒪᒋᐃᑎᐢᑭᐠ ᓯᕒᐃᔭ ᐅᑖᓂᓴ ᒥᓇ ᑲᐦᑭᔭᐤ ᑳ ᐋᐧᐢᑳᐢᑳᑯᐟ, ᐱᓬᐃᐢᑎᓇᐠ ᐅᑖᓂᓯᐋᐧᐊᐧ, ᑳ ᒪᒉᔨᒥᐢᑭᐠ ᒥᓯᐁᐧ ᐋᐧᐢᑳ. 58ᑭ ᑭ ᓇᔭᑌᐣ ᑭ ᑭᐢᑫᐧᔮᑎᓯᐃᐧᐣ ᒥᓇ ᑳ ᓭᓭᐢᑫᔨᑖᑲᐧᐦᑭ ᑭᐟ ᐃᓯᐦᒋᑫᐃᐧᓇ, ᐃᑌᐧᐤ ᑳ ᑎᐯᔨᐦᒋᑫᐟ. 59ᒋᑫᒫ ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ; ᑭ ᑲ ᐃᐦᑐᑖᑎᐣ ᑖᐱᐢᑯᐨ ᑲ ᑭ ᐃᑐᑕᒪᐣ, ᑳ ᑭ ᐊᑎ ᐱᐁᐧᔨᑕᒪᐣ ᑭᐦᒋᐃᑌᐧᐃᐧᐣ ᐁ ᐱᑯᓇᒪᐣ ᐊᓱᑕᒫᑫᐃᐧᐣ.

60ᐁᔨᐁᐧᕽ ᒫᑲ ᓂ ᑲ ᑭᐢᑭᓯᑐᑌᐣ ᑳ ᑭ ᐃᓯ ᐊᓱᑕᒫᑖᐣ ᒣᑳᐧᐨ ᐁ ᐅᐢᑳᑎᓯᔭᐣ, ᐁᑯᓯ ᑭ ᑲ ᐋᔮᑕᐢᑕᒫᑎᐣ ᑳᑭᑫ ᐊᓱᑕᒫᑫᐃᐧᐣ. 61ᐁᑲᐧ ᑭ ᑲ ᑭᐢᑭᓯᑐᑌᐣ ᑭᐟ ᐃᑖᑎᓯᐃᐧᓇ, ᒥᓇ ᑭ ᑲ ᓇᓀᐯᐃᐧᓯᐣ, ᐃᐢᐱ ᐅᑎᓇᑖᐧᐃᐧ ᑭᒋᐋᐧᒥᐢᑫᐧᒪᐠ, ᑭᒥᓴᐠ ᒥᓇ ᑭᓯᒪᐠ; ᐁᑯᓯ ᑭ ᑲ ᒥᔨᑎᐣ ᑭᑕ ᐅᑖᓂᓯᔭᐣ, ᓇᒪᐃᐧᔭ ᒫᑲ ᑭᔭ ᑭᐟ ᐊᓱᑕᒫᑫᐃᐧᐣ ᐅᐦᒋ. 62ᑭ ᑲ ᐋᔮᑕᐢᑕᒫᑎᐣ ᒫᑲ ᓂᐟ ᐊᓱᑕᒫᑫᐃᐧᐣ; ᐁᑯᓯ ᑭ ᑲ ᑭᐢᑫᔨᑌᐣ ᓂᔭ ᐁᐊᐧᑯ ᑳ ᑎᐯᔨᐦᒋᑫᐟ; 63ᑭᑕ ᑲᓄᑭᐢᑭᓯᔭᐣ, ᒥᓇ ᑭᑕ ᐊᐧᐋᐧᓀᔨᑕᒪᐣ, ᐁᑯᓯ ᐁᑳ ᐃᐧᑳᐨ ᒥᓇ ᑭᑕ ᐹᐢᑭᑌᓇᒪᐣ ᑭᑐᐣ, ᑭ ᓇᓀᐯᐃᐧᓯᐃᐧᐣ ᐅᐦᒋ; ᐃᐢᐱ ᑭ ᐳᓀᔨᑕᒫᑖᓂ ᑲᐦᑭᔭᐤ ᑳ ᑭ ᐃᑐᑕᒪᐣ, ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ.

Currently Selected:

ᐃᓯᑭᐁᓬ 16: KKMs

Highlight

Copy