ᓂᐢᑕᒼ ᑲᕒᐃᐣᑎᔭᓇ 14

1ᐱᒥᑎᓴᐦᐊᒧᐠ ᓵᑭᐦᐃᐁᐧᐃᐧᐣ; ᐁᔨᐁᐧᕽ ᒫᑲ ᓱᑭ ᓇᑐᓇᒧᐠ ᐊᐦᒑᑯᐃᐧ ᒥᔨᑯᐃᐧᓇ, ᒫᑲ ᔮᔭᐤ ᑭᑕ ᑭᐢᑭᐁᐧᐦᐃᑫᔦᐠ. 2ᒋᑫᒫ ᐊᓇ ᐁᑳ ᐁ ᓂᓯᑐᑖᑲᐧᓂᔨᐠ ᐱᑭᐢᑫᐧᐃᐧᐣ ᑳ ᐋᐸᒋᑖᐟ ᓇᒪᐃᐧᔭ ᐊᔨᓯᔨᓂᐊᐧ ᑳ ᑭᑐᑖᐟ ᒫᑲ ᑭᓭᒪᓂᑐᐊᐧ; ᒋᑫᒫ ᓇᒪ ᐊᐃᐧᔭ ᓂᓯᑐᑖᐠ; ᒫᑲ ᐊᐦᒑᑯᕽ ᐱᑭᐢᑳᐧᑕᒼ ᑳ ᒫᒪᐢᑳᑎᑲᐧᓂᔨᐠ. 3ᒫᑲ ᐊᓇ ᑳ ᑭᐢᑭᐁᐧᐦᐃᑫᐟ ᐱᑭᐢᑲᐧᑌᐤ ᐊᔨᓯᔨᓂᐊᐧ ᑭᑕ ᐃᓯ ᑭᐢᑭᓄᐦᐊᒪᐋᐧᐟ, ᒥᓇ ᑭᑕ ᐃᓯ ᒥᔪᑌᐁᐋᐟ, ᒥᓇ ᑭᑕ ᐃᓯ ᑲᑫᐢᑭᒫᐟ. 4ᐊᓇ ᑳ ᐱᑭᐢᑫᐧᐟ ᐱᑐᐢ ᐃᓯ ᐱᑭᐢᑫᐧᐃᐧᓂᕽ ᐃᐧᔭ ᑎᐱᔭᐤ ᑭᐢᑭᓄᐦᐊᒫᓱ; ᒫᑲ ᐊᓇ ᑳ ᑭᐢᑭᐁᐧᐦᐃᑫᐟ ᑭᐢᑭᓄᐦᐊᒫᐁᐧᐤ ᐅᑕᔭᒥᐦᐋᐊᐧ. 5ᓂ ᑳᐦ ᒥᔦᐧᔨᑌᐣ ᒫᑲ ᑲᐦᑭᔭᐤ ᓇᓈᑐᕽ ᐱᑭᐢᑫᐧᐃᐧᓇ ᐱᑭᐢᑳᐧᑫᔦᐠ, ᒫᑲ ᓇᐊᐧᐨ ᑭᑕ ᑭᐢᑫᐁᐧᐃᑫᔦᐠ: ᒋᑫᒫ ᐊᔨᐋᐧᐠ ᑭᐢᑕᑭᒫᐤ ᐊᓇ ᑳ ᑭᐢᑫᐁᐧᐃᑫᐟ ᐃᔨᑯᕽ ᐊᓇ ᓇᓈᑐᕽ ᐱᑭᐢᑫᐧᐃᐧᓇ ᑳ ᐋᐸᒋᑖᐟ, ᐱᑯ ᑭᐢᐱᐣ ᐃᑌᐧᐢᑕᒪᐋᐧᑕᑭ, ᐅᑕᔭᒥᐦᐋᐊᐧᐠ ᑭᑕ ᐅᐦᑎᓇᑭᐠ ᑭᐢᑭᓄᐦᐊᒫᑯᐃᐧᐣ.

6ᒫᑲ ᐁᑲᐧ ᓂᒋᐋᐧᒥᑎᐠ, ᑭᐢᐱᐣ ᐅᑎᑎᑕᑳᐧᐃᐧ ᓇᓈᑐᕽ ᐁ ᐃᓯ ᐱᑭᐢᑫᐧᔮᐣ, ᑖᓂᓯ ᑫ ᐃᑖᐸᒋᐃᑕᑯᐠ, ᐱᑯ ᑭᐢᐱᐣ ᐱᑭᐢᑳᐧᑎᑕᑳᐧᐃᐧ ᑭᐢᑫᔨᑖᑯᒋᑫᐃᐧᓂᕽ, ᐊᐦᐳ ᑭᐢᑫᔨᑕᒧᐃᐧᓂᕽ ᐅᐦᒋ, ᐊᐦᐳ ᑭᐢᑭᐁᐧᐦᐃᑫᐃᐧᓂᕽ, ᐊᐦᐳ ᑭᐢᑭᓄᐦᐊᒫᑐᐃᐧᓂᕽ? 7ᐊᐦᐳ ᐊᓂᐦᐃ ᐁᑳ ᑳ ᐱᒫᑎᓯᒪᑲᑭ, ᑭᐢᐱᐣ ᐁ ᐯᑖᑲᐧᑭ, ᑭᐢᐱᐣ ᐱᐱᑲᐧᐣ ᐊᐦᐳ ᑭᑐᒋᑲᐣ, ᑭᐢᐱᐣ ᐁᑳ ᑫᒋᓈᑖᑲᐧᕽ ᐊᓂᒪ ᐁ ᐃᑌᐧᒪᑲᕽ, ᑖᓂᓯ ᑫ ᑭ ᐃᓯ ᑭᐢᑫᔨᑖᑲᐧᕽ ᑫᑲᐧᐩ ᑳ ᐳᑖᑕᒥᕽ ᐊᐦᐳ ᑳ ᑭᑐᑖᕽ? 8ᒋᑫᒫ ᑭᐢᐱᐣ ᐱᐱᑲᐧᐣ ᐁᑳ ᑫᒋᓈᑖᑲᐧᑭ, ᐊᐁᐧᓇ ᑫ ᐊᐧᐁᐧᔨᐟ ᑭᑕ ᓄᑎᓂᑫᐟ? 9ᐁᑯᓯ ᐃᓯ ᒥᓇ ᑭᔭᐋᐧᐤ, ᑭᐢᐱᐣ ᐁᑳ ᐊᔨᑌᐧᔦᑯ ᐃᑌᐧᐃᐧᓇ ᐁ ᐁᐧᑕᑭ ᑭᑕ ᓂᓯᑐᐦᑕᒥᕽ, ᑖᓂᓯ ᑫ ᑭ ᐃᓯ ᑭᐢᑫᔨᑖᑲᐧᕽ ᑫᑲᐧᐩ ᑳ ᐃᐧᐦᑕᒥᕽ? ᒋᑫᒫ ᐱᑯᓇᑕ ᑭ ᑲ ᐱᑭᐢᑳᐧᓈᐋᐧᐤ. 10ᐃᑕᑲᐧᓇᐧ, ᐁᑐᑫ, ᒥᐦᒉᐟ ᓇᓈᑐᕽ ᐃᑌᐧᐃᐧᓇ ᐅᑕ ᐊᐢᑭᕽ, ᓇᒪᐋᐧᐨ ᐯᔭᐠ ᒫᑲ ᐁᑳ ᑭᑕ ᐃᐦᑕᑲᐧᕽ ᐊᓂᒪ ᐁ ᐃᑌᐧᒪᑲᕽ. 11ᐁᑯᓯ ᒫᑲ ᑭᐢᐱᐣ ᐁᑳ ᓂᓯᑐᐦᑕᒫᓂ ᐁ ᐃᑌᐧᒪᑲᕽ ᐱᑭᐢᑫᐧᐃᐧᐣ, ᐅᒪᔭᑭᑖᑯᓯᐤ ᓂ ᑲ ᐃᑌᔨᒫᐤ ᐊᓇ ᑳ ᐱᑭᐢᑫᐧᐟ, ᐁᑯᓯ ᒥᓇ ᐅᒪᔭᑭᑕᑯᓯᐤ ᓂᔭ ᓂ ᑲ ᐃᑌᔨᒥᐠ. 12ᐁᑯᓯ ᐃᓯ ᒥᓇ ᑭᔭᐋᐧᐤ, ᐊᔨᐢ ᑭᐟ ᐋᑲᒣᔨᒧᑐᑌᓈᐋᐧᐤ ᐊᐦᒑᐦᑯᐃᐧ ᒥᔨᑯᐃᐧᓇ, ᓇᑐᓇᒧᐠ ᑭᑕ ᐁᐧᔪᒋ ᐊᔮᔦᐠ ᑭᑕ ᐃᓯ ᑭᐢᑭᓄᐦᐊᒫᑯᐃᐧᓯᒋᐠ ᐅᑕᔭᒥᐦᐋᐊᐧᐠ. 13ᐁᑯᓯ ᐊᓇ ᐱᑐᓯ ᐱᑭᐢᑫᐧᐃᐧᐣ ᑳ ᐊᐸᒋᑖᐟ ᑭᑕ ᐃᓯ ᐊᔭᒥᐦᐋᐤ ᑭᑕ ᐃᑌᐧᐢᑕᒪᐋᐧᑕᕽ. 14ᒋᑫᒫ ᑭᐢᐱᐣ ᐊᔭᒥᐦᐋᔮᓂ ᐱᑐᓯ ᐱᑭᐢᑫᐧᐃᐧᓂᕽ, ᓂᐟ ᐊᐦᒑᕽ ᐊᔭᒥᐦᐋᐤ, ᒫᑲ ᓂ ᓂᓯᑐᐦᑕᒧᐃᐧᐣ ᓇᒪ ᓈᐣᑕᐤ ᐃᑖᐸᒋᐃᐁᐧᐤ. 15ᑖᓂᓯ ᒫᑲ? ᓂ ᑲ ᐊᔭᒥᐦᐋᐣ ᐊᐦᒑᕽ ᐅᐦᒋ, ᒥᓇ ᓂ ᑲ ᐊᔭᒥᐦᐋᐣ ᓂᓯᑐᐦᑕᒧᐃᐧᐣ ᐅᐦᒋ: ᓂ ᑲ ᓂᑲᒧᐣ ᐊᐦᒑᕽ ᐅᐦᒋ, ᒥᓇ ᓂ ᑲ ᓂᑲᒧᐣ ᓂᓯᑐᐦᑕᒧᐃᐧᐣ ᐅᐦᒋ. 16ᑭᐢᐱᐣ ᐁᑳ ᐁᑯᓯ, ᐃᐢᐱ ᐋᑕ ᑭᔭ ᐊᐦᒑᑯᕽ ᐅᐦᒋ ᑭ ᓇᓈᐢᑯᒧᔭᓂ ᑖᓂᓯ ᐃᐧᔭ ᐊᓇ ᑳ ᐊᐱᐟ ᐁᑳ ᐁ ᐅ ᑭᐢᑫᔨᑕᒧᐃᐧᓂᐟ ᑫ ᑭ ᐃᑌᐧᐟ, ᐋᒣᐣ ᑭ ᓇᓈᐢᑯᒧᐃᐧᓂᕽ, ᐃᐧᔭ ᐁᑳ ᐁ ᑭᐢᑫᔨᑕᕽ ᑖᓂᓯ ᐁ ᐃᑌᐧᔭᐣ? 17ᐋᑕ ᐃᓴ ᐃᐧᔭ ᑖᐯᐧ ᒥᑐᓂ ᑭ ᓇᓈᐢᑯᒧᐣ, ᒫᑲ ᐊᓇ ᑯᑕᐠ ᓇᒪᐃᐧᔭ ᑭᐢᑭᓄᐦᐊᒫᑯᐃᐧᓯᐤ. 18ᓂ ᓇᓈᐢᑯᒫᐤ ᑭᓭᒪᓂᑐ, ᐊᐊᐧᓯᒣ ᒥᐦᒉᐟ ᓇᓈᑐᕽ ᐱᑭᐢᑫᐧᐃᐧᓇ ᓂ ᐱᑭᐢᑳᐧᑳᐣ ᐃᔨᑯᕽ ᑲᐦᑭᔭᐤ ᑭᔭᐋᐧᐤ: 19ᒫᑲ ᐁᔨᐁᐧᕽ ᐊᔭᒥᐦᐋᐃᐧ ᒫᐊᐧᒋᐃᑐᐃᐧᓂᕽ ᓇᐊᐧᐨ ᓂᔮᓇᐣ ᐃᑌᐧᐃᐧᓇ ᑭᑕ ᐱᑭᐢᑫᐧᔭᐣ ᓂ ᓂᓯᑐᐦᑕᒧᐃᐧᐣ ᐅᐦᒋ, ᑭᑕ ᑭ ᑭᐢᑭᓄᐊᒪᐊᐧᑭᐠ ᑯᑕᑲᐠ ᒥᓇ, ᐃᔨᑯᕽ ᒥᑖᑕᑖᐧᐤ ᑭᐦᒋ ᒥᑖᑕᐦᑐᒥᑕᓇᐤ ᐃᑌᐧᐃᐧᓇ ᐁᑳ ᐁ ᓂᓯᑐᑖᑲᐧᕽ ᐱᑭᐢᑫᐧᐃᐧᐣ.

20ᓂᒋᐋᐧᒥᑎᐠ, ᐁᑳᐃᐧᔭ ᐊᐋᐧᓯᓯᐃᐧᐠ ᒫᒥᑐᓀᔨᒋᑲᓂᕽ: ᒫᑲ ᐃᐧᔭ ᒪᒑᔨᐃᐧᓂᕽ ᐅᐢᑲᐋᐧᓯᓯᐃᐧᐠ, ᒫᑲ ᐃᐧᔭ ᒥᑐᓀᔨᒋᑲᓂᕽ ᓈᐯᐃᐧᐠ. 21#ᐊᐩᓵᔭ 28:11,12ᐃᑕᓯᓇᐦᐃᑳᑌᐤ ᐅᔭᓱᐁᐧᐃᐧᓂᕽ, ᐁ ᐱᑐᓯ ᐱᑭᐢᑫᐧᔨᐟ ᐊᔨᓯᔨᓂᐊᐧ ᒥᓇ ᐊᔭᒋ ᒥᑐᓇ ᐅᐦᒋ ᓂ ᑲ ᐱᑭᐢᑳᐧᑖᐊᐧᐠ ᐅᑭ ᐊᔨᓯᔨᓂᐊᐧᐠ; ᒫᑲ ᓇᒪᐃᐧᔭ ᐁᑯᓯ ᐃᓯ ᐊᐦᐳ ᓂ ᑲ ᓇᑐᑖᑲᐧᐠ, ᐃᑌᐧᐤ ᑳ ᑎᐯᔨᐦᒋᑫᐟ. 22ᐁᑯᓯ ᒫᑲ ᓇᓈᑐᕽ ᐱᑭᐢᑫᐧᐃᐧᓇ ᑭᐢᑭᓇᐋᐧᒋ ᐊᔮᐊᐧ, ᓇᒪᐃᐧᔭ ᐊᓂᑭ ᐅᐦᒋ ᑳ ᑖᐯᐧᑕᐦᑭᐠ, ᒫᑲ ᐊᓂᑭ ᐅᐦᒋ ᐁᑳ ᑳ ᑖᐯᐧᑕᐦᑭᐠ: ᒫᑲ ᐃᐧᔭ ᑭᐢᑭᐁᐧᐦᐃᑫᐃᐧᐣ ᑭᐢᑭᓇᐋᐧᒋ ᐊᔮᐤ, ᓇᒪᐃᐧᔭ ᐊᓂᑭ ᐁᑳ ᑳ ᑖᐯᐧᑕᐦᑭᐠ ᐅᐦᒋ, ᒫᑲ ᐊᓂᑭ ᑳ ᑖᐯᐧᑕᐦᑭᐠ ᐅᐦᒋ. 23ᐁᑯᓯ ᒫᑲ ᑭᐢᐱᐣ ᑲᐦᑭᔭᐤ ᐅᑕᔭᒥᐦᐋᐊᐧᐠ ᒫᐊᐧᒋᐃᑐᑖᐧᐃᐧ, ᐁᑯᓯ ᑲᐦᑭᔭᐤ ᐱᑭᐢᑫᐧᑖᐧᐃᐧ ᓇᓈᑐᕽ ᐱᑭᐢᑫᐧᐃᐧᓇ, ᐁᑯᑕ ᒫᑲ ᐯ ᐱᐦᑐᑫᑖᐧᐃᐧ ᐁᑳ ᑳ ᐅ ᑭᐢᑫᔨᑕᒧᐃᐧᓂᒋᐠ ᐊᐦᐳ ᐁᑳ ᑳ ᑖᐯᐧᑕᐦᑭᐠ, ᓇᒪ ᒋ ᑭᐢᑫᐧᐊᐧᐠ ᑭ ᑲ ᐃᑎᑯᐋᐧᐊᐧᐠ? 24ᒫᑲ ᐃᐧᔭ ᑭᐢᐱᐣ ᑲᐦᑭᔭᐤ ᑭᐢᑭᐁᐧ ᐃᑫᔦᑯ, ᐁᑯᑕ ᒫᑲ ᐯ ᐱᐦᑐᑫᒋ ᐯᔭᐠ ᐁᑳ ᐁ ᑖᐯᐧᑕᕽ ᐊᐦᐳ ᐁᑳ ᐁ ᐅ ᑭᐢᑫᔨᑕᒧᐃᐧᓂᐟ, ᑲᐦᑭᔭᐤ ᑖᐯᐧᒥᐠ, ᑲᐦᑭᔭᐤ ᐅᔭᓱᐋᐧᑎᐠ; 25ᐁ ᐃᓯ ᑭᒧᐨ ᐃᑕᐢᑌᔨᐠ ᐅᑌᐦ ᓄᑯᑖᐋᐧᐣ; ᐁᑯᓯ ᐅᑳᐧᑲᓂᕽ ᑭᑕ ᐸᐦᑭᓯᐣ ᑭᑕ ᐊᔭᒥᐦᐁᐢᑕᐁᐧᐤ ᑭᓭᒪᓂᑐᐊᐧ, ᐁ ᐃᐧᐦᑕᕽ ᑖᐯᐧ ᑭᓭᒪᓂᑐᐊᐧ ᐁ ᐃᐧᒋ ᐊᔮᒥᑯᐁᐧᐠ.

26ᑖᓂᓯ ᒫᑲ, ᓂᒋᐋᐧᒥᑎᐠ? ᐃᐢᐱ ᒥᔮᐊᐧᒋᐃᑐᔦᑯ, ᐁ ᐃᑕᓯᐟ ᐊᔨᓯᔨᓂᐤ ᓂᑲᒧᐣ ᐊᔮᐤ, ᑭᐢᑭᓄᐦᐊᒫᑫᐃᐧᐣ ᐊᔮᐤ, ᑭᐢᑫᔨᐦᑖᑯᐦᑫᐃᐧᐣ ᐊᔮᐤ, ᐱᑐᓯ ᐱᑭᐢᑫᐧᐃᐧᐣ ᐊᔮᐤ, ᐃᑌᐧᐢᑕᒫᑫᐃᐧᐣ ᐊᔮᐤ. ᑭᔮᒼ ᑲᐦᑭᔭᐤ ᑫᑲᐧᐩ ᑭᑕ ᐃᐧ ᐃᑐᒋᑳᑌᐤ ᑭᑕ ᑭᐢᑭᓄᐦᐊᒫᑯᐃᐧᓯᕽ. 27ᑭᐢᐱᐣ ᒫᑲ ᐊᐃᐧᔭᐠ ᐊᔨᓯᔨᓂᐤ ᐃᐧ ᐱᑭᐢᑫᐧᒋ ᐁᑳ ᐁ ᓂᓯᑐᑖᑲᐧᕽ ᐱᑭᐢᑫᐧᐃᐧᐣ, ᑭᔮᒼ ᓈᓂᓯ, ᐊᐦᐳ ᐅᓵᒼ ᓈᓂᐢᑐ, ᐁᑯᓯ ᒫᒥᐢᑯᐨ; ᐯᔭᐠ ᒫᑲ ᑭᑕ ᐃᑌᐧᐢᑕᒫᑫᐤ: 28ᒫᑲ ᑭᐢᐱᐣ ᐁᑳ ᐅᑎᑌᐧᐢᑕᒫᑫᐤ ᐃᑖᒋ, ᑭᔮᒼ ᐁᐊᐧᑯ ᑭᑕ ᑭᔮᒪᐱᐤ ᐊᔭᒥᐦᐋᐃᐧ ᒫᐊᐧᒋᐃᑐᐃᐧᓂᕽ; ᐁᑯᓯ ᐃᐧᔭ ᑭᑕ ᐱᑭᐢᑳᐧᑎᓱ ᒥᓇ ᑭᓭᒪᓂᑐᐊᐧ. 29ᐅᑭᐢᑭᐁᐧᐦᐃᑫᐊᐧᐠ ᑭᔮᒼ ᓈᓂᓱ ᒥᓇ ᓈᓂᐢᑐ ᑭᑕ ᐱᑭᐢᑫᐧᐊᐧᐠ ᐁᑯᓯ ᑯᑕᑲᐠ ᑭᑕ ᑭᑖᓇᐁᐧᔨᑕᒪᐧᐠ. 30ᑭᐢᐱᐣ ᒫᑲ ᑫᑲᐧᐩ ᑭᐢᑫᔨᑕᒧᐃᑯᐃᐧᓯᒋ ᑯᑕᐠ ᐁ ᐊᐱᐟ, ᑭᔮᒼ ᐊᓂ ᓂᑳᐣ ᑳ ᐱᑭᐢᑫᐧᐟ ᑭᑕ ᑭᐱᑐᐁᐧᐤ. 31ᒋᑫᒫ ᑲᐦᑭᔭᐤ ᑭ ᑲ ᑭ ᑭᐢᑭᐁᐧᐦᐃᑳᓈᐋᐧᐤ ᐹᐯᔭᐠ, ᑲᐦᑭᔭᐤ ᑭᑕ ᑭᐢᑭᓄᐦᐊᒫᑯᐃᐧᓯᕽ, ᒥᓇ ᑲᐦᑭᔭᐤ ᑭᑕ ᒥᔪᑌᐁᐃᑯᐃᐧᓯᕽ; 32ᐁᑯᓯ ᐅᐟ ᐊᐦᒑᐦᑯᐊᐧᐊᐧ ᐅᑭᐢᑭᐁᐧᐦᐃᑫᐊᐧᐠ ᑎᐯᔨᒣᐊᐧᐠ ᐅᑭᐢᑭᐁᐧᐦᐃᑫᐊᐧᐠ; 33ᒋᑫᒫ ᑭᓭᒪᓂᑐ ᓇᒪᐃᐧᔭ ᐱᑫᐧᔨᑕᒥᐃᐁᐧᐃᐧᐣ ᑳ ᐊᑐᐢᑳᑕᕽ, ᒫᑲ ᐯᔭᑕᑫᔨᒧᐃᐧᐣ; ᐁᑯᓯ ᑖᐱᐢᑯᐨ ᑲᐦᑭᔭᐤ ᐅᐟ ᐊᔭᒥᐦᐋᐃᐧ ᒫᐊᐧᒋᐃᑐᐃᐧᓂᐋᐧᕽ ᐅᑲᓈᑎᓯᐊᐧᐠ.

34ᑭᔮᒼ ᐃᐢᑫᐧᐊᐧᐠ ᑭᑕ ᑭᔮᒪᐱᐊᐧᐠ ᐊᔭᒥᐦᐋᐃᐧ ᒫᐊᐧᒋᐃᑐᐃᐧᓂᕽ: ᒋᑫᒫ ᓇᒪᐃᐧᔭ ᐸᑭᑎᓇᒪᐋᐧᐊᐧᐠ ᑭᑕ ᐱᑭᐢᑫᐧᒋᐠ; ᒫᑲ ᑭᑕ ᐊᔮᒋᐠ ᓇᓇᐃᑕᒧᐃᐧᓂᕽ, ᑳ ᐃᑕᐢᑌᐠ ᒥᓇ ᐅᔭᓱᐁᐧᐃᐧᐣ. 35ᑭᐢᐱᐣ ᒫᑲ ᑫᑲᐧᐩ ᐃᐧ ᑭᐢᑫᔨᑕᑳᐧᐃᐧ, ᑭᔮᒼ ᑭᑕ ᑲᑫᐧᒋᒣᐊᐧᐠ ᐅ ᓈᐯᒥᐋᐧᐊᐧ ᐃᐧᑭᐋᐧᕽ: ᒋᑫᒫ ᓇᓀᐯᐊᐧᑫᔨᑖᑲᐧᐣ ᐃᐢᑫᐧᐤ ᑭᑕ ᐱᑭᐢᑫᐧᐟ ᐊᔭᒥᐦᐋᐃᐧ ᒫᐊᐧᒋᐃᑐᐃᐧᓂᕽ. 36ᑖᓂᓯ? ᑭᔮᐋᐧᐤ ᒋ ᑳ ᑭ ᐅᐦᒋᐸᔨᔨᐠ ᐅᐟ ᐃᑌᐧᐃᐧᐣ ᑭᓭᒪᓂᑐ? ᐊᐦᐳ ᒋ ᑭᔭᐋᐧᐤ ᐱᑯ ᑳ ᑭ ᐅᑎᐦᑎᑯᔦᐠ?

37ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᓂ ᐅᑭᐢᑭᐁᐧᐦᐃᑫᐃᐧᐣ ᐃᑌᔨᒥᓱᒋ, ᐊᐦᐳ ᓂᐟ ᐊᐦᒑᑯᐃᐧ ᐊᔮᐣ, ᑭᔮᒼ ᑭᑕ ᒪᓂ ᑭᐢᑫᔨᑕᒼ ᐊᓂᐦᐃ ᑳ ᒪᓯᓇᐦᐊᒫᑕᑯᐠ, ᐁᐊᐧᑯᓂ ᐅᔭᓱᐁᐧᐃᐧᓇ ᑳ ᑎᐯᔨᐦᒋᑫᐟ. 38ᒫᑲ ᑭᐢᐱᐣ ᐊᐃᐧᔭᐠ ᐁᑳ ᐃᐧ ᑭᐢᑫᔨᑕᑭ, ᑭᔮᒼ ᐁᑯᓯ ᐁᑳᐃᐧᔭ ᑭᑕ ᑭᐢᑫᔨᑕᒼ. 39ᐁᑯᓯ ᒫᑲ ᓂᒋᐋᐧᒥᑎᐠ, ᒥᐢᑕᐦᐃ ᓇᑕᐁᐧᔨᑕᒧᐠ ᑭᑕ ᑭᐢᑭᐁᐧᐦᐃᑫᔦᐠ, ᒥᓇ ᐁᑳᐃᐧᔭ ᑭᑕᐊᒫᑫᐠ ᑭᑕ ᐱᑭᐢᑫᐧᕽ ᓇᓈᑐᕽ ᐱᑭᐢᑫᐧᐃᐧᓇ. 40ᒫᑲ ᑭᔮᒼ ᑲᐦᑭᔭᐤ ᑫᑲᐧᐩ ᑭᑕ ᐃᓯ ᒥᔮᐧᓯᐠ ᒥᓇ ᑭᑕ ᐃᓯ ᓇᐃᓈᑲᐧᕽ ᑭᑕ ᐃᐧ ᐃᑐᒋᑳᑌᐤ.

Currently Selected:

ᓂᐢᑕᒼ ᑲᕒᐃᐣᑎᔭᓇ 14: KKMs

Highlight

Copy

Compare