ᓃᓵᐧᐤ ᓵᒼᔪᐃᓬ 10
10
1ᑭ ᐊᔨᑭᐣ ᒫᑲ ᒣᐧᐢᑕᐢ ᐃᔨᑯᕽ, ᐅ ᑭᐦᒋ ᐅᑭᒫᒥᐋᐧᐊᐧ ᐋᒪᐣ ᐅᐟ ᐊᐋᐧᓯᒥᓴ ᑭ ᐳᓂᐱᒫᑎᓯᔨᐊᐧ, ᐁᑯᓯ ᐦᐁᓇᐣ ᐅᑯᓯᓴ ᑭ ᑭᐦᒋ ᐅᑭᒫᐃᐧᔨᐊᐧ ᐁ ᑖᐱᐢᑲᒫᑯᐟ. 2ᑌᐱᐟ ᒫᑲ ᑭ ᐃᑌᐧᐤ, ᓂ ᑲ ᐋᐧᐸᐦᑕᐦᐋᐤ ᑭᓭᐋᐧᑎᓯᐃᐧᐣ ᐦᐁᓇᐣ ᐅᑯᓯᓴ ᓀᐦᐋᐢ, ᐅᐦᑖᐃᐧᔭ ᑳ ᑭ ᐃᓯ ᐋᐧᐸᐦᑕᐦᐃᔨᐟ ᑭᓭᐋᐧᑎᓯᐃᐧᐣ. ᑌᐱᐟ ᒫᑲ ᑭ ᐃᓯᑎᓴᐦᐅᐁᐧᐤ ᐁ ᐸᒥᓇᒧᐋᐟ ᐅᐟ ᐊᑐᐢᑫᔮᑲᓇ ᑭᑕ ᒥᔪᑌᐦᐁᐋᔨᐟ ᐅᑖᐃᐧᔨᐊᐧ ᐅᐦᒋ. ᐁᑯᓯ ᑌᐱᐟ ᐅᐟ ᐊᑐᐢᑫᔮᑲᓇ ᑭ ᑕᑯᓯᓇᐧᐠ ᐅᐟ ᐊᐢᑭᔨᕽ ᐅᐟ ᐊᐋᐧᓯᒥᓴ ᐋᒪᐣ. 3ᒫᑲ ᐅᐟ ᐅᑭᒫᒥᐋᐧᐊᐧ ᐋᒪᐣ ᐅᐟ ᐊᐋᐧᓯᒥᓴ ᑭ ᐃᑌᐊᐧᐠ ᐦᐁᓇᓇ ᐅᐟ ᐅᑭᒫᒥᐋᐧᐊᐧ, ᑖᐯᐧ ᒋ ᐁ ᑭᐢᑌᔨᒫᐟ ᑌᐱᐟ ᑯᑖᐃᐧᔭ ᑭᐟ ᐃᑌᔨᑌᐣ ᑳ ᐃᓯᑎᓴᐦᐊᒫᐢᐠ ᐅᒥᔪᑌᐦᐁᐃᐁᐧᐊᐧ? ᓇᒪ ᒋ ᑌᐱᐟ ᑭ ᑭ ᐃᓯᑎᓴᐦᐊᒫᐠ ᐅᐟ ᐊᑐᐢᑫᔮᑲᓇ ᑭᑕ ᐸᐹᒥᐋᐧᐸᐦᑕᒥᔨᐟ ᐅᑌᓇᐤ, ᒥᓇ ᑭᑕ ᓇᑕᐋᐧᑖᔨᐟ, ᒥᓇ ᑭᑕ ᓂᓯᐊᐧᓈᒋᐦᑖᔨᐟ? 4ᐁᑯᓯ ᐦᐁᓇᐣ ᑭ ᐅᑎᐦᑎᓀᐤ ᑌᐱᑕ ᐅᐟ ᐊᑐᐢᑫᔮᑲᓂᔨᐊᐧ, ᐁᑯᓯ ᑭ ᑳᐢᑭᐸᑕᒣᐧᐤ ᓇᐸᑌ ᐅ ᒥᐦᐃᐢᑐᐋᐧᓂᔨᐊᐧ; ᒥᓇ ᑭ ᑭᐢᑭᓴᒣᐧᐤ ᐅᐢᑯᑖᑳᔨᐊᐧ ᐋᐱᑕᐤ ᐋᐧᐢᑭᑐᔨᕽ ᐃᐢᑯ ᐁᑯᓯ ᑭ ᓯᐯᐧᑎᓴᐁᐧᐤ. 5ᐃᐢᐱ ᒫᑲ ᐃᐧᔨᑕᒪᐋᐧᒋᐠ ᑌᐱᑕ, ᑭ ᓯᐯᐧᑎᓴᐅᐁᐧᐤ ᑭᑕ ᓇᑭᐢᑳᒥᐦᐟ; ᒋᑫᒫ ᐊᓂᑭ ᓈᐯᐊᐧᐠ ᒥᐢᑕᐦᐃ ᑭ ᓀᐯᐃᐧᓯᐊᐧᐠ. ᑭᐦᒋ ᐅᑭᒫᐤ ᒫᑲ ᑭ ᐃᑌᐧᐤ, ᒉᕒᐃᑯᐃᕽ ᐊᔭᔮᐠ ᐹᑎᒫ ᐃᔨᑯᕽ ᑭ ᒥᐦᐃᐢᑐᐋᐧᓂᐋᐧᐊᐧ ᑭᑕ ᓂᐦᑖᐃᐧᑭᑭ ᐁᑲᐧ ᒫᑲ ᐯ ᑭᐁᐧᑫᐠ.
6ᐃᐢᐱ ᒫᑲ ᐋᒪᐣ ᐅᐟ ᐊᐋᐧᓯᒥᓴ ᐃᐧᔮᐸᐦᑕᑭᐠ ᐁ ᐁᐧᐢᑖᑌᔨᒥᑯᒋᐠ ᑌᐱᑕ, ᐋᒪᐣ ᐅᐟ ᐊᐋᐧᓯᒥᓴ ᑭ ᓇᑕᐃᐧ ᐊᑐᑌᐊᐧᐠ ᓯᕒᐃᔭᓇ ᐊᓂᑕ ᐯᐟᕒᐃᐦᐋᑊ, ᒥᓇ ᓯᕒᐃᔭᓇ ᐊᓂᑕ ᓵᐸ, ᓂᓯᑕᓇᐤ ᑕᐦᑐ ᑭᐦᒋᒥᑖᐦᑐᒥᑕᓇᐤ ᐅ ᒧᐢᑐᑌᐊᐧ, ᒥᓇ ᒣᐋᑲ ᑭᐦᒋ ᐅᑭᒫᐊᐧ ᑭᐦᒋᒥᑖᐦᑐᒥᑕᓇᐤ ᓈᐯᐊᐧ ᐁ ᑭᑭᐟ, ᒥᓇ ᑖᑊ ᐊᔨᓯᔨᓂᐊᐧᐠ ᒥᑖᑕᐦᐟ ᓂᓱᓵᑊ ᑕᐦᑐ ᑭᐦᒋᒥᑖᐦᑐᒥᑕᓇᐤ ᓈᐯᐊᐧ. 7ᐃᐢᐱ ᒫᑲ ᑌᐱᐟ ᐱᔦᐦᑕᕽ, ᑭ ᐃᓯᑎᓴᐁᐧᐤ ᒍᐋᐸ, ᒥᓇ ᑲᐦᑭᔭᐤ ᐅᓄᑎᓂᑫᐊᐧ ᐁ ᓱᑳᔭᐃᐧᓯᔨᐟ ᓈᐯᐊᐧ. 8ᐋᒪᐣ ᐅᐟ ᐊᐋᐧᓯᒥᓴ ᒫᑲ ᑭ ᐯ ᐊᐧᔭᐃᐧᐊᐧᐠ ᐁᑯᓯ ᑭ ᐅᔨᑳᐸᐃᐧᐊᐧᐠ ᐁ ᐊᑎ ᐱᐦᑐᑫᕽ ᑭᐦᒋᐃᐢᑳᐧᑌᒥᕽ; ᐊᓂᑭ ᒫᑲ ᓯᕒᐃᔭᓇᐠ ᓵᐸ ᐅᐦᒋ, ᒥᓇ ᕒᐃᐦᐋᑊ ᐅᐦᒋ, ᒥᓇ ᑖᑊ, ᒥᓇ ᒣᐋᑲ ᐊᔨᓯᔨᓂᐊᐧᐠ, ᐱᐢᑭᐢ ᑭ ᐊᔮᐊᐧᐠ ᐋᐧᔭᐃᐧᑎᒫᔨᕽ.
9ᐃᐢᐱ ᒫᑲ ᒍᐋᑊ ᐃᐧᔮᐸᐦᑕᕽ ᐁ ᐅᐦᒋᑳᐸᐃᐧᐢᑖᑯᐟ ᑭᑕ ᓄᑎᓂᑯᐟ ᐋᔨᑕᐤ ᐅᐦᒋ ᑭ ᑲᑫᑭᓀᐤ ᐊᓂᐦᐃ ᐁ ᓇᐊᐧᓱᐁᐧᔨᑖᑯᓯᔨᐟ ᐃᐢᕒᐁᐃᓬ, ᐁᑯᓯ ᐁᐊᐧᑯᓂ ᑭ ᐅᔨᑳᐸᐃᐧᐁᐤ ᑭᑕ ᓄᑎᓈᔨᐟ ᓯᕒᐃᔭᓇ; 10ᑯᑕᑲ ᒫᑲ ᐃᐧᔭ ᐊᔨᓯᔨᓂᐊᐧ ᑭ ᐸᑭᑎᓇᒪᐁᐧᐤ ᐋᐱᓵᔭ ᐅᒋᐋᐧᒪ, ᐁᐊᐧᑯᓂ ᑭᑕ ᐅᔨᑳᐸᐃᐧᐢᑕᐋᐧᔨᐟ ᐋᒪᐣ ᐅᐟ ᐊᐋᐧᓯᒥᓴ. 11ᐅᒥᓯ ᒫᑲ ᑭ ᐃᑌᐤ, ᑭᐢᐱᐣ ᓯᕒᐃᔭᓇᐠ ᐊᑎ ᓵᑯᐃᑖᐧᐃᐧ ᑭ ᑲ ᐃᐧᒋᐦᐃᐣ; ᒫᑲ ᑭᐢᐱᐣ ᐋᒪᐣ ᐅᐟ ᐊᐋᐧᓯᒥᓴ ᐊᑎ ᓵᑯᐃᐢᑳᐧᐃᐧ ᐁᑲᐧ ᑭ ᑲ ᐯ ᓇᑕᐃᐧ ᐃᐧᒋᐦᐃᑎᐣ. 12ᓱᑫᔨᒧᐠ ᒥᓇ ᓈᐯᑳᓱᑖᐠ ᑭᐟ ᐊᔨᓯᔨᓂᒥᓇᐊᐧᐠ ᐅᐦᒋ ᒥᓇ ᐅᐟ ᐅᑌᓇᐊᐧ ᑭ ᑭᓭᒪᓂᑐᒥᓇᐤ ᐅᐦᒋ; ᑳ ᑎᐯᔨᐦᒋᑫᐟ ᒫᑲ ᑭᑕ ᐃᑐᑕᒼ ᐊᓂᒪ ᐁ ᐃᓯ ᒥᔮᐧᐱᓯᒥᑯᐟ. 13ᐁᑯᓯ ᒍᐋᑊ ᒥᓇ ᐊᓂᐦᐃ ᐊᔨᓯᔨᓂᐊᐧ ᑳ ᐃᐧᒉᐃᐧᑯᐟ ᑭᓯᐋᐧᐠ ᑭ ᐊᑎ ᓈᑌᐊᐧᐠ ᐊᓂᐦᐃ ᓯᕒᐃᔭᓇ; ᑭ ᑕᐸᓯᐦᐃᐠ ᒫᑲ. 14ᐃᐢᐱ ᒫᑲ ᐋᒪᐣ ᐅᐟ ᐊᐋᐧᓯᒥᓴ ᐃᐧᔮᐸᐦᑕᑭᐠ ᓯᕒᐃᔭᓇ ᐁ ᑕᐸᓯᔨᐟ, ᐃᐧᔭᐋᐤ ᒥᓇ ᑭ ᑕᐸᓯᐁᐊᐧᐠ ᐋᐱᓵᔭ, ᐁᑯᓯ ᑭ ᐱᐦᑐᑫᐊᐧᐠ ᐅᑌᓈᕽ, ᐁᑲᐧ ᒍᐋᑊ ᑭ ᐳᓂᐁᐤ ᐋᒪᐣ ᐅᐟ ᐊᐋᐧᓯᒥᓴ ᒥᓇ ᑭ ᐯ ᑭᐁᐧᐤ ᒉᕒᐅᓴᓬᐊᒥᕽ.
15ᐃᐢᐱ ᒫᑲ ᓯᕒᐃᔭᓇᐠ ᐃᐧᔮᐸᐦᑕᑭᐠ ᐁ ᓵᑯᐦᐃᑯᒋᐠ ᐃᐢᕒᐁᐃᓬᐊ, ᑭ ᒫᒪᐃᐧ ᒫᐊᐧᒋᐦᐃᑐᐊᐧᐠ. 16ᐦᐁᑕᕒᐃᓴᕒ ᒫᑲ ᑭ ᐃᓯᑎᓴᐦᐅᐁᐧᐤ, ᐁᑯᓯ ᑭ ᐯᓯᐁᐧᐤ ᓯᕒᐃᔭᓇ ᐊᑳᒥᕽ ᓯᐱᕽ ᑳ ᐊᔮᔨᐟ; ᑭ ᑕᑯᓯᓂᔨᐊᐧ ᒫᑲ ᐦᐃᓬᐊᒥᕽ, ᐊᓂᐦᐃ ᓵᐹᐠ ᐅ ᑭᐦᒋᓯᒫᑲᓂᓯᐃᐧᑭᒫᒪ ᐦᐁᑖᕒᐃᓴᕒ ᐁ ᓂᑳᓂᐢᑕᒪᐋᐧᐟ. 17ᑭ ᐃᐧᐦᑕᒪᐋᐧᐤ ᒫᑲ ᑌᐱᐟ, ᑭ ᒪᒪᐃ ᒫᐊᐧᒋᐦᐁᐤ ᒫᑲ ᑲᐦᑭᔭᐤ ᐃᐢᕒᐁᐃᓬ, ᐁᑯᓯ ᑭ ᐋᓱᐊᐧᐊᒼ ᒑᕒᑕᐣ, ᒥᓇ ᑭ ᑕᑯᓯᐣ ᐊᓂᑕ ᐦᐃᓬᐊᒼ. ᓯᕒᐃᔭᓇᐠ ᒫᑲ ᑭ ᐅᔨᑳᐸᐃᐧᐢᑕᐁᐧᐊᐧᐠ ᑌᐱᑕ ᒥᓇ ᑭ ᓄᑎᓀᐊᐧᐠ. 18ᐊᓂᑭ ᒫᑲ ᓯᕒᐃᔭᓇᐠ ᑭ ᑕᐸᓯᐁᐊᐧᐠ ᐃᐢᕒᐁᐃᓬᐊ; ᐁᑯᓯ ᑌᐱᐟ ᑭ ᓂᐸᐁᐤ ᐊᓂᐦᐃ ᓯᕒᐃᔭᓇ ᓈᐯᐊᐧᐠ ᑌᐸᑯᐹᐧᐤ ᒥᑖᐦᑐᒥᑕᓇᐤ ᑎᑎᐱᑖᐹᓈᐢᑲᐧ ᐁ ᐋᐸᒋᐋᒋᐠ, ᒥᓇ ᓀᒥᑕᓇᐤ ᑕᐦᑐ ᑭᐦᒋᒥᑖᐦᑐᒥᑕᓇᐤ ᐅᑌᑕᐱᐊᐧ, ᒥᓇ ᑭ ᐸᑲᒪᐁᐧᐊᐧᐠ ᓵᐹᑲ, ᑳ ᑭᐦᒋ ᑎᐯᔨᒫᔨᐟ ᐅᓄᑎᓂᑫᒥᔨᐊᐧ, ᐁᑯᓯ ᐁᑯᑕ ᑭ ᓂᐱᐤ. 19ᐃᐢᐱ ᒫᑲ ᑲᐦᑭᔭᐤ ᑭᐦᒋ ᐅᑭᒫᐊᐧᐠ ᑳ ᑭ ᐊᑐᐢᑲᐋᐧᒋᐠ ᐦᐁᑖᕒᐃᓴᕒᐊ, ᐃᐧᔮᐸᐦᑕᑭᐠ ᐁ ᓵᑯᒋᐦᐃᑯᔨᐟ ᐃᐢᕒᐁᐃᓬᐊ, ᑭ ᐃᐧᑕᐢᑭᒣᐊᐧᐠ ᐃᐢᕒᐁᐃᓬᐊ, ᒥᓇ ᑭ ᐊᑐᐢᑲᐁᐧᐊᐧᐠ. ᐁᑯᓯ ᒫᑲ ᓯᕒᐃᔭᓇᐠ ᑭ ᐊᐢᑖᓯᐊᐧᐠ ᐃᐧᑳᐨ ᒥᓇ ᑭᑕ ᐃᐧᒋᐦᐋᒋᐠ ᐋᒪᐣ ᐅᐟ ᐊᐋᐧᓯᒥᓴ.
Currently Selected:
ᓃᓵᐧᐤ ᓵᒼᔪᐃᓬ 10: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
