ᐃᓯᐦᒋᑫᐃᐧᓂᐋᐧᐊᐧ 12

1ᓈᐣᑕᐤ ᒫᑲ ᐁᑯᐢᐱ ᐁᕒᐊᐟ ᑭᐦᒋ ᐅᑭᒫᐤ ᑭ ᓱᐃᐧᓂᐢᑫᔨᐤ ᑭᑕ ᑯᑕᑭᐋᐟ ᐋᑎᐦᐟ ᐅᑕᔭᒥᐦᐋᐊᐧ. 2ᐁᑯᓯ ᑭ ᓂᐸᐁᐤ ᒉᒥᓴ ᐅᒋᐋᐧᒥᔨᐊᐧ ᒑᐣ ᐃᓴᐁᐧᐢᐠ ᐅᐦᒋ. 3ᐃᐢᐱ ᒫᑲ ᐃᐧᔮᐸᐦᑕᕽ ᐁ ᒥᔦᐧᔨᑕᒥᔨᐟ ᒍᐊᐧ, ᑭ ᐊᑎ ᐅᑎᐦᑎᓀᐤ ᐱᑕᕒᐊ ᒥᓇ. ᐁᑯᐢᐱ ᒫᑲ ᑭ ᑲᑭᓯᑳᐊᐧ ᐁᑳ ᐁ ᐱᓭᐧᑲᓱᐟ ᐸᑫᐧᓯᑲᐣ. 4#ᐁᐠᓴᑕᐢ 12:1-27ᐃᐢᐱ ᒫᑲ ᑳ ᐅᑎᑎᓈᐟ, ᑭ ᐸᑭᑎᓀᐤ ᑭᐸᐦᐅᑐᐃᐧᑲᒥᑯᕽ, ᐁᑯᓯ ᑭ ᐸᑭᑎᓇᒪᐁᐧᐤ ᓀᐤ ᐁ ᓈᓀᐃᐧᔨᐟ ᓯᒫᑲᓂᓴ ᑭᑕ ᑲᓇᐁᐧᔨᒫᔨᐟ; ᐁ ᐃᑌᔨᑕᕽ ᒣᐧᐢᑕᐢ ᐃᔨᑯᕽ ᑭ ᒪᔮᐢᑯᑖᑐ ᐃᐧᐦᑯᐦᑐᑭ ᑭᑕ ᐊᐧᔭᐃᐧᑕᑕᒪᐋᐧᐟ ᐊᔨᓯᔨᓂᐊᐧ. 5ᐱᑕᕒ ᒫᑲ ᑭ ᑲᓇᐁᐧᔨᒫᐤ ᑭᐸᐦᐅᑐᐃᐧᑲᒥᑯᕽ: ᒫᑲ ᑭ ᐋᑲᒣᔨᒧᐊᐧᐠ ᐅᑕᔭᒥᐦᐋᐊᐧᐠ ᐁ ᐊᔭᒥᐦᐁᐢᑕᐋᐧᒋᐠ ᑭᓭᒪᓂᑐᐊᐧ ᐃᐧᔭ ᐅᐦᒋ.

6ᐃᐢᐱ ᒫᑲ ᐁᕒᐊᐟ ᐁ ᐃᐧ ᐯ ᐊᐧᔭᐃᐧᑕᐋᐟ, ᐁᐊᐧᑯ ᐁ ᑎᐱᐢᑳᔨᐠ ᐱᑕᕒ ᑭ ᓂᐹᐤ ᑕᐢᑕᐃᐧᐨ ᓂᓱ ᓯᒫᑲᓂᓴ, ᓂᓱ ᐱᐋᐧᐱᐢᑲᐧ ᐁ ᐅᐦᒋ ᑕᑯᐱᓱᐟ: ᐅᑕᓱᐃᑫᐊᐧ ᒫᑲ ᐊᐧᔭᐃᐧᑎᒥᐢᑳᐧᐟ ᐁ ᑲᓇᐁᐧᔨᑕᒥᔨᐟ ᑭᐸᐦᐅᑐᐃᐧᑲᒥᐠ. 7ᐁᑯᓯ ᐳᑎ, ᐅᑭᓯᑯᒪ ᑳ ᑎᐯᔨᐦᒋᑫᔨᐟ ᑭ ᓂᐸᐃᐧᐢᑖᐠ, ᒥᓇ ᑭ ᐋᐧᐢᑌᐤ ᑭᐸᐦᐅᑐᐃᐧᑲᒥᑯᕽ: ᑭ ᑐᐢᑭᐁᐧᐱᓀᐤ ᒫᑲ ᐱᑕᕒᐊ ᐅᐱᒣᔭᐤ, ᒥᓇ ᑭ ᑯᐢᑯᓀᐤ, ᐁ ᐃᑌᐧᐟ, ᐊᐧᓂᐢᑳ ᑭᔨᐸ. ᐱᐋᐧᐱᐢᑲᐧ ᒫᑲ ᑭ ᐸᑭᑎᓂᔨᐊᐧ ᐅ ᒋᐦᒋᕽ ᐅᐦᒋ. 8ᐁᑯᓯ ᐅᑭᓯᑯᐊᐧ ᑭ ᐃᑎᐠ, ᐸᑲᐧᑌᐦᐅ ᒥᓇ ᐴᐢᑕᐢᑭᓯᓀ. ᐁᑯᓯ ᑭ ᐃᑐᑕᒼ. ᑭ ᐃᑎᐠ ᒫᑲ, ᐊᑲᐧᓇᐅ ᑭᐟ ᐊᐢᐸᑯᐣ; ᒥᓇ ᐱᒥᑎᓴᐦᐅᐣ 9ᐁᑯᓯ ᑭ ᐊᐧᔭᐃᐧᐤ ᒥᓇ ᑭ ᐱᒥᑎᓴᐁᐧᐤ; ᓇᒪᐃᐧᔭ ᒫᑲ ᑭᐢᑫᔨᑕᒼ ᑖᐯᐧ ᐁ ᐃᑭᓂᔨᐠ ᐊᓂᒪ ᑳ ᐃᑐᑕᒥᔨᐟ ᐅᑭᓯᑯᐊᐧ, ᒫᑲ ᐁ ᒧᐦᒋ ᐃᓯᓇᒫᐣ ᑭ ᐃᑌᔨᑕᒼ.

10ᐃᐢᐱ ᒫᑲ ᑳ ᒪᔮᐢᑲᑭᐠ ᐊᓂᒪ ᓂᐢᑕᒼ ᒥᓇ ᐊᓂᒪ ᑯᑕᐠ ᐃᐢᑳᐧᑌᒼ, ᑭ ᐅᑎᑕᒪᐧᐠ ᐊᓂᒪ ᐱᐋᐧᐱᐢᑯ ᐃᐢᑳᐧᑌᒼ ᐅᑌᓈᕽ ᐃᓯ; ᐁᐊᐧᑯ ᓭᑫ ᑭ ᔪᑌᐸᔨᐤ: ᐁᑯᓯ ᑭ ᐊᐧᔭᐃᐧᐊᐧᐠ, ᒥᓇ ᑭ ᐊᑎ ᓵᐳ ᐱᒧᑎᐊᐧᐠ ᐯᔭᐠ ᐱᒧᐦᑌᐢᑲᓇᐤ; ᓭᒫᐠ ᒫᑲ ᐅᑭᓯᑯᐊᐧ ᑭ ᓇᑲᑎᐠ. 11ᐃᐢᐱ ᒫᑲ ᐱᑕᕒ ᒥᑐᓂ ᐁ ᐋᐱᑲᐃᐧ ᐊᔮᐟ, ᑭ ᐃᑌᐧᐤ, ᐁᑲᐧ ᓂ ᑭᐢᑫᔨᑌᐣ ᑖᐯᐧ, ᑳ ᑎᐯᔨᐦᒋᑫᐟ ᐁ ᑭ ᐃᓯᑎᓴᐋᐧᐟ ᐅᑭᓯᑯᒪ ᒥᓇ ᐁ ᑭ ᐸᐢᐱᐃᐟ ᐅᒋᐦᒋᕽ ᐅᐦᒋ ᐁᕒᐊᐟ, ᒥᓇ ᑲᐦᑭᔭᐤ ᐅᐟ ᐃᓯ ᐸᑯᓭᔨᒧᐃᐧᓂᐋᐧᐤ ᒍᐤ ᐊᔨᓯᔨᓂᐊᐧᐠ.

12ᐃᐢᐱ ᒫᑲ ᑳ ᒫᒥᑐᓀᔨᑕᕽ, ᑭ ᐅᑎᑕᒼ ᐅ ᐋᐧᐢᑳᐦᐃᑲᓂᔨᐤ ᒣᕒᐃ ᐅᑳᐃᐧᔭ ᒑᐣ, ᒫᕒᐠ ᑳ ᐃᓯ ᐊᐢᐱᔨᑳᓱᐟ; ᐃᑕ ᒥᐦᒉᐟ ᐁ ᒫᐊᐧᒋᐃᑐᒋᐠ ᐁ ᐊᔭᒥᐦᐋᒋᐠ. 13ᐃᐢᐱ ᒫᑲ ᐅ ᐹᐹᐊᐧᐊᕽ ᐃᐢᑳᐧᑌᒥᐢ ᑭᐦᒋ ᐃᐢᑳᐧᑌᒥᕽ, ᐅᐢᑭᓂᑭᐢᑫᐧᐤ ᑭ ᐯ ᐃᑐᐦᑌᐤ ᑭᑕ ᓇᐢᑫᐧᐊᐧᓯᑖᐟ ᕒᐅᑕ ᐁ ᐃᓯᔨᐦᑳᓱᐟ, 14ᐃᐢᐱ ᒫᑲ ᓀᓯᑐᑕᐋᐧᐟ ᐱᑕᕒᐊ ᐁ ᐃᑎᑖᑯᓯᔨᐟ, ᓇᒪᐃᐧᔭ ᔪᑌᓇᒼ ᐃᐢᑳᐧᑌᒼ ᐁ ᐃᓯ ᒪᒫᑖᑯᓯᐟ, ᒫᑲ ᑭ ᐱᐦᑐᑫᐸᑖᐤ ᐁᑯᓯ ᑭ ᐃᐧᐦᑕᒼ ᐱᑕᕒᐊ ᐁ ᓂᐸᐃᐧᔨᐟ ᐃᐢᑳᐧᑌᒥᕽ. 15ᑭ ᐃᑌᐊᐧᐠ ᒫᑲ, ᓇᒪ ᒫᐃᐧᔭ ᑭ ᑭᐢᑭᓯᐣ. ᒫᑲ ᑭ ᐃᑌᐧᐤ ᐁ ᑫᒋᓈᐅᐟ ᑖᐯᐧ ᐁᑯᓯ ᐁ ᐃᑭᓂᔨᐠ. ᐁᑯᓯ ᑭ ᐃᑌᐧᐊᐧᐠ, ᐅᑭᓯᑯᒪ ᐁᑐᑫ. 16ᒫᑲ ᐱᑕᕒ ᐋᒋᐱᑯ ᑭ ᐹᐹᐊᐧᐦᐃᑫᐤ: ᐃᐢᐱ ᒫᑲ ᑳ ᔪᑌᓂᑭᐠ, ᑭ ᐋᐧᐸᒣᐊᐧᐠ, ᐁᑯᓯ ᑭ ᒫᒪᐢᑳᑕᒪᐧᐠ. 17ᐃᐧᔭ ᒫᑲ, ᐁ ᐃᑎᓂᑫᐢᑕᐋᐧᐟ ᐁᑳ ᑭᑕ ᑭᑐᔨᐟ, ᑭ ᐋᒋᒧᐢᑕᐁᐧᐤ ᑳ ᑎᐯᔨᐦᒋᑫᔨᐟ ᑳ ᑭ ᐃᓯ ᐯ ᐊᐧᔭᐃᐧᑕᐦᐃᑯᐟ ᑭᐸᐦᐅᑐᐃᐧᑲᒥᑯᕽ ᐅᐦᒋ. ᑭ ᐃᑌᐧᐤ ᒫᑲ, ᐃᐧᐦᑕᒫᕽ ᐅᐦᐃ ᒉᒥᐢ, ᒥᓇ ᐅᒋᐋᐧᒥᒫᐊᐧᐠ. ᐁᑯᓯ ᑭ ᓯᐯᐧᑌᐤ, ᒥᓇ ᐱᑐᐢ ᐃᑕ ᑭ ᐃᑐᐦᑌᐤ.

18ᓭᒫᐠ ᒫᑲ ᐁ ᑭᓯᑳᐠ, ᓇᒫᐃᐧᔭ ᐱᑯ ᐊᐱᓯᐢ ᐅᐯᐧᑲᒥᑭᓯᐊᐧᐠ ᓯᒫᑲᓂᓴᐠ, ᑖᓂᑌ ᐃᐧᔭ ᐅᒪ ᐁᔮᐟ ᐱᑕᕒ. 19ᐃᐢᐱ ᒫᑲ ᐁᕒᐊᐟ ᑳ ᓇᑕᐁᐧᔨᒫᐟ ᐁᑳ ᒫᑲ ᐁ ᒥᐢᑲᐋᐧᐟ, ᒥᑐᓂ ᑭ ᑲᑫᐧᒋᒣᐤ ᑳ ᑭ ᑲᓇᐁᐧᔨᒫᔨᐟ, ᐁᑯᓯ ᑭ ᐃᑕᓱᐁᐧᐤ ᑭᑕ ᓂᐸᐃᒥᐦᐟ, ᑭ ᓯᐯᐧᑌᐤ ᒫᑲ ᒍᑎᔭᐃᕽ ᐅᐦᒋ ᓯᓴᕒᐃᔭᐃᕽ ᐃᓯ, ᐁᑯᑕ ᒫᑲ ᑭ ᐊᔮᐤ.

20ᒥᐢᑕᐦᐃ ᒫᑲ ᑭ ᓇᔦᑖᐁᐧᔨᒣᐤ ᐊᓂᐦᐃ ᑖᔭᕒ ᒥᓇ ᓵᐃᑕᐣ ᑳ ᐊᔮᔨᐟ: ᒫᑲ ᑭ ᐯ ᒫᒪᐃᐧ ᓈᑎᐠ, ᐁᑯᓯ, ᐁ ᑭ ᐅᒋᐋᒋᐠ ᐱᓬᐋᐢᑕᓴ ᑭᐦᒋ ᐅᑭᒫᐊᐧ ᐅᑲᓇᐃᐧ ᓂᐯᐃᐧᑲᒥᑫᐧᒪ ᑭ ᓇᑐᑕᒪᐧᐠ ᐃᐧᑕᐢᑭᑐᐃᐧᐣ, ᒋᑫᒫ ᑭ ᐅᑎᓯᐊᐧᐠ ᐅᐟ ᐊᐢᑭᐋᐧᕽ ᑭᐦᒋ ᐅᑭᒫᐊᐧ ᐅᐟ ᐊᐢᑭᔨᕽ ᐅᐦᒋ. 21ᐁ ᑭ ᐅᔭᑭᑕᕽ ᒫᑲ ᑭᓯᑳᐤ ᐁᕒᐊᐟ ᑭ ᐳᓯᐢᑲᒼ ᐅ ᑭᐦᒋ ᐅᑭᒫᐃᐧ ᑭᑭᐢᑳᒋᑲᓇ, ᐁᑯᓯ ᑭ ᐊᐱᐤ ᐅ ᑭᐦᒋ ᐊᐱᐃᐧᓂᕽ, ᒥᓇ ᑭ ᐱᑭᐢᑳᐧᑌᐤ ᐊᔨᓯᔨᓂᐊᐧ. 22ᑭ ᑌᐯᐧᐊᐧᐠ ᒫᑲ ᐁ ᐃᑌᐧᒋᐠ, ᒪᓂᑐ ᐅᐟ ᐃᑌᐧᐃᐧᐣ, ᓇᒪᐃᐧᔭ ᐊᔨᓯᔨᓂᐤ. 23ᓭᒫᐠ ᒫᑲ ᑳ ᑎᐯᔨᐦᒋᑫᐟ ᐅᑭᓯᑯᒪ ᑭ ᐸᑲᒪᐅᐠ, ᒋᑫᒫ ᐁᑳ ᑭᓭᒪᓂᑐᐊᐧ ᐁ ᒥᔮᐟ ᑭᐢᑌᔨᑖᑯᓯᐃᐧᐣ: ᑭ ᒧᐃᐧᐠ ᒫᑲ ᒪᓂᒍᓴ, ᒥᓇ ᑭ ᓯᐯᐧᒑᐦᑫᐧᐤ.

24ᒫᑲ ᐅᐟ ᐃᑌᐧᐃᐧᐣ ᑭᓭᒪᓂᑐ ᑭ ᔭᑭᑭᓂᔨᐤ ᒥᓇ ᑭ ᔭᑭᐅᒪᑲᓂᔨᐤ. 25ᐁᑯᓯ ᐹᕒᓇᐹᐢ ᒥᓇ ᓵᓬ ᑭ ᑭᐁᐧᐊᐧᐠ ᒉᕒᐅᓴᓬᐊᒥᕽ ᐅᐦᒋ, ᐃᐢᐱ ᑳ ᑎᐱᑐᑕᑭᐠ ᐅᐟ ᐊᑐᐢᑫᐃᐧᓂᐋᐧᐤ, ᐁ ᐃᐧᒉᐃᐧᑯᒋᐠ ᒑᐣ ᑳ ᐃᓯ ᐊᐢᐱᔨᑳᓱᐟ ᒫᕒᐠ.

Currently Selected:

ᐃᓯᐦᒋᑫᐃᐧᓂᐋᐧᐊᐧ 12: KKMs

Highlight

Copy

Compare