Рим 2

Аллагьдин суд

1Эгер уву гьамцдар касарик тахсир кипраш, увлан хил алдабгъуб адар; эгер уву сар шлик-вуш тахсир кипраш, уву яв увук тахсир киправа. Жарар тахсиркар апӀурайири, увура тахсиркри апӀруб апӀурава. 2Ухьуз аьгъяхьуз, аьхир, гьамцдар апӀрударик Аллагьди, Чан гьякьʼвализ дилигну, тахсир кипди. 3Гьаци вуйиган, уву, гьамцдар тӀулар апӀрур тахсиркар апӀурайир, гьеле гьацдар увура апӀурайир, Аллагьдин суддиккан ккутӀурччвидиза кӀури, фикир апӀурана? 4Ясана уву Дугъан зурба вуйи гьюрмат, сабур ва аьгь апӀувал гьаци улʼан идипнана, дарш, ва увуз вуйи Дугъан гьюрмат, уву яв тӀулариин швумал хьуз вуйибдин гъавриъ адарна? 5Уву инкар ва утӀукьнайир вува, яв гунгьар кӀулʼин гъадагъурадарва ва, гьамдиинди, Аллагьди Чан хъял улупру йигъаз Аллагьдин хъял увʼина артухъ апӀурава; хъа халкьдиз Дугъан гьякь вуйи суд рябкъиди. 6Аллагьди гьардиз чав гъапӀубдиз тувди. 7Гьаммишан ужувлар апӀури, аднахъ, гьюрматнахъ ва аьжалсузвалихъ хъергнайидариз Дугъу гьаргандин уьмур пешкеш апӀиди. 8Хъа учвтӀан аьгъдруриз, гьякь вуйи рякъюъди гъягъюз даккнириз ва диш дару рякъ кадабгънайириз Аллагьди Чан хъял ва гъизгъинвал улупиди. 9Дугъу абдал тӀулар апӀбаъ тахсиркар вуйи гьарсар касдиз, сифте жугьдариз, хъа имбудариз дердер ва аьзиятар гьаъди. 10Хъа ужʼвал апӀру гьарсар касдиз, сифте жугьдариз, хъа имбудариз Дугъу ад, гьюрмат ва мясляаьт гьапӀди. 11Аллагьди варидарин гьякьди суд апӀуру; майил апӀдар.

12Эгер Къанундикан деребхьдари гунагь апӀураш, дурар Къанун адарди йихиди. Хъа Къанун ади гунагь апӀрударин суд Къанундиинди апӀиди. 13Агъайин улихь Къанундикан гъеебхьдар гьякьлу хьидар, хъа Къанундиз мютӀюгъ гъахьидар Агъайи гьякь апӀиди. 14(Ва гьаддиз, Къанун адру миллетари чиб-чпиинди, гьеле дурарин Къанун адаршра, чпин кӀваан Къанундиъ айиси апӀураш, дурар чпи ву чпиз закон. 15Къанундиъ айиси дюзвал фу вуш ва дюз дарувал фу вуш, дурарин кӀваъ дибикӀна. Дишди апӀруган, дурариз чпин кӀваан аьгъю шула, ва дишди дарапӀруганра, чпин кӀваз аьгъю шула. Дурариз дишди дарапӀувал чпин ягь-намусну улупура ва гьадди дурар тахсиркрар апӀура. Дишди апӀувалра дурариз чпин ягь-намусну улупура ва гьадди дурарин тахсир адрувал улупура). 16Гьаму вари, Аллагьди Иса Месигьдилантина узу рабгъурайи Ужувлан хабарнаъ кӀурайиси, инсанарин вари жини ляхнарин суд апӀруган, хьибди.

Аллагьдиндар вуча кӀурайидар ва Къанун

17Эгер уву жвув жугьуд вуди гьисаб апӀураш, Къанундихъ йирфар хъирчраш, Аллагьдиинди уву дамагълу вуш, 18увуз Дугъан ниятар аьгъяш, Къанундиан дубгъури варитӀан ужуб ва чарасуз лазим вуйиб, аьгъю апӀураш, 19ва уву, кур вуйидар диш рякъюъди хъади гъягъюраза, кӀураш, мучӀушнаъ айидариз акв вуза, кӀураш, 20Къанундиъ гьякь ва аьгъювалар увуз ади, фикир адрудариз ва фукӀа аьгъдрудариз мялим вуза, кӀураш, 21гьаз уву дурар жарадариз улупурава, хъа уву увхъан дудрубгъди? Уву, мигьитӀибкӀанай кӀури, дарсар туврайир, уву гьаз гьитӀибкӀурава? 22Уву, сарира кьяппавал дапӀну ккундар кӀурайири, гьаз кьяппа тӀулар апӀурава? Уву, идолар гьясбикк ккадариз кӀурайир, мистар тӀараш гьаз апӀурава? 23Уву, Къанун азуз кӀури фурсар апӀурайир, Къанун чӀюбгъюри, Аллагь гьаз ужуз апӀурава? 24Гьаддиз, увлантина Агъайин ччвур аллагьсузари нянайикк ккипна, кӀури, дибикӀна Гирами китабариъ.

25Эгер уву Къанун тамам апӀуруш, суннат апӀувал мянайи абцӀна, хъа эгер уву Къанун чӀюбгъюраш, суннат апӀувалин гьарсаб мяна дубгра. 26Эгер суннат дапӀну адрури Къанундиъ айиб вари тамам апӀураш, думу суннат гъапӀурси гьисаб апӀуз хай даршулин? 27Яв суннат дапӀнайивализ ва увуз дидикӀну тувнайи къайдйириз дилигди, суннат дапӀну адарди, Къанун тамам апӀрури диван апӀидияв, гьаз гъапиш, уву Къанун тамам апӀури гъахьундарва.

28Зиълан лишнариз дилигну, гьякь жугьуд шлуб дар. Му, бедендин аьдати суннат гъапӀну кӀури, гьякь вуйи суннат дару гьисаб ву. 29Гьякь вуйи жугьуд чан кӀваантӀан Аллагь ккун апӀурайир ву. Му, дерккнайи аьдатариинди ваъ, хъа кӀваантӀан, рюгьналан вуйи гьякь суннатдик гьисаб ву. Ва гьамцир касдин апӀурайи тяриф адмийирихьан дар, хъа Аллагьдихьан ву.

Currently Selected:

Рим 2: ТабГК

Highlight

Copy